تكوين 2
2
1وَ بِمِثِلْ دَا، تَمَّتْ خَلِيقَةْ السَّمَاوَاتْ وَ الْأَرْض وَ كُلَّ شَيّءْ الْفِيهُمْ. 2وَ فِي الْيَوْم السَّابِعْ، اللّٰهْ كَمَّلْ خِدِمْتَهْ السَّوَّاهَا وَ فِي الْيَوْم السَّابِعْ، هُو وَقَفْ مِنْ كُلَّ خِدِمْتَهْ السَّوَّاهَا. 3وَ خَلَاصْ، الرَّبّ بَارَكْ الْيَوْم السَّابِعْ وَ قَدَّسَهْ أَشَانْ فِي الْيَوْم دَا هُو ذَاتَهْ وَقَفْ مِنْ كُلَّ خِدِمْتَهْ هَنَا الْخَلِيقَةْ. 4وَ دَا تَارِيخْ خَلِيقَةْ السَّمَاوَاتْ وَ الْأَرْض.
اللّه خلق الإنْسان
وَكِتْ اللّٰهْ الرَّبّ خَلَقْ السَّمَاوَاتْ وَ الْأَرْض، 5مَا فِي شَدَرَةْ وَاحِدَةْ كُلَ فِي الْأَرْض وَ قَشّ كُلَ مَا قَمَّ أَشَانْ اللّٰهْ الرَّبّ لِسَّاعْ مَا نَزَّلْ الْمَطَرَةْ فِي الْأَرْض. وَ مَا فِي نَادُمْ وَاحِدْ لِيَحْرِتْ التُّرَابْ. 6وَ لَاكِنْ النَّدَى الطَّالِعْ مِنْ الْأَرْض قَاعِدْ يَزْقِي كُلَّ الْأَرْض.
7وَ اللّٰهْ الرَّبّ خَلَقْ الْإِنْسَانْ مِنْ تُرَابْ الْأَرْض وَ نَفَّخْ فِي مُنْخَرَهْ نَفَسْ الْحَيَاةْ. وَ خَلَاصْ، الْإِنْسَانْ بِقِي حَيّ. 8وَ اللّٰهْ الرَّبّ مَقَّنْ جِنَيْنَةْ فِي بَكَانْ أُسْمَهْ عَدِنْ، فِي الصَّبَاحْ. وَ خَطَّ الْإِنْسَانْ الْهُو خَلَقَهْ فِي الْجِنَيْنَةْ دِي. 9وَ اللّٰهْ الرَّبّ قَوَّمْ مِنْ التُّرَابْ كُلَّ نَفَرْ هَنَا شَدَرْ سَمَحْ لِلشَّوْف وَ كُلَّ نَفَرْ هَنَا شَدَرْ الْعِيَالَهْ حَلُوِينْ لِلْأَكِلْ. وَ قَوَّمْ فِي أُسْط الْجِنَيْنَةْ شَدَرَةْ الْحَيَاةْ وَ شَدَرَةْ آخَرَةْ هَنَا عِرْفَةْ الْخَيْر وَ الشَّرّ.
10وَ بَحَرْ وَاحِدْ مَارِقْ مِنْ عَدِنْ وَ يَزْقِي الْجِنَيْنَةْ دِي. وَ مِنْ الْجِنَيْنَةْ دِي، الْبَحَرْ أَنْقَسَمْ بِقِي أَرْبَعَةْ بُحُورْ. 11الْأَوَّلْ أُسْمَهْ فِشُونْ وَ هُو الْمُحَوِّقْ بَلَدْ الْحَوِيلَةْ، بَكَانْ الدَّهَبْ. 12وَ الدَّهَبْ هَنَا الْبَكَانْ دَاكْ صَافِي. وَ هِنَاكْ فِي صَمُغْ الْعِنْدَهْ رِيحَةْ وَ الْحَجَرْ الْغَالِي الْأُسْمَهْ عَقِيقْ. 13وَ الْبَحَرْ التَّانِي أُسْمَهْ قِحُونْ وَ هُو الْمُحَوِّقْ كُلَّ بَلَدْ الْكُوشْ. 14وَ التَّالِتْ أُسْمَهْ دِجْلَةْ وَ هُو الْجَارِي صَبَاحْ لِبَلَدْ أَشُورْ. وَ الرَّابِعْ أُسْمَهْ الْفُرَاتْ.
اللّه خلق المرة
15وَ اللّٰهْ الرَّبّ شَالْ الرَّاجِلْ الْهُو خَلَقَهْ وَ خَطَّاهْ فِي جِنَيْنَةْ عَدِنْ لِيَحْرِتْهَا وَ يَحْرِسْهَا. 16وَ اللّٰهْ الرَّبّ أَمَرَهْ وَ قَالْ لَيَّهْ: «تَقْدَرْ تَاكُلْ عِيَالْ كُلَّ الشَّدَرْ الْفِي الْجِنَيْنَةْ. 17لَاكِنْ مَا تَاكُلْ مِنْ عِيَالْ شَدَرَةْ عِرْفَةْ الْخَيْر وَ الشَّرّ. أَشَانْ أَكِيدْ يَوْم إِنْتَ أَكَلْت مِنْهَا دَا، تُمُوتْ.»
18وَ بَعَدْ دَا، اللّٰهْ الرَّبّ قَالْ: «مَا عَدِيلْ لِلرَّاجِلْ يَقْعُدْ وِحَيْدَهْ. خَلِّي نَخْلِقْ لَيَّهْ إِنْسَانْ مِثْلَهْ لِيِعَاوِنَهْ.» 19وَ اللّٰهْ الرَّبّ خَلَقْ مِنْ التُّرَابْ كُلَّ حَيْوَانَاتْ الْكَدَادَةْ وَ كُلَّ طُيُورْ السَّمَاءْ وَ وَدَّاهُمْ لِلرَّاجِلْ لِيِشِيفْ كِكَّيْف يِسَمِّيهُمْ. وَ أَيِّ أُسُمْ الرَّاجِلْ أَنْطَاهْ لِلْمَخْلُوقِينْ الْحَيِّينْ، دَا بِقِي لَيْهُمْ أُسُمْ. 20وَ خَلَاصْ، الرَّاجِلْ سَمَّى كُلَّ الْبَهَايِمْ وَ طُيُورْ السَّمَاءْ وَ كُلَّ حَيْوَانَاتْ الْكَدَادَةْ. لَاكِنْ مَا فِي مَخْلُوقْ مِثِلْ آدَمْ لِيِعَاوِنَهْ.
21وَ خَلَاصْ اللّٰهْ الرَّبّ نَوَّمْ الرَّاجِلْ نَوْم شَدِيدْ وَ وَكِتْ هُو نَايِمْ، اللّٰهْ مَرَقْ عَضُمْ وَاحِدْ مِنْ صَفَّهْ وَ سَدَّ اللَّحَمْ فِي بَكَانَهْ. 22وَ بِالْعَضُمْ الشَّالَهْ مِنْ صَفّ الرَّاجِلْ دَا، اللّٰهْ الرَّبّ سَوَّى بَيَّهْ مَرَةْ وَ جَابَاهَا لَيَّهْ. 23وَ مِنْ شَافْهَا، الرَّاجِلْ قَالْ: «أَيْوَى! هِي دِي عَضُمْ مِنْ عُضَامِي وَ لَحَمْ مِنْ لَحَمِي. وَ أُسُمْهَا مَرَةْ أَشَانْ مَرَقَوْهَا مِنْ الرَّاجِلْ.» 24وَ بِسَبَبْ دَا، أَيِّ رَاجِلْ يِخَلِّي أَمَّهْ وَ أَبُوهْ وَ يِلِمّ مَعَ مَرْتَهْ وَ يَبْقَوْا جِسِمْ وَاحِدْ.
25وَ الرَّاجِلْ وَ مَرْتَهْ كُلُّهُمْ عَرْيَانِينْ وَ مَا عِرْفَوْا الْعَيْب أَمْبَيْنَاتْهُمْ.
Šiuo metu pasirinkta:
تكوين 2: ع.د.ت19
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
La Bible en arabe tchadien © Alliance biblique du Tchad, 2019