Ossetic - 2004 IBT-R (NT) Drama

Уӕд Йесо йӕ алыварс акаст ӕмӕ федта, Хуыцауы номыл лӕвӕрттӕ Кувӕндоны хӕзнадоны чи ӕвӕрдта, уыцы хъӕздгуыты. Федта дзы, дыууӕ лептӕйы чи нывӕрдта, уыцы мӕгуыр идӕдз усы дӕр. Йесо загъта: «Ӕцӕг цы у, уый уын зӕгъын, уӕртӕ уыцы мӕгуыр идӕдз ус се ’ппӕтӕй фылдӕр нывӕрдта хӕзнадоны. Иннӕтӕ иууылдӕр сӕ исбоны уӕлдӕйттӕ нывӕрдтой, уыцы мӕгуыр сылгоймаг та — цыдӕриддӕр ӕм уыдис, уый, йӕ хойраджы аргъ».

Иуӕй-иутӕ, кувӕндон цы зынаргъ дуртӕй амад у ӕмӕ йӕ цы хъӕздыг мысайнӕгтӕй сфӕлыстой, зӕгъгӕ, куы дзырдтой, уӕд сын Йесо загъта: «Ралӕудзӕн ахӕм рӕстӕг ӕмӕ, ам, цы уынут, уыдонӕй дур дурыл нал баззайдзӕн, иууылдӕр ныппырх уыдзысты».
Уӕд Ӕй бафарстой: «Ахуыргӕнӕг, кӕд ӕрцӕудзысты уыцы хабӕрттӕ, ӕмӕ се ’рцыды афон цӕмӕй бӕрӕг уыдзӕн?» Йесо сын загъта: «Уӕхи хъахъхъӕнут, цӕмӕй уӕ мачи фӕсайа, уымӕн ӕмӕ бирӕтӕ ӕрцӕудзысты Мӕ номӕй ӕмӕ дзурдзысты: „Ӕз Чырысти дӕн“ ӕмӕ „Афон ӕрцыд“. Ма-иу ацӕут сӕ фӕдыл. Хӕстытӕ ӕмӕ змӕстыты кой куы фехъусат, уӕд-иу ма фӕтӕрсут — раздӕр уал хъуамӕ ӕппӕт уыдӕттӕ ӕрцӕуой, фӕлӕ уый кӕрон нӕма уыдзӕн».
Загъта ма сын: «Иу адӕм сыстдзӕн иннӕйы ныхмӕ, паддзахад — паддзахады ныхмӕ. Уыдзӕни стыр зӕххӕнкъуыстытӕ, ранӕй-рӕтты — стонг ӕмӕ фыдрынтӕ. Зӕххыл цӕудзӕн ӕвирхъау цаутӕ, стыр ӕвдисӕйнӕгтӕ раргом уыдзӕн уӕларвӕй.

Фӕлӕ уӕ ӕппӕт уыдӕтты размӕ райдайдзысты ахсын ӕмӕ ӕфхӕрын, синагогӕты уын тӕрхон хӕсдзысты ӕмӕ уӕ ахӕстӕттӕм кӕндзысты. Мӕ номы тыххӕй-иу сымах паддзӕхты ӕмӕ бӕстыхицӕутты раз ӕрлӕууын кӕндзысты. Уӕд уын уыдзӕни Мӕн тыххӕй дзурыны фадат. Цы дзуапп ратдзыстут, ууыл уӕ рагацау тыхсын кӕй нӕ хъӕуы, уый уӕ зӕрдыл дарут. Уымӕн ӕмӕ уын Ӕз ахӕм ӕвзаг ӕмӕ куырыхон зонд ратдзынӕн, уе знӕгтӕ ӕмбырдӕй уӕ ныхмӕ фӕлӕууын дӕр ӕмӕ уӕм сдзурын дӕр куыд нӕ бафӕразой. Ӕмӕ уыл суанг уӕ ныййарджытӕ, уе ’фсымӕртӕ, уӕ хӕстӕджытӕ ӕмӕ уӕ хӕлӕрттӕ дӕр гадзрахатӕй рацӕудзысты, кӕйдӕрты уӕ мӕлӕтмӕ дӕр ратдзысты. Мӕн тыххӕй алкӕмӕн дӕр ӕнӕуынон суыдзыстут, фӕлӕ уӕ сӕрӕй иу ӕрду дӕр нӕ фӕхъӕудзӕн. Уӕ фӕразондзинады фӕрцы-иу фервӕзын кӕнут уӕ удтӕ.

Йерусалимыл ӕфсӕдтӕ ӕртыхстысты, уый куы фенат, уӕд-иу ӕй зонут, рӕхджы гӕныстон кӕй уыдзӕни, уый. Ӕмӕ Иудейы чи уа, уыдон лидзӕнт хӕхтӕм. Йерусалимы чи уа, уыдон дӕр уырдыгӕй лидзӕнт, йӕ алфамбылай чи уа, уыдон та йӕм ма бацӕуӕнт. Уымӕн ӕмӕ уыцы бонтӕ сты мастисӕн бонтӕ, цӕмӕй йӕ райдайӕнӕй йӕ кӕронмӕ сӕххӕст уа, Сыгъдӕг Фыст цы зӕгъы, уый. Уӕд додойаг уыдзысты сывӕрджын ӕмӕ дзидзидарӕг сылгоймӕгтӕ! Стыр бӕллӕх ӕрцӕудзӕн ацы зӕххыл. Хуыцауы фыдӕх баййафдзӕн ацы адӕмы. Кардылӕфтыд фӕуыдзысты ӕмӕ фӕцагъды уыдзысты, алы бӕстӕтӕм сӕ уацары фӕкӕндзысты. Муртаттӕгтӕ Йерусалимы сахар сӕ къӕхты бын ссӕнддзысты, цалынмӕ сӕ рӕстӕг фӕуа, уӕдмӕ.

Хур, мӕй ӕмӕ стъалытыл ӕнахуыр диссӕгтӕ уындзысты, зӕххыл та адӕм сау катайы бафтдзысты, абухгӕ денджызы уынӕрӕй сӕргой фӕуыдзысты. Адӕм ӕрцӕуинаг бӕллӕхты тасӕй зӕрдӕдзӕф кӕндзысты, уымӕн ӕмӕ нынкъуысдзысты уӕларвон тыхтӕ. Ӕмӕ уӕд „Адӕймаджы Фырты хъомыс ӕмӕ стыр кадимӕ фендзысты ӕврагъыл ӕрцӕйцӕугӕ“. Уыдӕттӕ ӕххӕст кӕнын куы райдайой, уӕд-иу ӕмраст слӕуут ӕмӕ-иу уӕ сӕртыл хӕрдмӕ схӕцут, уымӕн ӕмӕ уӕ фервӕзыны афон ӕрӕввахс ис».
Ӕмӕ сын Йесо ӕмбисонд ӕрхаста: «Акӕсут-ма легъуи бӕласмӕ ӕмӕ иннӕ бӕлӕстӕм. Сыфтӕр рафтаугӕ сӕ куы фенут, уӕд ӕй фӕзонут, сӕрд хӕстӕг кӕй у, уый. Уӕдӕ сымах дӕр ӕппӕт уыдӕттӕ ӕххӕстгӕнгӕ куы фенат, уӕд-иу зонут, Хуыцауы Паддзахад кӕй ӕрӕввахс ис, уый. Ӕцӕг цы у, уый уын зӕгъын: ацы фӕлтӕр нӕма аивгъуыйдзӕн, афтӕ ӕппӕт уыдӕттӕ ӕрцӕудзысты. Арв ӕмӕ зӕхх нал уыдзысты, Мӕ ныхӕстӕ та мыггагмӕ дӕр уыдзысты сӕ тыхы.

Кӕсут уӕхимӕ, цӕмӕй уӕ зӕрдӕтӕ фырхӕрд, фырнозт ӕмӕ царды мӕтӕй ма ӕруӕззау уой ӕмӕ уӕ уыцы бон ӕвиппайды ма ӕрӕййафа. Уымӕн ӕмӕ уый къӕппӕгау ӕрцахсдзӕнис ӕппӕт зӕххон цӕрджыты. Уӕдӕ иудадзыг уӕхи цӕттӕ дарут ӕмӕ кувут, цӕмӕй уӕ бон бауа ӕппӕт ӕрцӕуинаг бӕллӕхты сӕрты ахизын ӕмӕ Адӕймаджы Фырты раз ӕрлӕууын».
Боныгон Йесо адӕмы ахуыр кодта Кувӕндоны, изӕрӕй та-иу ацыд ӕмӕ-иу Йе ’хсӕв арвыста, Елеон цы хох хуынди, ууыл. Ӕмӕ-иу адӕм иууылдӕр сӕумӕйӕ цыдысты Кувӕндонмӕ Йӕ ныхӕстӕм Ын байхъусынмӕ.

Klausīties Лука 21