Naṉ. 8
8
Ama̱a̱ ku̱yu̱amu
1Tura Nuwaincha ashí yajasma niji̱a̱i̱ uunt kanunam pujuarmia nunasha Yuska enentáimta asa nasen násenkat tusa akupkámiayi. Túrunamtai ama̱a̱ ku̱yu̱tan naṉkamamiayi. 2Nuyá̱ initia̱ púkuni jíintrarmia nusha tura yakiya̱ entsa tunaja̱i̱ métek wajawarmia nusha akirnákarmiayi. Tuma asamtai yumi yútasha chi̱wia̱rmiayi. 3Nuyá̱ ama̱a̱sha yáitmataik ku̱yu̱kí̱ wéak ama̱a̱ juárkimiunmaya̱ 150 tsawant ejesha ku̱yu̱kí̱ wémiayi. 4Kame 7 nantu tura 17 tsawant naṉkaamasai̱ uunt kanusha Ararát naint armia nui̱ awaami juákmiayi. 5Tura áma̱a̱ka tuke ku̱yu̱kí̱ wémiayi. Nuyá̱ 10 nantu emka tsawantai̱ chíkich naintia tsakari̱sha paant jíintrarmiayi.
6Nuyá̱ 40 tsawant naṉkaamasmatai uunt kanú najanamia nuna áaṉkamuri̱n Nuwaikia uraimiayi. 7Tura urái shanashnán akupkámiayi. Shanashnásha entsa ku̱yu̱u̱mam we taa mái̱ waket ajamiayi. 8Nuyá̱ yamaikia ku̱yu̱achiash tusa Nuwái yampitsnasha akupkámiayi. 9Túrasha ku̱yu̱achu asamtai yámpitskia ekemsatniuri̱ wáinkiach waketki̱ támatai Nuwái uwejé̱n iwiaintiuk achik uunt kanunam eṉkeamiayi.
10Nuyá̱ siati tsawant nákas yampitsan ataksha akupkámiayi. 11Tura kí̱arai̱ uriwiu nuke̱n apaku támiayi. Nuja̱i̱ ama̱a̱ ku̱yu̱kí̱ wéan Nuwái nekaamiayi. 12Nuyá̱ siati tsawant nákas yampitsan ataksháa akupkámiayi. Túram yámpitskia atakka waketkichmiayi.
13Tura Nuwái 601 uwí takakuya nui̱ṉkia núṉkaka ju̱ju̱tékmiayi. Emka nantua nuna tsawantri̱ juármanum Nuwaikia kanú nukurke̱n aaṉka iis nuṉka ju̱ju̱kun wainkiamiayi. 14Nuyá̱ ukunam jimiará nantu jeastatuk paintisiáti tsawant ajasmánum núṉkaka mash káakmiayi. 15Nuya̱ṉka Nuwain Yus chicharuk 16“Yamaikia ame nuwemji̱a̱i̱ uchirmiji̱a̱i̱ tura najatmiji̱a̱i̱ kanunmaya̱ jíinkitiarum. 17Núnisaṉ ashí yajasmasha nanamtincha tura nuṉká japinias yujá ainia nusha ashí nuṉkanam wéar pampaṉkarat tusam ji̱i̱rarta” tímiayi.
18Yus nuní̱ tutai Nuwaikia ni nuwe̱ja̱i̱ tura uchirí̱sha núnisaṉ ni najati̱sha jíintrarmiayi. 19Núnisaṉ ashí yajasmasha tura nuṉká japinias yujá armia nusha tura nanamtincha nú weak nú weak jíintrarmiayi. 20Nuyá̱ Nuwái Uunt Yusan áestuattsa kayan ekenar áestutai̱n najana taṉku nanamtinniasha núnisaṉ nuṉkaya̱ncha Yus susamnia armia nuya̱n maa patak Yusan shiir enentáimtak takamtsuk áestuamiayi. 21Tura nuna kuṉkuntin Uunt Yus ti shiir nekapramiayi. Tura Ní enentáimsaṉ chichaak “Yamaikia aentsu yajauch túrutairi̱nkia nuṉkanka ama̱a̱ja̱i̱ṉkia atakka peṉké amukchatniuitjiai. Warí aentska uchichinmaya̱ṉ yajauch enentáimin áiniawai. Núnisnak ashí iwiaaku matsamártatna nunasha amukchartatjai.
22Túrasha nuṉka ana ju̱i̱kkia
yumitinkia micha átatui
tura esatái̱ṉkia tsue̱r átatui.
Nuyá̱ tsawai̱sha káshisha tuke ártatui.
Tuma asamtai arakmar júuktincha tuke átatui” tímiayi Uunt Yus.
Šiuo metu pasirinkta:
Naṉ. 8: jiv
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2009 Avant Ministries in cooperation with Wycliffe Bible Translators, Inc. All rights reserved.