Mien Bible (Thai Script) © Thailand Bible Society, 2007

เยียม ลู่ง เดี๊ย เมี่ยน ม่าน เจี์ย กอน หฮยาง เจี๊ยน ฝาว, แอ๋ง ยู์ง ตุ๊ เซียะ, ม่าย เต๋ย โต์-เมี่ยน ตอน ปวัด ป้าม เมี่ยน เญย เซียะ เหฑว่ย. นิ่น บัว หย่า กิ๊น เต๋ย หล่ง โหฒว เอ๊า. เฒี้ยว ฯฒฯ ก๊อง, “เยีย เญย สีง ลี่ง ไม้ เหธา ป้าม เมี่ยน เหยียด ลิ์ว เยียม. นิ่น บัว เป๋น อ๊อ ซิน ฮนั้ง. ยั่ง น้าย เจี๋ย นิ่น บัว เญย หฮญัง-เจ๊ย เฒี่ยง ตุ๊ เถา เหยียด แป๊ะ หญี่ เหฒียบ หฮญัง.”
วั้ว หฒั่น ม่าย เน​ฟิน เมี่ยน เยียม ลู่ง เดี๊ย, ฆะฮ้า หธ่อ ม่าย เญย. เซ โต์-เมี่ยน ตอน หล่ง ป้าม เมี่ยน เซียะ ปุน เหฌี่ย ต้าย เญย ฟุน-ฟะ. น้าย เซ โล์-ฮนอย ม่าย ปั้น เหฒ่ย, ม่าย เม่ง เต้า เญย เมี่ยน.
เฒี้ยว ปวัด เยียม ลู่ง เดี๊ย เมี่ยน โหฒว หว่าย สี่ ธั้ม. เฮญี้ยว หาย หฒั่น ขูง ฮนั้ม ธ้วด หว่าย เญย เจ๊า ฮนั้ง. เฒี้ยว ไฮ์ เฮญี้ยว มุน ไห่, ฮนั้ม-หฑวน, เฝย ตุ๊ นิ่น ไม้ ตู๋ง เหฒย เมี่ยน ม่าน ต้าย เยียม ลู่ง เดี๊ย. นิ่น หย่า เฑ่า ไห่. เฒี้ยว ก๊อง, “เยีย อ๋อย เฝียว เหฑ่ง, กว๊าด เหฑ่ง เยีย เหฒย ต้าย เญย เมี่ยน, ไม้ ปุน เยียม เดา-เป้ย. เลี่ยม เมี่ยน เลี่ยม เฮยี่ย ฒ่อย, ญอง เดา เญย กะน้าย เหธา ด๊าม-ลู่ง เญย เหนาะ อ๋อย เหมียด เหฑ่ง, เหว่ย หฒุ เยีย ฮนั้ม-หฑวน, เฝย ตุ๊ ไม้ ตู๋ง เหฒย น้าย เต๋ย กะน้าย.” มป่า โน​ยา โหฒว ตุ๊ หอบ เฒี้ยว เญย เฮญี้ยว.

เยียม น้าย มี่ง ก๊อง โน​ยา เญย เจ๊า-โหล่ว.
โน​ยา โหฒว คู้ เมี่ยน. วั้ว จ๋า ลู่ง เดี๊ย ขูง นิ่น กั้น ไม้ ม่าย ต๋อง ต้าน ฮนั้ง. นิ่น หาย หฒั่น หย่า กัน หลง ทิน-ฮู่ง. โน​ยา ม่าย ปัว เต้า ตอน บั๋ว เห่ว เซม, ฮาม เหธา ยา​เฟ้ด.
ทิน-ฮู่ง ปวัด ลู่ง เดี๊ย เมี่ยน หว่าย เจี๊ยน เหฌี่ย. เมี่ยน ขูง โหฒว โตะ โหฒว เอ๊าะ เญย สี่ ฮนั้ง. ทิน-ฮู่ง หมั่ง ลู่ง เดี๊ย, ปวัด ป่าย หว่าย เหฑ่ง, เหว่ย หฒุ ป้าม เมี่ยน เหยียด ฒู้ง ขูง โหฒว เอ๊าะ โหฒว หว่าย เญย เจ๊า ฮนั้ง. ทิน-ฮู่ง ฯฒฯ ก๊อง บั๋ว โน​ยา, “เยีย ตี่ง เฮญี้ยว อ๋อย เหมียด ลู่ง เดี๊ย เมี่ยน เหว่ย หฒุ นิ่น บัว โหฒว เอ๊าะ สี่ ปวั๊ง เหฑ่ง ลู่ง เดี๊ย. หมั่ง ม่าะ! เลี่ยม นิ่น บัว, เลี่ยม เดา-เป้ย, เยีย อ๋อย เหมียด เหฑ่ง. เม่ย อ๋อย หฒุ หล่ง เจียม ไห่ เญย เดี๋ยง กั๊บ โผว ฑั้ง. ฑั้ง กะญั์ว อ๋อย หฒุ เหฆน เจี๊ยน เหยียด ฉง เหยียด ฉง เญย. หย่า อ๋อย หฒุ หล่ง เดา-เดี๊ย โญ่ว ไห่ เญย ฒูง ไหน่ เจี๊ยน กะญั์ว กะเหญี่ย. น้าย โผว ฑั้ง อ๋อย หฒุ ฮนั้ง น้าย นอ โหฒว, ด๊าว ฟาม-แป๊ะ เดาะ, จั๊ง ฮม์ เหฒียบ เดาะ, ฮลัง ฟ่า เหฒียบ เดาะ. อ๋อย หฒุ ก๊ม เจี๊ยน ฑั้ง-ลิ่ว. ฑั้ง-ลิ่ว อ๋อย หฒุ เล่ย ฑั้ง-ซิน เหยียด เดาะ ฮลัง. แก้ง อ๋อย หฒุ โหฒว เยียม เหยียด ปูง ฑั้ง-เฮลน ฮนั้ง. น้าย โผว ฑั้ง อ๋อย หฒุ เหฆน โหฒว ปัว ฑั่ง, กู้ หงว่าย, บุด๋ง เหธา กะเดี๊ย. หมั่ง ม่าะ! เยีย อ๋อย ปุน บยู่ง-ซุ้ย-อิ๋ม เหยียม เดา-เป้ย, เหยียม ไต่ เหยียด ฒู้ง เยียม ลู่ง เดี๊ย ม่าย แหม่ง เญย กะน้าย. ตะฟ่าน นั่ง เญย, ม่าย เฉีย เญย กะน้าย อ๋อย หฒุ ไต่ เหฑ่ง. มป่า เยีย อ๋อย เหธา เม่ย แล์ง เจี์ย แหง่ง หว่า. เม่ย อ๋อย หฒุ ต้อ เม่ย เญย เอ๊า-เจว๊ย ตอน-บวั์ง เหธา เม่ย เปียะ ฑั้ง. เม่ย อ๋อย หฒุ ต้อ หญู่งๆ ม่าย แหม่ง เญย กะน้าย, เลี่ยม โก๊ว เลี่ยม เญ์ย, เหยียด หญู่ง เหยียด ต๋อย เปียะ ฑั้ง เหว่ย เหธา เม่ย เหฌียว ธ้วด แหม่ง. หญู่งๆ เหนาะ, หญู่งๆ แซง-คู้, เหธา หญู่งๆ ญอง เดา-เป้ย เญย กะน้าย, เหยียด หญู่ง เหยียด ต๋อย อ๋อย ต้าย ล์อ เม่ย เหว่ย เหฌียว นิ่น บัว เญย แหม่ง. เม่ย บัว อ๋อย หฒุ เฒาะ หญู่งๆ หญั่น ฮบ เปี้ยน เปียะ ฑั้ง, เลี่ยว เจี๊ยน โหฒว เม่ย บัว เญย หญั่น ฮบ หย่า โหฒว หวุย แซง-คู้ เญย กะน้าย.”
ทิน-ฮู่ง ฮนั้ง หาย นอ พ้าย โน​ยา, โน​ยา หย่า เอย เจี๊ยน โหฒว เหฑ่ง.

Klausīties ทิน เต่ย โต้ว 6