GÉNESIS 10
10
Iixhuihua Noé
1Sem, Cam huan Jafet eliyayaj iconehua Noé huan ya ni iniixhuihua catli quinpixque quema ya tlantoya nopa miyac atl catli momanqui ipan nochi tlaltipactli.
Iixhuihua Noé por itelpoca, Jafet
2Itelpocahua Jafet elque:
Gomer, Magog, Madai, Javán, Tubal, Mesec huan Tiras.
3Itelpocahua Gomer elque:
Askenaz, Rifat huan Togarma.
4Itelpocahua Javán elque:
Elisa, Tarsis, Quitim huan Dodanim.
5Huan iixhuihua Jafet teipa momiyaquilijque huan mocajque nechca hueyi atl ipan campa hueli tlalme campa camanaltiyayaj ica sese inincamanal.
Iixhuihua Noé por itelpoca, Cam
6Itelpocahua Cam elque:
Cus, Mizraim, Fut huan Canaán.
7Itelpocahua Cus elque:
Seba, Havila, Sabta, Raama huan Sabteca.
Itelpocahua Raama elque:
Seba huan Dedán.
8Huan Cus nojquiya elqui itata Nimrod catli quipixqui miyac chicahualistli campa hueli ipan tlaltipactli. 9Nochime quitocaxmatiyayaj Nimrod huan quimatiyayaj para ica itlapalehuil TOTECO elqui se cuali tlapejquetl. Yeca quema masehualme quihueyitlaliyayaj se tlacatl, quiijtosquíaj: “Yaya itztoc quen Nimrod, se cuali tlapejquetl ica itlapalehuil TOTECO.” 10Nopa achtihui altepeme catli moscaltijque ipan itlanahuatil Nimrod elqui Babel, Erec, Acad huan Calne ipan tlali Sinar. 11Huan itlanahuatil Nimrod pejqui ipan tlali Sinar huan momoyajqui hasta tlali Asiria. Yaya quichijqui nopa altepeme catli itoca Nínive, Rehobot huan Cala. 12Huan quichijqui Resén catli eltoya tlatlajco nopa hueyi altepetl Nínive huan Cala.
13Huan Mizraim elqui inintata:
Ludim, Anamim, Lehabim, Naftuhim, 14Patrusim, Caftorim huan Casluhim catli elqui ininhueyi tata nopa filisteos.
15Huan Canaán elqui itata iachtihui ejca catli itoca:
Sidón huan quipixqui se iteipan ejca catli itoca eliyaya Het. 16Huan Canaán nojquiya itztoya ininhuejcapan tata nopa masehualme: jebuseos, amorreos, gergeseos, 17heveos, araceos, sineos, 18arvadeos, zemareos huan hamateos.
Teipa nochi ni masehualme catli eliyayaj iteipan ixhuihua Canaán momoyajque campa hueli. 19Inintlal elqui tlen tlali Sidón hasta nopa piltlaltzi catli itoca Gaza catli eltoya ipan ojtli para Gerar. Huan neca campa hualquisa tonati inintlal yajqui hasta altepetl Lasa ipan ojtli para nopa altepeme Sodoma, Gomorra, Adma huan Zeboim.
20Nochi ya ni elque iteipan ixhuihua Cam. Huan nica ijcuilijtoc inintoca ininfamilias, huan inincamanal catli sesen camanaltiyayaj. Huan ijcuilijtoc iniestados huan inintlal ipan catli sese itztoya.
Iteipan ixhuihua Noé por itelpoca Sem
21Huan Sem elqui ininhueyi tata Heber huan iconehua. Sem elqui catli achtihui tlacatqui tlen inana huan teipa tlacatqui iicni Jafet.
22Huan Sem quinpixqui itelpocahua catli inintoca eliyayaj:
Elam, Asur, Arfaxad, Lud huan Aram.
23Itelpocahua Aram elque:
Uz, Hul, Geter huan Mas.
24Huan Arfaxad elqui itata Sala,
huan Sala elqui itata Heber.
25Teipa Heber quinpixqui ome itelpocahua:
Se motocaxtiyaya Peleg. (Peleg quinequi quiijtos “motlajcoitac”.) Quej nopa itoca pampa ipan nopa tonali tlaltipactli motlajcoitac. Huan iicni Peleg motocaxtiyaya Joctán.
26Huan Joctán elqui itata:
Almodad, Selef, Hazar Mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila huan Jobab. Nochi ya ni itztoyaj iconehua Joctán.
30Huan iteipan ixhuihua Joctán itztoyaj ipan nopa tlali tlatlajco Mesa huan nopa tepeme campa hualquisa tonati imelac Sefar.
31Nochi ya ni elque iteipan ixhuihua Sem ica sese ininhuejhueyi familias, huan sese inincamanal, huan sese ininpiltlal huan nochi nopa tlalme ica sese inintlanahuatijca campa mocahuayayaj.
32Huajca ni catli nimitzpohuilijtoc eltoya inintoca itlayacanca teipan ixhuihua Noé. Huan sese inijuanti mochijqui se hueyi familia ica iniixhuihua teipa ehuani. Nojquiya nica quiijtohua nopa tlalme campa mocajque. Huan quema panotoya nopa miyac atl, nochi xinachtli tlen masehualme quisque tlen iixhuihua Noé huan campa hueli momoyajque ipan tlaltipactli.
Šiuo metu pasirinkta:
GÉNESIS 10: nhwW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2005, Wycliffe Bible Translators, Inc. All rights reserved