Génesis 28
28
1Maperã Isaacpa Jacob tꞌɨ̃ pëiji mãikꞌaapa irumaa pedee pia jarapꞌeda, mãgaji:
—Miakꞌãinaapáde aji, na Canaán eujãdepema wẽra ome. 2Wã́ji Padán Aram eujãdee pɨ akꞌõchona Betuelmaa mãikꞌaapa pɨ chĩapa Labán kꞌau atapáde aji. 3Mɨa kꞌinia bɨ Tachi Akꞌõre Waibɨa pɨ ome wãmerã mãikꞌaapa pɨ pia akꞌɨ bamerã. Kꞌinia bɨ irua pꞌuuru chokꞌara pɨdeepa uchiapimerã. 4Kꞌinia bɨ pɨ ome mãikꞌaapa pɨdeepa uchiadaitꞌeerã ome pia oomerã irua Abrahammaa jaradakꞌa. Irua jaraji tachideepa uchiadaitꞌeerã na eujã chipariirã padaitꞌee, ɨ̃rá atꞌãri awaraa eujãdepemaarãkꞌa pꞌanɨ mĩda.
5Mãpai Isaacpa Jacob pëiji Padán Aram eujãdee arameo Betuel warra Labanmaa. Mãgɨ́ eperã Jacob, Esaú nawe Rebeca ɨ̃pema paji.
Esaupa wẽra awaraa atada
6Esaupa kꞌawa ataji Isaacpa Jacobmaa pedee pia jarada iru pëikꞌãri Padán Aram eujãdee mãpema wẽra atamerã. Ichiaba kꞌawa ataji Isaacpa jarada Canaán eujãdepema wẽra atanaamerã. 7Esaupa kꞌawakꞌãri Jacob chi akꞌõreerãpa jaradapꞌedaakꞌa Padán Aram eujãdee wã bɨ, 8kꞌawaaji chi akꞌõrepa Canaán eujãdepema wẽraarã kꞌinia–e bada. 9Mapa ichi wãji Abraham warra Ismael bapariidamaa mãikꞌaapa iru kꞌau tꞌɨ̃jarapatapꞌedaa Majalat ataji ichi wẽra papiitꞌee. Mãgɨ́ wẽra ɨ̃pema tꞌɨ̃jarapachida Nebayot. Mãgá Esaú Majalat iru baji awaraa Canaán eujãdepema wẽraarã ome.
Tachi Akꞌõrepa Jacobmaa ichi unupida
10Mãgá Jacob Bersebadeepa uchiaji Jarandee wãitꞌee. 11Ma ode wãde kꞌeudaikꞌãri, mãu jɨrɨpꞌeda chi porokꞌau–itꞌee, mama kꞌãi beeji. 12Mãgá kꞌãi bɨde kꞌãimokꞌaraaji tome eujãdeepa pajãdee sĩu bɨ. Mãgɨde angeleerã ɨtꞌaa, edaa wãpachida. 13Ma awara unuji Tachi Akꞌõre bainɨ̃ bɨ ichi ikꞌaawa.
Tachi Akꞌõrepa mãgaji:
—Mɨ pɨ akꞌõchona Abraham, pɨ akꞌõre Isaac Akꞌõre Waibɨada aji. Na eujã pɨ jẽra bɨmãi mɨa teeitꞌeeda aji, pɨmaa mãikꞌaapa pɨdeepa uchiadaitꞌeerãmaa. 14Ãra chokꞌara pꞌanadaitꞌee ipu nãusaa pꞌusa ide paraaparikꞌa. Pꞌanadaitꞌee norte eere, sur eere, oriente eere mãikꞌaapa occidente eere. Pɨ kꞌapꞌɨa mãikꞌaapa ãra kꞌapꞌɨa mɨa ne–inaa pia ooitꞌee jõmaweda na pꞌekꞌau eujãdepemaarãmaa. 15Mɨ pɨ ome bapariitꞌee. Pɨ akꞌɨ bapariitꞌee pɨ wãrumaa. Waya na eujãdee aneeitꞌee. Mɨa pɨ atabëi–e paitꞌee. Mɨa jaradakꞌa ooitꞌeeda aji.
16Jacob ɨ̃rɨmakꞌãri, kꞌĩsiaji: “Wãara Tachi Akꞌõre nama bɨ, mɨa kꞌawa–e baji mĩda.” 17Pꞌera nɨ̃bɨde kꞌĩsiaji: “Nama Tachi Akꞌõre bapari. Nama bɨ Tachi Akꞌõre eujãdee wãpari o.”
18Aɨ norema tapꞌedaweda Jacob pꞌirabaiji. Mãpai ma mãu chi porokꞌau bada atapꞌeda, olivodee ooda aceitepa weetꞌaaji ma mãu ɨ̃rɨ akꞌɨpiitꞌee Tachi Akꞌõre waawee bɨ. 19Naaweda ma eujãde baji pꞌuuru, tꞌɨ̃jarapatapꞌedaa Luz. Mamĩda Jacobpa ma eujã tꞌɨ̃ bɨji Betel.#28.19 Hebreo pedeede Betel jara kꞌinia bɨ “Akꞌõre te”. 20Mãpai Jacobpa Tachi Akꞌõremaa mãgaji:
—Wãara pɨ mɨ ome wãru pɨrã mãikꞌaapa mɨ kꞌariparu pɨrã chikꞌo ome mãikꞌaapa pꞌaru ome, 21ma awara mɨ akꞌõremaa waya kꞌapꞌɨa pia aneeru pɨrã, pɨ mɨchi Akꞌõre Waibɨa paitꞌee mãikꞌaapa mɨa pɨde ijãapariitꞌeeda aji. 22Nãgɨ́ mãu mɨa nama bɨitꞌee pɨ tekꞌa mãikꞌaapa mɨ netꞌaa chaa diezdepema aba pɨmaa teepariitꞌeeda aji.
Pašlaik izvēlēts:
Génesis 28: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.