Génesis 18
18
Tachi Akꞌõrepa Abrahammaa warra oopida
1Maapai Abraham atꞌãri bapachi Mamré eujãde pakꞌurura jẽra badamãi. Ewari aba imatꞌɨpa Abraham ichi te ne–edee ooda tꞌĩupatamãi su–akꞌɨ bɨ misa, Tachi Akꞌõrepa ichi unupiji. 2Abrahampa akꞌɨkꞌãri, unuji eperãarã õpee akꞌɨnɨ̃ pꞌanɨ ichi kꞌĩrapite. Unu ataruta, ãra auteebaiji mãikꞌaapa bedabaidachi ãra kꞌĩrapite ichi tau bɨɨrɨ eujãde tꞌõbairumaa. 3Mãpai irua mãgaji:
—Mɨchi Waibɨa, chupɨria kꞌawáaji. Ɨ̃raweda wãnaadapáde aji. 4Pɨa kꞌinia bɨ pɨrã, pania atapiitꞌee jĩru sɨɨdamerã mãikꞌaapa ɨ̃idamerã pakꞌuru ekꞌari, kꞌũrasaa bairã. 5Parã nama wãyaa wãda perã, mɨa chikꞌo joopiitꞌee kꞌodamerã, wãdai naaweda.
—Pia bɨda ajida. Pɨa jaradakꞌa oopáde ajida.
6Aramata Abraham ichi te ne–edee oodade tꞌĩuji mãikꞌaapa Saramaa mãgaji:
—Isapai harina pipɨara bɨ veinte kilo atapáde aji, mãikꞌaapa maatꞌɨpꞌeda, pan ɨ̃pɨpáde aji.
7Mãpai Abraham pꞌiraji ichi pꞌakꞌa pꞌe iru badamaa mãikꞌaapa pꞌakꞌa chakꞌe aba pipɨara bɨ jɨrɨtꞌeraji. Mãgɨ́ teeji ichi mimiaparimaa peemerã mãikꞌaapa chuumerã. Aramata ma mimiaparipa ooji chiparipa jaradakꞌa. 8Ma pꞌakꞌa chiara chuuda awara Abrahampa teeji queso pꞌakꞌa juba ome. Ichi juadoopa ma chikꞌo ãramaa teenaji kꞌodamerã ma pakꞌuru ekꞌari kꞌũrasaa badamãi.
9Ãra nekꞌomaa pꞌanɨ misa, Abraham arii baji. Aupadakꞌãri, Abrahammaa iidijida:
—¿Sãma bɨma ajida, pɨ wẽra Sara?
—Teeda bɨda aji.
10Mãpai Tachi Akꞌõrepa mãgaji:
—Añomaa mɨ waya cheitꞌeeda aji. Maapai pɨ wẽra Sarapa warra tꞌoitꞌeeda aji.
Mãɨmisa Sarapa Abraham ãpɨteikꞌa eereepa ũrimaa baji ãchi te ne–edee ooda tꞌĩupatamãiipa. 11Abraham chonaa baji. Ma awara chi wẽra Sara chõtrãa baji; waa bi kꞌayaakꞌaa paji. 12Maperã Sarapa ma pedee ũrikꞌãri, ëidachi mãikꞌaapa kꞌĩsiaji: “¿Sãgá o–ĩa warra oodaima tai nãgá chonaa chitoonɨta?”
13Mãpai Tachi Akꞌõrepa Abrahammaa iidiji:
—¿Sãapꞌeda Sara ëidachima? aji. ¿Ijãa–e bɨkꞌã warra tꞌoi, chõtrãa bɨ mĩda? 14¿Kꞌãare netꞌaata Akꞌõre Waibɨapa pꞌoyaa oo–e paima? aji. Añomaa mɨ waya cheitꞌee mãikꞌaapa Sarapa warra tꞌoitꞌeeda aji.
15Mãga ũrikꞌãri, Sara pꞌeradaida perã, meraji:
—Mɨ ëi–e bajida aji.
Mamĩda Tachi Akꞌõrepa pꞌanauji:
—Mɨa kꞌawa bɨda aji, pɨ ëida.
Abrahampa chupɨria iidida Sodoma pidaarã pari
16Maapꞌeda ma chedapꞌedaarã pꞌirabaijida mãikꞌaapa wãjida Sodoma pꞌuurudee. Abrahampa waawipai kꞌõpꞌãyanaji. 17Ode wãdade Tachi Akꞌõrepa kꞌĩsiaji: “Mɨa ooitꞌee bɨ Abrahammaa jaraipia bɨda aji. 18Irudeepa pꞌuuru chokꞌara uchiapiitꞌee mãikꞌaapa iru kꞌapꞌɨa na pꞌekꞌau eujãdepemaarã jõmaarã–itꞌee mɨa ne–inaa pia ooitꞌee. 19Mɨa iru jɨrɨtꞌeraji mɨ ũraa jarateemerã ichi warrarãmaa mãikꞌaapa ichi te pidaarãmaa. Mãgá ãrapa kꞌawaadai oodaitꞌee mɨa jara bɨkꞌa mãikꞌaapa aukꞌa kꞌawaadai tꞌãri pia nipapataadaitꞌee mɨ kꞌĩrapite. Mãga pꞌanadakꞌãripɨ, mɨa jaradakꞌa ãramaa pia ooitꞌee.” 20Mãga kꞌĩsiapꞌeda, Tachi Akꞌõrepa mãgaji Abrahammaa:
—Jõmaarãpa jarapata Sodomadepemaarã, Gomorradepemaarã ome audú ne–inaa kꞌachia ooi awaa pꞌanapata. 21Ɨ̃rá araa wãitꞌeeda aji, kꞌawaitꞌee wãara ãchia audú kꞌachia ooi awaa pꞌanɨ wa mãga–e.
22Omeeweda wãjida Sodomadee. Mamĩda Abraham Tachi Akꞌõre ome beeji. 23Abraham iru kꞌaitꞌapai wãpꞌeda, iidiji:
—¿Peeitꞌeekꞌã aji, eperãarã pia beerã kꞌachia beerã ome aukꞌa? 24¿Chupɨria kꞌawa–ekꞌã aji, cincuenta tꞌãri pia beerã paraa pɨrã? Cincuenta paraa pɨrã, ¿ma pꞌuuru jõmaweda jõpiitꞌeekꞌã? aji. 25¡Mãga oonáaji! Audú ne–inaa kꞌachia ooda–e pꞌanɨ pɨrã, ¿sãga ãra aukꞌa jõpiima? Pɨa eperãarã jõmaarã akꞌɨpari mãikꞌaapa pɨa aupai jarai chisãgɨɨrãpa pia oopata; chisãgɨɨrãpa kꞌachia oopata. ¡Chi pia beerã jõpinaapáde! aji.
26Mãpai Tachi Akꞌõrepa mãgaji:
—Cincuenta tꞌãri pia beerã unuru pɨrã Sodoma pꞌuurude, mãgara ma pꞌuuru jõmaweda jõpi–eda aji.
27Mamĩda Abrahampa waya iidiji:
—Mɨ chupɨria kꞌawaapáde aji. Mɨa kꞌawa bɨ pɨta Jõmaarã Akꞌõre Waibɨa; jõdee mɨ eperã jĩpꞌaa. 28Mamĩda mɨa kꞌawa kꞌinia bɨ eperã pia beerã cuarenta y cincopai paraa pɨrã, ¿ma pꞌuuru jõmaweda jõpiitꞌeekꞌã? aji.
Tachi Akꞌõrepa pꞌanauji:
—Cuarenta y cinco tꞌãri pia beerã unuru pɨrã, mãgara pꞌuuru jõmaweda jõpi–eda aji.
29Mãpai Abrahampa mãgaji:
—Cuarenta paraa pɨrã, ¿jõmaweda jõpiitꞌeekꞌã? aji.
Tachi Akꞌõrepa pꞌanauji:
—Cuarenta unuru pɨrã, mãgara jõmaweda jõpi–eda aji.
30Mamĩda Abrahampa waya iidiji:
—Mɨ ome kꞌĩraunaapáde aji, audú iidimaa bairã. Mamĩda mɨa kꞌawa kꞌinia bɨ eperã pia beerã treintapai paraa pɨrã, ¿jõmaweda jõpiitꞌeekꞌã? aji.
Akꞌõrepa pꞌanauji:
—Treinta unuru pɨrã, mãgara jõmaweda jõpi–eda aji.
31Abrahampa waya mãgaji:
—Mɨchi Waibɨa, mɨ kꞌɨɨrɨ kꞌisua pɨkꞌa bɨ nãgá audú iidimaa bairã. Mamĩda pia beerã veintepai paraa pɨrã, ¿jõmaweda jõpiitꞌeekꞌã? aji.
Tachi Akꞌõrepa pꞌanauji:
—Veinte unuru pɨrã, mãgara jõmaweda jõpi–eda aji.
32Mãpai Abrahampa iidiji:
—Aai Tachi Akꞌõre, mɨ chupɨria kꞌawaapáde aji. Kꞌĩraunáaji mɨa audú iidimaa bairã. Nadeepa waa mɨa iidi–e paitꞌee. Eperã pia beerã diezpai paraa pɨrã, ¿ma pꞌuuru pidaarã jõmaweda jõpiitꞌeekꞌã? aji.
—Ma eperãarã diez kꞌaurepa pꞌuuru pidaarã jõmaweda pee–eda aji.
33Tachi Akꞌõre Abraham ome pedee aupakꞌãri, wãji. Mãpai Abraham ichi temaa cheji.
Pašlaik izvēlēts:
Génesis 18: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.