Text: © New Life Computer Institute Audio: ℗ 2020 Hosanna

Ravula NLCI (NT) Non Drama

Ravula NLCI (NT) Drama

ഒരു ഉളേപ്പുജിനാത്തി ഏച്ചു പരീച്ചെമാരുവണ്ട ഒരു നേദാവുന്റ കുള്ളുക്കു തിന്റുകുടിച്ചിടുവബേണ്ടി പോയിത്തു. ഏച്ചുന്റ മുഗാളു കുറ്റ കണ്ടുപുടിപ്പ അവുടെ ഇന്തെര ഏച്ചുനെ കറ്റുകറ്റെ മെലേഞ്ചൊണ്ടു ഉളേച്ചിന്തരു. എമ്മടെക്കു അവുടെ മേലുപരാക്ക നീരുബെക്കിന്റ ബരുത്തകീന്റ ഒരു മയിച്ചെയ് ഏച്ചുന്റ മുല്ലെലക്കെ ഉളേച്ചിന്തയ്. ഏച്ചു നേമകാറെരണ്ടൊന്റമു പരീച്ചെമാരുവണ്ടൊന്റമു: “ഉളേപ്പുജിനാത്തി ചുഗാകാണത്തെരളെ ചാരിമാണ്ടെയെയ് നേമത്തെക്കു ഒപ്പിന്റെനല” എന്റു കേട്ടു. അയിങ്കു അയിര ഒന്റുമു പറേയദെ ചന്നയിന്തരു. ഏച്ചു ബരുത്തപുടിച്ച ആ മയിച്ചെനെ തൊട്ടുചാരിമാടിച്ചു ചൊല്ലിബുട്ടു. പിന്നെ ഏച്ചു അയിരണ്ടൊന്റ കേട്ടു: “ഉളേപ്പുജിനാത്തി നിങ്കട ആരുന്റെങ്കില മഗെനോ, എരുദോ കിണാറുക്കു ബൂന്തെങ്കി നീങ്ക ബിരേന്റല അയിരളെ മുഗാളെക്കു അത്തിഗദിപ്പെരി?” അയിങ്കു അയിരക്കു തിരിച്ചു ഒന്റുമു പറേവ പറ്റുവകാണി.

അവുടെ ബിരുന്തുക്കു ബന്തെര ഒക്കായിക്കുമു മുന്തിനെര ഉളേക്കിന്റ ജാഗ നോക്കി ഉളേക്കിന്റെനെ മെലേഞ്ചിച്ചു ഏച്ചു അയിരണ്ടൊന്റ ഈ കാരിയ പറേഞ്ചു: “ഒരുത്തെയ് ഇഞ്ഞെ കഞ്ഞളത്തെക്കു ബുളിച്ചെങ്കി മുന്തിനെര ഉളേക്കിന്റ ജാഗത്തി നീ പോയി ഉളേപ്പനാഗയ്. എന്നെഗെന്റെങ്കി ഞാക്കിന്തുമു മുന്തിന ഒരുത്തെനെ അയിനു കഞ്ഞളത്തെക്കു ബുളിച്ചിപ്പൊയ്. ഇഞ്ഞെമു അയിനെമു കഞ്ഞളത്തെക്കു ബുളിച്ചെയെയ് ബന്തിച്ചു ഇഞ്ചൊന്റ: ‘ഏന്തെച്ചിച്ചു ഏങ്കു ഉളേപ്പ ജാഗ ബുട്ടുകൊടു’ എന്റു പറേവടെക്കു നീ നാണകെട്ടൊണ്ടു അവുടിന്തു ഏന്തെച്ചൊപോച്ചു ഒക്കായിന്റമു ബൊവ്വക്കെകീന്റ ജാഗത്തിപോയി ഉളേക്കൊണ്ടിബരുവൊയ്.
ഇഞ്ഞെ കഞ്ഞളത്തെക്കു ബുളിച്ചെങ്കി നീ ഒക്കായിക്കിന്തുമു ബൊവ്വില ജാഗത്തിപോയി ഉളേക്കൊണു. എമ്മടെക്കു ഇഞ്ഞെ കഞ്ഞളത്തെക്കു ബുളിച്ചെയെയ് ബന്തിച്ചു ഇഞ്ചൊന്റ: ‘എന്റ ജൊദേ, നീ മുല്ലെലക്കെ ബന്തു ഉളേ’ എന്റു പറേവടെക്കു ആ കഞ്ഞളത്തെക്കു ബന്തിന്ത ഒക്കായിമു ഇഞ്ഞെ ബലിയെനെന്റു ബെപ്പൊരു. താനേ ബലിയെനെന്റു നിനേക്കിന്റെരളെ ഈച്ചിര താവുത്തുവു. താനേ താവുന്തെനെന്റു നിനേക്കിന്റെരളെ ഈച്ചിര ബലിയെരളാക്കുവു.”
പിന്നെ ഏച്ചു തന്നെ ബിരുന്തുബുളിച്ചെന്റൊന്റ: “നീ ഉച്ചെക്കോ അന്തിക്കോ ബിരുന്തു ബുളിച്ചിച്ചു തിമ്മകൊടുപ്പടെക്കു ഇഞ്ച ജൊദേയളെയോ ഇഞ്ച അണ്ണെരളേയെരളെയോ ഇഞ്ച ചൊന്തകാറെരളെയോ ഇഞ്ച കുള്ളരിഗെകീന്റ പണാക്കാറെരളെയോ ബുളിപ്പനാഗയ്. എന്നെഗെന്റെങ്കി നീ അയിരക്കു കൊടുത്തെങ്കു പഗേരമായി അയിര ഇഞ്ഞെമു ബിരുന്തുക്കു ബുളിപ്പൊരു. എന്റെങ്കി നീ ബിരുന്തു ബുളിപ്പടെക്കു പാവപട്ടെരളെമു കുൺട്ടെരളെമു കുറുടെരളെമു കയികാലു ബാരത്തെരെളെമു ബുളിക്കൊണു. അങ്ങാണെ ചെയിദെങ്കി നീക്കു നല്ലെയെയ് ബരുവൊയ്. നീ അയിരക്കു കൊടുത്തെങ്കു പഗേരമായി നീക്കു തരുവ അയിരളക്കെ ഒന്റുമുകാണിയില്ല. എന്റെങ്കി നേരുകാറെരളാന മയിച്ചെര ചത്തെരളിലിന്തു ഉഗിരുപുറാന്തു ഏന്തെപ്പടെക്കു നീക്കു അയിങ്കൊക്ക പഗേര കിട്ടുവൊയ്.”

ഏനെ കേട്ടിന്തിച്ചു ഏച്ചുന്റൊന്റ തിന്റുകുടിച്ചിടുവ ഉളേച്ചിന്ത ഒരുത്തെയ് അദുന്റൊന്റ: “ഈച്ചിരന്റ നാടിലി അദുന്റൊന്റ തിന്റുകുടിച്ചിണ്ടെയെയ് ബാഗിയകീന്റെയാന്റു” എന്റു പറേഞ്ചയ്.
അയിങ്കു ഏച്ചു ഒരു കദെ ഇട്ടുകൊടുത്തു: “ഒരു ജിന പല്ല ഒരു മയിച്ചെയ് ബലിയൊരു ബിരുന്തൊരുക്കിച്ചു ചുമാറു മയിച്ചെരളെ തിന്റുകുടിച്ചിടുവബേണ്ടി ബുളിച്ചു. ബിരുന്തുന്റ ചമേയമാനപ്പൊ പല്ല അദു താനു ബുളിച്ചെരളാത്തെക്കു തന്റ പണിക്കാറെനെ ചൊല്ലിബുട്ടിച്ചു ഇങ്ങാണെ പറേവ പറേഞ്ചു: ‘ബിരുന്തുക്കുകീന്റ ഒക്കാബഗേമു ഒരുക്കിബെച്ചുകീന്റെയ്, ഒക്കായിമു ബാമി.’ എന്റെങ്കി അയിര പല്ല ഒക്കായിമു തറിമുറി പറേഞ്ചരു. അയിരളിലി ഒന്റാമത്തെയെയ് പല്ല പറേഞ്ചയ്: ‘നാനു ഒരു ബയേലു എടുത്തുകീന്റെയ്. എനാക്കു അയിനെ പോയി നോക്കൊണു. അയിനെകോണ്ടു എന്റൊന്റ പൊറുക്കൊണു.’ ബേറൊരുത്തെയ് പല്ല പറേഞ്ചയ്: ‘നാനു അഞ്ചു ജോടി എരുദുവളെ എടുത്തുകീന്റെയ്. അയിരളെ ഏരുകെട്ടുവ പറ്റുവൊനോ എന്റു എനാക്കു നോക്കൊണു, അയിനെകോണ്ടു എന്റൊന്റ പൊറുക്കൊണു.’ ബേറൊരുത്തെയ് പല്ല പറേഞ്ചയ്: ‘എന്റ കനിയള ഇപ്പൊ കവുഞ്ചെനേപണി. അയിനെകോണ്ടു എനാക്കു ബരുവ പറ്റയ്.’
അയിനെകോണ്ടു ആ പണിക്കാറെയ് മടാങ്കിബന്തിച്ചു പല്ല അയിര പറേഞ്ചെനൊക്ക തന്റ ഉടേയക്കാറെന്റൊന്റ പറേഞ്ചുകൊടുത്തയ്. ഏനെ കേട്ടിന്തിച്ചു പല്ല ആ ഉടേയക്കാറെങ്കു അരിയബന്തിച്ചു അദു പല്ല തന്റ പണിക്കാറെന്റൊന്റ പറേഞ്ചു: ‘നീ അങ്ങടില ബീദിക്കുമു ചെറിചെറിയ പൊരുബൊവ്വരിഗെക്കുമു പോച്ചു അവുടെ കണ്ടുബന്റ പാവപട്ടെരളെമു കുറുടെരളെമു കുൺട്ടെരളെമു കയികാലു ബാരത്തെരളെമു ബുളിച്ചൊണ്ടു ബാ.’ ഉടേയക്കാറെയ് പറേഞ്ചപല്ലെ പണിക്കാറെയ് ചെയിദെയ്. എന്റിച്ചു പല്ല അയിനു മടാങ്കിബന്തിച്ചു ഉടേയക്കാറെന്റൊന്റ: ‘ഇമ്മത്തേ, നീ പറേഞ്ചെനൊക്ക നാനു ചെയിദുകീന്റെയ്. എന്റദെമു ഇഞ്ഞിമു ജാഗ ബാക്കികീന്റൊയ്’ എന്റു പറേഞ്ചയ്. അയിങ്കു ഉടേയക്കാറെയ് പല്ല പണിക്കാറെന്റൊന്റ പറേഞ്ചു: ‘നീ അങ്ങടിന്റ പുറാത്തെക്കു പോച്ചു, അവുടെ ബലിയ മാരിഗരിഗെമു ചെറിചെറിയ പൊരുബൊവ്വരിഗെമു ഗുടിച്ചിലു മാടി ബദുക്കിന്റെരളാത്തെക്കു പോച്ചു അയിരണ്ടൊന്റ എന്റ ഊരുക്കു ബരുവ തറുക്കതറുക്ക പറെ. എനാക്കു എന്റ കുള്ളു നിറേച്ചുമു മയിച്ചെര ബേണു.’ പിന്നെ അദു പല്ല ഇങ്ങാണെ പറേഞ്ചു: ‘മുല്ലെ നാനു ബിരുന്തുക്കു ബുളിച്ചിന്തെര ആരുമു എന്റൊന്റ ഉളേച്ചൊണ്ടു നാനു അട്ടുബെച്ചെനെ തിന്നരു.’”

ബലാബരി നെരേയ ഏച്ചുന്റൊന്റ പോയികോണ്ടിപ്പടെക്കു അദു തിരിഗിനിന്റൊണ്ടു അയിരണ്ടൊന്റ: “ഒരുത്തെയ് എന്റ ബൊവുകെട്ടി ആഗൊണിക്കി അയിനു തന്റ അപ്പെനെമു അവ്വെനെമു റാട്ടിനെമു മക്കളെമു അണ്ണെരളേയെരളെമു അക്കെരളേയെരളെമു ചിനേഗിക്കിന്റെനെമുകാട്ടി എന്നെ ചിനേഗിക്കൊണു. അയിനു തന്റ ഉഗിരുനെ ചിനേഗിക്കിന്റെനെമുകാട്ടി എന്നെ ചിനേഗിക്കൊണു. അല്ലക്കി അയിങ്കു എന്റ ബൊവുകെട്ടിയായിപ്പ പറ്റയ്. കുരിച്ചിലി തറേച്ചുകൊല്ലുവ കൊണ്ടുപോന്റ ഒരുത്തെനെപല്ലെ തനാക്കുബന്റ ബങ്കപ്പാടു തരിച്ചൊണ്ടു എന്റ ബൊവ്വെ ബാരക്കി അയിങ്കുമു എന്റ ബൊവുകെട്ടിയായിപ്പ പറ്റയ്.
നിങ്കളിലി ആരെങ്കില ഒരുത്തെയ് ബലിയ ഒരു കുള്ളു മാടുവ അലാന്തെങ്കി മുല്ലെ ആ കുള്ളു മാടുവ എത്തെനെ പയിച്ചെ ആവൊയ് എന്റു അയിനു കണാക്കു നോക്കുവൊനില്ല; അല്ലക്കി ആ കുള്ളു മാടുവബേണ്ടി അടിത്തറെ ഇട്ടുകാന്റു പണി തീരുപ്പ പറ്റദായിപോവൊയ്. അയിനെ മെലേന്റ ഒക്കാ മയിച്ചെരളുമു: ‘ഏനു പണി തൊടാങ്കിനയ്. എന്റെങ്കി അയിനെ ചെയിദു തീരുപ്പ ഏങ്കു പറ്റുവകാണി’ എന്റു പറേഞ്ചൊണ്ടു അയിനെ കളിയാക്കുവൊരു.
അല്ലക്കി ഒരു റാജാവു ബേറൊരു റാജാവുന്റൊന്റ പടെപൊരിവ പോന്റെങ്കു മുല്ലെ ഇരുവെദായിര പടെയാളിയളെമു കൂട്ടികോണ്ടുബന്റ റാജാവുന്റൊന്റ പടെപൊരിവ തനാക്കു പത്തായിര പടെയാളിയ മദിയോ എന്റു കണാക്കു മാടിന്റൊനില്ല. തന്റൊന്റ കീന്റെര പോരരു എന്റു തോന്റിനെങ്കി ആ റാജാവു ബലാബരി ദൂരത്തി ഇപ്പടെക്കുതന്നെ അയിനു കാരിയമൊക്ക പറേഞ്ചുതീരുപ്പബേണ്ടി തന്റ പേരിലി കുറെ മയിച്ചെരളെ അയിനാത്തെക്കു ചൊല്ലിബുടുവൊയ്. അങ്ങാണെതന്നെ നിങ്കളിലി ആരെങ്കില നിങ്കക്കു കീന്റെനൊക്ക ബേണ്ടെന്റു ബെച്ചുകാന്റു എന്റൊന്റ ബാരക്കി അയിങ്കു എന്റ ബൊവുകെട്ടിയായിപ്പ പറ്റയ്.
ഉപ്പു നല്ലെനാന്റു, എന്റെങ്കി അയിന്റ ചവികാണദാനെങ്കി ഒന്റുനെകോണ്ടുമു അയിങ്കു ചവി ബരുത്തുവ പറ്റയ്. ആ ഉപ്പു പിന്നെ നിലാത്തെക്കുമാഗയ് ബളാത്തെക്കുമാഗയ്. അയിനെ പുറാത്തെക്കു ബലിച്ചെറിയൊണ്ടി ബരുവൊയ്. കേട്ടിപ്പ മനാകീന്റെര കേട്ടിക്കൊട്ടു.”

Klausīties ലൂക്കോച്ചു 14