Genesis 8
8
Temanan te pegkelinep
1Wedà kelibeli te Timanem si Noe aw kedita te menenanap aw ayam-ayam doma kandin simakay te arka. Impekedog te Timanem se kelamag, aw migtebò den se wayeg minuyud. 2Sinengseng din se menge selep doton didalem te dagat aw menge linekatan te odan doton te langit. Kimedit se odan. 3Minuyud se wayeg te sebad gatos keliman se aldaw. 4Pitsa sempolò teg pito te ikepito te bolan, nekeselà se arka diyà te bontod te Ararat. 5Gayed minuyud se wayeg, aw kinità se toktok te menge bontod te pitsa ono te ikesempolò te bolan.
6Penga te kepatan se aldaw, inowang i Noe se bintanà te arka, 7aw binoloyan din se sebad owak. Wedà iyan likò doton te arka meneng gayed miglegeb-legeb lamig migkepangkag se tanà. 8Pegkenamay-namay, binoloyan heman i Noe se sebad selepati, amon ketegahan din aw migkepangkag se tanà. 9Meneng so nelinep pa se tanà te wayeg, wedad kinità te selepati embongan din, aw yan limikò iyan doton te arka. Impelowà i Noe se belad din aw inabat din se selepati. 10Penga te sebad simana, todà din binoloyan se selepati. 11Pegkemeapon niyan, limikò iyan doton ki Noe, aw doen tobed te kayo olibo inibing diyà te toktokay din. Doun niyan, netegahan i Noe te tabag minuyud se wayeg diyà te tanà. 12Penga niyan, migtagad si Noe te sebad simana, aw todà din binoloyan se selepati. Meneng wedà iyan palos likò.
13Nayan, peg-apet te enem gatos aw sebad se omay i Noe, te pitsa ono te tagnà bolan te omay sìyan, minuyud se wayeg diyà te tanà. Inabat i Noe se atep te arka amon megpeatap-atap. Kinità din te tabag migkepangkag se tanà. 14Peg-apet te pitsa kelowan teg pito te ikedowa te bolan, ontò migkepangkag se tanà. 15Yan minikagi se Timanem diyà ki Noe, 16“Lowà ka den lekat te arka sipat te esawa nikaw, menge batà nikaw, aw menge esawa dan. 17Pelowai heman se kedita te manok, ayam-ayam, aw menenanap, amon megbowad-bowad dan aw megkedita dan dini lanto te tanà.”
18Yan limowà si Noe lekat te arka sipat te esawa din, menge batà din, aw menge esawa dan. 19Limowà heman se menge ayam-ayam, menenanap, aw manok te tegsebad-sebad kemolò niyan.
20Penga niyan, miglodok si Noe te menge bato amon meg-inang sikandin te sonoganan te ayam-ayam ibegay diyà te Timanem. Inimetayan din se sebad diyà te tegsebad-sebad kemolò te ayam-ayam aw manok mepakay sonogen aw ibegay diyà te Timanem, aw sinonog din se kedita niyan kidoen. 21Peg-adek te Timanem te nadeg niyan, neluba sikandin, aw minikagi sikandin diyà te pedowan din, “Eked a todà pegpelumun te tanà tandà te medaet inang te otaw, so netegahan ko te gayed medaet se ibeg te pedowan te otaw lekat te pegtebaw dan. Eked a todà peg-igelà te kedita te otaw aw menenanap iling te ininang ko den. 22Dalem te doen pa keneyonan, gayed doen pegtanem aw peglegani, pegkegenaw aw pegkeinit, pengaldaw aw pengodan, aldaw aw delem.”
Pašlaik izvēlēts:
Genesis 8: mbs
Izceltais
Dalīties
Kopēt
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Flv.png&w=128&q=75)
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1982, Wycliffe Bible Translators, Inc. All rights reserved.