San Mateo 5
5
Ndi̱kaꞌan ndoso Jesús xiꞌin naꞌa nuu xiki
1Tá xi̱ni Jesús ndi̱xaa kuaꞌa ni naꞌa, saa nda̱a ra ndi̱kunduꞌu ra nuu iin xiki, ñaa ku̱yati nda ítaꞌan xiꞌin ra nuu ra, ya kuni soꞌo nda ya káꞌan ra.
Ñaꞌa ya ndixa ndáa yaꞌvi nuu Ndioxi
(Lc. 6:20-23)
2Saa xa̱á Jesús sínaꞌa ra na, káchi ra saa:
3―Vaꞌa ni kée ndo tá tu kúndaa ini ndo ya kúndáꞌvi ni ndo, ta xíniñuꞌu ni ndo Ndioxi, chi ndóꞌo̱ ku ndo kúu mií ichí koo ndo nuu xáꞌnda chiñu Ndioxi.
4’Vaꞌa ni kée ndo tá tu xáku ni ndo, saa chi vaxi kivi ta sindiko Ndioxi ini ndo.
5’Vaꞌa ni kée ndo tá tu vita ni ini ndo ta kusini ni ndo, saa chi vaxi kivi ta siniꞌi ndiꞌi Ndioxi ñuu ivi yóꞌó nuu ndo.
6’Vaꞌa ni kée ndóꞌo̱ íin tá íin naꞌa, na káꞌun ini án ndóꞌo̱ íin tá íin naꞌa, na íchi tikuii. Xaꞌa ya kúni ndo ikan ndo ya vaꞌa nuu Ndioxi, chi vaxi kivi ta taxi Ndioxi ya koo vaꞌa ni ini ndo xiꞌin ra.
7’Vaꞌa ni kée ndo tá kúndaꞌvi ni ini ndo xíni ndo inka naꞌa, chi saa kundaꞌvi ni ini Ndioxi kuni ra ndóꞌo̱.
8’Vaꞌa ni kée ndo tá tu ndinuꞌu ni ini ndo kúu ndo naꞌa, na kúu mií nima vaꞌa nuu Ndioxi, chi vaxi iin kivi ta kuni ndo Ndioxi.
9’Vaꞌa ni kée ndo tá tu ndáꞌva ndo kuachi xiꞌin naꞌa, na káni taꞌan, saa chi vaxi kivi ta kunani ndo seꞌe Ndioxi.
10’Vaꞌa ni kée ndo tá tu íyo naꞌa, na xáa ndikuu xiꞌin ndo xaꞌa ya kúni ndo ikan ndo ya vaꞌa, ya ndaa, chi ndóꞌo̱ ku ndo ndíkun ichí nuu xáꞌnda chiñu Ndioxi.
11’Vaꞌa ni kée ndo, tá íyo naꞌa kánaꞌa xiꞌin ndo, sítixuꞌvi na ndóꞌo̱, ta káꞌan kini na xiꞌin ndo, xaꞌa ya ndíkun ndo yeꞌe.
12’Tá ndóꞌo̱ ndo saa, tíxuꞌvi ndo, ta ná koo vaꞌa ni ini ndo, kusini ni ndo, saa chi chee ni koo ya vaꞌa taxi Ndioxi ndaꞌa ndo nuu ndivi. Saa ndo̱ꞌo nda ndi̱kaꞌan ndoso tuꞌun yuꞌu Ndioxi xi̱ndoo xi̱naꞌa, ndi̱xuꞌvi ni nda ―káchi Jesús xiꞌin na.
Ndá kuꞌva xíniñuꞌu koo naꞌa na ndíkun Jesús
(Mr. 9:50; Lc. 14:34-35)
13Saa káꞌan tuku Jesús xiꞌin nda ítaꞌan xiꞌin ra, káchi ra saa:
―Tá káa iín ya uꞌva táan yo xiꞌin ñaꞌa xíxi yo, saa íin ndóꞌo̱ nuu na ñuu ivi yóꞌó. Iín ya köo uꞌva, ta köo xáa uꞌva ka ya ñaꞌa, ni väꞌa ka ya, yakan kuaꞌan naꞌa xáta na ya yuꞌu ichí nuu yáꞌa naꞌa, ta xáñu ndoso na ya.
14’Nda tá íin ñu̱ꞌu̱ ya ndítuun na, saa íin ndo nuu na ñuu ivi yóꞌó. Iin ñuu ya íyo nuu xiki sukun, ta küvi koo sěꞌe ya. 15Ni na túun ñu̱ꞌu̱, ta köo chíkaa sěꞌe na ya ini iin ñaꞌa. Sundi chínuu sukun na ya, saa síndiyeꞌe ya nuu ndiꞌi na ndóo ini veꞌe. 16Saa ndóꞌo̱, koo ndo tá kuꞌva kúni Ndioxi, ta saa kuchiñu ndiyeꞌe ndo tá kuꞌva ndíyeꞌe ñu̱ꞌu̱ xaꞌa ñaꞌa ya vaꞌa íkan ndo, ta saa kuni naꞌa ya íkan ndo ta kaꞌan vaꞌa na xaꞌa Iva yo Ndioxi ta xaa kaꞌnu na ra ―káchi Jesús xiꞌin na.
Káꞌan Jesús xaꞌa ley ya ta̱a ra Moisés
17Saa ndi̱kaꞌan tuku Jesús, káchi ra saa:
―Ndïkani ini ndo ya vaxi i sindiꞌi xaꞌa i ley Ndioxi, án tuꞌun ra ya ta̱a nda ndi̱kaꞌan ndoso tuꞌun yuꞌu Ndioxi xinaꞌa. Växi i sindiꞌi xaꞌa i ya, chi ya vaxi i sixinu ka va i ku tuꞌun ya ndi̱kaꞌan Ndioxi. 18Ya ndaa káꞌan i xiꞌin ndo, kivi íyo ka ndivi xiꞌin ñuu ivi yóꞌó, ta nda iin letra, ni iin punto loꞌo ndündaa nuu ley Ndioxi ya ta̱a ra Moisés. Xinu ndiꞌi ni kúu tuꞌun ra, nda iin ya ndïꞌi xaꞌa. 19Yakan kua, ndá ka mií ndo yáꞌa ndoso ley yóꞌó, ni loꞌo ni kua yáꞌa ndo ya, ta saa íyo ya sínaꞌa ndo naꞌa ya kandixa na ya, ta saa ikan tu Ndioxi xiꞌin ndóꞌo̱ va, vali ni koo ndo nuu xáꞌnda chiñu ra. Sundi tá ndá ka mií ndo xáa súvi ya káꞌan Ndioxi, ta saa íyo ya sínaꞌa ndo naꞌa, ta nduu ndo iin naꞌa, na ndee ni ndee ka nuu xáꞌnda chiñu Ndioxi. 20Ya ndixa káꞌan i xiꞌin ndo, tá tu köo íkan ndo ya vaꞌa ndinuꞌu nuu Ndioxi, ta küchiñu ndo kiꞌvi ndo koo ndo nuu xáꞌnda chiñu ra. Yakan tá tu kúni ndo kiꞌvi ndo nuu xáꞌnda chiñu ra, ta xíniñuꞌu ndo vaꞌa ni ka ikan ndo ya vaꞌa nuu taꞌan ya íkan nda fariseo xiꞌin nda sínaꞌa ley Ndioxi ―káchi Jesús xiꞌin na.
Káꞌan Jesús xaꞌa na sáa ini xíni inka naꞌa
(Lc. 12:57-59)
21’Saa ndi̱kaꞌan tuku Jesús xiꞌin naꞌa, káchi ra saa:
―Xa xi̱ni soꞌo ndo ya ndi̱kaꞌan nda maestro nda sínaꞌa ley Ndioxi xinaꞌa. Ndi̱kaꞌan nda xiꞌin xii yo, káchi nda saa: “Käꞌni un naꞌa. Saa chi tá ná kaꞌni un naꞌa, ta saa ndoꞌo un, kaꞌni na chiñu yóꞌo̱, kuvi un, káchi nda maestro ikán. 22Ta vitin káꞌan yeꞌe xiꞌin ndo, tá ndá ndóꞌo̱ sáa ni ini xíni ndo ñani ndo, ta ndóꞌo̱ ta ìyo ni kixi tindoꞌo nuu ndo. Tá ndá ndóꞌo̱ káꞌan xiꞌin ñani ndo, ra kíꞌvi ku ra káchi ndo, ta ndóꞌo̱ ndíso ndo kuachi nuu na chiñu naꞌnu ni. Tá ndá ndóꞌo̱ távi chiꞌña ñani ndo, ta ìyo ni kuꞌun ndo ndaya nuu xíxi ñu̱ꞌu̱ xaꞌa ya káꞌan ndo saa.
23’Yakan kua, tá tu ndíso ndo ñaꞌa kuaꞌan xiꞌin ndo soko ndo nuu Ndioxi veꞌe ñuꞌu kaꞌnu, ta ndi̱kaꞌán ini ndo íyo kuachi ndo nuu ñani ndo, 24ta vaꞌa sindoo ndo ñaꞌa sóko ndo nuu Ndioxi nuu íyo ndo táxi ndo ya ndaꞌa ra. Saa kuꞌun ndo nuu na íyo kuachi xiꞌin ndo, nduku ndo ya mani nuu na, ndikitaꞌan vaꞌa ndo xiꞌin na. Ta saa ndiko koo ndo taxi ndo ñaꞌa ya sóko ndo nuu Ndioxi.
25’Ta vaꞌa ka kama ni ndikundee ndo xaa súvi ndo kuachi ndo xiꞌin taꞌan ndo tá xíka ndo kuaꞌan ndo ichí, tá täꞌan xaa ndo nuu juez. Chi tá köo xáa suvi kama ndo ya xiꞌin taꞌan ndo, ta kundaka na ndóꞌo̱ kuꞌun ndo xiꞌin na nuu juez. Ta ra juez ikán nditaxi ndóꞌo̱ ndaꞌa na policía ta na ikán taan na ndóꞌo̱ veꞌe kàà. 26Ya ndaa káꞌan i xiꞌin ndo, këe yachi ndo veꞌe kàà nda ná chaꞌvi ndiꞌi ndo xuꞌun xaꞌa kuachi ndo, saa tava na ndóꞌo̱ veꞌe kàà ―káchi Jesús xiꞌin na.
Tava ndo ñaꞌa ya kúu mií ndo, ya chíndaꞌa ndóꞌo̱ ikan ndo ya väꞌa
27Xa xi̱ni soꞌo ndo ya ndi̱kaꞌan nda maestro nda ta̱a ley Ndioxi xinaꞌa, ka̱chi nda saa: “Väꞌa kusun iin taa xiꞌin iin ñaꞌa tá süvi yá síꞌi ra ku yá”, káchi nda maestro ikán. 28Ta ya ndaa ni ndixa kua saa íyo ya, nda tá xíto ndaa iin taa ñaꞌa ta ndíkani kiꞌvi ini ra xíni ra yá, nda tá káa ra xa ndi̱kixi xiꞌin va yá saa káa ra, xaꞌa ya ndi̱kani ini ra saa. 29Xaꞌa ya ñaa kua káꞌan i xiꞌin ndo, tá tu xiꞌin nduchi nuu kuáꞌá ndo ku ya kuakiꞌvi ndo kuachi, ta vaꞌa tava ndo ya sikana ndo. Vaꞌa ka kua ná ndiꞌi xaꞌa iin ñaꞌñu ikin kuñu ndo, süvi ka vi ya ndiꞌi vaꞌa xaꞌa ndo kuꞌun ndo ndaya. 30Tá tu ndaꞌa kuáꞌá ndo kua táxi ichí ya kiꞌvi ndo kuachi, ta vaꞌa ka kaꞌnda ndo ya, tava ndo ya mií ndo, vaꞌa ka kua ná ndiꞌi xaꞌa iin ñaꞌñu ikin kuñu ndo, süvi ka vi ya ndiꞌi xaꞌa ndiꞌi ikin kuñu ndo kuꞌun ndo ndaya ―káchi Jesús.
Küvi sindikoo taa yá síꞌi ra
31Saa ndi̱kaꞌan tuku Jesús xiꞌin na, káchi ra saa:
―Xinaꞌa ndi̱kaꞌan nda maestro, káchi nda saa: “Iin taa tá kúni ra sindikoo vaꞌa ra yá síꞌi ra, ta vaꞌa ná kaꞌnda na tutu nuu síndikoo taꞌan vaꞌa na”, káchi ya si̱naꞌa nda. 32Sundi yeꞌe káꞌan i xiꞌin ndo tá ndá taa síndoo yá síꞌi ra, ta chíkaa ra yá ndaꞌa kuachi, ta süvi xaꞌa ya xíka yá xiꞌin inka taa kua síndikoo ra yá, xaꞌa ya kúni mií va ra kua íkan ra saa, kuachi mií ra kua tá ná ndikiꞌin inka taa yá. Tá ná ikan yá saa ta tá káa kuachi naꞌa, na xíka xiꞌin taꞌan, saa káa kuachi íkan yá. Ni ra tíndaꞌa xiꞌin yá ndóo ndaa yóꞌó, ta iin káchi ku kuachi ra xaꞌa ya ndíkiꞌin ra yá. Sundi tá tu xaꞌa ya xíka yá xiꞌin inka taa kua si̱ndoo ra yá, ta köo kuachi ndíso ra, ndikuu ―káchi Jesús.
Ndi̱kaꞌan Jesús küvi chinaꞌa yo Ndioxi
33Saa ndi̱kaꞌan Jesús káchi ra saa:
―Saa ni xa xi̱ni soꞌo ndo ya ndi̱kaꞌan nda maestro xiꞌin xii yo xinaꞌa, ka̱chi nda saa: “Tá chínaꞌa ndo nuu Ndioxi ya xaa súvi ndo chiñu, ta ndixa xaa súvi ndo ya káꞌan ndo”, káchi nda maestro. 34Ta yeꞌe káꞌan i xiꞌin ndo, väꞌa chinaꞌa ndo Ndioxi, ni nda iin ñaꞌa küvi chinaꞌa ndo, ni nuu ndivi ta küvi chinaꞌa ndo, chi nuu xáꞌnda chiñu Ndioxi ku ya. 35Ni nuu ñuꞌú ta küvi chinaꞌa ndo, saa chi nuu xáñu Ndioxi ku ya, ni xaꞌa ñuu Jerusalén küvi chinaꞌa ndo chi nuu koo rey ra kaꞌnu ku ya. 36Ni xaꞌa xiní ndo küvi chinaꞌa ndo, saa chi köo kúchiñu ndo ndasa yaa ndo ixi xini ndo án ndasa ndáá ndo ya. 37Tá kivi káꞌan ndo xaa súvi ndo chiñu káchi ndo, ta xaa súvi ndo ya, tá káꞌan ndo xäa súvi ndo ya káchi ndo, ta xäa súvi ndo ya. Köo xíniñuꞌu kaꞌan ndo inka tuꞌun ya kandixa naꞌa ndóꞌo̱, chi tá chínuu ndo inka tuꞌun káꞌan ndo ta ya káku xiní kiti nǎꞌa ku tuꞌun ikán ―káchi Jesús.
Kuꞌvi ini yo kuni yo na sáa ini xíni yoo
38Saa ndi̱kaꞌan tuku Jesús xiꞌin na, káchi ra saa:
―Xa xi̱ni soꞌo ndo ya ndi̱kaꞌan nda maestro xinaꞌa, káchi nda saa: “Tá íyo iin naꞌa sítikueꞌe na nduchi nuu inka na, ta saa vaꞌa sitikueꞌe na nduchi nuu na ikán. Saa ni tá íyo iin naꞌa si̱ndikava na iin nuꞌu inka na, tá kuꞌva si̱ndikava na nuꞌu na ikán. Saa ná sindikava na nuꞌu mií na i̱kan saa”, káchi ya ta̱a nda maestro ikán. 39Ta yeꞌe káchi saa xiꞌin ndo, ndïko koo ndo ikan ndo saa xiꞌin naꞌa, na íkan ndá ka ñaꞌa xiꞌin ndo. Tá ndá naꞌa ka̱ni xaꞌnda iin ñaꞌñu nuu ndo, ta käni taꞌan ndo xiꞌin na, vaꞌa sindiko koo ndo inka ñaꞌñu nuu ndo ná kani na ndóꞌo̱. 40Tá ndá naꞌa káꞌan kuachi xaꞌa ndo nuu na chiñu, ta kúni na kindaa na toto ndo ndaꞌa ndo, ta vaꞌa taxi ndo toto ndo ndaꞌa na, nda chilo ndo taxi ndo ndaꞌa na. 41Tá ndá naꞌa xáa nduxa xiꞌin ndo kuiso ndo ñaꞌa na kuꞌun xiꞌin ndo iin mil metro, ta vaꞌa kundiso ndo ñaꞌa na kuꞌun xiꞌin ndo uvi mil metro. 42Tá ndá naꞌa ndúku ndá ka ñaꞌa nuu ndo, ta taxi ndo ya ndaꞌa na. Tá ndá na ndúku too ñaꞌa nuu ndo ta taxi too ndo ya ndaꞌa na ―káchi Jesús.
Xíniñuꞌu kuꞌvi ini yo kuni yo na sáa ini xíni yoo
(Lc. 6:27-28-32-36)
43ꞌSaa ndi̱kaꞌan tuku Jesús káchi ra saa:
―Xa xi̱ni soꞌo ndo ya ndi̱kaꞌan nda maestro xinaꞌa, ka̱chi nda saa: “Kuꞌvi ini ndo kuni ndo na taꞌan ndo, ta kundasi nuu ndo kuni ndo na sáa ini xíni ndóꞌo̱”, káchi nda maestro si̱naꞌa nda. 44Sundi yeꞌe káꞌan xiꞌin ndo, kuꞌvi ini ndo kuni ndo na sáa ini xíni ndóꞌo̱, ta kaꞌan ndo xiꞌin Ndioxi ná chikaa ra ya vaꞌa na távi chiꞌña ndóꞌo̱. 45Ikan ndo ya vaꞌa xiꞌin na, ta saa kundaa ini naꞌa ya ndixa kúu ndo seꞌe Ndioxi, ra íyo nuu ndivi. Chi saa mií ra íkan ra ya vaꞌa xiꞌin ndiꞌi naꞌa, táxi ra ndíyeꞌe ñu̱ꞌu̱ nuu na väꞌa xiꞌin na vaꞌa, saa ni síkuun ra savi sata na vaꞌa xiꞌin na väꞌa. 46Tá tu ndisaa naꞌa na kúꞌvi ini xíni ndóꞌo̱, kúꞌvi ini ndo xíni ndo, ta köo ndáa yaꞌvi ya nuu Ndioxi, chi saa íkan tu naꞌa, na köo xíni ichí Ndioxi va. 47Tá tu káꞌan toꞌo ndo xiꞌin ndisaa na taꞌan ndo, ta saa ni köo ndáa yaꞌvi ya nuu Ndioxi. Chi nda na köo kándixa Ndioxi ta saa íkan tu na ikán va xiꞌin taꞌan na. 48Xaꞌa ya ñaa kua ná koo ndo naꞌa, na ndaa ini, tá kuꞌva íyo Iva yo Ndioxi ra i̱í, ra ndaa ini ―káchi Jesús xiꞌin na.
Šiuo metu pasirinkta:
San Mateo 5: xta
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Active: ©Wycliffe Bible Translators, Inc. All rights reserved.