Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Kété no nāā *Pákə tə́ ní, Jeju ger̄ kadə̄ kum mbang yān asə. I mbang ń kadə̄ əya̰ń de kə́ dɔ nang tə́ gə̄ ba aw̄ń rɔ̄ Bɔbə̄n tə́ ní. Ni ń tár deē yān gə̄ kə́ dɔ nang tə́ kə dɔ ndɔ̄ gə̄ ní, táŕdə́ mbóńg ta tɔ̄l̄ tə́. Jeju nin̄ kə ngé ndóō yá̰a̰ yān gēé ndi a əsan̄ yá̰á̰ kə́ loo tíbí. *Diabəl əndā kem Judas Iskariot ngōn̄ Simo̰ tə́ kɔ̄ɔ́ ɓá kadə̄ əla Jeju jī de gə̄ tə́. Jeju ger̄ kadə̄ Bɔbə̄n adə̄n yá̰a̰ malang ō, kadə̄ ni-ḭḭ i rɔ̄ Nə́ɓā tə́ ō, a tél i yā kaw̄ rɔ̄ Nə́ɓā tə́ ō. Ni-ḭḭ dɔɔ́ ta kəsa tə́, ɔr̄ kūbə̄ yān kə́ dɔ madə̄ tə́ kɔ̄ɔ́, ba un kūbə̄ kɔl̄ rɔ̄ kógə̄ḿ do̰ō̰ń ɓōdə̄n. Gō tə́ anī, ni-ɓōkə́ man̄ kem kārāá ba əla gíŕ tə́go nja ngé ndóō yá̰a̰ yān gə̄ ō, ɔl̄ kə kūbə̄ kɔl̄ rɔ̄ ń do̰ō̰ń ɓōdə̄n ní ō. Dan ń ni-ugə̄ dɔ Simo̰ Piyer tə́ anī, Piyer ədan na:
Ḭ̄ Kɔ́ɔ̄ɓē kə ī-tə́go njaḿ a?
Jeju tél ədan na:
Kə́ ngɔŕ ń toō tə́ ní yá̰á̰ ń m̄-rāā toó ī-ger̄ alé, banī ndɔ̄ń tə́ anī ā ī-ger̄ kum.
Piyer ədan na:
Kadə̄ ḭ̄ kə ī-tə́go njaḿ mā a, m-ɔ́də aĺ i kə́ bátə́ gə̄ tə́!
Jeju tél ədan na:
Ré m̄-tə́go njaí aĺ anī, ā ə́ngé yá̰a̰ yāḿ alé.
Simo̰ Piyer ədan na:
Kɔ́ɔ̄ɓē, ré i beé anī, ā ī-tə́go i njaḿ ngóy alé, ā ī-tə́go jīḿ ō, dɔḿ ō.
Anī Jeju ədan na:
Deē ń ndogə̄ man̄ kɔ̄ɔ́ ní, a tə́go rɔ̄n to̰ alé, tām̄ rɔ̄n malang i kə́ *unjə̄ njáý njáý kɔ̄ɔ́. Sḭḭ̄ ūnjī ɓá tā, ba i sḭḭ̄ malang alé.
Tɔdɔ̄ ni ger̄ deē ń a əlan jī de gə̄ tə́ ní, i tām̄ najə̄ ń noō tə́ n ni-əda na nin̄-unjə̄n̄ malang aĺ ní.
Dan ń ni-tə́go njadə́ oy anī, un kūbə̄ yān əla rɔ̄n tə́ gogə́ ō, tél aw̄ ndi ta kəsa tə́ ō, ba ədadə́ na:
Ī-gerī kum yá̰á̰ ń m̄-rāā sesí toō a? Sḭḭ̄ ī-ɓāŕmī na i ngol nge ndóō de gə̄ yá̰a̰ ō, Kɔ́ɔ̄ɓē ō. Ba nge ń ə́daī noó majə, tɔdɔ̄ mā i nge ń noō. Ré mā ń i Kɔ́ɔ̄ɓē ō, ngol nge ndóō de gə̄ yá̰a̰ ō ní, m̄-tə́go njasí anī, majə kadə̄ sḭḭ̄ ī-tə́goī nja naā ō. Tɔdɔ̄ m-ɔ́jə́sí i yá̰á̰ kə́ yā kadə̄ ī-ndájī, kadə̄ ī-rāāī tītə̄ ń m̄-rāā sesí ní. Ādə̄ m-ə́dásí najə̄ kə́ bo ngá̰ý, nge kəla bo tɔȳ kɔ́ɔ̄n aĺ ō, ngōmbang kəla bo tɔȳ deē ń əlan ní aĺ ō. Kə́ ngɔr ń toō tə́ ní ī-gerī yá̰á̰ ní kɔ̄ɔ́, ba ré ī-rāāī beé anī, rɔ̄sí a nel̄sí.
M-ɔ̄r̄ i najə̄ yāsí sḭḭ̄ malang alé, m̄-ger̄ ngé gə̄ ń m̄-gə̄rādə́ ní. Banī i gáŕ kadə̄ najə̄ ń toō ń ndangən̄ kem makətūbə̄ tə́ ní udə gírí:
Deē ń əsa yá̰a̰ seḿ ní, ɔr̄ gándən əɓamə̄ń.
M-ə́dásí ngɔr ń toō tə́ pá tá kadə̄ yá̰á̰ ní ugə̄ ɓáý, yā kadə̄ loo ń ugə̄ anī, ī-taāī kem kadə̄ Mā i Mā ń m̄-ndi noó ní. Ādə̄ m-ə́dásí najə̄ kə́ bo ngá̰ý, deē ń əhɔ deē ń m-ə́lan ní kə̄ rɔ̄n tə́ ní, əhɔm̄ i mā nəkɔ́ kə̄ rɔ̄n anī. Ba deē ń əhɔm̄ kə̄ rɔ̄n tə́ ní, əhɔ i nge ń əlam̄ ní kə̄ rɔ̄n tə́.


Dan ń Jeju ɔr̄ najə̄ gə̄ ń noō anī, ndílən ndi kə gōó alé. Ba ni-əda wáńg na:
Ādə̄ m-ə́dásí najə̄ kə́ bo ngá̰ý, deē kógə̄ḿ dansí tə́ a əlam̄ jī de gə̄ tə́.
Ba ngé ndóō yá̰a̰ yān gə̄ mbel a̰ā̰n̄ ta kum naā, tām̄ nin̄-gerə̄n̄ deē ń ni-ɔr̄ najə̄ yān ní alé. Nge ndóō yá̰a̰ yān kógə̄ḿ adə̄ i nge ń Jeju tárən ní, ndi kadə Jeju tə́ ngɔr. Anī Simo̰ Piyer mbel a̰a̰n kə gír kumneé kadə̄ dəje Jeju ké ɔr̄ i najə̄ yā náā wa. Nge ndóō yá̰a̰ ní nōr̄ kə̄ rɔ̄ Jeju tə́, ba ədan na:
Kɔ́ɔ̄ɓē, i náā?
Jeju tél əda na:
I deē ń m-ā m-ə́lá gájə́ mápa kum tá̰á̰ tə́ yā kadə̄n ní.
Loo ń noō tə́ ni-əla gájə́ mápa kum tá̰á̰ tə́, ba adə̄ Judas ngōn̄ Simo̰ Iskariot. Dan ń Judas taā gájə́ mápá ní anī, *Sətan udə kemən tə́. Anī Jeju ədan na:
Yá̰á̰ ń kadə̄ ī-rāā ní, ī-rāā láẃ.
Dan de gə̄ ń əsan̄ yá̰a̰ seneé tə́ ní, deē kógə̄ḿ kə́ ger̄ kum najə̄ ń ni-əda ní gətóo. Dan ń Judas i nge ngɔ̄m̄ ngong nar ní, de kə́rēý gə̄ gírə̄n̄ kadə̄ Jeju ədan i najə̄ mang yá̰á̰ kə́ tām̄ yā nāā tə́, aláa na mērən i kadə̄ ngé ndoō gə̄ yá̰a̰. Adə̄ Judas taā gájə́ mápá ní, ba kə̄ ta jī tə́ noō ni-teē ndágá. Loo i ndɔ̄ kɔ̄ɔ́.

Dan ń Judas teē ndágá kɔ̄ɔ́ anī, Jeju əda na:
Ngɔlaā ń toō ɔsən̄ gɔn Ngōn̄ Deē ō, Ngōn̄ Deē ɔsə gɔn Nə́ɓā ō. Nə́ɓā a ɔsə gɔn Ngōn̄ Deē kemən nəkɔ́ Nə́ɓā tə́, ba na̰y i ngɔr kadə̄ a ɔsə gɔnən. Ngánə́ḿ kə́ dūú gə̄, m-ā m̄-ndi sesí i sḛ́ý beē ngóy. Ā ī-sāāmī, ba tītə̄ ń m-ə́da *Jipə gə̄ kété ní, m-ə́dásí ngɔlaā ń toō ō:
Sḭḭ̄ ásiī kugə̄ loo ń m-ā m-āw̄ kə̄ tū tə́ ní alé. M-ādə̄sí gō míndə́ kə́ kijə:
Ī-táriī naā. Tītə̄ ń m̄-tárəńsí ní, ī-táriī naā dɔ dáńsí tə́ ō. Ré ī-táriī naā anī, i loo ń noō tə́ n de gə̄ malang a gerə̄n̄ kadə̄ sḭḭ̄ i ngé ndóō yá̰a̰ yāḿ gə̄ ní.


Simo̰ Piyer ədan na:
Kɔ́ɔ̄ɓē, a āw̄ i kə̄ rá?
Jeju tél ədan na:
Loo ń m-ā m-āw̄ kə̄ tū tə́ ní, ngɔlaā ásə kun gōḿ yā kaw̄ tū tə́ alé, banī gō tə́ pá tá ā ún gōḿ ɓáý.
Piyer ədan na: Kɔ́ɔ̄ɓē, i tām̄ rí tə́ á ə́da na m-ásə kun gōí ngɔlaā aĺ ní? M-ə̄ndā dɔ rɔ̄ḿ danaá kɔ̄ɔ́ ɓá yā kadə̄ m-óy tām̄ yāí tə́.
Jeju tél ədan na:
Kə́ rɔ̄kum tə́ ə̄ndā dɔ rɔ̄í danaá kɔ̄ɔ́ ɓá yā kadə̄ óy tām̄ yāḿ tə́ a? Ādə̄ m-ə́daī najə̄ kə́ bo ngá̰ý, kété pá tá kadə̄ kə́ra kə̄njá nōō ní, ā ī-nējə̄ nja mətá ə́da na ī-gerə̄m̄ alé.

Klausīties Najə̄ kə́ Majə yā Jeju ń Ja̰a̰ ndang ní 13