Matai 5
5
1Umwene vwu avavwene avanu umwu vavelye isipuga vuvule pwu akatoga pakidugala. Pwu akatama navene avakongi va mwene vakatama nave. 2Pwu akadindula undomo akatsova akavamańisa akata: 3Vandugataluko avidova UMepo vwu vivwene uvugatsu mańa uludeva lwa kukyańa lwa vene. 4Vandugataluko avilila ulwihotsi mańa vwu vitsesivwagwa. 5Vandugataluko avadekedeke mańa vwu ikilunga kyoni vuhale vwa vene. 6Vandugataluko avatye ninzala jya vugolosu jivava nikyumilwa kya vugolosu vumilwe mańa vwu vikwigutaga. 7Vandugataluko uvwu likuvavona ilikungwava mwitumbu mańa vwu valalivonaga ilikungwava navene. 8Vandugataluko avali ninumbula imbalatse mańa vwu vikundolaga Unguluve. 9Vandugataluko avapelalunotsehetso mańa vwu vitsovwagwa ukuva vana va Nguluve. 10Vandugataluko aviswimwa ulwakuva vagolosu mańa vwu uludeva lwa kukyańa lwa vene. 11Ndi vandugataluko vangave avanu vikuvaduka, vangave vikuvaswima, vangave vikuvanwaṅila uvugalagala vwoni ulwakuva vavwene ndi vanu vango. 12Muhekelage mululutilage mańa isya kuvahomba syongosu vuvule kukyańa. Mańa vwu vagahile ukuvaswima navańamalago voni vwu mukanale uńe.
13Ńi mwińo gwa kilunga uńe, upwu gungave umwińo guvejangike, pwu upita sivetsagepwu isya kuvela nnonu? Bako pwu nagwiva nakavombo akange, vwu upita gutagwagwe panzi, vakadikilage mmalunde avanu. 14Ńi lumuli lwa kilunga uńe. Uvutsenge uvuli pakidugala pakyańa navukwuva, 15Nalyene ililangamuli angave umunu akotsitse pwu navigubikila nikiswiswi. Bako vivika pakyańa pakibatilo pwu likuvamulika voni avali nńumba, 16Vwu luvikage vuvule-vule ulumuli lwińo, pwu valanginya udadajińo kukyańa vwu vatsivwene imbombo tsińo innonu itswu muvomba.
17Mulisagilaga ukuta pange nditsile nkulimbula nisimilitso navańamalago. Nanditsili nkulimbula, bako nditsile nkulutilitsa vuvule. 18Jilweli-lweli ndikuvavula ndita: Ukutsisika upwu kilajaga nikya kukyańa nikya pasi ikilunga nakijaga nakange naka-i nakange akadebe sitso musimilitso. Tsikwitsa tango tsoni. 19Uvi ita nukulimbula kapamato kene ntulagilo utudebe utwu ita nukuvavula ukulimbula avanu, vi alatsovwa ukuva vi vi ndebe kuvoni ndudeva lwa kukyańa. Lweli uvi ita nukutsikonga indagilo ita nukuvavula ukutsikonga avanu, vi alatsovwa ukuva vi mbaha ndudeva lwa kukyańa,
20Mańa ndikuvavula ndita: Vungave uvugolosu vwińo navulutili vuvule ukulutilila sitso nuvwa vamańakalata nuvwa vapalisai pwu nandingilemwo lusiku ndudeva lwa kukyańa. 21Mpulike ukuta vavulilwe avamamajińo ukuta: Ulabudaga. Uvi ibuda umunu, vi va kuhigwa. 22Lola uńe ndikuvavula ndita: Uvi ikumbipila unine, vi va kuhigwa, uvi ikunsula unine ita vi lipelwa uve, vi atulile inongwa jya palulundamano lwa vańivaha, uvi ikunduka unine ita vi linu uve, vi vakulahwa ndugenge lwa mwoto. 23Ungave vwibiha pakutekela isinge pakitekelelo kya kutekelapwo, pwu ukumbuhitsage ukuta twale nongwa nunjyango, 24pwu ulekage tango baho isyu ugegile isya kutekela, usilekage pasi pakitekelelo kya kutekelapwo, ubihage tango kusajana nunnino, pwu vwitse kukitekela isyu ugegile isya kutekela. 25Undekepelage ṅani-ṅani uńanongwa jyako vwu ndi ńi voni munzila, uńanongwa jyako ukuta alakuvikaga pamiganongwa, uvone umwene umiganongwa ikukuvika pańivaha, pwu vukeńemuka vikukudindila nńumba jya vańololo. 26Jilweli-lweli ndikuvavula ndita: Nulatsihume mumwa vwu nuhombili nakahela ka kunepo aka kumalisa syoni.
27Mpulike ukuta litsovilwe ilya kuta: Ulaligupaga. 28Lola uńe ndikuvavula ndita: Uvi undala ikundolela nuvunogwe, vi aligwipe nave vuvule munumbula jya mwene. 29Ungave uvwene iliho lyako ilya kukyandyo likukwambutsa, pwu usulage ulitagage. Mańa vwu uli nnonu vuvule kangave kiswa akapagika kapamato kene aka mumana gwako, gungave ugwene ummana gwako gwoni vuvule guponela mumwa ukulahwa ndugenge lwa mwoto. 30Ungave uvwene ikivoko kyako ikyandyo kikukwambutsa, pwu ukegetage ukitagage, Mańa vwu uli nnonu vuvule kangave kiswa akapagika kapamato kene aka mumana gwako, gungave ugwene ummana gwako gwoni vuvule guponela mumwa ukulahwa ndugenge lwa mwoto. 31Nalyene litsovilwe ilya kuta: Uvi ikumumya undala va mwene, vi upita ampetsage kalata va kuta ndimumitse. 32Lola uńe ndikuvavula ndita: Uvi ikumumya undala vwu natulili inongwa jya vuligu, vwu ampelile va kuligupa navange. Uvi ikuntola uvi vamumitse avange, vwu aligwipe nundala va vange vuvule.
33Mpulike ukuta vavulilwe avamamajińo ukuta: Ulajiganikaga ulwa vunwasi, mańa ungegelage unkuludeva isyu unjiganikye, utye ndikungegelaga. 34Lola uńe ndikuvavula ndita: Kwu bako ukujiganikila mwu akange. Kwu bako nukuta: Mańa nakukyańa, mańa kwu kukitamilo kya Nguluve. 35Kwu bako nukuta: Mańa napakilunga kya pasi apa, mańa kwu katamilo ka malunde ga Jujwa, kwu bako nukuta: Mańa namu-Jelulsalemu, mańa vwu vutsenge vwa nkuludeva umbaha, 36kwu bako nukujiganika ulwa kuta: Mańa nupwu ndili nuntwe, mańa nakajwili akange nulumańili nukuvalatsa, nulumańili nukukapela uvutitu. 37Mutsovage lilya kuta: Ena, nngave mukwidika, nilya kuta: Bako, nngave mubela vuvule. Aga kwongeletsa pakyańa pa gene gwu gahumile mbuvivi vuvule.
38Mpulike ukuta litsovilwe ilya kuta: Paluvujitso muvikepwu iliho paliho nilino palino. 39Lola uńe ndikuvavula ndita: Kwu bako ukulwa numunu umbivi. Lola uvi ikukutova ilipi palitama lya kukyandyo, vi umpetsage nilinine, nalyene atovage. 40Uvi ita akuhige ugwańingilitsa ita gwu nditole, vi umpetsage naki kilundwa. 41Uvi akwumilitse inzila jya pamaili mpamato mwene, vi ugendage nave avamaili vavili. 42Uvi idova isya kudova kwave, vi umpetsage. Uvi ilonda ukutana isinge kwave, vi ulenzelukaga.
43Mupulike ukuta litsovilwe ilya kuta: Muganane nunnino, mu-sulane nuntavangwa. 44Lola uńe ndikuvavula ndita: Ngananage navatavangwa vińo, mbasajage avikuvakotola, mbavombelage innonu avavasulile, mbisajilage avikuvahovela avikuvaswima. 45Pwu mwiva vana va dadajińo kukyańa, Mańa umwene ilitsuva lya mwene likuvahumila navavivi navannonu, nisula jya mwene ikuvatimihitsa navagolosu navagalagala. 46Nupwu ngave muvaganile avene avavaganile uńe vwu mukavile uluhombo lulikwu? Avene avasangutsi nda naviganana vene vuvule-vule navene? 47Ngave mupembetsania ńi vene ńi vanamunu vuvule, vwu muvombile kiki ikya kuta tuvombile akange akaluti? Avene avapanzi nda navipembetsania vuvule-vule navene? 48Pwu mbetsage valuti vuvule nduvwu namwene udadajińo kukyańa iva nduti vuvule.
Šiuo metu pasirinkta:
Matai 5: Kinga
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
New Testament in Kikinga © British and Foreign Bible Society, 1961.