Thai, Northern - 2017 Lanna Bible (Non-Drama NT)

ปีลาต​เลย​ปา​พระเยซู​ไป แล้ว​สั่ง​ทหาร​เฆี่ยน​พระองค์ หมู่​ทหาร​ก็​เอา​กิ่ง​ไม้​ตี้​มี​หนาม​มา​แป๋ง​เป๋น​มงกุฎ แล้ว​เอา​สุบ​หัว​หื้อ​พระองค์ แล้ว​เอา​เสื้อ​คุม​สี​ม่วง​ใส่​หื้อ แล้ว​หมู่​เขา​ก็​เปี่ยน​กั๋น​เข้า​มา​หา​พระองค์​กับ​อู้​หย้อ​พระองค์​ว่า “ขอ​กษัตริย์​ของ​จาว​ยิว​จง​จ๋ำเริญ​เต๊อะ” แล้ว​ก็​ตบ​หน้า​พระองค์
ปีลาต​ก็​ออก​มา​อู้​กับ​หมู่​จาว​ยิว​ว่า “ผ่อ​ลอ เฮา​ปา​เขา​ออก​มา​หื้อ​หมู่​ต้าน เปื้อ​หื้อ​หมู่​ต้าน​ฮู้​ว่า เฮา​บ่﻿หัน​ว่า​ป้อจาย​คน​นี้​มี​ความ​ผิด​อะหยัง​เลย” พระเยซู​ก็​ออก​มา​ตึง​สุบ​มงกุฎ​หนาม​กับ​ใส่​เสื้อ​คุม​สี​ม่วง ปีลาต​เลย​อู้​กับ​คน​ตังหลาย​ว่า “เขา​นี่​ลอ”
เมื่อ​หมู่​หัว​หน้า​ปุโรหิต​กับ​ทหาร​ฮักษา​พระวิหาร​หัน​พระองค์ ก็​ปา​กั๋น​ฮ้องเอิ้น​ว่า “เขิง​บน​ไม้​ก๋าง​เขน เขิง​บน​ไม้​ก๋าง​เขน” ปีลาต​ก็​อู้​กับ​หมู่​เขา​ว่า “หมู่​ต้าน​เอา​เขา​ไป​เขิง​กั๋น​คน​เดียว​เต๊อะ ย้อน​เฮา​บ่﻿หัน​ว่า​เขา​มี​ความ​ผิด​อะหยัง​เลย”
หมู่​จาว​ยิว​ก็​อู้​กับ​ปีลาต​ว่า “หมู่​เฮา​มี​กฎหมาย ต๋าม​กฎ​นั้น​เขา​สมควร​ต๋าย ย้อน​เขา​ยก​ตั๋ว​เป๋น​พระบุตร​ของ​พระเจ้า”
เมื่อ​ปีลาต​ได้ยิน​ว่า​พระเยซู​ยก​ตั๋ว​เป๋น​พระบุตร​ของ​พระเจ้า เขา​ก็​กั๋ว​นัก​ขึ้น ปีลาต​เลย​ปา​พระเยซู​เข้า​ไป​ใน​วัง​แหม​รอบ แล้ว​อู้​กับ​พระเยซู​ว่า “ต้าน​ลุก​ไหน​มา” แต่​พระเยซู​บ่﻿ตอบ​อะหยัง ปีลาต​เลย​อู้​กับ​พระองค์​ว่า “เยียะ​หยัง​บ่﻿ยอม​อู้​กับ​เฮา ต้าน​บ่﻿ฮู้​กา ว่า​เฮา​มี​อำนาจ​ตี้​จะ​ป่อย​ต้าน​กาว่า​จะ​เขิง​ต้าน​ตี้​ไม้​ก๋าง​เขน​ได้”
พระเยซู​ก็​อู้​ว่า “ถ้า​พระเจ้า​บ่﻿ได้​หื้อ​อำนาจ​นั้น​กับ​ต้าน ต้าน​ก็​จะ​บ่﻿มี​อำนาจ​เหนือ​เฮา จาอั้น​คน​ตี้​ยับ​เฮา​มา​หื้อ​ต้าน​ก็​ผิด​นัก​เหลือ​ต้าน”
เมื่อ​ปีลาต​ได้ยิน​จาอั้น เขา​ก็​ฮิ​หา​ตาง​ตี้​จะ​ป่อย​พระเยซู แต่​จาว​ยิว​ก็​เอิ้น​ว่า “ถ้า​ต้าน​ป่อย​เขา ต้าน​ก็​บ่﻿ใจ้​เปื้อน​ของ​ซีซาร์ ย้อน​คน​ตี้​อ้าง​ตั๋ว​เก่า​เป๋น​กษัตริย์​ก็​เป๋น​ศัตรู๋​กับ​ซีซาร์”
เมื่อ​ปีลาต​ได้ยิน​จาอั้น เขา​ก็​ปา​พระเยซู​ออก​มา แล้ว​ก็​นั่ง​ตี้​นั่ง​ของ​ผู้​พิพากษา​ตี้​ฮ้อง​กั๋น​ว่า “ลานหิน” (​ภาษา​ฮีบรู​ฮ้อง​ว่า “กับบาธา”)
วัน​นั้น​เป๋น​วัน​เกียม​งาน​ปัสกา ใก้​เตี้ยง​ปีลาต​ก็​อู้​กับ​หมู่​จาว​ยิว​ว่า “ผ่อ​แล่ นี่​กษัตริย์​ของ​หมู่​ต้าน”
หมู่​เขา​ก็​ปา​กั๋น​เอิ้น​ว่า “ฆ่า​มัน​เลย ฆ่า​มัน​เลย เขิง​บน​ไม้​ก๋าง​เขน​เลย” ปีลาต​อู้​กับ​หมู่​เขา​ว่า “หมู่​ต้าน​จะ​หื้อ​เฮา​เขิง​กษัตริย์​ของ​หมู่​ต้าน​ตี้​ไม้​ก๋าง​เขน​กา” หมู่​หัว​หน้า​ปุโรหิต​ก็​ตอบ​ว่า “เฮา​มี​กษัตริย์​องค์​เดียว​เต้าอั้น คือ​ซีซาร์”
แล้ว​ปีลาต​ก็​ยก​พระเยซู​หื้อ​หมู่​เขา​เอา​ไป​เขิง​บน​ไม้​ก๋าง​เขน

หมู่​ทหาร​ก็​ปา​พระเยซู​ไป แล้ว​หื้อ​พระองค์​แบก​ไม้​ก๋าง​เขน​ของ​พระองค์​ไป​ตี้​ตี้​ฮ้อง​กั๋น​ว่า “เนิน​กระโหล้ง​หัว” ภาษา​ฮีบรู​ฮ้อง​ว่า “กลโกธา” หมู่​เขา​ก็​เอา​พระองค์​ไป​เขิง​บน​ไม้​ก๋าง​เขน​ตี้​หั้น​กับ​นักโต้ษ​แหม​สอง​คน พระเยซู​อยู่​ก๋าง นักโต้ษ​สอง​คน​นั้น​อยู่​คน​ละ​เผิก​ของ​พระองค์ ปีลาต​หื้อ​เขียน​ข้อความ​ติด​ไว้​บน​ไม้​ก๋าง​เขน​ของ​พระองค์​ว่า “เยซู จาว​นาซาเร็ธ กษัตริย์​ของ​จาว​ยิว” จาว​ยิว​หลาย​คน​ก็​ได้​อ่าน​ป้าย​นี้ ย้อน​ตี้​ตี้​เขา​เขิง​พระเยซู​นั้น​อยู่​ใก้​เมือง และ​ป้าย​นั้น​เขียน​เป๋น​ภาษา​ฮีบรู ภาษา​ลาติน กับ​ภาษา​กรีก หมู่​หัว​หน้า​ปุโรหิต​อู้​กับ​ปีลาต​ว่า “ขอ​บ่﻿หื้อ​เขียน​ว่า ‘กษัตริย์​ของ​จาว​ยิว’ แต่​ขอ​หื้อ​เขียน​ว่า ‘ป้อจาย​คน​นี้​อ้าง​ว่า​เป๋น​กษัตริย์​ของ​จาว​ยิว’ ”
ปีลาต​เลย​ตอบ​หมู่​เขา​ไป​ว่า “อะหยัง​ตี้​เฮา​เขียน​ไป​แล้ว​ก็​หื้อ​แล้ว​ไป​เหีย”
เมื่อ​หมู่​ทหาร​เขิง​พระเยซู​แล้ว ก็​เอา​เสื้อผ้า​ของ​พระองค์​มา​แบ่ง​กั๋น​ใน​หมู่​ทหาร​สี่​คน​ได้​คน​ละ​ผืน แต่​เหลือ​เสื้อ​ตั๋ว​ตัง​ใน​ของ​พระเยซู​เป๋น​ผ้า​ตอ​ผืน​เดียว​บ่﻿มี​ดูก หมู่​เขา​เลย​อู้​กั๋น​ว่า “บ่﻿ต้อง​ฉีก​ละ หื้อ​จกเบอร์​กั๋น​เอา​ว่า​ใผ​จะ​ได้” ตี้​เกิด​ขึ้น​จาอี้​ก็​เปื้อ​หื้อ​เป๋น​ไป​ต๋าม​พระคัมภีร์​ตี้​เขียน​ไว้​ว่า
“​เขา​เอา​เสื้อผ้า​เฮา​ไป​แบ่ง​กั๋น แล้ว​เอา​เสื้อ​ของ​เฮา​มา​จกเบอร์​”
หมู่​ทหาร​ก็​ได้​เยียะ​จาอั้น คน​ตี้​ยืน​อยู่​ใก้​ไม้​ก๋าง​เขน​ของ​พระเยซู​นั้น ก็​มี​แม่​กับ​น้าสาว​ของ​พระองค์ มารีย์​เมีย​เคลโอปัส กับ​มารีย์​จาว​เมือง​มักดาลา เมื่อ​พระเยซู​หัน​แม่​กับ​สาวก​ตี้​พระองค์​ฮัก​ยืน​อยู่​ใก้﻿ๆ หั้น พระองค์​ก็​เลย​อู้​กับ​แม่​ของ​พระองค์​ว่า “แม่​เหย ขอ​หื้อ​ฮับ​คน​นั้น​เป๋น​ลูก​แม่” แล้ว​พระองค์​ก็​อู้​กับ​สาวก​คน​นั้น​ว่า “ฮับ​นาง​เป๋น​แม่​ของ​ต้าน​ตวย” สาวก​คน​นั้น​ก็​ฮับ​แม่​ของ​พระองค์​มา​อยู่​ตี้​บ้าน​ของ​ตั๋ว​เก่า​ตั้งแต่​ต๋อน​นั้น

หลังจาก​นั้น พระเยซู​ฮู้​ว่า​กู้​สิ่ง​กู้​อย่าง​เสร็จ​หมด​แล้ว เปื้อ​หื้อ​เป๋น​ไป​ต๋าม​พระคัมภีร์ พระองค์​เลย​อู้​ว่า “เฮา​ใค่​อยาก​กิ๋น​น้ำ” มี​ถ้วย​ใส่​เหล้า​องุ่น​ส้ม​วาง​อยู่​ตี้​หั้น เขา​ก็​เอา​ฟองน้ำ​มา​จุ่ม​เหล้า​องุ่น​นั้น​ใส่​ป๋าย​ไม้​อ้อ​แล้ว​ยก​ขึ้น​เถิง​ปาก​พระเยซู บ่ากอง​พระเยซู​กิ๋น​เหล้า​องุ่น​ส้ม​นั้น พระองค์​ก็​อู้​ว่า “เสร็จ​แล้ว” คอ​ของ​พระองค์​แหง็ก​ลง​แล้ว​ก็​ต๋าย

วัน​นั้น​เป๋น​วัน​เกียม แล้ว​แหม​วัน​จะ​เป๋น​วัน​สะบาโต​หลวง​ย้อน​ว่า​เป๋น​งาน​ปัสกา หมู่​จาว​ยิว​เลย​ขอ​หื้อ​ปีลาต​สั่ง​ทหาร​ของ​เขา ตุ๊บ​ขา​คน​ตี้​โดน​เขิง​อยู่​บน​ไม้​ก๋าง​เขน​หื้อ​หัก​เหีย แล้ว​หื้อ​เอา​ศพ​ออก​ไป​เปื้อ​บ่﻿หื้อ​ศพ​กา​อยู่​ตี้​ไม้​ก๋าง​เขน​ใน​วัน​สะบาโต จาอั้น หมู่​ทหาร​เลย​มา​ตุ๊บ​ขา​ของ​คน​แรก​กับ​แหม​คน​นึ่ง​ตี้​โดน​เขิง​อยู่​ข้าง﻿ๆ พระเยซู บ่ากอง​มา​เถิง​พระเยซู เขา​หัน​ว่า​พระองค์​ต๋าย​แล้ว เขา​เลย​บ่﻿ได้​ตุ๊บ​ขา​ของ​พระองค์ แต่​ทหาร​แหม​คน​นึ่ง​เอา​หอก​แตง​ขี้ข้าง​พระองค์ แล้ว​เลือด​กับ​น้ำ​ก็​ไหล​ปุ้ง​ออก​มา คน​นั้น​ตี้​หัน​ก็​เล่า​เป๋น​พยาน และ​กำ​พยาน​ของ​เขา​ก็​เป๋น​ความ​จริง เขา​ฮู้​ว่า​เขา​อู้​ความ​จริง เปื้อ​ต้าน​ตังหลาย​จะ​ได้​เจื้อ สิ่ง​นี้​เกิด​ขึ้น​เปื้อ​เป๋น​ไป​ต๋าม​พระคัมภีร์ ตี้​ว่า “กระดูก​ของ​พระองค์​จะ​บ่﻿หัก​สัก​อัน” กับ​มี​พระคัมภีร์​แหม​ข้อ​นึ่ง​ตี้​ว่า “หมู่​เขา​จะ​ผ่อ​พระองค์​ตี้​หมู่​เขา​ได้​แตง”

หลังจาก​นั้น​โยเซฟ​จาว​อาริมาเธีย​ตี้​เป๋น​สาวก​ลับ﻿ๆ ของ​พระเยซู ย้อน​กั๋ว​หมู่​ผู้นำ​จาว​ยิว ก็​มา​ขอ​ปีลาต​เอา​ศพ​พระเยซู​ไป ปีลาต​ก็​ยอม​หื้อ โยเซฟ​ก็​มา​เอา​ศพ​พระองค์​ไป
นิโคเดมัส​คน​ตี้​เกย​ไป​หา​พระเยซู​ต๋อน​เมื่อ​คืน​ก่อน​หน้า​นี้​ก็​มา​ตวย เขา​เอา​เครื่องหอม​มา​ก็​คือ มดยอบ​ผสม​กับ​กฤษณา​หนัก​ประมาณ​สาม​สิบ​กิโลกรัม​ป๋าย โยเซฟ​กับ​นิโคเดมัส​ก็​เอา​ศพ​พระองค์​มา​กับ​เอา​ผ้า​ลินิน​ห่อ​ศพ​กับ​เครื่องหอม​ไว้​ต๋าม​ประเพณี​ก๋าน​ฝัง​ศพ​ของ​จาว​ยิว ใก้﻿ๆ ตี้​พระเยซู​ถูก​เขิง​นั้น มี​สวน​อยู่​ตี้​นึ่ง ใน​สวน​นั้น​มี​อุโมงค์​ฝัง​ศพ​ใหม่​ตี้​บ่﻿เกย​ใจ๊​ใส่​ศพ​คน​ใด​เตื้อ แล้ว​ย้อน​ว่า​วัน​นั้น​เป๋น​วัน​ดา​วัน​สะบาโต​ของ​จาว​ยิว กับ​อุโมงค์​ฝังศพ​นั้น​ก็​อยู่​ใก้﻿ๆ ตี้​หั้น เขา​ก็​เลย​เอา​ศพ​ของ​พระองค์​วาง​ไว้​ใน​อุโมงค์​นั้น

Klausīties ยอห์น 19