Yowana 6
6
Yeesu kaayaana abhaanu bhiwumbi bhitaanu ebhyokurya
(Mataayo 14:13-21; Maariko 6:33-44; Ruuka 9:12-17)
1Bhunu gayo ꞉gaawooye, Yeesu ˆnaagenda ngʼambu ya omwaro gwa Gariraaya. Omwaro guyo nigwo riisiina erindi ogutogwa ati Tibheeriya. 2Esangi enene erya abhaanu ꞉bhaariga mbaseeta Yeesu, kwa okubha ꞉bhaariga bharorere ebhimenyegesho bhinu ꞉aariga akorere ku-bharwaye. 3Niwe Yeesu ˆnaariinya ku-kiima ekirebhe ari amwi na abheeyigira bhaaye, mbeekara eyo. 4Kabhaga kayo, insikukuru ya Abhayawudi eya Ipaasaka, ꞉yaariga irebhereeye okuyika.
5Bhunu Yeesu ꞉eenamukire, ˆnaarora esangi enene erya abhaanu ndimuujaga-ko. Niwe ˆnaabhuusha Firipo ati, “Angu, ekitura okugura aaki emikaate egya okuriisha abhaanu bhanu?” 6Yeesu okubhuusha Firipo kutyo, ꞉aariga ˆnaamusakya, kwa okubha ꞉aariga amenyere omwene, kinu kaaja okukora. 7Firipo ˆnaamusubhya ati, “Mikaate gya dinaari magana gabhiri#6:7 Dinaari magana gabhiri. Dinaari yimwi ꞉yaariga iriingʼeene na muyeero gwa rusuku rumwi ku-muunu wumwi. gitakutura okwisa abhaanu bhanu bhari anu, raabhé kiraabhagabhire katoototooto.” 8Niwe omwiyigira owundi owa Yeesu, Ndereya, unu ꞉aariga ari mumura waabho Simooni Peetero, ˆnaabhwira Yeesu ati, 9“Ariwo mumura wumwi anu ari na mikaate etaanu egya giishayiri na nswi ebhiri. Nawe ebhyokurya bhinu bhitakutura okwisa, abhaanu bhanu ni bhaafu!” 10Mmbe, Yeesu ˆnaaragirira abheeyigira bhaaye ati, “Mubhabhwire bheekare.” Ansi ayo, ꞉gaariga gariwo manyansi maafu. Niwe abhaanu bhoone kutyo, mbeekara. Mu-bhaanu bhayo, ꞉bhaariga bharimo abharume bhiwumbi bhitaanu. 11Kimwi Yeesu ˆnaagega emikaate giyo, ˆnaakumya Nyamuwanga, ˆnaabhuturabhutura emikaate giyo, ˆnaagabhira abhaanu bhoone kutyo bhanu ꞉bhaariga bheekaaye ayo. ˆNaakora kutyokutyo na ginswi giibhiri gyone, ˆnaabhagabhira. Abhaanu bhoone kutyo mbarya kutyo ꞉bhaariga mbeenda.
12Bhunu ꞉bheegutire, Yeesu ˆnaabhwira abheeyigira bhaaye ati, “Mukumanye ebhisigara bhyone kutyo, kisige okubhura na kimwi.” 13Mmbe, mbabhikumanya bhyone kutyo, mbeejusha bhikapo ekumi na bhibhiri ebhya emikaate gya giishayiri ginu ꞉gyasigaaye.
14Mmbe bhunu abhaanu bhayo ꞉bhaarorere ekimenyegesho kinu Yeesu ꞉aakorere, mbaaika ati, “Kimari omuunu unu niwe omuragi wa Nyamuwanga unu ꞉kyeesigaga ati ariija mu-kyaro anu.”#6:14 Ringira Ekiyiityo kya Ebhiraagiro 18:15-19. 15Yeesu ˆnaamenya ati abhaanu bhayo ꞉bhaariga mbeenda bhamugwate managa, insonga bhamukore okubha omukama weebhwe. Nawe Yeesu ˆneemuka ayo, ˆnaagenda kweki mu-kiima ari omwene era.
Yeesu kaaribhata iiguru ku-nyanja
(Mataayo 14:22-33; Maariko 6:45-52)
16Keegoro, abheeyigira bha Yeesu mbatebhera okugenda ku-mwaro gwa Gariraaya. 17Mbariinya mu-bhwato, mbaamba okwambuka okugenda mu-musi gwa Kaperinawumu. Na akabhaga kayo, ekisuute ꞉kyariga kyeengiiye, nawe Yeesu ꞉aariga akyari kuyika okuyimbana nabho.
18Mmbe, omuyaga ngubhiiya, amabhooka ngamba okubha manene. 19Bhunu abheeyigira bhayo ꞉bhaariga bhaafugire muna kiromiita etaanu kutya, mbarora Yeesu ˆnaaribhataga ku-nyanja aarebhereeye okuyika ku-bhwato bhwebhwe. Mboobhaya muno. 20Niwe, Yeesu ˆnaabhabhwira ati, “Musige okuubhaya! Ni anye!” 21Mmbe, abheene mbeenda ati ariinye mu-bhwato. Ayoayo, obhwato mbugobha ku-kyaro enu ꞉bhaariga mbagenda.
Yeesu niwe ebhyokurya bhinu ebhiyaana abhaanu obhurame
22Mwejo, riisangi rya abhaanu bhanu ꞉bhaariga bhasigaaye ngʼambu, mbarora bhwato bhumwi era ayo. ꞉Bhaariga bhamenyere ati Yeesu atagendere bhwato bhumwi na abheeyigira bhaaye, tari ꞉bhaariga bhamenyere ati abheeyigira bhaaye ꞉bhaagendere abheene era. 23Kimwi abhaanu abhandi mbaaja na amaato okusooka mu-musi gwa Tibheeriya, mbayika anu ꞉bhaariiye emikaate, bhunu Raatabhugenyi Yeesu ꞉aariga akumiishe Nyamuwanga. 24Bhunu abhaanu bhayo ꞉bhaarorere ati Yeesu atari ayo, na abheeyigira bhaaye bhoone bhatariwo, mbeengira mu-bhwato, mbagenda Kaperinawumu okwagara Yeesu eyo.
25Bhunu ꞉bhaayikire ngʼambu, mbamurora, mbamubhuusha ati, “Mwiyigisha, wiijireri enu?” 26Yeesu ˆnaabhasubhya ati, “Enibhabhwira ekimari ati, omunyaagara itari ati musombookeeywe ekimenyegesho kinu ꞉naakorere, tari ni kwa okubha ꞉mwariiye emikaate mwiguta. 27Musige okukorera emirimu ebhyokurya bhinu ebhimara mbinyamuka, tari mukorere emirimu ebhyokurya bhinu bhitakunyamuka, bhinu ebhiyaana abhaanu obhurame bhunu bhutakuweera. Omwana wa Adaamu kaaja okubhayaana ebhyokurya bhiyo, kwa okubha uyo niwe ayaaywe obhuturo bhwa okukora kutyo na Raata, Nyamuwanga.” 28Niwe abheene mbamubhuusha ati, “Angu, woori kikore kutiki insonga kiture okukora amangʼana ganu Nyamuwanga keenda?” 29Yeesu ˆnaabhasubhya ati, “Amangʼana ganu Nyamuwanga keenda mukore, ni kwikirisha unu ꞉aatumirwe nawe.”
30Mbamubhuusha kweki ati, “Woori owuuja okukora ebhimenyegeshoki, insonga kibhirore, kikwikirishe? Owuuja okukora engʼanaki?” 31Bhaajaaji ꞉bhaariiye iimanu#6:31a Ringira Obhungʼaanyi 16:4-36. bhunu ꞉bhaariga bhari ku-nsi ya orukungu, rwa kutyo ꞉yaakaamirwe mu-Makaamo Amataakatiifu ati, “꞉Aabhayaaye ebhyokurya bhya mu-rwire bharye.”#6:31b Ringira Ijabhuri 78:24. 32Mmbe, Yeesu ˆnaabhabhwira ati, “Enibhabhwira ekimari ati, Musa ꞉ataabhayaaye ebhyokurya bhiyo, tari ni Raata Nyamuwanga unu woori kaabhayaana emwe ekyokurya ekyenekyene kinu ekisooka mu-rwire. 33Ekyokurya kya Nyamuwanga ni kinu ekiika okusooka mu-rwire nkiyaana abhaanu bhoone kutyo abha mu-kyaro kinu obhurame bhunu bhutakuweera.” 34Niwe abheene mbamubhwira ati, “Raatabhugenyi, nuukiyaane ekyokurya kiyo ku-nsiku.” 35Yeesu ˆnaabhasubhya ati, “Ni anye ekyokurya kinu ekiyaana abhaanu obhurame bhunu bhutakuweera. Omuunu woonewoone unu kaanyiija-ko okunyiikirisha, atarirumwa omweko kimwi, amwi ati okuungwa obhwiro kweki.
36“Nawe anye enibhabhwira ati, mwandora, nawe mutakunyiikirisha. 37Abhaanu bhoone kutyo bhanu Raata kaanaana, abhaaja okuuja ku-anye okunyiikirisha. Woonewoone unu kaanyiija-ko nitarimweseranya wuri. 38Anye niteejire okusooka mu-rwire insonga nikore ganu eneenda anye, tari niijire insonga nikore ganu unu antumire keenda. 39Unu antumire keenda ati, nisige okubhusha na wumwi ku-bhanu anaaye, tari nisuure bhoone kutyo ku-rusuku rwa obhuteero. 40Enaaika kutyo kwa okubha kinu Raata keenda ni ati, abhaanu bhoone kutyo bhanu bhamenyere Omwana waaye mbamwikirisha, bhabhe na obhurame bhunu bhutakuweera. Anye noone niribhasuura ku-rusuku rwa obhuteero.”
41Mmbe, Abhayawudi bhanu ꞉bhaariga bhari ayo, mbaamba okwisigiinyira kwa okubha Yeesu ꞉aariga aaikire ati, “Ni anye ekyokurya kinu kiikire okusooka mu-rwire.” 42Mbabhuushaanya ati, “Angu, unu atari Yeesu omwana wa Yuusufu, unu eswe kyone kimenyere abheebhusi bhaaye? Woori, kaatura kutiki okwaika ati eekire okusooka mu-rwire?” 43Yeesu ˆnaabhasubhya ati, “Musige okwisigiinyira emwe abheene na abheene. 44Atariwo omuunu unu kaatura okuunyiija-ko atafutirwe na Raata unu antumire. Anye noone nirimusuura ku-rusuku rwa obhuteero. 45Ikaamirwe na abharagi mu-Makaamo Amataakatiifu ati, ‘Abhaanu bhoone kutyo bharibhaga bheeyigisiibhwe na Nyamuwanga.’#6:45 Ringira Isaaya 54:13. Mmbe, omuunu woonewoone unu keetegeeresha na okwiyigira okusooka ku-Raata, uyo kaaja ku-anye. 46Nitakwaika ati ariwo omuunu unu ararorere Raata Nyamuwanga, tari ni unu ꞉aasookere ku-Nyamuwanga, uyo niwe aramurorere.
47“Enibhabhwira ekimari ati, omuunu woonewoone unu kaanyiikirisha, uyo ari na obhurame bhunu bhutakuweera. 48Ni anye ekyokurya kinu ekiyaana abhaanu obhurame bhuyo. 49Bhaajaaji waanyu ꞉bhaariiye iimanu bhari ku-nsi ya orukungu, mbafwa. 50Nawe anu kiriwo ekyokurya kinu kiikire okusooka mu-rwire, omuunu akakirya atakuuja okufwa. 51Anye ni anye ekyokurya kinu kiikire okusooka mu-rwire, kinu ekiyaana abhaanu obhurame bhunu bhutakuweera. Omuunu woonewoone unu kaarya ekyokurya kiyo, kaabha na obhurame bhunu bhutakuweera. Ekyokurya kiyo ni mubhiri gwani, enigusoosha ku-nsonga ya abhaanu bhoone kutyo abha mu-kyaro kinu, bhabhe na obhurame bhunu bhutakuweera.”
52Mmbe, Abhayawudi bhayo mbaamba okubhambashaanya abheene na abheene, mbaaikaga ati, “Omuunu unu, kaatura kutiki okukiyaana omubhiri gwaye kigurye?” 53Niwe Yeesu ˆnaabhabhwira ati, “Enibhabhwira ekimari ati, raabhe mutariiye omubhiri gwa Omwana wa Adaamu, na okunywa amaanyinga gaaye, obhurame bhunu bhutakuweera bhutakutura okubha mw-imwe. 54Omuunu woonewoone unu kaarya omubhiri gwani na okunywa amaanyinga gaani, uyo ari na obhurame bhunu bhutakuweera, anye noone nirimusuura ku-rusuku rwa obhuteero. 55Mumenye ati, omubhiri gwani nigwo ekyokurya ekyenekyene, na amaanyinga gaani nigo ekinywebhwa ekyenekyene. 56Omuunu woonewoone unu kaarya omubhiri gwani na okunywa amaanyinga gaani, uyo kaayimbana na anye, anye noone niiyimbana nawe. 57Rwa kutyo Raata unu kaarama kajaanende ꞉aantumire, na niwe kaakora anye noone niindama, okusooka ku-mwene, mmbe omuunu woonewoone unu kaandya, nirimukora woone arame.#6:57 Ringira Yowana 5:21. 58Mmbe, ni anye ekyokurya kinu kiikire okusooka mu-rwire. Kitakususana na ekyokurya kinu bhaajaaji waanyu ꞉bhaariiye, mbafwa. Tari omuunu woonewoone unu kaarya ekyokurya kinu, aribha na obhurame bhunu bhutakuweera.” 59Yeesu ꞉aaikire amangʼana gayo, akabhaga kanu ꞉aariga ˆneeyigishaga ari mw-isunagoogi,#6:59 Mw-isunagoogi. Ringira riingʼana Riisunagoogi mu-Mangʼana Amakomeeye. Kaperinawumu eyo.
Amangʼana ga obhurame bhunu bhutakuweera
60Mmbe, abhaanu abhaafu mu-bheeyigira bhaaye bhunu ꞉bhoonguuywe amangʼana gayo, mbaaika ati, “Amangʼana ganu ni makomeeye muno! Niga unu kaatura okugeekirisha?” 61Yeesu ˆnaamenya mu-mutima gwaye ati, abheeyigira bhaaye abheesigiinyira ku-ganu ꞉aariga aaikire, ˆnaabhabhuusha ati, “Angu, amangʼana ganu gaabheeta emitima? 62Woori, eyiija okubha kutiki mukarora Omwana wa Adaamu ˆnaariinya okugenda mu-rwire enu ꞉aariga ari ku-bhwambiro? 63Mwoyo wa Nyamuwanga niwe unu kaayaana abhaanu obhurame. Omuunu atakutura okukora kyonekyone kwa bhuturo bhwaye omwene era. Amangʼana gayo naabhabhwira ni ga Mwoyo wa Nyamuwanga, na nigo agareeta obhurame bhunu bhutakuweera. 64Nawe bhariwo abhandi mw-imwe bhanu bhatakwikirisha.” Yeesu ꞉aaikire kutyo, kwa okubha ꞉aariga amenyere bhanu bhatakwikirisha okusookerera ku-bhwambiro ati, ni bhaaya, na unu kaaja okumurya injeejemo. 65Mmbe, ˆnaagenderera okubhabhwira ati, “Kiyo nikyo kyakora naabhabhwira ati, atariwo omuunu unu kaatura okuunyiija-ko raabhe atatangasiibhwe na Raata.”
66Ku-nsonga ya amangʼana gayo, abhaafu mu-bheeyigira bhaaye mbamusiga, ꞉bhataagendereeye okubha amwi nawe kweki. 67Niwe Yeesu ˆnaabhuusha abheeyigira bhaaye ekumi na bhabhiri bharya ati, “Angu, emwe mwone omwenda okwimuka?” 68Simooni Peetero ˆnaamusubhya ati, “Raatabhugenyi, kigende kuuga? Awe uri na amangʼana ganu agakiyaana obhurame bhunu bhutakuweera. 69Eswe ekikwikirisha na kyamenyere ati, ni awe Omutaakatiifu#6:69 Omutaakatiifu. Ringira riingʼana Abhataakatiifu mu-Mangʼana Amakomeeye. unu usorerwe na Nyamuwanga.” 70Niwe Yeesu ˆnaabhabhwira ati, “Nibhasorere muri ekumi na bhabhiri okubha abheeyigira bhaani, nawe owumwi weemwe ni Sitaani.” 71Ayo Yeesu ꞉aariga ˆnaaikira Yuuda, omwana wa Simooni Esikariyooti. Yuuda uyo niwe ꞉aariiye Yeesu injeejemo, raabhé kutyo ꞉aariga ari owumwi wa abheeyigira bhaaye ekumi na bhabhiri bharya.
Šiuo metu pasirinkta:
Yowana 6: kya
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023, Wycliffe Bible Translators, Inc. All rights reserved