Matthew 9
9
Jesus‑em Naallghuskanga Uniiqaq
1Taagken Jesus angyamun uuglluni inglunganun naayvam aghviqaq. Enkaam Capernaum‑emun aglaqaq neminun. 2Ilangita yuget ellnganun tagitkaat uniiqaq yuuk allighaakun. Jesus‑em liigikluki ugpeqilleghtulngit, pikaa uniiqaq, “Ighnemni, quya! Seghleghqelleghten seghevutut.”
3Taagken ilangi apeghtughikayuget Liilightuusaneng sumeghtaghaqat, “Una yuuk seghleghqeghllagtuq. Kiyaghneghuyugtuq seghevutilleghmikun seghleghqelleghneng!”
4Jesus‑em liisimakluki sumeghtaghallghit, pikii, “Sangan seghleghmeng sumeghtaghaghetsi? 5Naliq akuzilleq piyaqniita, ‘Seghleghqelleghten seghevutut’ nalighmeng ‘Makelluten piyugi’? 6Liigikesnaqamsi Ighnegha Yugem seghevutilleghqalgutanga seghleghqelleghmeng nunami whani.” Enkaam uniiqaq yuuk pikaa, “Makelluten, allighan tuguluku, aglaa!”
7Yuuk makelluni aglaqaq. 8Yulghutet esghapagluku tallughyukat, usuqegkaat Kiyaghneq tawatelngughmeng aghtughyaghqaanghilleliskangi yuget.
Jesus‑em Tuqluqanga Matthew
9Taam kingunganeng Jesus‑em igleghutkelluku esghaqaa tax‑em qerngughtistenga, aqumluni qepghaghvigmini; Matthew‑nguftuq. Pikaa, “Maligtinga.”
Enkaam Matthew‑m nekevluni maligtekaa.
10Mulugpenateng Jesus‑enkut maligsaaghtekullghiit neghyaghtuqat Matthew‑nkunun. Neghuusimaluki tax‑meng qerngughtistelghutetlu, seghleghqestelghutetlu aqumluteng Jesus‑enkut neghelgusiqiit. 11Ilangita Pharisees‑et esghaghluku neghelgusiighilghii, maligsaaghtengi aaptekiit, “Sangan apeghtughistegpesi neghelgusightaki tax‑meng qerngughtistetlu, seghleghqestetlu?”
12Jesus‑em nagalluki kiimsiqii, “Yugunqegtat aghallegtaghsughniitut, tamaakunginaat qinuyulghiit. 13Liisaghtughteggu sameng pisiitanga una Akuzitnilnguq Igaqegkaq whaten pilghii, ‘Piyukenghitanka aghqutesi, itupill nangllegtaghtesugamsi.’ Tagingunghitunga tagsighnaluki elqughutngalghiit, iwernga taginguunga tagsighnaluki seghleghqestet.”
Aapqughaalleq Fast‑elleghmeng
14Taagken John‑em Paaptaayestem maligsaaghtengita takuluku Jesus aaptekaat, “Sangan whangkutallu Pharisees‑etlu awen fast‑aaqesta, naqam maligsaaghteten fast‑egpenateng?”
15Jesus‑em kiimsiqii, “Nulightughyaghqam tagsiqliqii qivghungayaghqaawaat tawanlluku nulightughnaqelghii? Yeghlegillu! Iwernga pilleghqaq kaasaghqaaguq nulightughnaqelghii ellngitneng iqitestekumegteggu, elngaatall tamaani aghneghni fast‑ellequt.”
Jesus‑em Apeghtuusii Ilasaghqaanghitut Jews‑et Apeghtuusiitnun
16Taagken Jesus‑em pikii, “Kitum alngunak ilaaghnaanghitaak aatkalugek nutaghameng liiqneghmeng. Ilaalleq qellughtekumi piigullequq, enkaam piilleq sullevellequq. 17Talwa kitum alngunak wine‑eghraghaghmeng imighnaanghitaa awataghpaluk qayughllak awataghpaluk imiqumi aafkaghluni imiighullequq. Enkaam awataghpaluk atuuyaghqaananighllequq. Iwernga awataghpagraghaq imiqumi wine‑eghraghaghmeng qerngaagmek naavnaanghituk.”
Jesus‑em Naallghutillghallu Unguvaghtillghallu
18Paninang Jesus akuzimaluku Jews‑et igleghutistengat iteghluni segesqughlluni manungakun pikaa, “Panika whaa tuqunꞌghhaaguq, iwernga takuluku saaftekuvgu unguvaghllequq.”
19Enkaam Jesus‑em nekevluni maligtekaa, maligsaaghtengillu maligutkat.
20-21Aglaamaluki, qinuyulghiim aghnam takukaa Jesus tunutanganeng. Qula maalghuk siipneqluku ayumiqulleq kiitelqungigalnguq. Whaten sumeghtaghaqaq, “Saafteqeghsaqumkun aatkaakun, naallghunnayaghtunga.” Enkaam saaftekaa atkuyaaghan keniikun.
22Jesus‑em qiivutkelluku esghaghluku aghnaq pikaa, “Panimni alingegpenang! Ugpeqilleghpegun naallghututen.” Aga aghnaq naallghutkaq.
23Taagken Jesus‑em kaalluni igleghutistenkunun, esghaqii tuqiilghiini qalghightaghtetlu, yulghutetlu qiyaaghuuteghllalghiit. 24Tawavek pikii, “Aanleghaatek! Aghnaghaghhaq tuqullghituq qavaaguq!”
Iwernga nenglaqegkaat. 25Aanleghaatesatki, iteghluni Jesus‑em tugukaa iiggakun, enkaam aghnaghaghhaq unguvaqaq. 26Enkaam taana allaaghlluwhaghtilleq ungipaqegkaat tamangani.
Jesus‑em Naallghuskek Ayaakak Yugek
27Taagken Jesus aghulaqegkaq nemeng. Ayaakak yugek maligsaaqaak, akilghuumaagmek whaten, “Ighneghani David‑em, nangllegyagutikung!”
28Aga mangteghamun iteghyan maligtekaak, enkaam Jesus‑em aaptekakek, “Ugpeqestegneguu naallghutilleghqaqa?”
Kiimsiqaak, “Aa‑a Ataneq!”
29Taagken Jesus‑em iyegkenkun saaflukek pikakek, “Ugpeqilleghpetegetun apeghiighli.” 30Enkaam esghaghyagutkak. Jesus‑em ineghtengngwaaqakek, “Ungipaghpenatek kitumun alngunak.”
31Iwernga navek pineghmegni aapghaqegkangak Jesus‑em apeghiiqaa ellmegnun.
Jesus‑em Naallghuskanga Akuzingigalnguq Yuuk
32Taakuk yugek aghulaqumalukek, Jesus‑mun tagitkaat yuuk akuzingigalnguq qayughllak ilumikun tughneghalek. 33Legan Jesus‑em tughneghaq aanestaa, yuuk aga akuzikaq. Enkaam yulghutet saghiighayugulluteng whaten pikat, “Whatelngughmeng allaaghlluwaghtilleghmeng esghaasigatukut Israel‑mi!”
34Iwernga Pharisees‑et pikat, “Umiilgita tughneghaat aghtughyaghqaanghillelisimaat aanesqiisqelluku tughneghaghneng.”
Jesus‑em Nangllegyaguskangi Yuget
35Taagken Jesus igleghtekaq tamaghhaani Galilee‑mi, apeghtughimaghmi synagogue‑ngitni, ungipaqimaghmillu Pinilghiineng Ungipaaneng Ataneghpagullghem. Naallghuquqii qamaglluki aqnighnelgetlu qinuyulghiitlu. 36Esghaghluki yulghuteghllaget nangllegyagutkii, qayughllak seghleliighngaghllaget, kayutngunateng; penniighestun penniighnightengilngughestun. 37Taagken maligsaaghteni pikii, “Uglalghiim yugem ugpeqsugaqiit Pinilghiit Ungipat. Tamaakunguut usputngalghiit nunivagseghanun unataghyaqleggiinaaghtekat. Taawanginaq palapiguut qepghaghtet. 38Enkaangam yughaghtek Atanghanun unataghyaghqat, kayagtisqelluku qepghaghtekaghqameng unataghyaghqaanun.”
Šiuo metu pasirinkta:
Matthew 9: ess
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2018, Wycliffe Bible Translators, Inc. All rights reserved.