Dagaare, Southern - 2014 Edition ( Non-Drama NT)

Bible translation: Dagaare © 2014 Bible Society of Ghana www.biblesociety-ghana.org/ ℗ 2017 Hosanna A Gansoŋ Poɔ Yelbie ama yi la a Dagaare Gansoŋ poɔ, naŋ waa a Gansoŋ Laŋne naŋ be a Gaana paaloŋ poɔ soobo. Bana la taa o faŋ zaa

Dagaare, Southern - 2014 Edition (Drama NT)

First New Testament in Dagaare Language © The Bible Society of Ghana, 2013.

A Yeezu da be la zie kaŋ a puoro, kyɛ O naŋ da wa puori baare la ka O potuuribo kaŋ da wa yeli ko O, “Daana, wuli te lɛ te naŋ na maŋ puori aŋa Gyɔɔn naŋ da wuli o potuuribo lɛ.” Ka a Yeezu da yeli ko ba, “Ka yɛnee maŋ wa puoro, yɛ maŋ yeli:
Te Saa, ka a fo yuori waa soŋ.
Ka fo naaloŋ wa.
Ko te bondirii bebiri zaa.
Kyɛ di a te yelbebe suuri ko te,
bonso, te maŋ di la suuri ko neɛzaa naŋ di te sane.
Ta sage ka te kpɛ enyaabo poɔ.”

Ka a Yeezu da yeli ko ba, “Yɛ de ka yɛ kaŋ la taa o ba, a gaa o zie tensogpozentaa a te yeli ko o, ‘N ba, pɛŋ ma boroboro ata, bonso, N ba kaŋ yi la sori wa, kyɛ ka N ba taa bonzaa na ko o ka o di.’ Ka o leɛ yeli sɔge a die poɔ, ‘Ta dɔɔnɔ ma, a dendɔre larɛɛ la baare, kyɛ ka maa ne N bibiiri gaŋ. N kontoɔ̃ iri de bonzaa ko fo.’ Maa yele korɔ yɛ, ka o naŋ koŋ iri a de bonzaa ko o, o naŋ waa o ba zuiŋ, kyɛ a dɔɔ naŋ dɔɔnɔ o zuiŋ, o na iri la a ko o bonzaa o naŋ boɔrɔ.”
“Lɛnso ka N yele korɔ yɛ, Yɛ sɔre, ba na ko yɛ la, yɛ bɔ, yɛ na nyɛ la, yɛ kpaare a pane, ba na yuo ko yɛ la ka yɛ kpɛ. Bonso, neɛzaa naŋ maŋ sɔre, ba maŋ ko o la, neɛzaa meŋ naŋ maŋ bɔ maŋ nyɛ la, ka a pane maŋ yuo ko neɛzaa meŋ naŋ kpaare. Nembuo la be yɛ poɔ ka o bie na sɔre zoma, ka o de waabo ko o? Bee ka o bie sɔre gyɛle ka o de naŋa ko o? Ka yɛnee gba naŋ waa nenfaare baŋ ka yɛ de bonveɛle ko yɛ bibiiri, bonso, ka a yɛ Saa naŋ be a tenvelaa poɔ koŋ ko banaŋ zaa naŋ sɔre a Vooroŋ Soŋ yi O zie.”


A Yeezu da digre la sefaa naŋ waa muu yire dɔɔ kaŋ eŋɛ, kyɛ a sefaa naŋ da wa yi baare, a dɔɔ muu da yelee yɛlɛ ka a noba nɔɛ da maa. Ka a noba mine da yeli, “A Bɛlezɛbu naŋ e a sefaare naa la ko O a kpeɛ̃õ ka O digre ne a sefaare.” Kyɛ a noba mine naŋ da boɔrɔ ka ba gyenne a Yeezu la so ka ba da yeli ka O e yelkpeɛŋaa naŋ yi tenvelaa ka ba nyɛ. Kyɛ a Yeezu da baŋ la ba poteɛrɛ, a da yeli ko ba, “Paaloŋ zaa deme naŋ leɛ zɔɔrɔ ne taa na leɛ la dalempoɔ, ka a yie le dɔgle taa. Azuiŋ ka Setaana naaloŋ wa kyataa a zɔɔrɔ ne taa, wola ka o naaloŋ na e are, yɛ naŋ pãã yeli ka Bɛlezɛbu kpeɛ̃õ la ka N de digre ne a sefaare? Ka anaŋ wa waa ka Bɛlezɛbu kpeɛ̃õ la ka N digre ne a sefaare, ka lɛ aŋ meŋ kpeɛ̃õ la ka a yɛ sefa-digribe meŋ digre ne a sefaare? A ŋaa zuiŋ ba na waa la yɛ sɛrediribe. Kyɛ ka Naaŋmen kpeɛ̃õ wa la ka N digre ne a sefaare, a lɛ wuli ka Naaŋmen naaloŋ ta yɛ la. Ka gandaa wa gyere o logi kyɛ nyɔge o tammo a guuro ne o yiri, a o boma na are la zomm lɛ. Kyɛ ka neɛ kpeɛ̃õ naŋ gaŋ o wa zɔɔtoɔ̃ o, o na faa la a o zɔɔzɔɔ-boma na o naŋ da dɛle, kyɛ de o boma poŋ noba. Soba na zaa naŋ ba be N zie, zɔɔrɔ ne ma la, ka soba na meŋ naŋ ba boɔrɔ laŋna N deme poɔ, ŋmeɛrɛ yaara bara.”


“Ka sefaa wa yi neɛ eŋɛ, o maŋ yɔ yoɔrɔ la dondoli zu, a boɔrɔ pɛnnoo zie, kyɛ ka o naŋ ba wa nyɛ a pɛnnoo zie, o maŋ yeli la, ‘N na leɛ gaa la a yiri na poɔ N naŋ da yi na.’ Ka o naŋ wa leɛ wa, o maŋ nyɛ la a yiri ka o peere yi, a veɛlɛ o zaa. O pãã maŋ leɛ gaa la, a te taa o taaba mine ayopoĩ naŋ waa faare gaŋ o meŋɛ wa ne, ka a zaa wa kpeɛrɛ be. A neɛ ŋa soba yɛlɛ pãã maŋ maaleŋ eɛɛ faa yaga gaŋ o dɛndɛŋ na.”

A Yeezu naŋ da naŋ yele a yɛlɛ ama la ka pɔge kaŋ naŋ be a noba poɔ da ŋmɛ kulinni eŋ O kyɛ yele, “A poɔ na naŋ dɔge fo ane berɛ na fo naŋ ɛnne nyɛ la maaloo.” Ka a Yeezu leɛ yeli, “Banaŋ naŋ woŋ a Naaŋmen yelbiri a tuuro a yelbiri la nyɛ maaloo.”


A noba naŋ da wa te erɛ yaga, Yeezu da piili yele korɔ ba la, “A zenɛ noba kpɛ la faa yaga. Ba maŋ boɔrɔ la ka ba nyɛ yelmannaa, kyɛ ba koŋ nyɛ yelmannaa zaa, ka a Gyona yelmannaa na yoŋ naane. Aŋa lɛ a Gyona naŋ da waa yelmannaa ko a Ninevɛ noba, lɛ meŋ la ka a Nensaala Bie meŋ na waa yelmannaa ko a zenɛ noba. A Kɔmpare paaloŋ pɔgenaa ne a zenɛ noba na laŋ iri la a kuuni poɔ a sɛrɛɛdiibu daare, ka o ko ba saanaa. Bonso, o da yi la tateŋɛ wa ka o woŋ a Solomɔn yɛŋ yɛlɛ, kyɛ yɛ nyɛ, neɛ kaŋ naŋ gaŋ Solomɔn be la a kyɛ! A Ninevɛ noba ne a zenɛ noba na laŋ iri la a kuuni poɔ a sɛrɛɛdiibu daare, ka Ninevɛ noba ko a zenɛ noba saanaa. Bonso, a Ninevɛ deme da leɛ la ba eebo a saŋ na a Gyona naŋ kanne ba. Kyɛ nyɛ, neɛ kaŋ naŋ gaŋ a Gyona be la a kyɛ!


Neɛzaa ba maŋ kyɔŋ fentelɛ a de gbaale kyigi pɔge. O maŋ de pare la fentel-daa zu ka noba naŋ kpeɛrɛ a die na nyɛrɛ zie. A fo nimiri la a fo eŋɛ fentelɛ. Ka a fo nimiri wa taa laafeɛ, fo eŋɛ zaa na paale ne la veɛloŋ. Kyɛ ka a fo nimiriŋ wa sãã, a fo eŋɛ zaa na paale ne la ligruŋ. Azuiŋ, maaleŋ kaa velaa ka a veɛloŋ naŋ be fo eŋɛ ta wa e ligruŋ. Ka a fo eŋɛ zaa gbuli wa taa veɛloŋ, ka o zie kanzaa ba kye lige poɔ, o zaa na nyɛrɛ la aŋa fentelɛ naŋ kyaane fo ane o veɛloŋ.”


Yeezu naŋ da naŋ yele a yɛlɛ, a Farazii neɛ kaŋ da wa boɔle O la ka O wa o yiri ka ba di. Lɛ la ka a Yeezu wa kpɛ te zeŋ a diibu zie. A Farazii ŋa noɔre da maaɛ la ne o naŋ nyɛ ka a Yeezu ba pɛge O nuuri kyɛ dire a diibu. Lɛ la ka a Yeezu da yeli ko o, “A yɛnee Faraziimine maŋ pɛge la a ŋmane ane a laa puori, kyɛ ka a yɛ poore kpɛ paale ne bombɔ-gaŋne ane potuoloŋ. Yɛnee dambolo ŋa! A neɛ na soba naŋ maale a puori, ona naane maale a poɔ meŋ be? Azuiŋ yɛ de boma naŋ be a yɛ ŋmane ane a laa poore ko nembaalba, kyɛ nyɛ, bonzaa na eɛɛ velaa ko yɛ.”
“Kyɛ yɛ yuori la we, Faraziimine! Yɛ maŋ iri la badoge ane nyɛremaanyuu ane zɛva-boorɔ zaa a tere a Naaŋmen kyɔɔtaa kyɛ ba kyɛllɛ mennoŋ ane Naaŋmen nɔmmo yɛlɛ. A ama la ka a seŋ ka yɛ da erɛ a kyɛ ta bare a anaŋ meŋ eebo. Yɛ yuori la we, Faraziimine! Yɛ maŋ nɔŋ ka yɛ zeŋ a nembɛrɛ zenziiri a puoruuderiŋ, kyɛ nɔnɔ ka noba puoro yɛ ne emmo a dare pooreŋ. Yɛ yuori la we! Yɛ waa ŋa yaare naŋ ba maŋ sãã, ka noba ba baŋ kyɛ maŋ do kyɛnɛ a zu.”
Ka a bege baŋna kaŋ da leɛ yeli sɔge a Yeezu, “Wulwullo, fo naŋ yeli a ŋaa, tenee meŋ la ka fo to.” Ka a Yeezu yeli, “Yɛ meŋ yuori la we, yɛnee bege baŋnema! Yɛ maŋ tuo la noba tuotegrɛ naŋ gaŋ ba faŋ, kyɛ yɛmenne koŋ de nubiri seene ne a tuobu. Yɛ yuori la we! Bonso, yɛnee la mɛ a Ŋmen-yelmanneba na a yɛ sããkommine naŋ ko yaare. A ŋaa yɛ naŋ e wuli ka yɛ di la danseɛ kyɛ sage a lɛ a yɛ sããkommine naŋ e; bonso, banaŋ da ko a Ŋmen-yelmanneba kyɛ ka yɛ meŋ mɛ a ba yaare. A lɛnso ka Naaŋmen yeli O yɛŋ poɔ, ‘N na toŋ la Ŋmen-yelmanneba ane apostoliimine ba zie, ka ba na ko ba mine kyɛ dɔgre ba mine.’ Azuiŋ a Ŋmen-yelmanneba zẽẽ ba naŋ kyiri, a yi a teŋɛ piiluu saŋ, na do la a zenɛ noba, a piili ne Abɛl te tɔ Zakareya ba naŋ da ko a Naaŋmen bagmaalkuuri ane a zisoŋ sogɔŋ. Serɛzaa ka N yele korɔ yɛ, a ba dɔgroŋ na dɔgle la a zenɛ noba zu. Yɛ yuori la we, yɛnee bege baŋnema! Bonso, yɛ nyɔge la a bammo die saafebiri de; yɛmenne ba kpeɛrɛ kyɛ la pigi banaŋ meŋ naŋ boɔrɔ kpeɛbo sori.”
A Yeezu naŋ da wa yi yeŋ, a Naaŋmen bege wulwulibo ane a Faraziimine da piili zɔɔrɔ la yɛlɛ yaga, a soore O yɛlɛ yaga, a boɔrɔ ka ba bɛre nyɔge O a O yɛlɛ yeluu poɔ.

Klausīties Luk 11