Keliko: Ụ́ꞌdụ́kọ́ Múké Múngú vé rị New Testament+

Ụ́ꞌdụ́kọ́ Múké Múngú vé rị

Úyú ĩ ní tã ni sĩí ꞌdĩri Ãdámã vé rĩ.
Múngú kã ꞌbá ri gbií, gbi ĩri sụ̃ụ́ ꞌí tị́nị. Gbi kộpi ágó pi ũkú be, sẽ kộpi ní tãkíri, ĩri ní kộpi zịzú “ꞌbá.”
Ãdámã kã adrií caá ílí be mụ̃dụ̃rụ̃lụ̃ ãlu pụ̃kụ́ na (130), ĩri ní mvá ágó tịzú sụ̃ ꞌí tị́nị. Ĩri ní rụ́ ni ꞌdazú Sétẽ ꞌi. Kã Sétẽ ri tịị́, vụ́drị̃ ni gé, Ãdámã gõ adrií caá ílí be mụ̃dụ̃rụ̃lụ̃ ãrõ (800), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Ãdámã adri caá ílí be mụ̃dụ̃rụ̃lụ̃ úrõmĩ pụ̃kụ́ na (930), ĩri ní kúru drãzú.
Sétẽ kã adrií caá ílí be mụ̃dụ̃rụ̃lụ̃ ãlu drị̃ ni tọ̃wụ́ (105), ĩri ní Ẽnósã ri tịzú. Kã Ẽnósã ri tịị́, vụ́drị̃ ni gé, Sétẽ gõ adrií caá ílí be mụ̃dụ̃rụ̃lụ̃ ãrõ drị̃ ni ẹ́zị̂rị̃ (807), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Sétẽ adri caá ílí be mụ̃dụ̃rụ̃lụ̃ úrõmĩ mụdrị́ drị̃ ni ị̃rị̃ (912), ĩri ní kúru drãzú.
Ẽnósã kã adrií caá ílí be pụ̃kụ́ úrõmĩ (90), ĩri ní Kẽnánã ri tịzú. Kã Kẽnánã ri tịị́, vụ́drị̃ ni gé, Ẽnósã gõ adrií caá ílí be mụ̃dụ̃rụ̃lụ̃ ãrõ mụdrị́ drị̃ ni tọ̃wụ́ (815), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Ẽnósã adri caá ílí be mụ̃dụ̃rụ̃lụ̃ úrõmĩ drị̃ ni tọ̃wụ́ (905), ĩri ní kúru drãzú.
Kẽnánã kã adrií caá ílí be pụ̃kụ́ ẹ́zị̂rị̃ (70), ĩri ní Mãhãlãlélĩ ri tịzú. Kã Mãhãlãlélĩ ri tịị́, vụ́drị̃ ni gé, Kẽnánã gõ adrií caá ílí be mụ̃dụ̃rụ̃lụ̃ ãrõ pụ̃kụ́ sụ (840), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Kẽnánã kã caá ílí be mụ̃dụ̃rụ̃lụ̃ úrõmĩ mụdrị́ (910), ĩri ní kúru drãzú.
Mãhãlãlélĩ kã adrií caá ílí be pụ̃kụ́ ázíyá drị̃ ni tọ̃wụ́ (65), ĩri ní Yãrédẽ ri tịzú. Kã Yãrédẽ ri tịị́, vụ́drị̃ ni gé, Mãhãlãlélĩ gõ adrií caá ílí be mụ̃dụ̃rụ̃lụ̃ ãrõ pụ̃kụ́ na (830), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Mãhãlãlélĩ adri caá ílí be mụ̃dụ̃rụ̃lụ̃ ãrõ pụ̃kụ́ úrõmĩ drị̃ ni tọ̃wụ́ (895), ĩri ní kúru drãzú.
Yãrédẽ kã adrií caá ílí be mụ̃dụ̃rụ̃lụ̃ ãlu pụ̃kụ́ ázíyá drị̃ ni ị̃rị̃ (162), ĩri ní Ẽnókã ri tịzú. Kã Ẽnókã ri tịị́, vụ́drị̃ ni gé, Yãrédẽ gõ adrií caá ílí be mụ̃dụ̃rụ̃lụ̃ ãrõ (800), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Yãrédẽ adri caá ílí be mụ̃dụ̃rụ̃lụ̃ úrõmĩ pụ̃kụ́ ázíyá drị̃ ni ị̃rị̃ (962), ĩri ní kúru drãzú.
Ẽnókã kã adrií caá ílí be pụ̃kụ́ ázíyá drị̃ ni tọ̃wụ́ (65), ĩri ní Mẽtũsélã ri tịzú. Kã Mẽtũsélã ri tịị́, vụ́drị̃ ni gé, Ẽnókã gõ adrií caá ílí be mụ̃dụ̃rụ̃lụ̃ na (300), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Ẽnókã ri tã ꞌoó pịrị Múngú ẹndrẹtị gé, Ẽnókã adri caá ílí be mụ̃dụ̃rụ̃lụ̃ na pụ̃kụ́ ázíyá drị̃ ni tọ̃wụ́ (365). Ẽnókã ní tã ꞌoó pịrị Múngú ẹndrẹtị gé rĩ sĩ, gõ índré dị̃ị́ kuyé, ãꞌdiãtãsĩyã Múngú ꞌdụ ĩri mụzú ídri rú.
Mẽtũsélã kã adrií caá ílí be mụ̃dụ̃rụ̃lụ̃ ãlu pụ̃kụ́ ãrõ drị̃ ni ẹ́zị̂rị̃ (187), ĩri ní Lẽmékẽ ri tịzú. Kã Lẽmékẽ ri tịị́, vụ́drị̃ ni gé, Mẽtũsélã gõ adrií caá ílí be mụ̃dụ̃rụ̃lụ̃ ẹ́zị̂rị̃ pụ̃kụ́ ãrõ drị̃ ni ị̃rị̃ (782), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Mẽtũsélã adri caá ílí be mụ̃dụ̃rụ̃lụ̃ úrõmĩ pụ̃kụ́ ázíyá drị̃ ni úrõmĩ (969), ĩri ní kúru drãzú.
Lẽmékẽ kã adrií caá ílí be mụ̃dụ̃rụ̃lụ̃ ãlu pụ̃kụ́ ãrõ drị̃ ni ị̃rị̃ (182), ĩri ní mvá ágó tịzú. Ĩri ní rụ́ ni ꞌdazú Núwã ꞌi, ĩri ní ꞌyozú kĩnĩ, “Mvá nõri ímụ́ ꞌbâ ĩzã ko ĩzãngã ꞌbá ní rií nyaá ẹ̃zị́ ꞌbá ní rií ngaá drị́ sĩ nyọ̃ọ́kụ́ Úpí Múngú ní trií gí nõri agá nĩ.” Lẽmékẽ kã Núwã ri tịị́, vụ́drị̃ ni gé, Lẽmékẽ gõ adri caá ílí be mụ̃dụ̃rụ̃lụ̃ tọ̃wụ́ pụ̃kụ́ úrõmĩ drị̃ ni tọ̃wụ́ (595), tị anji ãgõ ụrụkọꞌbée anji ũkú pi be ílí ꞌdĩꞌbée agá rá. Lẽmékẽ adrií caá ílí be mụ̃dụ̃rụ̃lụ̃ ẹ́zị̂rị̃ pụ̃kụ́ ẹ́zị̂rị̃ drị̃ ni ẹ́zị̂rị̃ (777), ĩri ní kúru drãzú.
Núwã kã adrií caá ílí be mụ̃dụ̃rụ̃lụ̃ tọ̃wụ́ (500), vụ́drị̃ ni gé, ĩri ní Sémẽ pi tịzú Ámã be, Yãpétẽ sĩ.

Klausīties Íꞌdóngárá 5