Ikoma - 2022 WBT (NT) Drama

Ikoma - 2022 WBT (NT) Non Drama

Ghaache koheta ghayo, Yesu aghatëënya anyancha e Ghariraaya, ino wiiki ebherekiiru anyancha e Tibheeriya. Erikinda ikoro re bhaato rekamutambana Yesu, gho kubha mbaare bharooche ebhyërëkërëri bhino are araköra gho kobhahöri abhabhabharu. Niho Yesu na abhaanabheegha bhaache bhaghatiira mo‑gheghoro nyarebhe, bhaghiikara haghirohamu. Eriibhagha riyo, anyangi e Bhaasaka e Bhayahuuti neere ˆeghatingʼi.
Yesu akarëkëra amiisho akarighi erikinda ikoro re bhaato rino reere reraacha ghokooche. Niho akamobhoori Bhiiribho akabhugha, “Bhiiribho, kana, ntoghotora ghoghora hayi ebhiinyakurë bhe kobharaagheri abhaato bhano?” Yesu ꞉naamobhooriri Bhiiribho hangʼu gho komusaki, gho kubha naare eche kino akuucha ghuköra. Bhiiribho akamugharokeri akabhugha, “Koru nangabha tongaghoriri ebhiinyakurë kubha omooto woose abhönë ghasuuhu ghasuuhu, chatinaari amaghana abhere chetangatoriri kobhiisha.” Niho umu mo‑bhaanabheegha bhaache uno are arabherekeru Andereya, ömööbhö Simiyooni Bheetero, akamobhoorera akabhugha, “Oo Omutëmi, naanyi‑ho omobhureni umu hano uno anyi ne emighaate etaano ghe shayiri ne ebhesu bhesuuhu bhibhere. Amare ekiinyakurë kino nibhu gheghuköra ghiishe erikinda rino?” Mbe, Yesu akabhabhoorera abhaanabheegha bhaache akabhugha, “Mobhabhoorere abhaato bhiikare haase.” Ahaghiro hayo, ꞉haare na amanyaaki maaru, bhoose bhaghiikara haase. Ghate yaabho, mbaare‑mu abhasubhe ebheku bhitaano. Niho Yesu akiimoki emighaate ghiire, aghiitabheri Eryobha, aghaghesuura, akabhahööhi abhaato bhoose bhano ꞉bhaare hayo. Aghaköra hangʼu hangʼu ne ebhesu bhiire. Omooto woose akabhöna kebhuno are arëënda.
Hano abhaato bhoose bhiighotiri, Yesu akabhabhoorera abhaanabheegha bhaache akabhugha, “Mokome amatigho gha bhiinyakurë bhyose bhino bhisaaghiri, ghetabhora egheteneka ghyokyose.” Mbe, bhaghakoma ebhiinyakurë bhyose bhino abhaato ꞉bhaariire bheghasaagha, koru mo‑mighaate etaano ghe shayiri, bhaghiichori ebhetonga ikomi na bhibhere. Hano abhaato bhayo bharooche ekyërëkërëri kiyo Yesu ꞉aköriri, bhakabhugha, “Mahëënë omooto uno n‑omurööti o Ryobha, niwe uno twitëngʼiire kubha nakuucha mo‑se.” Yesu akamënya kubha abhaato bhaare ꞉mbëëndiri komughööta, na komotoora gho changuru kubha omutëmi waabho. Amare iwe aghatanura, aghaye wiiki a‑gheghoro omwene chiri.


Eriibhagha re mughörööbha, abhaanabheegha bha Yesu bhakahiringita ghuye mo‑nyancha e Ghariraaya. Hano ekengʼuuri ghisöhiri, bhaghasöha mo‑bhwato na ghusëëma ghutëënya anyancha ghuye Kabherenawumu, amare Yesu naare akeere kohika, ghughöötana nabho.
Mbe, anyancha eghasëëma ghusarëka gho kubha obhukama mboore bhuhaari. Hano abhaanabheegha bha Yesu ꞉bhaare bhahikiri obhurë bho chakiromeeta ishaano hamu ishaasabhe, bhakamorighi Yesu araghënda ighoro e manche, akabha ˆaghatingʼi obhwato. Ibho bhaghatiina chwee. Niho Yesu akabhabhoorera akabhugha, “N‑eni, motatiina!” Ibho bhakëënda asöhë mo‑bhwato. Hayo hayo obhwato bhokahika amwambuko hano ꞉bhaare ghuye.

Atabhoori yaache, erikinda re bhaato bhano ꞉bhaare bhasaaghiri amwambuko owonde o nyancha, bhakamënya kubha haanyi no obhwato bhumu hangʼu hano. Wiiki bhakamënya kubha Yesu taghiire no obhwato bhuure haghirohamu na abhaanabheegha bhaache, amare abhaanabheegha ꞉mbaaghiire abheene chiri. [Abhaato abhande bhakaacha na amaato aghande koru mo‑moghya o Tibheeriya, bhakahika hano erikinda re bhaato ꞉bhaare bhariire emighaate, hano Omutëmi Yesu aritabhiiri Eryobha.] Hano erikinda re bhaato bhaare ꞉bhaamënyiri kubha Yesu taanyi hayo, koru abhaanabheegha bhaache bhataanyi‑ho, bhaghasöha mo‑maato ghayo, bhaaghaye Kabherenawumu komutabhara Yesu. Hano abhaato bhaare bhahikiri amwambuko o nyancha, bhakamubhöna Yesu, bhakamobhoori bhakabhugha, “Oo Omweghi, nyingake wichiri ino?”
Yesu akabhagharokeri akabhugha, “Mahëënë ˆnekabhabhoorera, nyeeche moghuntabhara taanyi gho kubha morooche ebhyërëkërëri bhino ꞉niiköriri, amare n‑gho kubha ꞉neebhaheere emighaate, mokarë moghiighota. Motakörëra emeremo ebhiinyakurë bhino bheghusarëka, amare mubhe moraköra gho ghiri e kubhöna ebhiinyakurë bhino bhetaaghusarëka, bhino bhekobhaha abhaato obhuhöru bho miishe ghyose. Eni Omoona o Mooto nekobhaha abhaato ebhiinyakurë bhiyo, gho kubha Taata Waryobha naaheere obhotoro ghuköra ghayo.” Niho ibho bhakamobhoori bhakabhugha, “Kana, tukörë ke kubha totore ghuköra emeremo ghino Eryobha rekwënda?” Yesu akabhagharokeri akabhugha, “Emeremo ghino Eryobha rekwënda mukörë nighyo ghino, ghonkumi eni, uno netomuru naryo.” Bhakamobhoori bhakabhugha, “Kana, noghuköra ekyërëkërëri ke kubha torighi, na toghokumi? N‑gheghiro ke oghuköra? Bhasookoro bhiito ꞉mbaariire agharinga eriibhagha bhaanyi mwibhara, kinya bhuure yandëkuru mo‑Mandëkö Amatööbhiyu kubha, ‘Nabhaheere ekiinyakurë ghe koru Mwishaaro kubha bhari.’”
Mbe, Yesu akabhabhoorera akabhugha, “Mahëënë ˆnekabhabhoorera, taanyi Musa uno ꞉abhaheere bhasookoro bhaanyu ebhiinyakurë bhiire bheruure Mwishaaro. Amare n‑Taata waane, uno ibheere akobhaha inyu ekiinyakurë ke hëënë kino gheekoru Mwishaaro. Ekiinyakurë ke Ryobha n‑uno ikiri koru Mwishaaro, kubha abhahë abhaato bhoose bha mo‑se obhuhöru.” Niho bhakamugharokeri bhakabhugha, “Oo Omutëmi, ntoghusabha otuhë ekiinyakurë kiyo chaasiko choose.” Yesu akabhagharokeri akabhugha, “Eni neeni ekiinyakurë kino ghekobhaha abhaato obhuhöru. Omooto wowoose uno akuucha ghokoone, taakooghu anchëra inkongʼorimu, wiiki uno aghonkumi taakooghu anyööta naabha.

“Amare eni ˆnekabhabhoorera kubha koru nangabha mondooche, mokeere motaaghonkumi. Abhaato bhoose bhano Taata aheere, mbakuucha ghokoone na ghonkumi. Wiiki nteekomwanga naabha koru umu uno akuucha ghokoone. Eni niichiri koru Mwishaaro kubha nibhe neraköra amiigha gha Taata uno antomiri. Ntiichiri ghuköra amiigha ghaane. Amiigha gha Taata uno antomiri nigho ghano, kubha netaacha komorumeeri koru umu mo‑bhaare aheere, amare nebharyoki mo‑rosiko ro ntenero. Amiigha gha Taata n‑ghano, omooto woose uno akumënya kubha eni n‑Omoona waache na ghonkumi, abhe no obhuhöru bho miishe ghyose. Eni nekuucha komoryoki mo‑rosiko ro ntenero.”
Mbe, Abhayahuuti bhaghasëëma kwingʼunyerangʼunyera gho kubha Yesu ꞉niighambiri kubha, “Eni n‑ekiinyakurë kino ghiikiri koru Mwishaaro.” Bhakabhoorani bhakabhugha, “Kana, omooto uno taanyi Yesu, mwërëëti o Yusubhu, uno ntobheeche abhiibhori bhaache bhoose? Mbe, nibhu aghotora kobhugha kubha ꞉niikiri koru Mwishaaro?” Yesu akabhagharokeri akabhugha, “Motighe kwingʼunyerangʼunyera inyu bheene kwo bheene. Taanyi‑ho omooto uno aghotora kuucha ghokoone, aribha Taata uno antomiri atamurahuuniri. Eni nekuucha komoryoki omooto uyo mo‑rosiko ro ntenero. Yandëkuru mo‑Mandëkö Amatööbhiyu kubha, ‘Eryobha ndekobheeghi abhaato bhoose.’ Mbe, omooto wowoose uno aghutëghëërëra na kwegha koru gho Taata, nakuucha ghokoone. Taanyi‑ho uno amorooche Waryobha Taata, nanyinga eni mwene uno neruure ghokooche.
“Mahëënë ˆnekabhabhoorera, omooto wowoose uno aghonkumi eni, naanyi no obhuhöru bho miishe ghyose. Eni neeni ekiinyakurë kino ghekobhaha abhaato obhuhöru. Nangabha bhasookoro bhaanyu ꞉bhaariire agharinga mwibhara, koru hangʼu ꞉mbaakuure. Amare hano nkeenyi‑ho ekiinyakurë kino gheghwika koru Mwishaaro. Aribha omooto ariire ekiinyakurë kiyo, taaghoku naabha. Eni n‑ekiinyakurë kino gheghwika koru Mwishaaro, kino ghekobhaha abhaato obhuhöru. Omooto wowoose uno akurë ekiinyakurë kiyo, naakubha no obhuhöru bho miishe ghyose. Ekiinyakurë kiyo n‑omobhere waane uno nekoworuusi gho ghiri e bhaato bhoose, kubha bhabhe no obhuhöru bho miishe ghyose.”
Mbe, Abhayahuuti bhaghasëëma ghushangʼaana na kobhoorani bharabhugha, “Omooto uno nibhu aghotora ghotuha omobhere waache, kubha towurë?” Mbe, Yesu akabhabhoorera akabhugha, “Mahëënë ˆnekabhabhoorera, erabha motaakurë omobhere waane, na kunyo amasaahë ghaane, eni Omoona o Mooto, motaakubha no obhuhöru bho miishe ghyose. Omooto wowoose uno akurë omobhere waane na kunyo amasaahë ghaane naanyi no obhuhöru bho miishe ghyose, na neeni nekomoryoki mo‑rosiko ro ntenero. Omobhere waane niwe ekiinyakurë ke mahëënë, na amasaahë ghaane nikyo ekinywebhu ke mahëënë. Omooto wowoose uno akurë omobhere waane na kunyo amasaahë ghaane naakubha arëëndërëra ghwikara moose yaane na neeni neghwikara moose yaache. Taata uno antomiri m‑muhöru anyi, na neeni nekubhöna obhuhöru gho kohetera gho Taata. Hangʼu hangʼu, omooto wowoose uno akowure omobhere waane, nakubhöna obhuhöru gho kohetera ghokoone. Mbe, eni n‑ekiinyakurë kino ghiikiri koru Mwishaaro, ghetanga kino bhasookoro bhaanyu ꞉bhaariire bhaaghaku. Amare omooto wowoose uno akurë ekiinyakurë kino, naakubha no obhuhöru bho miishe ghyose.” Yesu ꞉naabhughiri amangʼana ghano eriibhagha are areeghi mo‑risinaghooghi iyo Kabherenawumu.

Ibheere abhaghëndi bhaaru bha Yesu hano bhooghwire ghayo, bhakabhoorani bhakabhugha, “Ameeghi ghano m‑mahaari chwee! Kana, n‑niwe aghotora ghoghiishereri?” Eriibhagha Yesu amënyiri kubha mbakongʼunya gho ghano abhughiri, akabhabhoori akabhugha, “Kana, angʼana ino ˆekabhakarari? Mbe, nibhu ekubha erabha mokondighi eni Omoona o Mooto, ndatiira ghuye Mwishaaro hano neere ekimbërë? Akörö e Ryobha niyo ekobhaha abhaato obhuhöru. Omooto taaghotora ghuköra ghyokyose gho changuru cheeche omwene. Amangʼana ghano nebhabhooriire n‑gha Akörö e Ryobha, nagho ngakoruusi obhuhöru. Amare mbaanyi‑ho abhande ghateghate yaanyu bhano bhakwanga ghonkumi.” Yesu ꞉naabhughiri hangʼu gho kubha ꞉naamënyiri koru simoka kubha m‑bhawe bhano bhakwanga komokumi, na kubha n‑niwe uno akuucha komwigharurani. Mbe, akëëndërëra ghosiikëra arabhugha, “Gho ghayo, ˆnekabhabhoorera, taanyi‑ho omooto uno aghotora kuucha ghokoone, aribha Taata atamotooreriiri.”
Gho ghiri e mangʼana ghayo, abhaaru bhano ꞉bhaare bharamutambana, bhakamotigha, nabho bhataaghëndiini nawe wiiki. Niho Yesu akabhabhoori abhaanabheegha bhaare ikomi na bhabhere akabhugha, “Kana, na niinyu mokwënda ghontigha?” Simiyooni Bheetero akamugharokeri akabhugha, “Oo Omutëmi, toghi waawe? Iye omwene noonyi na amangʼana ghano ghaghotuha obhuhöru bho miishe ghyose. Itu ntoghokumi, wiiki ntweche kubha iye n‑Omutööbhiyu koru kwo Ryobha.” Niho Yesu akabhabhoorera akabhugha, “Nebhahwire inyu ikomi na bhabhere kubha abhaanabheegha bhaane, amare umu ghate yaanyu n‑o Rishambu.” Hayo Yesu naare aramosiikërëra Yuuta mwërëëti o Simiyooni Isikariyoote. Uyo niwe ꞉ichiri komwigharurani Yesu, koru nangabha are umu mo‑bhaanabheegha bhaache ikomi na bhabhere.

Klausīties Yohana 6