Yɛ́su pɔ́ yɛcɔ́ lɛ́Ꞌ, ḿbɛ́t ḿbɔ́ pɔ tsɛt ndɑ́-nɛnɔŋpɔꞋ ḿbɔ́ ńzíꞋ pʉɔ nɛ́ yúu ńdɔk ɛ́sɑ́Ꞌ Ŋkʉʉ sʉ́Ꞌnɛ mbɔ̌ lɑ́Ꞌ, pɛtɑ́tndɑ́ pɑnɔŋ pɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́p pɛkɛ́m tsɛt lɑ́Ꞌ tɔ́. Ḿbíkŋɛ wɛ́ ŋɡɔ: «Sẅíi wɛk, ɔ lɔk lík wɔ̌ ŋ́ɡɛ mɔ mɛnu? KwɑꞋ wɔ̌ túunɛ wú ŋɡɔ ɔ ɡɛ pɔ́Ꞌɔ?» Yɛ́su tsɔ́Ꞌ mbɔ̌ pɔ́p ŋɡɔ: «Mbɑ mɔ yɑ́ɑ, ŋ ɡɛ ḿbíkŋɛ wʉ́ʉ nɛ́ tɑ́Ꞌ nu. Pʉʉ sẅíi wɑ́ɑ: “Cẅɛ́ɛ ŋki-Jɑ̂ŋ kɑ pɔ́ ɛ́fú mbɔ̌ Sɛ́ kɛ pɔ mbɔ̌ pʉɔmɛsɔŋ?”» Pɔ́p zúꞋ, ŋ́kwɑŋɛ tsɛtsɛt pɔ́p ŋɡɔ: «Pɛkŋɛ lɑɑ ŋ́ɡɔ, Sɛ́ kɑ túunɛ wɛ́, mbɔ ɑ ɡɛ ḿbíkŋɛ wɛkŋɛ ŋɡɔ tɛ mɛlɑ́Ꞌkʉ̈ɔ́ pɛkŋɛ ŋ́kɑɑ pɛ́m nu-Jɑ̂ŋ pɔ́ ɔɔ? Ḿbɛn ŋ́ɡɔ, ɛ́ fú mbɔ̌ pʉɔmɛsɔŋ, mbɔ lɑ́Ꞌ ɡʉ ńdɔk mɛŋɡɔꞋ ńtɛ́m wɛkŋɛ ńjẅí, mbíꞋŋɡɔ pɔ́p tsɛt yɔ́p tú ḿbɔ́ ńjí ŋɡɔ Jɑ̂ŋ kɑ pɔ́ ŋɡɛ́mndʉ̈ɔꞋ-Sɛ́.» Ŋ́kwɑŋɛ pɑꞋɑ, ńtsʉ́Ꞌ ńtsɔ́Ꞌ pɔ ŋɡɔ, pɔ́p kɑ́ jí ŋu ɑ m̄bɔ́ ńdɔk wɛ́ ńtʉʉ pɔ́. Yɛ́su cú yɛ́ mbɔ̌ pɔ́p ŋɡɔ: «Mbɑ mɔ yɑ́ɑ, ŋ kɛ́ sẅíi wʉ́ʉ ŋu ẅí n dɔknɛ lík yɛ́ ŋ́ɡɛ mɔ mɛnu pɔ́.»


Ńcú pɔ́Ꞌɔ, ńzɛ nɛlɔk sɑknɛkɛt ńcú mbɔ̌ lɑ́Ꞌ ŋɡɔ: «Wɛcɔ́ ndʉ́m kɑ lɑ́Ꞌ ŋ́ɡẅɛɛ ŋkɑ́Ꞌ wɛ́, ŋ́ɡʉ tsɛtú ḿbi mɛtʉ́ mi pɛ́ kíɛ mɛntɑ́ɑ mɛ́ ńdɔk ńniitɛ mɛluꞋ, ńjʉ́ɔꞋ mbɔ̌ pʉɔ, ńdɔ sɛ́ ŋ́ɡʉ nɛnɛn, ŋ́ɡʉ ńtɔ́ zúꞋu ńnɑ́ŋ tɛꞋ.» Ŋkɑ́-nɛkɑ́p mɛntɑ́ɑ-tʉ́ ɡɛ ŋ́kuꞋ,ɑ túu wɛcɔ́ ŋu nǔu ɡɑŋfɑꞋ pɛ́ mbɔ̌ pʉɔ pinɛ pɔ́p ŋkɑ́Ꞌ ŋ́ɡɔ ɑ ɡʉ ńcẅɛ́ɛ yúu mi ɛ́ cẅɛtnɛ ŋkɑ́Ꞌ. A kúu zúꞋu, pɔnɛ ɡɑŋfɑꞋ kɛpɔŋ ɡẅɛɛ wɛ́ ńtswɑ́ɑ, ńzuŋ wɛ́ ɑ pɛn mbɔ́ fɛ̌ɛ. A pɛn ńtúu wɛcɔ́, pɔ́p pɛn ńtswɑ́ɑ wîwɑ́, ńzɔɔtɛ wɛ́, ńzuŋ wɛ́ ɑ pɛn mbɔ́ fɛ̌ɛ. Ŋɡɑŋ-ŋkɑ́Ꞌ pɛn ńtúu mbɑ́ɑtɛ yɛtɑ́t, pɔ́p kʉ́ɔꞋtɛ ẅîwɑ́, ńníꞋ mɛfʉ́ŋ nǔu wɛ́, ńzuŋ wɛ́. Pɔ́Ꞌɔ lɑ́, ŋɡɑŋ-ŋkɑ́Ꞌ ɡɔ́ɔ ŋ́kɛ́ ŋ́kwɑŋɛ ŋɡɔ: «Mɔ ŋ́ɡɛ ŋ́ɡɔ ku pɛꞋnɛ? Ńnɑ́ŋ tɛ ŋ́ɡɔ: “Mɔ, ŋ ɡɛ ńtúu Mɔ́ɔ wɑɑ wí ŋ kɔŋnɛ wɛ́ tɛꞋ. Pɔ́p ɡʉ ŋ́ɡɛ pɑ́Ꞌ lɑ́ ŋ́ɡɛ mɛkuꞋ mɛ́.” Mɔ́ɔ ɡʉ ŋ́kúu zúꞋu, pʉɔ pɔ́p ŋkɑ́Ꞌ jʉ́ɔ wɛ́, ńcú tsɛtsɛt pɔ́p ŋɡɔ: “Njʉ́ndɑ́ wɛ pʉ́ɔ liinɛ ɑ tɔ́nɛ. Pɛkŋɛ jẅí wɛ́, ńjʉ́ ŋkɑ́Ꞌ!” Ńcú pɔ́Ꞌɔ, ɛ́shuŋ wɛ́ ńdɔk ɛ́fú ŋkɑ́Ꞌ ńcẅɛt, ńjẅí wɛ́.»
Yɛ́su cú mɔ́ mɛnu, ḿbíkŋɛ ŋɡɔ: «Pʉʉ jʉ́ɔ yʉ́ʉ ŋɡɔ ŋɡɑŋ-ŋkɑ́Ꞌ ŋ́ɡɛ ńtɔ́ ŋ́ɡɛ ŋ́ɡɔ ku nǔu pɔ́p?» A ŋ́ɡɛ ńtɔ́ ŋ́ɡɛ pɛ́ jẅítɛ wɔ́p. A níꞋ ŋkɑ́Ꞌ mbɔ̌ pɑniitɛ mɛluꞋ pɛndɛꞋ. Lɑ́Ꞌ zúꞋ pɔ́Ꞌɔ, ńcú ŋɡɔ: «Ŋɡɑ́ŋ, ḿbɔ́ ɛ́ pɔɔ pɔ́ pɑ́Ꞌ pɔ́!» Yɛ́su ɡɔ́ɔ ŋ́kɛ́ ńdíŋɛ wɔ́p tɛ ńcú ŋɡɔ: «Tɛ wɔ ŋkɑŋ-ŋwɑꞋnɛ ẅí ɛ́ tsɛt ŋwɑꞋnɛ-Sɛ́ pɑꞋnɛ ńdɔk ńcú ŋɡɔ kʉ̈ɔ́: ŊɡɔꞋ yi pɑpɔ́ɔ ndɑ́ kɑ mɛꞋnɛ, kɑ ńtsʉꞋnɛ ŋɡɔꞋ yi ɛ́ piꞋnɛ ndɑ́? Ŋu ẅí ɑ vunɛ nǔu yîyɑ́ ŋɡɔꞋ, ŋ́ŋẅiꞋlɛ mbʉʉ yɛ́ tsʉʉ. Ɛ́ kɛ ḿbɛn ḿvu nǔu ŋu, mbɔ ɛ́ ɡʉ ŋ́ɡɔꞋ wɛ́ tsʉʉ.»

PɑꞋ pɛtɑ́tndɑ́-pɑnɔ́ŋ pɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ, kɑ zúꞋnɛ yɔ sɑknɛkɛt, ńdii ŋɡɔ ɑ cú pɔ mbɔ̌ pɔ́p lɑ́, pɔ́p lɔ́ɔ shʉ́ nɛɡẅɛɛ wɛ́ ŋkɑ́ ɛ̂yɑ́, lɑ́ ḿbɔ́k mík-lɑ́Ꞌ.
Ŋ́ɡɔ́ɔ ńzɛ nɛpɔ́ ḿbɑ́tɛ wɛ́, ńtúu pɛ mɑ́nɑ́ŋ nzʉʉ yɛ, lɑ́ pɔ́p pɔ́ yɔ́p nzʉʉ yɛ pɔ pɑꞋ pʉɔ sʉ́Ꞌnɛ, lɑ́ ḿbɔ́ ńzẅíꞋlɛ pɑꞋ ɑ ɡɛ ɛ́fɑɑnɛ ntsu wɛ́, lɑ pɛ́ lɔk ŋ́ɡẅɛɛ wɛ́ ŋ́ɡɑ́ mbɔ̌ ŋɡɔ́mnɑɑ-Pɑlɔ́mɑ. Pɔ́p tɔ́ ḿbíkŋɛ Yɛ́su ŋɡɔ: «Ndɛ, pɛk sɛ́ ńjí ŋɡɔ ɔ sɛ́ ńcú nu, ḿbɛn ḿbɔ́ ńdɛꞋlɛ pɔ nu yi ɛ́ tʉ́ʉnɛ ndʉ́ŋndʉŋ, ɔ kɑ́ líŋɛ pʉɔ pɔ nǔu shʉ́ pɔ́, ńdɛꞋlɛ nu nɛ́nẅín, pɔ pɑꞋ Sɛ́ sɛ́ ḿbíkŋɛ ŋɡɔ pɛ́ ɡɛ pɔ́Ꞌɔ. Sẅíi wɛk: “Nɛpʉ́ʉ nɛkŋɛ pɛꞋnɛ ḿbɛ́m ŋɡɔ pɛkŋɛ mɑꞋ ntsup-kɑ́sɑ-Pɑlɔ́mɑ kɛ ŋɡɑ́ŋ?”» Yɛ́su jí ŋɡɔ pɔ́p zẅíꞋ pɔ ntsu wɛ, ńcú mbɔ̌ pɔ́p ŋɡɔ: «Pʉʉ ńnyɛt wɑ́ɑ nɛ́ pɑk-ŋkɑ́p.» Pɛ́ ɡɑ́ mbɔ̌ wɛ́. A píknɛ ŋɡɔ: «Yɔ shʉ́-wɔ̌ ẅi ɛ́ nǔu ŋkɑ́p? Yɔ pɔ́ lík wɔ̌ yi ɛ́ nǔu?» Pɔ́p tsɔ́Ꞌ mbɔ̌ wɛ́ ŋɡɔ: «Ɛ́ wɛ Kɑ́sɑ, lík pɛn ḿbɔ́ pɔ yɛ́.» Yɛ́su kɛ́ ŋ́ɡɔ́ɔ ńcú mbɔ̌ pɔ́p ŋɡɔ: «Ɛ́ lɑɑ ḿbɔ́ pɔ́Ꞌɔ, pʉʉ ɡɑ́ yúu mi ɛ́ yɛ́ Kɑ́sɑ mbɔ̌ Kɑ́sɑ, ŋ́ɡɑ́ yɛ Sɛ́ mbɔ̌ Sɛ́.» Pɔ́p zúꞋ pɑꞋ ɑ tsɔ́Ꞌnɛ pɔ́Ꞌɔ, ɛ́ kʉꞋnɛ wɔ́p, pɔ́p pɔɔ jʉ́ɔ yɛcɔ́ lɔ́Ꞌ nǔu sẅíiŋɛ yi ɑ cúnɛ mbɔ̌ lɑ́Ꞌ pɔ́, ńjɑ́k shʉ́ nɛɡẅɛɛ wɛ́, ńtsʉ́Ꞌ ńnɑꞋ nɑꞋnɛ.


Pɛcɔ́ mbɔ́ntɑ́Ꞌ pʉɔ nǔu nɔɔ-Pɑsɑdukɑy ńtɔ́ nɛjɔ́ŋ Yɛ́su, Pɑsɑdukɑy pʉɔ pinɛ pɔ́p ŋ́kɑɑ ḿbɛ́m ŋɡɔ pɛpfú ɡʉ ńdɑ́Ꞌ ńzẅíimɛ nǔu nɛvú pɔ́. Ńcú ŋɡɔ: «Cícɑ, Mɔ̌sɛ̂ɛ kɑ ŋwɑꞋnɛ tsɛt nɛpʉ́ʉ nɛkŋɛ ŋɡɔ: “Ŋu lɑɑ ńzɔ́Ꞌ mɑŋɡɛ́, ḿbɛn ḿpfú kɛ́ pɔ́pmɛ ɡẅɛɛ mɔ́ɔ, mbɔ mɔ́ɔmɑ́ wɛ ɡẅɛɛ nɛsuk mpfúk, pɔ́pmɛ́ pí mbɔ́ŋkʉ̈ɔ́ ńdɔk nɔŋ njẅɛt-mɔ́ɔmɑ́ ɛ̂wɑ́.” Sẅíi wɛk: pɛcɔ́ pɔ́ɔpɛ́mɑ́ kɑ pɔ́, ḿbɔ́ mbɛ́ɛnɛ sɑɑmbɑ́, nduŋmbi zɔ́Ꞌ, ŋ́ɡɛ ḿpfú kɛ́ nɑ́ mɔ́ɔ. Mbɑ́ɑtɛ suk mpfúk, ḿbɛn ḿpfú yɛ́ kɛ́ nɑ́ mɔ́ɔ. Mbɑ́ɑtɛ yɛtɑ́t pɛn ɛ́suk mpfúk ɛ̂wɑ́, ḿpfú pɔ kɛ́ nɑ́ mɔ́ɔ. Pɔ pɔ́Ꞌɔ, tɛ pɔ́p sɑɑmbɑ́ zɔ́Ꞌ wîwɑ́ mɑŋɡɛ́, ŋ́kɛ́ ḿpfú pɔ kɛ́ nɑ́ mɔ́ɔ. Ɛ́ ɡɔ́ ńdẅiklɛ mɑŋɡɛ́ ɛ̂wɑ́ pfú yɛ́. PɑꞋ pɔ́p sɑɑmbɑ́ kɑ tɛmtɛ ńzɔ́Ꞌ mɑŋɡɛ́ wɔ lɑɑ, pɛ́ ɡʉ ńdɑ́Ꞌ zẅíimɛ nǔu nɛvú, ɑ pɔ́ wɛ wɔ̌ ŋkɑ́ ɛ̂yɑ́?» Yɛ́su tsɔ́Ꞌ mbɔ̌ pɔ́p ŋɡɔ: «Ɛ́ nǔu ŋkɔ̂ɔnɛ, mbɛ́ɛnɛ mbɑ pɑŋɡɛ́ sɛ́ ńzɔ́Ꞌ. Lɑ́ ŋ́ɡʉ nǔu pʉɔ pinɛ Sɛ́ jʉ́ɔnɛ ŋɡɔ ɑ ɡʉ ńzẅíimɛ wɔ́p, pɔ́p kúu yɔ́p tsɛt ŋɡɔŋ fí, wɛcɔ́ nɛzɔ́Ꞌ pɔɔ pɛn ḿbɛ́t ɡú pɔ́. Ńzɛ ŋ́ɡɔ ḿbɔ́ pɔ́p pɔ́ɔ ŋ́ɡʉ ḿbɛn ŋ́ɡɛ ḿpfú pɔ́. Pɔ́p tsʉ́Ꞌ ḿbɔ́ pɔ pɑꞋ pɛcʉ̈ɔ́Ꞌ-Sɛ́ lɑ́, ńtsʉ́Ꞌ pɔ́-Sɛ́, mbíꞌŋɡɔ Sɛ́ cẅɛ́ɛ wɔ́p mbɔ̌ nɛvú. KwɑꞋ Mɔ̌sɛ̂ɛ kɑ lɛɛ lɛɛnɛ ńdɛꞋlɛ ŋɡɔ pʉɔ ɡʉ ńdɑ́Ꞌ zẅíimɛ nǔu nɛvú. Ɛ́ nǔu zʉꞋ ŋwɑꞋnɛ yi ɑ kɑ ŋwɑꞋnɛnɛ nǔu nu-mɔ́cúꞋ nɛɡíi ẅi ɑ kɑ jʉ́ɔnɛ múk pɔ́ ŋ́kʉ́ nǔu lɑ́ ɛ́ pɔɔ ḿbɔ́ shí pɔ́, ɑ fúŋ Tsɑpʉɔ ŋɡɔ, Sɛ́ Ábɛlɛhɑ̂m, ḿbɔ́ Sɛ́ Ɛ́sɑk, ḿbɔ́ Sɛ́ Yɑkɔ̂p. Yɛ́su pɛn ńcú ŋɡɔ, Sɛ́ kɑ́ pɔ́ Sɛ́-pɛpfú pʉɔ pɔ́, A Sɛ́-pʉɔ ntʉʉ. MbíꞋŋɡɔ ɛ́ ɡʉ mbɔ̌ Sɛ́, mbɔ pʉɔ pɛtsʉʉ ntʉʉ.» Yɛ́su tsɔ́Ꞌ pɔ́Ꞌɔ, wɛcɔ́ ŋkyɛ́Ꞌtɛ nɛpʉ́ʉ-Mɔ̌sɛ̂ɛ túŋtɛ ńcú ŋɡɔ: «Ndɛ ɔ tsɔ́Ꞌ kwɑꞋ sʉ́Ꞌnɛ. Tɛ ɛ́fú pɔ́Ꞌɔ, ŋu pɔɔ pɛn ŋ́ɡẅɛɛ sʉktʉ́m nɛpɛn ḿbíkŋɛ wɛ́ nɛ́ yɛcɔ́ nu pɔ́.»


Yɛ́su pɛn ńcú mbɔ̌ pɔ́p ŋɡɔ: «Pʉʉ kwɑŋɛ yʉ́ʉ ŋɡɔ pɛ́ zíꞋ pʉɔ ŋɡɔ Nzɑ́Ꞌŋkʉ ẅi Sɛ́ kɑ lɑ́Ꞌnɛ ŋ́kɑꞋ ŋɡɔ ɑ ɡʉ ńdɑ́Ꞌ ḿbɔ́ ŋu nǔu njẅɛt-Fɔɔ Ndɑvît pɛꞋnɛ ńdɔk ḿbɔ́ ŋɡɔ ku?» Fɔɔ Ndɑvît kwɑꞋ jʉ́ ńcú tsɛt ŋwɑꞋnɛ-mɛzɔpŋki ŋɡɔ:
Tsɑpʉɔ Sɛ́ cú mbɔ̌ wɑɑ Tɑ́t ŋɡɔ:
«Tɔ́ ńnɑ́ŋ nǔu ɡúŋ-pɔ́ yɑ́ɑ yi tʉʉ,
ńzẅíꞋlɛ n dɔk ɡɑŋmbuu pú, ŋ́ɡɛ ntíknɛ mɛku mú.
Lɑ́ Fɔɔ Ndɑvît fúŋnɛ wɛ́ tɑ́t pɑꞋɑ, mbɔ ɑ pɛn ḿbɔ́ Nzɑ́Ꞌŋkʉ, ḿbɛn ḿbɔ́ ŋu nǔu yɛ njẅɛt ŋ́ɡɔ ku?»
Yɛ́su ɡɛ ńtswɛ́ ḿbɔ́ ŋ́ɡɑ́ ntík mbɔ̌ ɡɑŋku pɛ́, lɑ́Ꞌ tsʉʉ yinɛ ɛ́ ḿbɔ́nɛ zúꞋu pɔ́ ńzúꞋ. A cú ŋɡɔ: «Pʉʉ lʉ́ɔꞋ pɑkyɛ́Ꞌtɛ nɛpʉ́ʉ-Mɔ̌sɛ̂ɛ. Pɔ́p kɔŋ nɛmɑꞋ mɛsɛsɑ ndẅí ńdɔk ḿbɔ́ ŋ́kɑ́t, ḿbɛn ŋ́kɔŋ ŋɡɔ pɛ́ cɛꞋlɛ wɔ́p ndǔ zɑ́n. Ŋ́kúumɛndɑ́-cúꞋlɛ, ŋ́kɑŋ yɔ́p zʉꞋ pɔ mbi. Pɔ́p kúu zʉꞋ mɛtsɑ́ɑtɛ, ńnɑ́ŋ pɔ nǔu zʉꞋ pɛlʉ́m. Pɔ́p kɛ́nɛ ḿbɛn ńdɔk jínu ńcẅɛ́ɛ yúu pɛpfúk, ńtsʉ́Ꞌ nɛcɛꞋlɛ Sɛ́, ńdɔk nɛcú nu ɛ́ sɑk ɛ́fú mík pʉɔ. Sɛ́ ɡʉ ńdɑ́Ꞌ ńzɑ́p yɔ́p tsɑ́ŋ ɛ́ tɛn tɛꞋ.»

Klausīties Lúkɑ́shi 20