Muria, Far Western: Muria Far Western (NT)

Muria Far Western

येसु असा ओरकुन इतुर, “परमेस्वर मिकुन दोष हेमाकिर इन्जोर निमाट दुसरोन वने दोष हेमाट। बाक्याकि निमाट बोद प्रकारते दुसरोन दोष हिन्तोरिट ओदे प्रकारते मिकुन वने परमेस्वर दोष हियानुर, अनि निमाट बोद मापते दुसरोन काहान्तोरिट ओदेय मापते परमेस्वर मिया साटि वने काहानुर। अनि निमा आपुना तमोना कोन्डातांग डुन्डोतुन हुळान्तोन मति आपुना कोन्डानिगा मन्ता किळातुन बाक्या ध्यान केवि? आयोते आपुना कोन्डांगतिगा किळा मन्ता असके निमा आपुना तमोन ‘हे तमो, पोसा निया कोन्डातांग डुन्डो टन्डसीका’ इन्जोर बदाम इन्दा परकि? मति हे कपटि मानेय, पहले निया कोन्डातांग किळातुन टन्डा असके निवोर तमोना कोन्डातांग डुन्डोतुन सोबाय हुळसुन टन्ड परकि।”
“पवित्र चिजक नयकना मुने हेमाट, बाक्याकि नयक परके मल्स मिकुन हिक्स वाटार अनि मिया मोतितुन पदिंगना मुने वाटसिमाट बाक्याकि पदिंग काल्कने ओवकाना सन्दि आयमाकि।”


येसु असा ओरकुन इतुर, “तलकिकिट ते मिकुन हियानुर, पळकिकिट ते मिकुन पुटार, कोहकिकिट ते मिया साटि कवाळ तरयानुर। बाक्याकि बोरायि तलकान्तोर ओन पुटान्ता, अनि पळकान्तोर ओर पुटहान्तोर, अनि कोहकान्तोर ओना साटि कवाळ तरयानुर। मरि रोटि तलकान्तोर ते ओन कल हियानुर इदाम मानेय मियागा बोर मन्तोर? या मीन तलकान्तोर ते तरास हियानुर बहे? इदाम निमाट खराब मन्ज वने आपुना बालकिन सोबाय चिजक हियाना पुन्तोरिट ते मिवोर स्वरगतोर बाबो परमेस्वर तलकवालोरकुन सोबाय चिजक बचोन पकाय हियानुर!”

येसु असा ओरकुन इतुर, “इन्जोर मिया साटि दुसरो लोकुरक बदाम व्यवहार कियाना इन्जोर इच्चा किन्तोर अदामे ओरासंग वने निमाट व्यवहार किम्ट। बाक्याकि मूसाना नियम अनि परमेस्वरना पोल्लो वेहवालोरा करहाना अर्थ इदे आन्दु।”


येसु असा ओरकुन इतुर, “हुडला टाटरातिगाडाल लोपा हन्ट, बाक्याकि नाशतिगा हन्दाना टाटरा हजोर अनि अदेना हरि पकाय हजोर मन्ता, ओद हरिते दान्तोरक पकाय लोकुरक मन्तोरक। बाक्याकि अनन्त जिवनतिगा हन्दाना टाटरा हुडला अनि ओद हरि पकाय कठिन हरि मन्ता अनि ओद हरितुन कलियान्तोर पकाय कमि लोकुरक मन्तोरक।”


येसु ओरकुन असा इतुर, “आपुनास परमेस्वरना पोल्लो वेहवाल आन्दोम इदाम खोटाल वळकवाल लोकुरकताल सावदान मन्ट, ओरक बेळांगना रुपते मिया हेरे वान्तोरक मति लोपाडाल ओरक हिकवाल हुन्डराह लेहका आन्दुरक। ओरा बुतोता परिणामते निमाट ओरकुन पुन्किट, गोटि मराताल बोरायि अंगुर या बाबरि मराताल मरका कायांग जमा कियाकि बहे? बसकेय आयो! सबोय सोबाय मरा सोबाय काया हादान्ता अनि खराब मरा खराब काया हादान्ता। सोबाय मरा खराब काया हादिला परो, अनि खराब मरा सोबाय काया वने हादिला परो। सोबाय काया हादो ओद मरातुन कदियसुन किसतिगा वाटसिन्तोर। इद प्रकारते ओरा कायाते निमाट ओरकुन पुन्किट।”
येसु असा इतुर, “नाकुन ‘हे प्रबु, हे प्रबु’, इन्वाल बोरे मानेय आयो मति स्वरगतिगा मन्तोर नावोर परम बाबोना इच्चाते ताकान्तोर ओरे स्वरगतिगा हन्दा परनुर। ‘हे प्रबु, हे प्रबु, माक निया पोरोयते परमेस्वरना पोल्लो वेहतोम, अनि निया पोरोयते दुष्टात्मातुन पसिहतोम, अनि निया पोरोयते पकाय चमत्कारता बुतोंग कितोम’ इन्जोर अदे दिया पकाय लोकुरक नाकुन इन्दानुर। असके नना ओरकुन ‘नना बसकेय मिकुन पुनोन। हे खराब बुतो केवालोर, नावा हेरेटाल लक हन्ट’ इन्जोर साप साप इन्जिका।”


येसु ओरकुन असा इतुर, “इन्जोर नावांग इव पोल्लोंग केन्जुन अवेन बोरे मानेमान्तोर ते ओरक आपुना लोता पायवा कलदे बनेहकितोर ओर बुद्धिमान मानेयना लेहका ठहरे मायनुर। अनि पिर वातु, उसा वातु, अनि पकाय वळिय वने वातु, अनि अद लोतुन आदळे मातु मति ओद लोता पायवा कलदे बनेहकिता मता इन्जोर ओद लोन अरो आतु। मति नावांग इव पोल्लोंग बोरायि केन्जुन अव पोल्लोता अनुसार ताकोर ओर मानेय आपुना लोन तोळियता पायवाते लोन बनेहकितोर निरबुद्धि मानेय लेहका मन्तोर। अनि पिर वातु, उसा वातु, अनि पकाय वळिय वातु, अनि ओद लोतुन आदळेमातु अनि ओद लोन मुटस अद सबोय नाश आतु।”
इव पोल्लोंग येसु इतुर असके पजा भीळ ओना पोल्लोते चके मातुरक। बाक्याकि ओर मूसाना नियमतुन करिहवालोरा लेहका आयो मति अदिकारते ओरकुन उपदेश हिन्दुर।

Klausīties मत्ति 7