Populāri Bībeles panti no San Mateo 6

Dalīties

Jã'ajekʉna jã'amajñarʉã rʉarepa cuasama'ñe pa'ijʉ Repaʉ chʉ̃'ʉñe'te na'a rʉa cuasajʉ cho'ojʉ pa'ijʉ̃'ʉ. Ũcuare Repaʉ mʉsanʉkonare ãuna'me ũkuche peore ĩsimʉ.

Mʉsanʉkonare che'ro cu'ache ti'jñejañe cuasajʉ oima'ñe pa'ijʉ̃'ʉ. Che'ro ũcuaumucusepi ñataʉna cuasajʉ̃'ʉ repamajñarʉã. Repaumucujña pa'iche te'enarechi'a cu'ache ti'jñemʉ maire. Dios mʉsanʉkonare cu'ache ti'jñejañe masikʉjekʉ cho'okaija'mʉ —chiisi'kʉa'mʉ repaʉ.

Ũcuarʉmʉ Jesús jo'e ija'che chʉ'vasi'kʉa'mʉ: —Kurina'me Diore ũcuapa'rʉvachi'a cuasacu'akʉna jo'e mʉsanʉkonare ija'chere chʉ'vamʉ chʉ'ʉ: Mʉsanʉkona pa'ichena'me ãu ãiñena'me ũkuchena'me kãña ju'iche rʉarepa cuasajʉ pa'imanejʉ̃'ʉ. Mai pa'iche ãuna'me kãñachi'ama'mʉ.

Mʉsanʉkonapi te'eʉ Diore sẽni mʉ'ʉ pa'iruupʉna kaka jeo mai Ja'kʉ Diore Ñoma'kʉni sẽejʉ̃'ʉ. Jã'aja'ñe cho'oto mai Ja'kʉ Dios pãi ũcuanʉko rope'e cho'oche peore Ñakʉji mʉ'ʉ te'eʉ cho'oche ña re'oja'che cho'osi'e ro'i re'oja'che ĩsija'mʉ.

Mʉsanʉkonapi sẽni ija'che i'kajʉ̃'ʉ: Ja'kʉ, Cʉnaʉmʉ Pa'ikʉ, pãi mʉ'ʉre vajʉchʉjʉ pojoa'jʉ. Ũcuachi'a mʉ'ʉ chʉ̃'ʉñe pãi ũcuanʉko cho'ojarʉmʉ tĩ'aa'kʉ. Cʉnaʉmʉ pa'ina mʉ'ʉ chʉ̃'ʉñe masi cho'ocheja'che cheja pa'ina ũcuaja'che re'oja'che cho'ojʉ paapʉ.

Ũcuachi'a chʉkʉna chiiche ãu si'aumucujña ĩsijʉ̃'ʉ, chʉkʉna ãijañe.

Chʉkʉna cu'ache cho'oche jo'e cuasamanejʉ̃'ʉ, chʉkʉna'te pãi cu'ache cho'osi'e chʉkʉna jo'e cuasama'ñeja'ñe.

Chʉkʉna'te vatipi chʉ̃'ʉkʉna cu'ache cho'oñu chiito mʉ'ʉpi ʉ̃sekaijʉ̃'ʉ, cho'omanea'jʉ chini. Jã'aja'ñe i'kajʉ Diore sẽejʉ pa'ijʉ̃'ʉ.

’Chekʉna cu'ache cho'osi'ere mʉsanʉkonapi jo'e cuasama'to mai Ja'kʉ Dios ũcuaja'che mʉsanʉkona Repaʉ'te cu'ache cho'oche jo'e cuasamaneja'mʉ.

Pĩ'ava'na pa'iche'te cuasa ñajʉ̃'ʉ. Pĩ'ava'na ãujẽ'e tãmava'naa'me. Ĩsichejẽ'e cho'omava'naa'me. Ãu care'vavʉ'ñajẽ'e peova'naa'me repava'na. Jã'aja'ñe pa'iva'nareta'ni mai Ja'kʉ Cʉnaʉmʉ Pa'ikʉji ãu ĩsikʉ'mʉ repava'nare. Repaʉ Dios pĩ'ava'nare peore cuasakʉ rʉa re'oja'che kuirakʉ'mʉ. Jã'ata'ni mʉsanʉkonare pãi na'a rʉa cuasakʉ na'a re'oja'che kuirakʉ pa'imʉ Repaʉ.

Ũcuarʉmʉ Jesús jo'e ija'che chʉ'vasi'kʉa'mʉ: —Mʉsanʉkona rʉarepa põse si'ache koo paamanejʉ̃'ʉ. Icheja chejaquee põse pu'janajẽ'e pu'ja si'asõkaijʉ chekʉrʉmʉ macono phũ'ka cho'osõñe'me. Chekʉrʉmʉ ñaanapi rani peore ñaasõkaiche'me repa. Mʉsanʉkona paache põse icheja chejaquee si'asõjañea'me. Jã'ajekʉna repa põse rʉarepa cuasama'ñe pa'ijʉ Dioni na'a rʉa cuasajʉ pa'ijʉ̃'ʉ. Repaʉ pa'icheja sani re'oja'che koojachere cuasajʉ̃'ʉ. Repaʉ ĩsiche pu'jacu'ache'me. Ũcuachi'a Repaʉ ĩsiche macono phũ'ka cho'osõma'ñea'me. Ũcuachi'a ñaanajẽ'e peochejaa'me repacheja. Dios ĩsijache koojanajejʉ pojojʉ pa'ijʉ̃'ʉ mʉsanʉkona. Mʉsanʉkonapi põsere na'a rʉa cuasajʉ pani Dios ĩsijache rʉa cuasamanejanaa'me —chiisi'kʉa'mʉ repaʉ.

Ũcuarʉmʉ Jesús ija'che chʉ'vasi'kʉa'mʉ: —Pãi ka'chanapi ũcuate'eʉ'te paato repaʉ'te paanare ũcuapa'rʉvachi'a chiicu'amʉ repaʉ'te. Chekʉrʉmʉ repaʉ'te paanare te'eʉ'te na'a rʉa chiiʉ chekʉreta'ni cuhemʉ repaʉ. Ũcuachi'a kurina'me Diore ũcuapa'rʉvachi'a cuasama'me pãi. Kurire na'a rʉa cuasajʉ Dioreta'ni cuasama'me —chiisi'kʉa'mʉ repaʉ.

Diore rʉa cuasama'me mʉsanʉkona. U'chara'ñʉrʉã iumucujña pa'ira'ñʉrʉãre pãipi ʉosõru che'ro peoja'mʉ. Rʉa jeerʉmʉ pa'imara'ñʉrʉãta'ni repara'ñʉrʉã re'oja'che kuirakʉ'mʉ Dios. Mʉsanʉkonare pãi na'a rʉa re'oja'che kuirakʉ mʉsanʉkona ju'iche kãña ĩsikʉ'mʉ Repaʉ.

Mʉsanʉkonapi te'eʉ, “Chʉova'na pa'iva'nani cho'okasa”, chini mʉ'ʉ na'a rʉa ja'me pa'ikʉ'terejẽ'e kʉama'ñe te'eʉ cuasakʉ cho'okaijʉ̃'ʉ repanare. Kʉama'ñe mʉ'ʉchi'a te'eʉ cuasakʉ cho'okaiʉ pa'ijʉ̃'ʉ. Jã'aja'ñe cho'oru mai Ja'kʉ Dios pãi ũcuanʉko rope'e cho'oche peore Ñakʉji mʉ'ʉ te'eʉ cuasakʉ cho'osi'e ña ro'ija'mʉ —chiisi'kʉa'mʉ repaʉ.

Ũcuarʉmʉ Jesús chʉkʉna'te repaʉ neenare ija'che chʉ'vasi'kʉa'mʉ: —Mʉsanʉkonapi chekʉnani re'oja'che cho'okañu chini rupʉ chekʉnapi pãipi ñaa'jʉ chini re'oja'che cho'ojʉ pa'imanejʉ̃'ʉ. Mʉsanʉkonapi jã'aja'ñe cho'ojʉ pa'ito Dios mai Ja'kʉ Cʉnaʉmʉ Pa'ikʉ mʉsanʉkonare re'oja'che cho'osi'e ro'i jmamakarʉjẽ'e ĩsimaneja'mʉ.

Ũcuarʉmʉ Jesús ija'che che'chosi'kʉa'mʉ: —Mʉsanʉkonapi ãu ãima'ñe pa'ijʉ Dioni sẽejʉ pañu chini, sẽ'sevʉchi'a re'oja'cheja'che ñoñe pa'ina cho'ocheja'che cho'omanejʉ̃'ʉ. Repana pãi ãu ãima'ñe pa'ijʉ Dioni sẽni repana chiña, sʉmava'na ñoñe pa'inaa'me, pãipi ña, “Dioni sẽejʉ ãu ãima'ñe pa'inajejʉ re'onaa'me ina”, chiapʉ chini. Pãi repanare re'oja'che i'kasimakarʉchi'api ro'isi'eja'chea'me repanare. Ũcuarepaa'me jã'a. Mʉsanʉkonapi ãu ãima'ñe pa'ijʉ Dioni sẽni chʉova'na ñoñe pa'imanejʉ̃'ʉ. Ãu ãisina pa'icheja'che pojojʉ pa'ijʉ̃'ʉ. Mʉsanʉkonapi ũcuaʉakʉji ãu ãima'ñe pa'iʉ Dioni sẽeʉ pasa chini charo mʉsanʉkona chiña sĩ'sisõ cʉ̃'ʉ veni care'vajʉ̃'ʉ raña, pãipi mʉsanʉkona Diore sẽejʉ ãu ãima'ñe pa'iche'te ña masimanea'jʉ. Jã'aja'ñe cho'oto mai Ja'kʉ, Dios, Ñoma'kʉpi mʉsanʉkona kʉama'ñe re'oja'che cho'oche ña ro'ija'mʉ mʉsanʉkonare —chiisi'kʉa'mʉ repaʉ.