Mata 4
4
Pe heeya ge Zeso ne
Mrk 1.12-13; Luk 4.1-13
1Guwa̰ gaw, On̰om ge Dok ne gene Zeso ɗiŋ ge babur pul yà, ndwa go Ba ge ho̰o̰l he ne pe. 2Guwa̰ ge wa̰a̰ mam njuwal dwam warndà ɗaal mage gyala go, camal ɗege kee ne. 3Ba ge hee nda pe mbo ya ge ne ta, jan ne go: Kaɗɗa go fareba mo Dok Van ne, ho mo wa go, njal mbe ma no, num seŋe kaŋ zam. 4Zeso gwan ge ne janna go: Njaŋeya ge Dok ne jan go:
«A be kaŋ zam ɗeŋew mbo ee ndu duwana kaɗ ge ndwa ne to,
Ɗaŋɗe, ge fare ge diige peɗ ge ndage no ge Dok wa zì ya ta.»#Dwa 8.3.
5Guwa̰, Ba ge ho̰o̰l gene ne ge suwal ga̰a̰l ge harcal diŋ yà, ee ne ge zok ge Dok ne sok a̰me ge haal waɗeya pagal digi. 6Sok mbe go, jan ne go: Kaɗɗa go fareba mo Dok Van ne, doo tene ya se, ago Njaŋeya ge Dok ne jan go:
«Mbo hoɗ na malayka ma na wa ge mo pe,
Àa mbo wan mo ge maa tok digi caɗ,
Ge go mo ko chiya ge njal sok van a̰me ta to.»#Mkm 91.11-12.
7Zeso jan ne go: Ge sok a̰me ge ɗogle ge Njaŋeya ge Dok ne mbe zì, jan go: «Mo mbo hee Bagezok Dok ge amo pe to.»#Dwa 6.16. 8Ba ge ho̰o̰l gene ne ge njal a̰me ge haal waɗeya pagal digi yà iya, ngay ne muluk ge dunin̰a ne ma peɗ, ge maa kaŋ kwaɗa ma. 9Jan ne go: «Kaɗɗa mo guu mo ko ya ge mbi ndwa se uware mbi, mbi mà hon mo ano mbe ma no peɗ.» 10Zeso jan ne go: «Wa̰a̰ tene gezi yà Saytan! Ago Njaŋeya ge Dok ne jan go:
“Mo mbo uware Bagezok Dok ge amo ɗu.
Mo kee ne sḛ ɗu kikiɗ tèmel.”»#Dwa 6.13.
11Ge sok mbe go, Ba ge ho̰o̰l n̰a ne, malayka ge Dok ne ma mbo ya ge ne ta, àa ɗege kee tèmel hon ne me.
Fare oyya ge Zeso ne ge suwa ge Galile ne go
Mrk 1.16-20; Luk 4.14-15; Yoh 1.35-43
12Guwa̰, Zeso za̰a̰ go àa wan Yohana, ba ge kee nda baptem ya ge daŋay zì. Sok ge za̰a̰ fare mbe go, ɗege mbo kaɗ ge suwa ge Galile ne yà. 13Daa kaɗ ge suwal Nazareɗ diŋ to, mbo kaɗ ge Kapernawom yà, suwal ga̰a̰l ge no guwa ge mangaɗam ga̰a̰l ge no suwa ge Zabulon mage Neftali ne buwal ge nga go. 14A ndwa go fare ge ndu ge zwagre Dok wa Ezay ne ge dee jin̰a wa huy:
15«Ḛ za̰a̰, nda ge no pe rusu ge Yahuɗ ma way zì to,
Ge kaa no ge suwa ge Zabulon mage Neftali ne go ma,
Ge no vin̰a pul ge mbo mangaɗam ga̰a̰l wa yà,
Ge no mangaɗam Urdun wa lee gene yà ma,
Galile, suwa ge nda ge no pe rusu Yahuɗ zì to ma way!
16Ɓase ge ambi ge kaa no ge tṵṵ ge ɗeɗeg zì ma,
Kuwa kɔn̰al ge monna ge Dok ne ya go,
Num ge kaa no ge suwa ge tṵṵ ge swày ne zì ma,
Kɔn̰al a̰me zen ja ge num pagal.»#Eza 8.23–9.1.
17Ge sok mbe go gaw, Zeso ee pe oy fare, ka janna go: Ḛ seŋe ta se, ago, sok ge Dok kee muluk ge ḛ pagal mbyaɗ-ɗa go.
Tolla ge Zeso too nda ge ame hateya ge ndà ge zḛḛge ma
18Dwam a̰me go ɗu, Zeso ka mboya ge mangaɗam ga̰a̰l ge Galile ne wa go, kuwa nda ge swaɗ soso ma zi dol kuwal, àa kaa na̰ van, ge ɗu dḭḭl Simo̰ ge nda chiya ne dḭḭl Piyer, Andre ge ne na̰ van me. 19Jan num go: «Ḛ gaa kàre mbi pe. Ajo̰o̰ ḛ nda ge wan sini ma ne, mbi mbo seŋe ḛ nda ge gene nda duwana ma ya mbi ta ma.» 20Ge sok mbe go gaw, àa n̰a maa kuwal ma, àa kàre ne pe ya.
21Sok ge mbo zḛḛ ya kaal nde, kuwa nda ge swaɗ soso ge ɗogle ma zi, àa kaa na̰ van, Jak mage Yohana ɓanna ge maa ba Zebede kàɗɗa ge faa go zoo maa kuwal ndwal ma. 22Tol num waɗme, ge sok mbe go gaw, àa n̰a maa ba ge faa yà, àa kàre ne pe ya.
Zeso hate ɓase ma fare ge Dok ne, zon num me
23Guwa̰, Zeso ka mbo oy Fare ge Kwaɗa ge muluk ge Dok ne ge suwa ge Galile ne go peɗ, ka hate nda ge zok kee kaɗeya ge Yahuɗ ma way ma zì, ka zon nda ge ka kee tuguɗi mage sulugu ge diige pe peɗ, ge ɓase ma buwal zì. 24Ne kaŋ ge kê mbe, ee nda faa ge ne dḭḭl ge suwa ge Siri ne go peɗ. Ge sok mbe go, àa ka gene ne nda ge ka kee tuguɗi pe hini-hini mage ka za̰a̰ yal ma ya, ge nda ge on̰om ge sone ma no num zì ma, ge suu mbuɗuɗum ma, ge looɗol ma ya me, ne sḛ ka zon num. 25Go mbe no, nda mbo ya ɓase nɔnɔg ge Zeso pe go, ge suwa ge Galile ne ya, ge Dekapol ya ndwa go suwal ga̰a̰l ge wol ma, ge suwal ga̰a̰l Jerusalem ya, ge suwal gegene ge no ge suwa ge Jude ne go ma ya, ge suwa ge no mangaɗam Urdun wa lee gegene yà ma ya me, àa ka kàre ne pe.
Šiuo metu pasirinkta:
Mata 4: kiaGRB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2017 Wycliffe Bible Translations, Inc. All rights reserved.