℗ Audio 2018 The Bible Society in Taiwan; © Text 2012 The Bible Society in Taiwan

HAK-NGÎ SṲN-KÎN – Hien-thoi Thòi-vân Hak-ngî Yi̍t-pún

在 亞伯拉罕 个時代，當地識有一擺飢荒；後來又有一擺飢荒。 以撒 就徙到 基拉耳 、 非利士 王 亞比米勒 該位去。 上主向 以撒 顯現，對佢講：「你毋好去 埃及 ，愛留在𠊎所指示你个地方。 你愛暫時住在這位，𠊎愛㧯你共下，賜福給你。𠊎愛將這地方全部賜給你㧯你个後代，遵守𠊎㧯若爸 亞伯拉罕 所立个約。 𠊎愛給你盡多子孫，像天頂个星仔恁多，又愛將這土地全部賜給你个子孫。地上个萬國愛因為你个子孫得到福氣， 因為 亞伯拉罕 聽從𠊎个話，遵守𠊎所有个法律㧯命令。」 以撒 就留下來住在 基拉耳 。
當地人對 以撒 問起厥𡜵娘，佢就講：「姖係𠊎个老妹」，毋敢講：「係𠊎个𡜵娘」；因為 麗百加 非常靚， 以撒 驚當地人會㓾死佢，將 麗百加 搶走。
以撒 在該地方住一駁仔，有一日 非利士 王 亞比米勒 對佢个窗門向外看，看到 以撒 㧯厥𡜵娘 麗百加 有盡熱情个動作。 亞比米勒 喊 以撒 來，問佢：「原來姖就係若𡜵娘，你做麼介講係若老妹呢？」
以撒 應佢：「若係𠊎承認姖係吾𡜵娘，驚怕𠊎會因為姖被人㓾掉！」
亞比米勒 講：「你做麼介恁樣對待𠊎等？若係𠊎个人民中有人㧯你个𡜵娘睡，你就係害𠊎等犯罪。」 亞比米勒 就警告人民：「麼人動到這人㧯厥𡜵娘，就愛處死。」
以撒 在該地方耕種，該年就得到百倍个收成，因為上主賜福給佢。 佢个財產越來越多，成做非常好額个人。 非利士 人看到佢有恁多羊群、牛群㧯奴僕，就盡毋甘願。 佢等將佢所有个井用泥坉掉；這兜井係厥爸 亞伯拉罕 在世个時僕人所挖个。
後來 亞比米勒 對 以撒 講：「你離開𠊎等去！你已經比𠊎等較強了！」 所以， 以撒 離開該地方，到 基拉耳 个坑壢，在該位搭帳篷，就住在該位。 亞伯拉罕 還在个時識挖兜井，總係佢過身後， 非利士 人將該兜井坉掉。 以撒 就重新挖開來，該兜井還係用厥爸當初所安个名。
以撒 个僕人在坑壢中挖一隻井，尋到水源。 基拉耳 个牧人㧯 以撒 个牧人相爭，講：「這係𠊎等个水。」所以 以撒 喊該口井做 埃色 ，因為佢等㧯佢相爭。 以撒 个僕人又挖一口井，佢等又為這口井相吵，所以 以撒 喊這口井做 西提拿 。 佢徙離開該地方，又挖另外一口井。這擺就無相爭，所以佢喊這口井做 利河伯 。佢講：「上主這下給𠊎等盡闊个地方好自由發展，𠊎等一定會在這位興旺起來。」
以撒 離開該位，搬到 別是巴 。 該暗晡，上主向佢顯現，對佢講：「𠊎係若爸 亞伯拉罕 个上帝；因為𠊎㧯你共下，你毋使驚。為到𠊎僕人 亞伯拉罕 个緣故，𠊎愛賜福給你，使你多子多孫。」 以撒 就在該位起祭壇敬拜上主，然後在該位搭帳篷；厥僕人也在該位挖一口井。

亞比米勒 帶佢个軍師 亞戶撒 㧯元帥 非各 ，對 基拉耳 來看 以撒 。 以撒 對佢等講：「你等做麼介來看𠊎？頭擺你等毋係當惱𠊎，將𠊎逐出來嗎？」 佢等應講：「這下，𠊎等清楚知上主㧯你共下。𠊎等希望你㧯𠊎等共下來發誓、立約，好麼？ 頭擺𠊎等好款待你，俾你平平安安離開。這下𠊎等知上主賜福給你；請毋好傷害𠊎等，像𠊎等無傷害你共樣。」 以撒 就準備筵席，㧯佢等共下食、共下啉。 第二日，佢等打早䟘起來，互相發誓、立約。 以撒 送佢等，佢等就平平安安離開佢轉去。
就在該日， 以撒 个僕人向佢報告有關挖井个事，講：「𠊎等尋到水源了！」 佢就㧯該口井安名 示巴 ，所以該城喊做 別是巴 ，直到今晡日。

以掃 四十歲个時㧯兩個 赫 人結婚，一個係 比利 个妹仔 猶滴 ，一個係 以倫 个妹仔 芭實抹 。 姖等常常害 以撒 㧯 麗百加 操煩。

Klausīties 創世記 26