Tatanigaina 3
3
Ia Huhughu Ka Noni
1Ka ira vahina tagukava neke to va vuhariro nga Iahova ia God mu, ia adogho mo neke toraina avoavoho fuluduna ka rivai sekesekei ka maneri haroharo. Kaike ravata manei neke kahe ghua iahi ka ia fotati, “?Heve, God neke toraina kahe ghini ghau va gigima taka mahai fuadira ghu ira leghu heke nga ka giliona nunumana?”
2“Ghai a boka mahai fuadi mo ka ira heke ka giliona nunumana, 3nga ira fuana ia heke ta tetu ka hoatana ia nunuma mo neke va kahe ghini ghaina God taka mahainina ghu, ba posinina ghu ghai. Nato posini la ghai, a leme ghatu, neke ghua.”
4Ghe ia adogho neke kahe ghua iahi ka ia fotati, “Deo, ghau e deo go age leme ghu. 5Vununa God ne avohi ta age tobehena hibamu nira noto mahaini la ghau, nia o age taghe God o ghua avohina ia veha nia muko.”
6Ne finini ghu ia fotati ta vehana ka mala mahai ia fuana heke nia ta fifini vevehanana e ghua, manei neke kuhana ghini ta mala vanani avoavohona neke hiori ghu keha fuanara neke mahairi ghu. Manei neke vanani molamo keranau neke au taremehanao keha fuanara neke mahai ghu manei. 7Mahaini di ghua ghu maneri palu ia fuana heke, toke tobehe ma ira hibadi to avohi ghu dike sosole, ta ghuana. Pama varighara kaladi figi tuna gedi titivi ghu dike ghua. 8Ka ia saighonana neke kaporo mehao ia sivoli, maneri palu dike nomohi Iahova ia God ghaghahena ka giliona ia nunuma, dike poika ghini ghu maneri palu ka giliodi ira heke. 9Ghe Iahova ia God neke kudo lao ka ia mane, “Hae mu agho?”
10“Ara nake nomohigho ghaghahena agho ka nunumana nake maughegu ghu, vununa ara nake sosole, nake poika ghu,” neke ghua ungene tughuna ia mane.
11“?Hei neke kahe ghinighona no sosole agho neke ghuana?” neke ghua notohona Iahova ia God. “?Heve, agho noke mahaini ia fuana heke nake kahe ghinigho va gigimano ara taka mahainina ghu?”
12Ia mane neke kahe ghua iahi, “Ia fotati noke nakai taremehaguo agho aiahi neke vanaguna keha fuanara ia heke, nake mahaini ghu ara.”
13Kahe ghua tuna iahi ka ia fotati neke ghua God Iahova, “?Neke heve ghe noke riva ghini nga agho leghutau ta muko iahi?”
“Ia adogho neke seboauna, nake mahaini ghu ara,” neke ghua ia fotati.
14Kahe ghua tuna iahi ka ia adogho neke ghua Iahova ia God, “Vununa agho noto riva ghini iahi,
“Agho o age hio tibiri ta fuludu lao ka leghu tagukava popohi nga
nia leghu tagukava mauke nga, e ghua!
Agho o age tagu ka tiau nia,
nia o age ghani sota
ka ira leghu ravata nga ka ia doli agho.
15Ara a age nakaini ia varikanai,
ka varihoataiu agho nia ia fotati,
nia ka varihoataidi ira pagusu ka agho nia ka ia fotati;
Ia pagusu ka ia fotati e age botai pau nia agho,
nia agho o age ghanini ia susubina kaikeu ka ia pagusu ia fotati.”
16Ka ia fotati, God Iahova neke kahe ghua iahi,
“Ara a age va faa vananigho vavahagala ka ia potei rekaha agho,
nia ka ia karatana va doli rekaha agho, e ghua.
Geta ghua mo iahi ghe, agho o age soni kuhana ghini mo kerauau,
nia manei ge age mana kaputigho ghu agho, e ghua.”
17Ka Adamu, God neke kahe ghua iahi,
“Vununa agho noke nomohi ia ghaseborou, noke mahaini ghu ia fuana heke
nake va beanighono ara mahainina ia fuana,
e age au ghu ka pekana tibiri ia kava vununa ghinigho agho.
Agho o age riva ngazuluai ka ia kamotona doliu mala vananigho ghanona taghou.
18Ia kava e age va kodolo sesehu nia lolozo malauna agho,
nia agho go age mahairi ghu ira ghano ta kodolo taghodi ka ia kobosona kava, e ghua.
19Ka ia toraina riva gotogoto agho,
ta age kuru gheu ghano mala mahaina agho,
o vuhai ke leghu lao ghu agho ka ia kava
ka noke vuhao agho.
Vununa ka forokuna kava noke vuhana agho
nia ka furongona kava take leghu laona agho.”
20Adamu#3:20 Ka ngengene Hiburu mu “mane” e ghua mu fafahakanana Adamu. neke va kudo ghini Ivi#3:20 Fafahakanana Ivi ka ngengene Hiburu mu “doli” e ghua. ia ghaseborona, vununa manei neke age faadira ira leghu noni ta “doli” nga.
21Iahova ia God neke rivai poko ka kafudi tagukava malana ka Adamu nia ia ghaseborona, e ghua.
22Ianimu tuna ghe neke kahe ghua nga iahi Iahova ia God, “Ghatunaina noni irahi to meha taghe ghita to ghua avohina ia veha nia muko. Maneri toraina deo ga va malumuri ghu ta hio fuanana ka ia hekena doli ta mahaina ghu mala doli toghunaina.” 23Va kaveri tuna ka ia nunumana Ideni neke ghua Iahova ia God neke va rivari ghu ka ia kava dike vuha mehao. 24Leghuna gigi kaveri manei, manei neke nakairi ka visi fateona mo ia nunuma, ira engizeli nia kaike leboto sisilufu mala magara ta helupu pelara leghu kenu, mala kopu ghinina ia hangana ta ghahe lao ka ia hekena doli.
Šiuo metu pasirinkta:
Tatanigaina 3: kji
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Islands Bible Ministries. All rights reserved.