Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወበውእቱ መዋዕል ኀለፈ እግዚእ ኢየሱስ በሰንበት እንተ መንገለ ገራውህ ወአርዳኢሁሰ ርኅቡ ወአኀዙ ይምሐዉ ሰዊተ ወይብልዑ። ወርእዮሙ ፈሪሳውያን ይቤልዎ ናሁ ርኢ አርዳኢከ ዘይገብሩ ዘኢይከውን ገቢረ በሰንበት። ወይቤሎሙ ኢያንበብክሙኑ ዘገብረ ዳዊት አመ ርኅበ ውእቱኒ ወእለ ምስሌሁ። ዘከመ ቦአ ቤቶ ለእግዚአብሔር ወበልዐ ኀባውዘ ቍርባን ዘኢይከውኖ ለበሊዕ ወኢ ለእለ ምስሌሁ ዘእንበለ ለካህናት ለባሕቲቶሙ። ወኢያንበብክሙኑ ዘሀሎ ውስተ ኦሪት ከመ ካህናት እለ ውስተ ቤተ መቅደስ ያረኵስዋ ለሰንበት ወኢይከውኖሙ ጌጋየ። ወአነሂ እብለክሙ ከመ ዘየዐቢ እምቤተ መቅደስ ሀሎ ዝየ። ሶበሰ ተአምሩ ምንት ውእቱ ዘይቤ «ምጽዋተ አበድር እመሥዋዕት» እምኢኰነንክምዎሙ ለእለ ኢአበሱ። እስመ ወልደ ዕጓለ እመሕያው ለሊሁ ውእቱ እግዚኣ ለሰንበት።

ወፈሊሶ እግዚእ ኢየሱስ እምህየ ቦአ ውስተ ምኵራቦሙ። ወናሁ ብእሲ ዘየብሰት እዴሁ ወተስእልዎ እንዘ ይብሉ ይከውንኑ በሰንበት ፈውሶ ከመ ያስተዋድይዎ። ወይቤሎሙ መኑ እምውስቴትክሙ ብእሲ ዘቦ አሐዱ በግዕ ወእመ ወድቆ በሰንበት ውስተ ግብ አኮኑ ይእኅዞ ወያነሥኦ። እፎ እንከ ፈድፋደ ይኄይስ ሰብእ እምነ በግዕ ይከውንኬ በሰንበት ገቢረ ሠናይ። ወእምዝ ይቤሎ ለውእቱ ብእሲ ስፋሕ እዴከ ወሰፍሐ እዴሁ ወሐይወት ሶቤሃ ወኮነት ከመ ካልእታ። ወወፂኦሙ ፈሪሳውያን ተማከሩ በእንቲኣሁ ከመ ይቅትልዎ። ወአእሚሮ እግዚእ ኢየሱስ ተግኅሠ እምህየ ወተለውዎ ብዙኃን ሕዝብ ወአሕየዎሙ ለኵሎሙ። ወገሠጾሙ ከመ ኢያግህድዎ። ከመ ይትፈጸም ዘተብህለ በኢሳይያስ ነቢይ እንዘ ይብል። «ናሁ ወልድየ ዘኀረይኩ ፍቁርየ ዘሠምረቶ ነፍስየ ወአነብር መንፈስየ ላዕሌሁ ውእቱ ይነግር ፍትሕየ ወኵነኔየ ለአሕዛብ። ኢይደምፅ ወኢይጸርሕ ወአልቦ ዘይሰምዕ ቃሎ እንዘ ይሜህር በምኵራብ። ብርዐ ቅጥቁጠ ኢይሰብር ወሱዐኒ ዘይጠይስ ኢያጠፍእ እስከ ያገብእ ፍትሐ መዊኦቱ። ወበስመ ዚኣሁ አሕዛብ ይትአመኑ።»

ወእምዝ አምጽኡ ሎቱ ዘጋኔን ዕዉረ ወጽሙመ ወበሃመ ወፈወሶ እስከ ውእቱ ዕዉር ወጽሙም ወበሃም ነበበሂ ወርእየሂ ወሰምዐሂ። ወይዴመሙ ኵሎሙ አሕዛብ ወይቤሉ አኮኑ ዝንቱ ወልደ ዳዊት። ወፈሪሳውያንሰ ሰሚዖሙ ይቤሉ ዝንቱሰ ኢያወፅእ አጋንንተ ዘእንበለ በብዔል ዜቡል መልአኮሙ ለአጋንንት። ወአእሚሮ እግዚእ ኢየሱስ ኅሊናሆሙ ይቤሎሙ ኵላ መንግሥት እንተ ትትናፈቅ በበይናቲሃ ትማስን ወኢትቀውም ወኵላ ሀገር ወእመሂ ቤት እንተ ትትናፈቅ በበይናቲሃ ኢትቀውም። ወእመሰ ሰይጣን ለሰይጣን ያወፅኦ ተናፈቀኬ በበይናቲሁ እፎ እንከ ትቀውም መንግሥቱ። ወእመሰ አነ በብዔል ዜቡል አወፅኦሙ ለአጋንንት ውሉድክሙ በምንት ያወፅእዎሙ ወበእንተዝ እሙንቱ ፈታሕተ ይከውኑክሙ። ወእመሰ አነ በመንፈሰ እግዚአብሔር አወፅኦሙ ለአጋንንት ዮጊኬ በጽሐት ላዕሌክሙ መንግሥተ እግዚአብሔር። ወአልቦ ዘይክል መኑሂ በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ቤቶ ይበረብር። ዘኢኮነ ምስሌየ ዕድውየ ውእቱ ወዘኢይትጋባእ ምስሌየ ይዘርወኒ በእንተዝ እብለክሙ ኵሉ ኀጢአት ወፅርፈት ይትኀደግ ለሰብእ ወዘሰ ፀረፈ ላዕለ መንፈስ ቅዱስ ኢይትኀደግ ሎቱ። ወዘሰ ነበበ ቃለ ላዕለ ወልደ ዕጓለ እመሕያው ይትኀደግ ሎቱ ወዘሰ ነበበ ላዕለ መንፈስ ቅዱስ ኢይትኀደግ ሎቱ ኢበ ዝ ዓለም ወኢ በዘይመጽእ። እመ አኮ ግበሩ ዕፀ ሠናየ ወፍሬሁኒ ሠናየ ወእመ አኮ ግበሩ ዕፀ እኩየ ወፍሬሁኒ እኩየ እስመ እምፍሬሁ ይትዐወቅ ዕፅ። ኦ ትውልደ አራዊተ ምድር በእፎ ትክሉ ሠናየ ተናግሮ እንዘ እኩያን አንትሙ እስመ እምተረፈ ልብ ይነብብ አፍ። ኄር ብእሲ እምሠናይ መዝገበ ልቡ ያውፅኣ ለሠናያት ወእኩይሰ ብእሲ እምእኩይ መዝገበ ልቡ ያወፅኣ ለእኪት። አንሰ እብለክሙ ኵሉ ሰብእ ዘይነብብ ንባበ ፅሩዐ ያገብኡ ሎቱ ቃለ በዕለተ ደይን። እስመ እምቃልከ ትጸድቅ ወእምቃልከ ትትኴነን።

ወአሜሃ መጽኡ ሰብእ እምጸሐፍት ወእምፈሪሳውያን ወይቤልዎ ሊቅ ንፈቅድ እምኀቤከ ትእምርተ ንርአይ። ወአውሥአ እግዚእ ኢየሱስ ወይቤሎሙ ትውልድ ዕሉት ዐማፂት ወዘማዊት ትእምርተ ተኀሥሥ ወትእምርትሰ ኢይትወሀባ ዘእንበለ ትእምርተ ዮናስ ነቢይ። እስመ በከመ ነበረ ዮናስ ውስተ ከርሠ ዐንበሪ ሠሉሰ መዋዕለ ወሠሉሰ ለያልየ ከማሁ ይነብር ወልደ ዕጓለ እመሕያው ውስተ ልበ ምድር ሠሉሰ መዋዕለ ወሠሉሰ ለያልየ። ሰብአ ነነዌ ይትነሥኡ አመ ዕለተ ደይን ወይትፋትሕዋ ለዛቲ ትውልድ ወያስተኀፍርዋ እስመ ነስሑ በስብከተ ዮናስ ወናሁ ዘየዐቢ እምዮናስ ሀሎ ዝየ። ንግሥተ አዜብ ትትነሣእ አመ ዕለተ ደይን ወትትፋታሕ ምስለ ዛ ትውልድ ወታስተኀፍራ እስመ መጽአት እምአጽናፈ ምድር ትስማዕ ጥበቢሁ ለሰሎሞን ወናሁ ዘየዐቢ እምሰሎሞን ሀሎ ዝየ።

ወእምከመ ወፅአ መንፈስ ርኩስ እምሰብእ የዐውድ በድወ ኀበ አልቦ ማይ እንዘ የኀሥሥ ዕረፍተ ወየኀጥእ። ወእምዝ ይብል እገብእ እንከሰ ውስተ ቤትየ እምኀበ ወፃእኩ ወመጺኦ ይረክቦ እንዘ ያስተራክብ እዳወ ዕሩቀ ወኵስቱረ ወምሩገ። ወእምዝ የሐውር ወያመጽእ ምስሌሁ ካልኣነ ሰብዐተ አጋንንተ እለ የአክዩ እምኔሁ ወበዊኦሙ የኀድሩ ህየ ወይከውን ደኃሪቱ ለውእቱ ብእሲ ዘየአኪ እምቀዳሚቱ ከማሁ ይከውና ለዛቲ ትውልድ እኪት። ወእንዘ ይነግሮሙ ዘንተ ለሕዝብ ናሁ እሙ ወአኀዊሁ ይቀውሙ አፍኣ እንዘ ይፈቅዱ ይትናገርዎ። ወመጽአ አሐዱ እምአርዳኢሁ ወይቤሎ ናሁ እምከ ወአኀዊከ አፍኣ ይቀውሙ ወየኀሥሡ ይትናገሩከ። ወአውሥአ ወይቤሎ ለዘነገሮ መኑ ይእቲ እምየ ወእለ መኑ እሙንቱ አኀውየ። ወሰፍሐ እዴሁ ወአመረ ኀበ አርዳኢሁ ወይቤ ነዮሙ እምየ ወአኀውየ። እስመ ኵሉ ዘይገብር ፈቃዶ ለአቡየ ዘበሰማያት ውእቱ እኁየኒ ወእኅትየኒ ወእምየኒ ውእቱ።

Klausīties ወንጌል ዘማቴዎስ 12