Jenesis 8
8
Göulunöŋ öröba eriga gölmenöŋ öröniyök.
1Wehön 150 mi teköiga miaŋgöreŋ Anutunöŋ Noagö aka arökŋaŋgö mirigö sömbupŋi aka yuai pakpak yambuk waŋgenöŋ malgeri, mi mötmörim eŋgiba luhut ketaŋi röja aliga gölme qakŋe qeiga onöŋ könahiba öröba erök. 2Anutunöŋ emune o diginŋinambuk yeŋgö jeŋini aka euyaŋgöreŋ könakembagö oŋi oŋi mieŋgö numbuŋini mi qaliba soŋgo aliga kienöŋ tiŋgita tömböriba suepnöhök kunbuk qahö erök. 3Qahö eriga o ketaŋan könahiba gölme qakŋe ahöahöŋeyök liliŋgöba öröba eta geyök. Wehön 150:gö dop o mieŋön öröba eta geba ahöget. 4Mewö ahögetka waŋgenöŋ köiŋ 7 miaŋgö silimŋi 17 miaŋgöreŋ kunduŋi qetŋi Ararat miaŋgö bohonŋi kunöŋ mekötahöba köhöiba tarök. 5Miaŋgöreŋ tariga o miaŋön toroqeba öröba eta eta anök. Anda köiŋ 10 miaŋgö silimŋi mutukŋi miaŋgöreŋ kunduŋi mieŋgö bohonŋini mi aukŋe asuhum tiŋgitket.
6Tiŋgitketka wehön 40 teköiga Noanöŋ waŋgegö jeŋgenaŋi mutuk memeŋi mi metalök. 7Metala koekoe nei kun melaiiga könakemba laŋ bölbölgöba anda kaba qahö liliŋgöba maliga gölmegö oŋi miaŋön jöpköyök. 8Miaŋgö andöŋe Noanöŋ kembö kun melaiiga anök. Gölme qakŋe onöŋ öröba geyök me qahö, miaŋgö könaŋi mötmamgöra mi melaiiga anök. 9Kembönöŋ anda kaba onöŋ toroqeba gölme körekŋanök turuba ahöyöhaŋgöra luhut memeŋaŋgö tatatŋi qahö miwikŋaiba waŋgegöreŋ liliŋgöiga Noanöŋ böröŋi böraŋda waŋge uruŋe waŋgiriga öŋgöyök. 10Öŋgöiga wehön 7:gö dop toroqeba mamböt mala miaŋgöreŋ kembö mi kunbuk waŋgenöhök melaiiga anök. 11Anda mare miaŋgöreŋ liliŋgöba oil ipkö sinŋi gwölögwölö kun mi meteköba numbuŋan yöhösaŋda Noagöreŋ kayök. Mewö kaiga Noanöŋ mi eka kewö möt asariyök: Onöŋ mönö öröba eriga gölmenöŋ asuhum teköza. 12Mi möt asariba kunbuk wehön 7:gö dop mamböta kinda kembö mi kunbuk melaiiga bölbölgöba anök. Anökmö, nalö miaŋgöreŋ mi yaŋgöreŋ kunbuk qahö liliŋgöba kayök.
13Noagö malmal yambuŋi 601 miaŋgö köiŋ mutukŋaŋgö silimŋi mutukŋi miaŋgöreŋ onöŋ gölme qakŋe jöpköba öröniba ahöyök. Mewö aiga Noanöŋ waŋgegö boŋi mei aniga kewö uba ehök: Gölme qakŋan mönö öröniba ahöyök. 14Mi ehi kunbuk öröniba köiŋ yahötŋaŋgö silimŋi 27 miaŋgöreŋ örönim teköba ahöyök.
15Anutunöŋ Noagöra keu kewö jiba jii mörök: 16“Gi, anömgi aka nahöniranurupki iŋini mönö waŋge mosöta etket. 17Eta sömbup yuai malmalŋinambuk pakpak göbuk waŋgenöŋ maljei, mi neiŋi neiŋi, mirigö sömbupŋi aka mokoleŋ yuai pakpak bapŋini gölmenöŋ köla ölölöŋgömakzei, mi mönö körek eŋguaŋgita etket. Mewö aknöŋga ölöp gölmenöŋ ahum sehiba gwölönarökpuk aka deŋda gölme dop köla malme.”
18Mewö jii möta Noa anömŋet aka nahöniranurupŋi yeŋön mohotŋe waŋge mosöta etket. 19Etketka arökŋaŋgö sömbupŋi pakpak, mokoleŋ yuai pakpak, nei pakpak aka yuai pakpak gölmenöŋ anda kamakzei, mieŋön mönö mewöŋanök isikŋinaŋgö dop waŋge mosöta awataŋgöba et teköget. Mewö.
Noanöŋ Anutugöra jöwöwöl ohoba saiwap jiyök.
20Et tekögetka Noanöŋ Kembugöra jöwöwöl alta kun memba mirigö sömbupŋi dönqizizinŋini qahö mi pakpak aka nei dönqizizinŋini qahö mi pakpak yeŋgöreŋök tosatŋi eŋgömemba alta qakŋe ala miaŋön Anutugöra jöwöwöl ohoyök. 21Ohoiga Kembunöŋ wörön umköhöwakŋi nahömŋambuk mi möri dop köliga uruŋan keu kewö jiyök: “Ambazip yeŋgö uruŋinaŋgö mötmöt areŋinan mönö moröŋineyök könahiba bölöŋi akzemö, töndup gölme mi nalö kunöŋ ambazipköra aka kunbuk kude qesuahömam. Yuai pakpak malmalŋinambuk maljei, nöŋön mi lök qahöwak teköm eŋgialmö, miaŋgö dop nalö kunöŋ kunbuk qahö jim teköba ak eŋgimam. 22Gölmenöŋ ahöm öŋgömawaŋgö dop mönö gölmenöŋ köl kömötketka ölŋi asuhui megetka miaŋön mönö kude qahöwak teköma. Miri amöriiga saŋgenŋi mörakŋe aka könöpŋambuk aiga könöwiba mörakŋe. Kömunjaŋ kie nalö aka wehön nalö, suŋgem aka asakŋi mi nalöŋi nalöŋi lilikqilik aka awataŋ ahöba anmahot. Mi pakpak teteköŋi qahö ahöm öŋgöiga malme. Mewöŋan mönö mewö toroqeba ahöma. “Mewö”.
Šiuo metu pasirinkta:
Jenesis 8: bmu
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2013, Wycliffe Bible Translators, Inc. All rights reserved.