Lûke 18
18
Ndoka pâ ɛ̈chë lə̂ ndavrö la earə̂ kə̂ wa ngbanga
1Jezü tö ndoka âtə sə̈ adjisîpili ndə̂ yê, ndə̂kə̂ nyisə̂ nə̈ sə̈ andjê pä, äwäpä andjë to pö sə̈ Ndjapä logbɛ̂, kə̂ moabô mô tâ-ê. 2Tche tô rə̂ sə̈ andjê päkëdə̂: «Lə̂ ngâ gö, ngâ earə̂ kə̂ wa ngbanga kädje, tche kpêâbo wa Ndjapä-a, kə̈ lûâbo ndjë sə̂ ngâ akrə balë-a. 3Lə̂ gö nə̈ lâme, ngâ ɛ̈chë lə̂ ndavrö kä ndjë tâ ndə̂ tche nə tchê logbɛ̂, kə̂ gbo earə̂ kə̂ wa ngbanga lâme lakə̂ to rə̂ sə̈ tchë päkëdə̂: ‹Amö wa tchə̂lə̂ ngbanga lə̂ gbâtə̂ mê la earə̂ kə̂ kosə̂ mê âtə.› 4Earə̂ kə̂ wa ngbanga nə̈ nyîâbo tchê ndə̂nə̈-a. Pânə̈ tche tô rə̂ bhâtə̂ su yê päkëdə̂: ‹Tə̂ lëge nə̈ më wûnsə̂ nə̈ nə̂ pä më kpêâbo wa Ndjapä-a, kə̈ lûâbo sə̂ ngâ akrə balë-a. 5Praâbalë batə̂ më ndjôâbô ngû ndjô tə̂ ɛ̈chë lə̂ ndavrö âtə-ê, më âwa tchə̂lə̂ ngbanga ndə̂ yê, ânyë tche ka bata kâ ndə̂kə̂ ka küma mê.›» 6Gbölö Gbïɛ̈ kä tö rə̂ sə̈ andjê päkëdə̂: «Nyë djë pö ndə̂ ngbongbo earə̂ kə̂ wa ngbanga lâme tô rə̂! 7Käko azü ndə̂ Ndjapä ndə̂ tche dɨ̂ andjê, ndə̂ andjë kɨ sə̈ tchë dalobiî lâme, tchê wabô tchə̂lə̂ ngbanga ndə̂ andjê? Tche âsə zoo ânyë kə̂ za könô sə̈ andjê? 8Me tö rə̂ sə̈ nyê! Tche âwa tchə̂lə̂ ngbanga ndə̂ andjê gasa-ê. Praâbalë âdə Modô ndə̂ Akrə âkangbâ yê, tchê gboadje azü ndə̂ andjë zâ su andjê sə̈ tchë pâ cho âtə?»
Ndoka pâ farizïɛ̈n la earə̂ kə̂ pala makətche-lapöo
9Jezü kâ tô ndoka âtə sə̈ angâ azü ndə̂ andjë wûntə̂ andjë tə̂ adjîrə̂ azü tchâtchu Ndjapä ânyë kə̂ talusə̂ angâ andjê. 10Tche tö rə̂ sə̈ andjê päkëdə̂: «Aköchë bïchuû ë atə̂lə̂ gbölö nda Ndjapä ndə̂kə̂ to pö sə̈ Ndjapä. Ngânə̈ də̈ farizïɛ̈n, ngânə̈ də̂ earə̂ kə̂ pala makətche-lapöo. 11Farizïɛ̈n lâme krʉ̂ lafô ânyë kə̈ sə̂ lakə̂ to pö sə̈ Ndjapä bhâtə̂ su yê pä#18.11 Tche krʉ̈ lafô ânyë kə̈ tô pö sə̈ Ndjapä bhâtə̂ su yê: Änyïndə̂ kə̂ to rə̂ pä tche krʉ̈ bhâchï ânyë kə̈ tô pö sə̈ Ndjapä.: ‹Ndjapä, më zä ayîabâ sə̈ mö, bëte më wâbo batə̂ adɨ̂ azü gbɛ̂-a, ndə̂ andjë wâtə̂ a-earə̂ ngbä, la a-earə̂ mbə̈lï, la azü ndə̂ andjë pu aɛ̈chë âdəndjë aköchë ndə̂ azü lâme-a. Më wâbo ndjë batə̂ earə̂ kə̂ pala makətche-lapöo lâme-a. 12Lə̂ lö mïndûu manə̈ bïchuû, më kösə̂ kɨ̈zɨ̂ sûsunə̈ bïchuû lakə̂ to pö sə̈ Ndjapä. Rə gbɛ̂ ndə̂ mê gbo rə̂, më kʉ̈ dîme nə̈ sə̈ mö.›
13«Earə̂ kə̂ pala makətche-lapöo lâme sə̂ andə̂ yê nə̈ bhâchï, tche kêngabô ndjë la yê atə̂ lafô-a. Praâbalë tche sə̈ lakə̂ bhi tchêla ngbôgo yê lakə̂ to rə̂ päkëdə̂: ‹Ndjapä, amö wun nyonyo mê, mëmê ndə̂ më wâtə̂ earə̂ ngbongbo rə.›» 14Jezü kâ tö rə̂ päkëdə̂: «Më tö rə̂ sə̈ nyê: Earə̂ kə̂ pala makətche-lapöo lâme âsə̈ gu atə̂ndə̂ yê, dëkë tche dâka tchâtchu Ndjapä nə̂, âdə̂âbo farizïɛ̈n lâme-a. Bëte akrə ndə̂ tche mbôtə̂ yê gbölö, a âmboadje tchë, tche wa kpîɛ̂kpîɛ̂ rə̂, ânyë akrə ndə̂ tche mbôtə̂ yê kpîɛ̂kpîɛ̂ rə̂, a âmboadje tchë, tche wa gbölö.»
Jezü ë tchôtchô pö pâ angbelɛ̂-abechë
(Mat 19.13-15; Mar 10.13-16)
15Azü nə̈ ndjë la angbelɛ̂-abechë sə̈ Jezü ndə̂kə̂ pa tche to könô yê ëpâ andjê. Ndə̂ adjisîpili wûn rə̂ käko, kə̈ sə̂ lakə̂ hro la azü nə̈. 16Praâbalë Jezü gî abechë lâme ndola tchë, ânyë kə̈ tô rə̂ päkëdə̂: «Nyë gbötə̂ abechë, andjë nə̂ pu mê! Nyë kïäbô kîtə̂ köbo tə̂ andjê, bëte Gbölö gö-gbïɛ̈ ndə̂ Ndjapä wätə̂ andə̂ andjanə̈ ndə̂ andjë wâ batə̂ abechë lâme. 17Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche mbôâbô mbô la sə̂ Gbölö gö-gbïɛ̈ ndə̂ Ndjapä batə̂ abechë âtə, tchê liabô balë atə̂lə̂ nə̈ tee-a.»
Jezü la earə̂ rə
(Mat 19.16-30; Mar 10.17-31)
18Ngâ makündji ndə̂ ajuîfu yü Jezü päkëdə̂: «Tchôtchô earə̂ kə̂ nyisə̂ rə, më âmbo atöko ânyë kə̂ gbo tchîsûwu ndə̂ logbɛ̂ logbɛ̂?» 19Jezü tô rə̂ sə̈ tchë päkëdə̂: «Bëte giamâ kä ndə̂ mo ê mê pä tchôtchô akrə? Ngâ tchôtchô akrə balë wâbo-a, kütû Ndjapä balë. 20Mo wûnsə̂ andïɛ̈ nə̂: Âwâbo pä mo pu ɛ̈chë âdəndjë köchë ndə̂ ngâ akrə-a, âwâbo pä mo won akrə-a, âwâbo pä mo zɨ ngbä-a, âwâbo pä mo mo yepa tə̂ ngâ akrə-a, äwäpä mo lusə̂ bha la anyï zə̈#18.20 Nyë dɨ̈ Eki 20.12-16..»
21Köchë lâme tô rə̂ ndə̂nə̈ päkëdə̂: «Ndə̂ gbô mê ndə̂po tə̂ bechë-ɛ̈köchë, më mbô arə lâme nə̂ gbɛ̂ ndjoa ëtə̂ tchô angêta.» 22Pânə̈ ndə̂ Jezü djê pö lâme, tche tô rə̂ sə̈ tchë päkëdə̂: «Gbô ngâ rə balë kä po ndə̂kə̂ pa mo mbo rə̂: Äwäpä mo ka arə gbɛ̂ ndə̂ mo wâ la rə̂, kə̂ krʉ tchə̂lə̂ makətche nə̈ tə̂ a-earə̂ yûkü, käko ânyë mô gboadje arə bhâ lafô, la tchêngbâ nə̈, mo nə ngbâ mê.»
23Praâbalë ndə̂ köchë lâme djê pö nə̈, nyonyo rôpâ yê, bëte tche wä la arə tə̂ gbölösə̂nə̈. 24Ndə̂ Jezü wûn rə̂ ndə̂ tche sə̂ la nyonyo, kə̈ tô rə̂ päkëdə̂: «Sə̂nə̈ kâkä tə̂ a-earə̂ rə ndə̂kə̂ li lə̂ Gbölö gö-gbïɛ̈ ndə̂ Ndjapä! 25Sə̂nə̈ kä tə̂ earə̂ rə ndə̂kə̂ li atə̂lə̂ Gbölö gö-gbïɛ̈ ndə̂ Ndjapä, kə̈ rô kə̂ li ndə̂ gia ndə̂ rə̈ yê wû pä chamö lə̂ grʉ̈ masângê.» 26Azü ndə̂ andjë sə̂ lakə̂ dje tchë tô rə̂ päkëdə̂: «Käko tchabâ lɛ̂ɛ kä âkə̂ tcha?» 27Jezü tô rə̂ ndə̂nə̈ sə̈ andjê päkëdə̂: «Rə ndə̂ sə̂nə̈ kâ tə̂ azü ndə̂kə̂ mbo rə̂, sə̂nə̈ kâbo tə̂ Ndjapä-a.»
28Käko Pîêre tô rə̂ päkëdə̂: «Ârâ gbötə̂ arə ndə̂ ârâ gbɛ̂, ânyë kə̈ zâ tchêngbâ zə̈.» 29Jezü tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê: Âdə ngâ akrə âgbotə̂ nda ndə̂ yê, ɛ̈chë ndə̂ yê, arə̂mâ ndə̂ yê, bha nə̈ la anyï nə̈, abechë ndə̂ yê bëte Gbölö gö-gbïɛ̈ ndə̂ Ndjapä, 30tchê gboadje arə âro masə̂nə̈ ndə̂ tchô angêta, ânyë kə̂ gboadje ndjë tchîsûwu ndə̂ logbɛ̂ logbɛ̂ lə̂ tchîsûwu ndə̂ ânə.»
Jezü kä tô pö ndə̂kə̂ tchu lakə̂ jo ndə̂ yê lə̂ kuzü
(Mat 20.17-19; Mar 10.32-34)
31Jezü kʉ̈ adjisîpili ndə̂ yê lə̂ könô gbɛ̂ tchêpâ nə̈ bïchuû, kə̈ gîtə̂ yê la andjê bhâchï, ânyë kə̈ tô rə̂ sə̈ andjê päkëdə̂: «Nyë djë rə̂, azə̈ âe atə̂ Jerûzalêmo ndə̂kə̂ pa pö gbɛ̂ ndə̂ a-earə̂ ndə̂ma Ndjapä mbô rə̂ lə̂ mbëtï pâ Modô ndə̂ Akrə alême, âmbo gundə̂sə̂ nə̈.
32«A âgboadje tə̂ yê tchânə̂ azü ndə̂ andjë wâbô wâtə̂ ajuîfu, andjê moadje tchë, kə̂ droadje tchë, kə̂ kuadje ngrʉ̂srö tə̂ yê. 33Andjê bhiadje tchë la goto, ânyë kə̂ won-adje tchë. Lə̂ lö vötaâ nə̈, tchê joadje lə̂ kuzü.» 34Praâbalë adjisîpili ndə̂ yê djêâbo tchə̂lə̂ pö lâme balë-a. Tchə̂lə̂ dju pö lâme wätə̂ andjê wü, ânyë andjë wûn-âbô sə̂ pö ndə̂ Jezü tô rə̂ lâme wûn-î.
Jezü tchä ngâ earə̂ föla
(Mat 20.29-34; Mar 10.46-52)
35Ndə̂ Jezü ndô la gö ndə̂ Jerikö, dëkë ngâ earə̂ föla sə̂ bêche tə̂ ma köbo lakə̂ yukû rə tchânə̂ azü. 36Tche djê sɨ̈kɨ̈ kpûlû azü ndə̂ andjë ro, kə̈ yûkû rə nə̈ ndə̂ âmbo lâme. 37A tô rə̂ sə̈ tchë pä Jezü, akrə gö ndə̂ Näzärête kä ndə̂ âro lâme. 38Käko tche tâ wârə̂ lakə̂ to rə̂ päkëdə̂: «Jezü, Modô ndə̂ Davîdi, amö wun nyonyo mê!» 39Azü ndə̂ andjë sə̂ lakə̂ nə bhâtə̂ küma nə̈ hrô la tchë ndə̂kə̂ pa tche ngbo ma yê tâ, praâbalë tche kä tâ wârə̂ ngbôô päkëdə̂: «Modô ndə̂ Davîdi, amö wun nyonyo mê!»
40Jezü krʉ̂-ê, kə̈ zâma ndə̂kə̂ pa a nə la tchë sə̈ anyê. Ndə̂ tche nə̂ ndola Jezü, Jezü yû tchë päkëdə̂: 41«Mo nyïndə̂ nə̈ pä më mbo giamâ tə̂ zə̈?» Tche tô rə̂ ndə̂nə̈ päkëdə̂: «Gbölö Gbïɛ̈, amö mbo rə̂ ndə̂kə̂ pa më ka wûn tchô.» 42Jezü tô rə̂ sə̈ tchë päkëdə̂: «Amö wun tchô! Kə̂ za su zə̈ sə̈ mê tchâ mö nə̂.» 43Posə̂nə̈, tche wûn tchô, ânyë kə̈ nə̂ ngbâ Jezü lakə̂ voga Ndjapä. Kpûlû azü nə̈ gbɛ̂ âsə̈ wun rə̂ käko, kə̈ sə̂ ndjë lakə̂ voga Ndjapä.
Šiuo metu pasirinkta:
Lûke 18: lnl
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Wycliffe Bible Translators, Inc.