Yowana 10
10
Ekirengekanyo kya omureefi owa omutima omujomu
1Yeesu ˆnaagenderera okwaika ati, “Enibhabhwira ekimari ati, omuunu woonewoone unu atakwingirira mu-muryango akeenda okwingira mw-ibhago rya giingʼondi, tari kaarwanya okwingirira ayandi, uyo ni mwifi na muunu unu kaateesha abhaanu ebhiinu bhyebhwe. Omuryango gwa okwingirira mw-ibhago rya giingʼondi. 2Nawe unu keengirira mu-muryango gwa riibhago, uyo ni omureefi wa giingʼondi. 3Omwigusi wa omuryango keegurira uyo, na giingʼondi egyungwa riisi ryaye. Omureefi uyo amenyere amasiina ga giingʼondi, kaagibhirikira ˆnaagiwurusha anja. 4Akawurusha anja giingʼondi gyaye gyone kutyo, kaagitangatira, na giingʼondi gyone ngimuseeta, kwa okubha gimenyere riisi ryaye. 5Giingʼondi gitakutura okuseeta omureefi omugenyi, tari gikamuungwa egibhirima, kwa okubha gitakumenya esi ryaye.” 6Yeesu ꞉aabhwiriiye Abhafarisaayo ekirengekanyo kiyo, nawe abheene ꞉bhataasombookeeywe amangʼana ganu ꞉aariga ˆnaabhabhwira.
7Mmbe, Yeesu ˆnaabhabhwira kweki ati, “Enibhabhwira ekimari ati, ni anye omuryango gunu giingʼondi egiturira okwingira mw-ibhago. 8Bhanu ꞉bhaantangatiiye bhoone kutyo ni bheefi, na bhaanu bhanu abhateesha abhaanu ebhiinu bhyebhwe, nawe giingʼondi ꞉gitaabheetegeeresiishe. 9Ni anye omuryango. Woonewoone unu keengira mw-ibhago okuturira ku-anye aryerusibhwa, ariingira na okuwuruka, na arinyoora obhunyansi obhujomu. 10Omwifi kaaja insonga eebhe giingʼondi, eete, na okunyamura. Nawe anye niijire insonga abhaanu bhabhe na obhurame, na bhabhe nabhwo bhwafu.
11“Ni anye omureefi owa omutima omujomu. Omureefi owa omutima omujomu keesoosha obhurame bhwaye ku-nsonga ya giingʼondi gyaye. 12Omuunu unu keesiga okuriywa, unu giingʼondi gitari gyaye, uyo atari mureefi. Akarora insunji niija, kaasiga ayo giingʼondi ˆnaabhirima, insunji niigwata giingʼondi, egindi ngibhirima enu na enu. 13Omuunu uyo kaabhirima, kwa okubha ni muunu unu keesiga okuriywa, na ku-mwene giingʼondi kitari kiinu, kwa okubha gitari gyaye.
14“Ni anye omureefi owa omutima omujomu. Nimenyere giingʼondi gyani, na gyone gimmenyere, 15rwa kutyo Raata aammenyere, na rwa kutyo anye noone nimumenyere. Anye noone enisoosha obhurame bhwani ku-nsonga ya giingʼondi gyani. 16Niri na giingʼondi egindi ginu gitari gya mw-ibhago rinu, giyo gyone eyeendwa nigireete anu nigireebhe. Giingʼondi giyo gyone, girimenya riisi ryani. Ikamara okubha kutyo, eribha-wo eyijo rimwi, na mureefi wumwi.
17“Raata anyendere, kwa okubha enisoosha obhurame bhwani, insonga nibhugege kweki. 18Atariwo omuunu unu kaatura okunsoosisha-mo obhurame bhwani, tari ni anye omwene enibhusoosha-mo. Anye niri na obhuturo bhwa okubhusoosha-mo, na niri na obhuturo bhwa okubhusubhya-mo kweki. Ni Raata omwene niwe ꞉aandagiriiye okukora kutyo.”
19Bhunu ꞉bhoonguuywe amangʼana gayo, Abhayawudi mbaawukana kweki abheene na abheene. 20Abhayawudi abhaafu mbaaika ati, “Unu ari na ekiwi! Na ni musasi! Kubhaki omumwitegeeresha?” 21Nawe abhandi mbaaika ati, “Amangʼana gayo gatari ga muunu unu ari na ekiwi. Angu, ekiwi ekitura okukora omuwofu arore?”
Abhaanu abhaafu abharema Yeesu
22Mu-nsiku giyo, Yerusareemu eyo ꞉yaariga iriyo insikukuru ya Abhayawudi eya okuyiita kutyo riiyekaru rya Nyamuwanga ꞉ryeesiibhwe. Akabhaga kayo, ꞉kaariga kari ka mbewo. 23Yeesu ꞉aariga ˆnaaribhata mw-ibhanja rya riiyekaru, mw-Igaragaanja rya Seremaani. 24Abhayawudi abhandi mbamwiyinda, mbamubhuusha ati, “Owuuja okukinyansha okukwiganiirisha okuyikira rusukuki? Raabhe ni awe Kiriisitu, nuukibhwire abhweru.” 25Nawe Yeesu ˆnaabhasubhya ati, “Anye naamarire okubhabhwira kutyo, nawe emwe mutakwikirisha. Ebhiruguusho bhinu enikora ku-bhuturo bhwa Raata, nibhyo ebhyaika ati anye ni niga. 26Nawe emwe mutakwikirisha kwa okubha emwe mutarimo mu-ngʼondi gyani. 27Giingʼondi gyani egyungwa riisi ryani. Anye nigimenyere, egyene gyone eginseeta. 28Anye enigiyaana obhurame bhunu bhutakuweera, na gitakutura okubhura. Na atariwo omuunu unu kaatura okugisaakura mu-mabhoko gaani. 29Raata unu ꞉aaginaaye, ni mukuru okukira bhoone kutyo. Na atariwo omuunu unu kaatura okugisaakura mu-mabhoko gaaye. 30Anye na Raata kiri kiinu kimwi.”
31Ayo niwe Abhayawudi mbabhooja amagina kweki, insonga bhamubhume nago, bhamukomere. 32Nawe Yeesu ˆnaabhabhwira ati, “Naabheeresiishe ebhiruguusho bhyafu bhinene bhinu ebhisooka ku-Raata. Ni kiruguushoki ku-bhiyo kinu ekikora mwende okumbuma na amagina?” 33Abhayawudi mbamusubhya ati, “Kitakukubhuma na amagina ku-nsonga ya okukora amangʼana amajomu ganu owukora, tari kwa okubha owujabhura Nyamuwanga. Na owiikora ati awe uri Nyamuwanga, enu awe uri muunu era, rwa abhaanu abhandi!” 34Yeesu ˆnaabhabhuusha ati, “Angu, itakaamirwe mu-Makaamo geemwe aga ebhiraagiro ati Nyamuwanga ꞉aaikire ati, ‘Emwe ni bhaanyamuwanga’?#10:34 Ringira Ijabhuri 82:6. 35Ikaamirwe mu-Makaamo Amataakatiifu ati, abhaanu bhanu bharamiiye amangʼana ga Nyamuwanga, Nyamuwanga omwene ꞉aabhaaikire ati ni bhaanyamuwanga. Na eswe kimenyere ati, ganu gakaamirwe mu-Makaamo Amataakatiifu ni kimari. 36Raata niwe ꞉aansorere, ˆnaantuma mu-kyaro anu. Woori kubhaki omwaika ati, enijabhura Nyamuwanga nikaaika ati, ‘Anye niri Mwana wa Nyamuwanga’? 37Raabhe nitakukora emirimu gya Raata, ambe musige okunyiikirisha. 38Nawe raabhe enikora emirimu gya Raata, raabhé kutyo mutakunyiikirisha anye, mwikirishe emirimu giyo. Ayo niwe omuuja okumenya ati, Raata ari mu-mutima gwani, anye noone niri mu-mutima gwa Raata.” 39Bhunu Abhayawudi ꞉bhoonguuywe amangʼana gayo, mbeenda okumugwata kweki, nawe Yeesu ˆnaatereesuka mu-mabhoko geebhwe.
40Mmbe, Yeesu ˆnaagenda kweki ngʼambu ya oruuji rwa Yorodaani, ˆnaayika anu Yowana ꞉aariga ˆnaabhatiisisha abhaanu, ˆneekara eyo. 41Abhaanu bhaafu mbamuuja-ko, mbaaika ati, “Ni kimari Yowana ꞉ataakorere ekimenyegesho kyonekyone, nawe amangʼana goone kutyo ganu ꞉aariga ˆnaaikira Yeesu, ꞉gaariga gari ga kimari.” 42Abhaanu bhaafu bhanu ꞉bhaariga bhari ayo, mbeekirisha Yeesu.
Šiuo metu pasirinkta:
Yowana 10: kya
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023, Wycliffe Bible Translators, Inc. All rights reserved