 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

अब्राहम कर संतान, दाऊद कर संतान, यीशु मसीह कर बंशावली।
अब्राहम ले इसहाक हर जनमिस, इसहाक ले याकूब हर जनमिस, याकूब ले यहूदा अउ ओकर भाई मन जनमिन, यहूदा अउ तमार ले पेरेस अउ जोरह मन जनमिन, पेरेस ले हेस्रोन हर जनमिस, अउ हेस्रोन ले एराम हर जनमिस, एराम ले अम्मीनादाब हर जनमिस, अम्मीनादाब ले नहशोन हर, अउ नहशोन ले सलमोन हर जनमिस, सलमोन अउ राहाब ले बोअज हर जनमिस, बोअज अउ रूत ले ओबेद हर जनमिस, अउ ओबेद ले यिशै हर जनमिस, अउ यिशै ले दाऊद राजा हर जनमिस।
अउ दाऊद ले सुलैमान हर ओ महिला ले जनमिस जेहर आगू उरिय्याह कर घरदारिन रहिस, सुलैमान ले रहबाम हर जनमिस, रहबाम ले अबिय्याह हर जनमिस, अउ अबिय्याह ले आसा हर जनमिस, आसा ले यहोशाफात हर जनमिस, यहोशाफात ले योराम हर जनमिस, अउ योराम ले उज्जियाह हर जनमिस, उज्जियाह ले योताम हर जनमिस, योताम ले आहाज हर जनमिस, अउ आहाज ले हिजकिय्याह हर जनमिस, हिजकिय्याह ले मनश्शे हर जनमिस, मनश्शे ले आमोन हर जनमिस, अउ आमोन ले योशिय्याह हर जनमिस; अउ बांधल जाए ले बेबीलोन शहर मे जाए तक कर समय मे योशिय्याह ले यकुन्याह, अउ ओकर भाई मन जनमिन।
बंधुवा होए के बेबीलोन शहर पहुचाए जाए कर आगू यकुन्याह ले शालतियेल हर जनमिस, अउ शालतियेल ले जरुब्बाबेल हर जनमिस, जरुब्बाबेल ले अबीहूद हर जनमिस, अबीहूद ले इलयाकीम हर जनमिस, अउ एलयाकीम ले अजोर हर जनमिस, अजोर ले सादोक हर जनमिस, सादोक ले अखीम हर जनमिस, अउ अखीम ले एलीहूद हर जनमिस, एलीहूद ले एलीआजर हर जनमिस, एलीआजर ले मत्तान हर जनमिस, अउ मत्तान ले याकूब हर जनमिस, याकूब ले यूसुफ हर जनमिस, जेहर मरियम कर घरदार रहिस, अउ मरियम ले यीशु हर जनमिस, जेहर मसीह भी कहलाथे।
ये मंधे अब्राहम ले दाऊद तक ले चउदह पीड़ही होईस, अउ दाऊद ले बेबीलोन शहर ले बंधुवा होए के पहुचाए जाए तक चउदह पीड़ही, अउ बंधुवा होए के बेबीलोन शहर ला पहुचाए जाए कर समय तक ले मसीह तक ले चउदह पीड़ही होईस।


यीशु मसीह कर जनम ये मंधे ले होईस, कि जब यीशु कर दाई मरियम कर सगाई यूसुफ कर संग मे होए रहिस, त ओमन कर शादी होए कर आगू ले मरियम हर पवित्र आत्मा कती ले गर्भ ले पाल गईस। तले मरियम कर घरदार यूसुफ जेहर धर्मी रहिस अउ मरियम ला बदनाम करे बर नी चाहत रहिस, ओला चुपके ले छोएड़ देहे बर बिचार करिस। जब यूसुफ हर ये गोएठ कर बिचार मे ही रहिस कि त प्रभु कर स्वर्गदूत हर ओला सपना मे दिखाई दे के कहे लागिस, “हे यूसुफ! दाऊद कर संतान तय अपन घरदारिन ला अपन हिया ले आए बर झिन डर, काबर कि जे मरियम कर गर्भ मे हे ओहर पवित्र आत्मा कती ले हे। ओहर बेटा जनमाही अउ ओकर नाव यीशु रखबे, काबर कि ओहर अपन मैनसे मन कर पाप ले उद्धार करही।”
एहर एकरे बर होही कि जे बचन ला प्रभु अपन अगमजानी मन कर द्वारा कहे रहिस ओहर पूरा होए: “देखा, एक कुवारी हर गर्भवती होही अउ एक बेटा ला जनमाही, अउ ओ बेटा कर नाव इम्मानुएल रखल जाही, जेकर अर्थ है परमेश्वर हमर संग मे।” तब यूसुफ नींद ले जागिस अउ प्रभु कर दूत कर हुकूम अनुसार अपन घरदारिन ला अपन हिया ले लानिस; अउ जब तक ले मरियम हर बेटा ला नी जनमिस तब ले यूसुफ हर मरियम कर लिघे नी गईस: अउ ओहर ओकर नाव यीशु रखिस।

Klausīties मत्ती 1