Luka 12
12
Naɓan Kutu Shin ɗaa maa Farisi yaa
(Mat 10.25-27)
1Kaa ta kaɓan asum taa shiil ɓum, tung shiila yen ki pan ryak kaa tabsaa aɗakghai yen, pang Yesu kap ɓana angaa byaa mee nung kaa pang, shee ka, “Kǝ yin ndǝr iyis maa Farisi, tung ka a ɗaa angaa tǝlǝm mɓaa ni. 2Nzup awung kǝng ɓuɓaa taa waraa apara, nzup maa awung kaa shaa ma ara ɓuɓaa a yokgha ma. 3Nung kǝ yin ni shee ta ara shiiryaa a sheera ma tǝɗoong vii ya. Nung tǝkos kǝ yin sheeraki kǝshii kǝshaa, a Sheera ma shiin givyaa.
Mung kaa Shaa Wop Mee
(Mat 10.28-31)
4“Ng ɓaa yin yinaa Mar min, kǝ yin shii wop maa angaan kaa ɓora ndus yin rak, dǝbarin kaɓan a shama shaa yin awen nak. 5Ng zhakghaa yin mung kǝ yin shaa wop mee, shaan wopng Vitor. Mung kǝ mee ni wun ndus yin, shama kǝ foo yin ta rwaa mang ɓetki ɓetkyaa. Ng kaɓan ni, mee ni en mung kǝ sham kǝ yin yir wop mee. 6Ng taka anyeeeshiin gularin lok kwen a ɗǝ ryapsa yen shiin ketlin pyar mɓaa ni rakghaa? Nzup ɗǝ kaɓan Vitor rikǝnaki ɗǝ gaat ta kǝshii yena rak. 7Koo tǝkoɓin shii yin a ɓwak yok shiila yena. Kǝ yin shii wop rak, yini yin ɓyak aɓum maa gularin lok.
Sheerang Yesu ɗǝ Vana Mee Kǝshii maa Suma
(Mat 10.32-33; 10.19-20; 12.32)
8“Ng ɓaa yin, nzup mung kǝ ɓana asum ka ng mamin ni, makghai Fan Sum ng ɓaa awan tokghaan zarng Vitor ka ng mamin ni. 9Nzup ɗǝ kaɓan mung kǝ meni van mi nggen maa sum maa, makghai Fan sum ng vana ma ta nggen maa awan tokghaan zarng Vitora. 10Nzup mung kǝ shee vishiin nung shiin Fan Suma, Vitor porsa aram mee furayang, nzup ɗǝ kaɓan mung kǝ meni shee vishiin nung shiin Awurkin Vitora, Vitor porsa aram mee furayang rak.
11“A yen ni wunak yin toor nggen maa mushorin ara shama shii maa angaan Yahudu ɗǝ nggen maa ruu yaa, ɗaa mushorin ndar. Kǝ pis yin ɗaa awung kǝ yin pala yen ta rak, ɗaa awun kǝ yin shee rak, 12tung ka Awurkin Vitor maksa yin maa awung kǝ yin shee ta tang.”
Agaran Gondong Mu Awuu Maa Apar
13Muɗakghai ta kǝshii maa sum kyaa ɓan Yesu ka, “Viikuta, ɓan zǝǝ min kǝ kaɓshii war maa awung kǝ dǝ war kuu kala war maa.”
14Yesu pal ma ta ka “Sum, na ni tee mi ka kǝng nak yin maa mu toor ɗǝ mung kapsa awun kǝ dǝ yin kuu kala yin maa paa?” 15Pang ɓan yen ka, “Ɗǝran! Kǝ yin nak ruɗan toksa maa awuu maa par rak, tung ka sokghaa maa awuu maa par mee ni ryakghaa ku kaa sok fyedna taa apara rak.”
16Shee ɓan yen agara: Shee ka, “Mu sokghaa yen ta mang kǝ ɗǝn mee kun ɗakghai. 17Shee kap koora maa aɗoo, ng sheeki ka, ‘Aran kǝng toksa nzup maa wun kǝng ɗǝnshii ta rak, yeni pang ng shaa paa?’
18“Pang shee ka, Zheri ng yok awun kǝng shakghaa. Ng rumza nzup maa cadn kǝng ɗǝ mee kǝng lokshii a dǝshaa maksar maksar kǝng fur nzup maa awun ɗǝn min ta ɗaa awun kǝng ɗǝ mee. 19Kǝng ɓan shii min ka, a tokshii awura ryaa yaa ma maa yee pyak, yir wusungaan ɗaa mu, shii ta ryaaki ɗǝ swaaki kaa kwar lakng maa angaan kaa shaa katla maa ndoo ɗǝ wok.”
20Pang Vitor ɓan ma ka, “A Gondong ni! Ta biibin ɓaryaa a kwaa ki ni. Na ni wura nzup maa awun kaa tokshii ki paa?”
21Yesu kǝd nung ki ɗǝ sheeki ka, “Kaɓan ni pang mung kǝ meni tokshii awen shii mee maa taa par ryaa, nzup ɗǝ kaɓan ng mu shoor ni nggen Vitor.”
Kǝ Pis Yin Rak
(Mat 6.25-34)
22Shee Yesu ɓan angaa byaa mee ka, “Tung kaɓan ng ɓana yin, kǝ pis yin tung fyedna yin rak, ɗǝ awung kǝ yin ryak, koo awun kǝ yin ryakghaa ndusa yina rak. 23Yokghan ka fyedna ɓyak awura ryaa, kan kee mang kǝ ndus ɓyak kǝrɓǝt ri. 24Ɓyaan agwaat: A kwanaki rak, a ɗǝ ˈyobɓaki rak, a ɗǝ arang kaa toksaki ta rak koo cadng rak, nzup ɗǝ kaɓan Vitor ng ɗǝ naa yen awura ryaa. Yin ɗǝ yokghaki ka yin ɓyak agwaat nggen kal ta nggen Vitora rakghaa! 25Nani ta kǝshii yinaa pang tung pisa maa par ri, shama fwaa dǝtshemi gaat koo ayisa shii mee maa paa? 26Ng yin ni shama shaa awuu njot mari rak, tung yeni pang ng pisa yin ɗaa dǝs maa awuna kyaa paa?
27“Ɓasan ɗǝ ɗaan buri kǝng ɗa pokghaa kǝ yin ɓee raa. Ɓasan ɗǝ shiin kaa maksaraki ta. A shaa ɗǝn rak, koo a tǝlsa shii yen maa akǝrɓǝt rak, nzup ɗǝ kaɓan ng ɓana yin ka, koo Salmon ɗaa awuu sokghaa mee shama shaa tǝshapn kǝ kun gang mang gaat ta kǝshii yena rak. 28Ng mee ni kaɓan ni pang Vitor ng kasa alurum taa pokghaa, alurum kǝ wo ni ɓee yen ɓari nas a kuɗuk yenaa ɗǝ rwaa, yin ɗǝ yokghaki ka Vitor kasa yin kǝ yin kun ɓyak kaɓan nakghaa? Yinaa angaan kǝ naa maa aɗoo yin njot! 29Kǝ yin ɗǝ kǝ koora karkǝɗoo ta shii maa awung kǝ yin ryakghaa rak, ɗǝ awung kǝ yin swaa rak, kǝ pis yin tung ki rak. 30Angaa maa par ryaa kaa yok Vitor rak ni pang a yara nzup maa awuu mari. Dǝ yin yok ka yin ruɗa awuna mari. 31Nzup ɗǝ kaɓan, yarang tǝruun Vitor, a naa yin dǝs maa awuna maryaa ket.
Toksan Awuu Kwak Toora
(Mat 6.19-21)
32“Kǝ yin shii wop rak, yinaa tarak maa cak kǝ yin njot. Tung ka Dǝ yin yira wusungaa kǝ na yin tǝruu ki. 33Ryapsan nzup maa awung kǝ yin ɗǝ mee, kǝ yin na angaa shoor. Yarang zarin pyarng kǝ kaksharaa rak, kǝ yin tokshii sokghaa yin lokng toora mang kǝng masalaki rak, aran kǝ akoos shama gunza rak, ɗaa adidam shama swaa rak. 34Tung ka arang kǝ sokghaa yin ta, tang ni pang karkǝɗoo yin ɗaa ta.
Kasan Ɗaa Yin tung Taan Mulok
35“Kasan ɗaa yin tung ɗǝn, kǝ yin kala rwaa dugus yin ryaaki. 36Kǝ yin ɗa kan kee akorin kaa ˈyaa yisǝng mulok yen mang kǝ nak arang lakng yallan yii pashaa. Meni tari kǝ sok yen wommi, ng mee ni ta wun karkǝshii kaa pǝl maa karkǝshii ki ta nyee. 37Awung katla karkǝɗoo ni taa koring mu lok kyaa, ng sum ki ni taa sok yen kaa yakghai wom ˈyaan yis. Kǝduk dukghaa ng ɓana yin ka, ryakghaa kǝrɓǝtng tǝkori mee kǝ ɓan yen ka ɗan ndaa, kǝ yin rii awura ryaa, byaa yen tǝshaa tǝshaa kǝ kapshii yen maa awura ryaa. 38Akorin pan a nakghaa angaa katla maa aɗoo ng meni tari ɗǝ tǝɗoong biibi koo ɗǝ peeng kanas, meni taa sok yen kaa ta shakghaa maa. 39Tung kaɓan Yokghaan ka Mulok ni wuu yok dǝtsheeming kǝ koos taa lok myaa, kala ma kǝ lǝr lok myaa kǝ gunjin maa awung mee rak. 40Yini maa ket, kasan ɗaa yin, tung ka Fan Sum taa ta ayisang kǝ yin yokghai rak.”
41Biturus yiɓǝn ma ka, “Mulok a ɓaa war warni agara maryaa koo nzup ɗaa sumyaa nyaa?”
42Mulok palta ka, “Nani mushorin kori mang kǝng shaa ɗaan kǝduk-dukghaa ɗǝ sakghaɗa paa? Mee ni mung kǝ mulok mee ˈyaa lok mee kwak myaa tung ka kǝ ɗǝ kǝ naa a dǝs maa koring sum ki awura ryaa yen ta dǝtsheemi kǝ sum ki shee nyaa? 43Mu nggen kal ni koring kǝ mulok mee taa sok ma shaan awung kǝ na ma shaaki. 44Ng ɓana yin ka, naa maa ˈyaan yis nzup maa awung kǝng ɗǝ mee. 45Nzup ɗǝ kaɓan ng kori ki ni shee ta aɗoo myaa ka, mulok min Pora mang nak, pang kap ruusa maa kori kyai, pang ɗǝ ryaa ɗǝ swaa maa awunan kǝ ɗǝ kǝ wuna maa. 46Vii gaat mulokng kori ki taa sokghaa ma ta viing kǝ yokghai rak ɗǝ dǝtsheeming kǝ yokghai rak. Vǝvǝra ma, kǝ ruushii ma kǝ ton ma foo kǝshii maa arang kaa ɗǝ ˈyaa angaan kaa ɗǝ yira kutu rak.
47“Ng kori ni yok awung kǝ mulok mee ruɗaki ka kǝ shii pang ˈyii aɗoo ka kǝ shii awen kyaa rak koo van shaa maa awung kǝ mulok mee ki ruɗaki, a ruusa maa ɗǝng. 48Nzup koring kǝ yok awung kǝ mulok mee ruɗaki kǝ shii rak, pang shii awung kǝ sham ruusa, a ruusa ma njot. Nzup mung kǝ Vitor ni na ma awuu pyak, Vitor yara awuu pyak ta kwak myaa. Mung kǝ Vitor ni na ma ˈyaa maa awuu pyak, Vitor yara awuu pyak ta myaa.
Yesu Wutaa Kapsana
(Mat 10.34-36)
49“Ng taa kǝng ryak rwaa ni ta apar ryaa, sokghaa wubang ruɗa, rwaa ki wubang ta ryaa kyaa! 50Ng ɗǝ vishiin bonzan #12.50 vishiin bonza: mee ni bungaan kǝ Yesu taa swaak ta ayisang nggena. mang bungaa mang kǝ taang maa nggena, karkǝɗoo min yarsa ni ka kaa wuu shii ma kǝ lakshii ta. 51Ta ɓyaa yinaa ka, ng taa ka kǝng wutaak ɗaan wom ni ta apar ryaa? Ng kaɓan ni rak! Ng ɓaa yin, kapsana ni pang ng wutaak. 52Awung kǝ kap ɓari, kǝshii lok gaat kǝng ɗaa asum kwen, a kapsanak, asum taat shii maa sum mɓaa ya, asum mɓaa shii maa sum taat ɗaa. 53Dǝ kapsana ɗǝ fan mee, fan kapsana ɗǝ dǝ mee, nak kapsana ɗǝ fai mee, fai kapsana ɗǝ nak mee, kǝ kapsana ɗǝ yiin fan mee, yiin fan kapsana ɗǝ kǝ mee.”
Yokghan Yisan Nggen
(Mat 16.1-3)
54Yesu ɓan asum tǝkwak ta ka, “Yin ni ɓee gurgushii ni nanzu sharvii ya, yin ɗǝ sheeki ka, a shaa korok, kaɓan ni pang a shaa korok. 55Ng yin ni yir wuu war langvii veɗaaki, yin ɗǝ sheeki ka a shaa araa pyaa, kaɓan ni pang a shak. 56Yinaa Angaa tǝlǝm mɓaa! Yin yok ɓyaan awung kǝng waraki ndara ɗǝ toor korok, nzup ɗǝ kaɓan yin sham yokgha maa awung kǝng waraki taa apara zheri rakghaa?
Kasan Ɗaa Yin ɗǝ Mung kǝ Yin ɗǝ Toor ɗǝ Mee
(Mat 5.25-26)
57“Yeni ryak pang yin yok awun kǝ kun kǝ yin shaa rak paa? 58Yin ni naaki lokng toora ɗǝ mung kǝ yin ɗǝ toor ɗǝ mee, ta gwarshaa, yar shiiin kǝ yin kasak. Ng woni van, wura naa ku ta ruun toora. Ruun toor tona ku naa fan kop, fan kop ta tona ku wura naa jaarum maa. 59Kǝduk dukghaa ng ɓana ku a ɗaa tang ni, a wara rak shee wani pǝr nzup maa awung kaa byaa ku.”
Šiuo metu pasirinkta:
Luka 12: (Boi) Tiyaa
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©️2022 Luke Initiative for Scripture Translation