Luka 5
5
Yesu Varshii Angaa byaa Mee Mang kǝ Gaat
(Mat 4.18-22; Mar 1.16-22)
1Vii yena, kǝ Yesu ta shambala kyaa nung kuɓor Ganisarat#5.1 Ganisarat: Tǝsakng kuɓor Ganisarat ɗakghai mee ni kuɓor Galili.. Shee asum taa kur ma tung ka kaa yir nung Vitor, 2Yesu ɓee kusuk nyarang kuɓor mɓaa maa angaa mokghan geshii kaa war kalakghaa ta nung gǝng kyaa, a taa bonza zarci yena. 3Pang Yesu lǝri ta kǝshii kusuk gaɗi kyaa, kǝng mang Siman ni, pang ɓan ma ka, kǝ ton kusuk ki wunak shiin mina. Siman shii kaɓan ki, shee Yesu ɗan ndaa, pang ɗǝ kǝ maksa asumaa.
4Kǝ kǝd sheen nung ɗaa sum kyai, shee ɓan Siman ka, “Ton kusuk ki ka wunak ta araa sor soraa, kǝ yin foo zarci ki, kǝ yin mok ta.”
5Siman pal ma ta ka, “Viikuta, wo yis bang ta fwaa kyaa ni, wo kap awen nak, tung ka a shee yaa kaɓan, ng fwak.”
6Yeni kaa shii kaɓan, shee a mok ageeshii pyak, kǝ ryak zarci yen ki naa ɓoraki. 7Pang a tokshii aɗakghai yen ɗǝ kwak tung ka kaa taa ɓwak yen ta, yeni kaa tari, a mok ageeshii ki a shiilshii akusuk kyaa mɓaa yen. Shee akusuk ki min yara swaa shii yen tung lǝmsa.
8Kǝ Siman Biturus, kǝ ɓee kaɓan shee jir karang nggen Yeswaa, pang shee ka, “Mulok, war kalan mi gep, ng mu ram ni!” 9Nzup maa sum kaa ɗaa Biturus, awuna ki shiishii yen maa ndus, tung ɓum maa geeshiing kaa mok. 10A Yakub ɗǝ Yohana awan Zabadi kaa ɗaa swaan Biturus ni, ndus yen maa shiishii ket.
Shee Yesu ɓan Siman ka, “Kaa shii wop rak, nanzwan ɓaryaa a nakghaa mu mokghaa maa sum.” 11Kaa napshii akusuk yen wunak nung gǝngngaa, shee a kala nzup maa wuna yen tang, pang a bii Yesu.
Yesu Bar Ɗǝ Dǝbabci
(Mat 8.1-4; Mar 1.40-45)
12Vii yena ta kǝ Yesu ng kǝshii ndar yena, sum yen kǝ womnak dǝbabci ri ma yaa, kǝng ta araa kyaa, mee kǝ ɓee Yesu shee piri ndaa, ɗǝ yis mee nggen Yeswaa, pang kwarshii ma ka, “Viikuta, ng mee ni shii ku maa shee kaa bonjin mi gep.”
13Shee Yesu gunji sum ki ɗǝ kwak mee pang ɓan ma ka, “Ng ruɗaki! Zheri a bara.” Shee womnak dǝbabci ki ɗoo foo ma nyee.
14Shee Yesu nap maa kutu, pang ɓan ma ka, “Kaa ɓan muɗakghai rak, nakghai kaa zhak shii mu ta sungwarin Vitora kǝ ɓasa ku, kaa nap kwak, kan kee awung kǝ shiiring Musa shee ri, tung kaa sum yokghai ka a sok bonza yaa.”
15Nzup ɗǝ kaɓan, awung kǝ Yesu shii, nung ki basak yal nzup maa raa kǝ ɓyak mang mee. Ɓum maa sum tari tung ka kaa yir nung Vitor, tung kaa sok bara ta. 16Nzup ɗǝ kaɓan Yesu ng ɗǝ naaki arang kǝ mwen ta rak. Tung kǝ shee nung ɗǝ Vitor.
Yesu Bar ɗǝ Mu Ndus Shanggad
(Mat 9.1-8; Mar 2.1-12)
17Vii yena kǝ Yesu ng ta maksa asum maa ya, Afarisi#5.17 Afarisi: Ayen nyaa angaa byaan kuɓolng shiiring Musa kadal kadal. ɗǝ angaa yokghan shiiring Musa kaa war nzup maa ndarng kaa nggǝs Galiliyaa ɗǝ Yahudiya, ɗǝ kǝshii ndar Urushalima, a ta ɗaa kyaa ta tang. Mulok Vitor na ma shadnang kǝ bar ɗaa angaa womnak. 18Kaa ta tang, shee a dǝshai taa ɗǝ sum yen kǝng shanggad, shii maa araa yisa, asum kyaa shii ta yara gwarshii tung ka wulǝra sum ki ta kǝshii kyaa, kaa ˈyii ma nggen Yeswaa. 19Yeni kaa sok gwarshiin lǝra rak tung ɓum maa sum. Shee a turi shiin givyaa, pang a ɓoo ɓoˈalng kǝshii ki, tang ni pang a wujira sum ki ta tǝɗoo maa sum maa, ta nggen Yeswaa.
20Kǝ Yesu ɓee ka asum kyaa na aɗoo yena nzup ta mee yaa. Shee ɓan sum ki ka, “Mar min a porshii aram mu furyangaa.”
21Afarisi ɗaa angaa yokghan shiiring Musa, a kap yiɓsǝna maa ɗakghai yen ka, “Nani mari kǝng porsa Vitor paa? Ng zhakghaki ka mee porsa ram maa sum furayang yen maa, awung kǝ Vitor ni en mu shaaki paa?”
22Yesu kǝ yok awung kǝ a koraki taa aɗoo yena pang yiɓǝn yen ka, “Yani ryak pang yin koora aɗoo shiin maa awunari paa? 23Ma yen ki ni kun ɓyakghaa paa? Kǝng shee ka, ‘A porshii ram mu furyangaa,’ koo mang kaa shee ka, ‘Nanzu kaa sǝri nyaa’? 24Ng ruɗaki kǝ yin yok ka, makghai Fan sum, ng sham ta apar ryaa kǝng porshii aram furyang.” Shee shiiɓǝl ma ta mu womnak kyaa ɓan ma ka, “Nanzu ka cir ara yisa mu kaa por lokghaa.” 25Shee nanzu mang, cir ara yisa mee yis maa sum maa, kap shii lok pang ng makghaa Vitor. 26Nzup maa sum kaa ta tang ndus yen shiishii, a mak Vitor, a shee ka, ɓari wo ɓee awung kǝ wo ɗǝ ɓyaaki rak.
Yesu Tok Lawi
(Mat 9.9-13; Mar 2.13-17)
27Ta dibarin nbana, kǝ Yesu kala kǝshii ndar ki. Mu yelan pyar ndar#5.27 Pyar ndar: Mee ni pyar gandu. yen kaa tokghaa ma ka, Lawi. Ng ta ɗaa kyaa ta ara yalang pyar ndar kyaa, shee Yesu ɓan ma ka, “Tari, kaa bii mi.” 28Pang Lawi nanzu shee kala awushaa mee pang bii Yesu. 29Shee Lawi kwar lak ryaa maa awura lok mee yaa tung makghaan Yesu. Aɗakghai mee, angaa yelan pyar ndar pyak ɗaa dǝs maa sum a taa ɗa ryaaki ɗǝ yen ket. 30Afarisi ɗǝ angaa yokghaan shiiring Musa a ɗaa angaa yen ni ket, a kap ɓoran gyer ta angaa byaan Yeswaa ka, “Tung yeni pang yin swaaki, yin ryaaki ɗaa angaa yelan pyar ndar ɗaa angaa shaan ram paa?”
31Yesu pal yen ta ka, “Angaan kaa ɗǝ womnak rak, a yara mu nggal rak, angaa kaa ɗǝ womnak ni yara mu nggal. 32Ng taa tung kǝng tok angaa ɗaan zar ni rak, ng taa tung nzup maa angaa shaan ram ni ka, kaa shangshii aɗoo yen.”
Yiɓǝna shiin Kaɓan Nungaa
(Mat 9.14-17; Mar 2.8-22)
33Shee a ɓan ma ka, “Angaa byaan Yohana mu bonza a ɗǝ kaɓa nung ɗǝ kwarsan Vitor, angaa byaa maa Farisi a ɗǝ shaaki ket, yeni ryak pang angaa byaa mu a ryaaki ɗǝ swaaki paa?”
34Yesu pal yen ta ka, “Amar mu yii pashii ɗǝ kǝ kaɓa nung kaa ta ɗaa kyaa ɗǝ yenaa? 35Vii ɗakghai taak mang kǝ mu yii pashii a cira ma ta tǝɗoo yena, taa yisa kyaa ni pang a kaɓa nung.”
36Yesu ɓan yen agara mari pang shee ka, “Mu ɗakghai ɗǝ kǝ koma pǝri pashii kǝ tǝl shiin koɓyaa rak, mee ni shii kaɓan, yarsa pǝri pashii ki, mang pashii ki shaa ɗǝ mang koɓi ki rak. 37Muɗakghai ɗǝ kǝ fura yining nggam kǝshii koɓin lapɓurungaa nyaa? Ng mee ni shii kaɓan Yining nggam ki, meni yal sarsa koɓin lapɓurung ki, nggam ki ɗǝ koɓin lapɓurung ki a yarsak. 38Tung kaɓan, yining nggam kun kaa fur kǝshii lapɓurung pashaa ni. 39Mung kǝ ɓwak soo nggam mang kǝ yellaa, yaa ruɗa yinin nggam ta rak tung ka mang kǝ yellaa ki ɓyakng maa.”
Šiuo metu pasirinkta:
Luka 5: (Boi) Tiyaa
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©️2022 Luke Initiative for Scripture Translation