Sgaw Karen Common Bible © Bible Society of Myanmar, 1992.

ကစၢ်ယွၤဆိၣ်ဂ့ၤစီၤနိအၤဒီးအဖိခွါတဖၣ်ဒီးစံးဝဲ, “အိၣ်ဒီးသုဖိသုလံၤအါဂၤဒ်သိးသုစၢၤသုသွဲၣ်တဖၣ်ကအိၣ် မူအိၣ်ဂဲၤလၢဟီၣ်ခိၣ်ဒီဘ့ၣ်ညါန့ၣ်တက့ၢ်. ကယဲၢ်ဆၣ်ဖိကီၢ်ဖိခဲလၢာ်, ထိၣ်ဖိလံာ်ဖိဒီးဒ့ၣ်ဖိညၣ်ဖိတဖၣ် ကအိၣ်မူလၢတၢ်ပျံၤတၢ်ဖုးသုန့ၣ်လီၤ. အဝဲသ့ၣ်ဘၣ်တၢ်ပာ်အီၤလၢသုတၢ်စိတၢ်ကမီၤအဖီလာ်န့ၣ်လီၤ. သုအီၣ်အဝဲသ့ၣ်ဒီးတၢ်မဲတၢ်မါအသံကစဲာ်စ့ၢ်ကီးသ့ဝဲန့ၣ် လီၤ. ယဟ့ၣ်လီၤတၢ်န့ၣ်ခဲလၢာ်လၢသုတၢ်အီၣ်အဂီၢ်န့ၣ်လီၤ. တၢ်တမံၤလၢသုတဘၣ်အီၣ်အီၤန့ၣ်တၢ်ညၣ်လၢတၢ်သွံၣ်အိၣ်ဒံးလၢ အပူၤန့ၣ်လီၤ. ယတြီတၢ်အံၤမ့ၢ်လၢသးသမူ အိၣ်လၢတၢ်သွံၣ်အပူၤအဃိလီၤ. ဒီးကယဲၢ်ပှၤတဂၤလၢ်လၢ်လၢအဟံးန့ၢ်ပှၤအသးသမူန့ၣ်ကဘၣ်တၢ်စံၣ် ညီၣ်အီၤလီၤ. ကယဲၢ်ဆၣ်ဖိကီၢ်ဖိတဒုဒုလၢအဟံးန့ၢ်ပှၤကညီအသးသမူန့ၣ် ယကစံၣ်ညီၣ်အီၤလၢတၢ်သံန့ၣ်လီၤ. ပှၤကညီဘၣ်တၢ်တ့အီၤလီၤဂာ်ဒ်ကစၢ်ယွၤအသိးဒီးပှၤတဂၤဂၤလၢ အမၤသံပှၤကညီတဂၤန့ၣ်အနီၢ်ကစၢ်ဒၣ်ဝဲကဘၣ်တၢ်မၤသံအီၤလၢပှၤ ကညီသကိးသကိးဒီးအီၤန့ၣ်လီၤ.
သုကဘၣ်အိၣ်ဒီးသုဖိသုလံၤအါအါဂီၢ်ဂီၢ်ဒ်သိးသုစၢၤသု သွဲၣ်တဖၣ်ကအိၣ်မူလၢဟီၣ်ခိၣ်ဒီဘ့ၣ်ညါန့ၣ်လီၤ.”
ဒီးကစၢ်ယွၤစံးဘၣ်စီၤနိအၤဒီးအဖိခွါတဖၣ်, “ဒီးခဲကနံၣ်အံၤယမၤယတၢ်အၢၣ်လီၤအီလီၤဒီးသုဒီးသုစၢၤ သုသွဲၣ်တဖၣ်, ဒီးကယဲၢ်တၢ်အိၣ်ဒီးတၢ်အမူအသါခဲလၢာ်, ကယဲၢ်ထိၣ်ဖိ လံာ်ဖိဒီးဆၣ်ဖိကီၢ်ဖိတဖၣ်, ကယဲၢ်တၢ်ခဲလၢာ်လၢအဟးထီၣ်လၢ ကဘီပူၤဃုာ်ဒီးသုန့ၣ်လီၤ. ယမၤယတၢ်အၢၣ်လီၤအီလီၤဒီးသုလၢတၢ်ကတိၤဒ်အံၤလီၤ. ယအၢၣ်လီၤသုလၢကယဲၢ်တၢ်အမူအသါခဲလၢာ်တဘၣ်တၢ်မၤ ဟးဂီၤကွံာ်အီၤလၢထံလုၣ်ဘၢတၢ်လၢၤဘၣ်. ထံလုၣ်ဘၢတၢ်တမၤဟးဂီၤကဒီးဟီၣ်ခိၣ်နီတစုလၢၤဘၣ်. ဒ်တၢ်အၢၣ်လီၤအီလီၤလီၤထူလီၤယိာ်အပနီၣ်တမံၤလၢယမၤ ဒီးသုဒီးတၢ်အမူအသါခဲလၢာ်အသိးန့ၣ်, ယပာ်လီၤယချံၣ်လၢတၢ်အၢၣ်အပူၤလီၤ. တၢ်အံၤကမ့ၢ်ယတၢ်အၢၣ်လီၤအီလီၤအတၢ်ပနီၣ်လၢယမၤဒီးဟီၣ်ခိၣ်လီၤ. တုၤယမၤဘၢမူခိၣ်လၢတၢ်အၢၣ်တဖၣ်န့ၣ်ဒီးတၢၢ်ကွဲၤဖျါထီၣ်ဝဲ ဒၣ်န့ၣ်, ယကသ့ၣ်နီၣ်ထီၣ်က့ၤယတၢ်အၢၣ်လီၤအီလီၤဒီးသုဒီးကယဲၢ်ဆၣ်ဖိ ကီၢ်ဖိခဲလၢာ်လၢထံလုၣ်ဘၢတၢ်တမံၤအသုတမၤဟးဂီၤကဒီးကယဲၢ် တၢ်မူတၢ်သါခဲလၢာ်နီတစုလၢၤတဂ့ၤန့ၣ်လီၤ. တုၤတၢၢ်ကွဲၤဖျါထီၣ်လၢတၢ်အၢၣ်အကျါန့ၣ်ဒီးယကထံၣ်တၢ်အံၤဒီး သ့ၣ်နီၣ်ထီၣ်က့ၤတၢ်အၢၣ်လီၤအီလီၤလီၤထူလီၤယိာ်လၢယမၤဒီး ကယဲၢ်တၢ်မူတၢ်သါခဲလၢာ်လၢဟီၣ်ခိၣ်ဖီခိၣ်န့ၣ်လီၤ. တၢ်န့ၣ်မ့ၢ်တၢ်အၢၣ်လီၤအီလီၤအပနီၣ်လၢယမၤဒီးကယဲၢ်တၢ်အမူ အသါခဲလၢာ်န့ၣ်လီၤ.”

စီၤနိအၤအဖိခွါတဖၣ်လၢအဟးထီၣ်လၢကဘီပူၤန့ၣ်မ့ၢ်ဝဲ စီၤၡ့ၣ်, စီၤဃၣ်ဒီးစီၤယ့ဖ့းသးတဖၣ်လီၤ. (စီၤဃၣ်န့ၣ်မ့ၢ်စီၤကနၤဧၣ်အပၢ်န့ၣ်လီၤ.) စီၤနိအၤအဖိခွါသၢဂၤအံၤမ့ၢ်ကယဲၢ်ပှၤဟီၣ်ခိၣ်ဖိခဲလၢာ် အပၢ်လၢပျၢၤတဖၣ်န့ၣ်လီၤ.
စီၤနိအၤလၢအမ့ၢ်ပှၤထူစံာ်ဖိတဂၤအံၤမ့ၢ်ဝဲပှၤအဆိကတၢၢ် တဂၤလၢအသူၣ်လီၤစပံးအလီၢ်န့ၣ်လီၤ. ဒီးအဝဲအီစပံးထံတနီၤဝံၤအလီၢ်ခံမူၤဝဲဒီးဘ့ၣ်လီၤကွံာ် အကူအသိးဒီးမံဝဲအိၣ်ဘ့ၣ်ဆ့လၢအဒဲပူၤန့ၣ်လီၤ. ဖဲစီၤကနၤဧၣ်အပၢ်စီၤဃၣ်ထံၣ်ဝဲလၢအပၢ်အိၣ်ဘ့ၣ်ဆ့န့ၣ်အဝဲဟး ထီၣ်ကွံာ်ဝဲဒီးတဲဘၣ်အဒီပုၢ်ဝဲၢ်ခံဂၤန့ၣ်လီၤ. ဒီးစီၤၡ့ၣ်ဒီးစီၤယ့ဖ့းသးဟံးန့ၢ်ဆ့ကၤဖးထီတဘ့ၣ်ဒီး စိာ်ဝဲလၢအဝဲသ့ၣ်အဖံဘၣ်ခိၣ်အလီၢ်ခံန့ၣ်လီၤ. ဒီးအဝဲသ့ၣ်လဲၤဂုၤခံဆူဒဲပူၤ, ဃၣ်အမဲာ်ဆူတၢ်ချၢဒီးကး ဘၢအပၢ်ဒ်သိးအသုတထံၣ်အပၢ်အတၢ်အိၣ်ဘ့ၣ်ဆ့တဂ့ၤန့ၣ်လီၤ. ဒီးတုၤစီၤနိအၤပၢၢ်ထီၣ်က့ၤလၢအတၢ်မူၤသံးဒီးသ့ၣ်ညါဝဲ တၢ်လၢအဖိခွါအဆံးကတၢၢ်မၤအီၤဒ်လဲၣ်န့ၣ်ဒီး,
အဝဲစံး, “တၢ်ဆိၣ်အၢအိၣ်လၢစီၤကနၤဧၣ်အလိၤလီၤ. အဝဲကကဲထီၣ်အဒီပုၢ်ဝဲၢ်ခွါတဖၣ်အကုၢ်လီၤ.
စံးထီၣ်ပတြၢၤယွၤ, စီၤၡ့ၣ်အကစၢ်ယွၤန့ၣ်တက့ၢ်. စီၤကနၤဧၣ်ကမ့ၢ်စီၤၡ့ၣ်အကုၢ်န့ၣ်လီၤ.
မ်ကစၢ်ယွၤဒုးအိၣ်ထီၣ်တၢ်ဘၣ်ဘျုးအါထီၣ်လၢစီၤယ့ဖ့းသး အဂီၢ်တက့ၢ်. မ်အစၢၤအသွဲၣ်ကအိၣ်မူသကိးဒီးစီၤၡ့ၣ်အပှၤဂီၢ်မုၢ်န့ၣ်တက့ၢ်. စီၤကနၤဧၣ်ကမ့ၢ်စီၤယ့ဖ့းသးအကုၢ်န့ၣ်လီၤ.”
ထံလုၣ်ဘၢတၢ်ဝံၤအလီၢ်ခံန့ၣ်စီၤနိအၤအိၣ်မူဝဲအနံၣ်သၢကယၤ ယဲၢ်ဆံ, ဒီးသံဝဲဖဲအသးအိၣ်အနံၣ်ခွံကယၤယဲၢ်ဆံန့ၣ်လီၤ.

Klausīties လံာ်တၢ်ကဲထီၣ်အခီၣ်ထံး 9