O KEJADIAN 4
4
O Kain deʼ o Habel
1Ipahaika o Adam womahiganu kaoroëhe moi deʼ o ngo Hawa, ngoihekata, deʼ ongoheka gënanga o ngohaka mohiao. Munanga mongohaka o ngohaka o nauru womatengo deʼ motemo, ”De ma Jou Ai roriwo ngohi tamakeoka o ngohaka o nauru womatengo.” O ngohaka gënanga mihi romanga o Kain. 2Daha o ngo Hawa mongohaka o nauru womatengoli, ai romanga o Habel. O Habel wodadi o duba magogoana, mä o Kain wototumule. 3O öraha muruono naga ipahaika O Kain wal̄ë o hidoku moi ai dumule mahasili daha wohihuba ma Jouika. 4#Ibr. 11:4 Daha o Habel wal̄ë o duba mangohaka i ria-riaka o dutu moi, watoaka, daha wohi huba ma ake-akeme duru ma oa-oa ma Jouika. Ma Jou wosanangi o Habelika deʼ toünanga ai huhuba, 5mä wïoluku o Kain deʼ to ünanga ai huhuba. O Kain duru wongamo, deʼ ai biono yatohata. 6Done ma Jou wïtemo o Kainika, ”Yadodoa hongona nongamo? Yadodoaho anibiono yatohata? 7Nako ngona nodiai maoa, maraioka ngona noiete; manako ngona nodiai o dorou, done o baradoha itamä hupaya iwohama ani hininga magoronaika. O baradoha imau yakuaha ani diri, mä ngona kokiani nahohihanga.”
8 #
Mat. 23:35; Luk. 11:51; 1Yoh. 3:12 Daha o Kain wïtemo Habelika, ai dodoto, ”Naino ngone hoiki o dumuleika.” Maöraha önanga imahiadonika genangoka o Kain wï gohara de wïtoma o Habel, ai dodoto.
9Ma Jou wïleha o Kainika, ”Kiaka waika o Habel, ani dodoto?”
O Kain wohaluhu, ”Ngohi tihiorikua. Kokiani ngohi ti goa-goana ahi dodoto?”
10 #
Ibr. 12:24
Daha ma Jou wïtemo, ”Yadodoa hongona nodiai o hali hömodo-modongo gënanga? Ani dodoto ai awunu o tonakil̄e i pöaka Ngohil̄e, hokä o ilingi i pöaka igahoko o balahi. 11Ngona o lolai namake hiädono yakunokaua o tonaka nakarajanga. O tonaka gënanga yawomoka ani dodoto ai awunu, matero-tero yahelenga mauru la yatarima ani dodoto gënanga ai awunu maöraha ngona nïtoma. 12Nako ngona nodatomo, o tonaka o kia-kiaua mahasili; ngona aha kano tagi-tagi koiwa ani ngï nogogere o duniaka.”
13Done o Kain wotemo ma Jouika, ”O hukumanga gënanga i tubuho holi, ngohi takunua tatagongo. 14Ngona nohi duhu ngohi o tonakoka nënanga, magurutika deʼ ani himanga. Ngohi aha todadi kato dagi-dagi koiwa o ngï togogere o duniaka, deʼ ngohi aha ihi toma o nagona dika ihimö make-make ngohi.”
15Mä ma Jou wïtemo, ”Kowali. Nako ngona initoma, done hokä ma balahi, deʼ ini tö toma-toma hö yatumidi ahaö yätoma.” Ipaha ma Jou wïgelenga o nonako o Kainika hupaya onagona dika imaka make dede ünanga uha iwitoma. 16Daha ma Jou Ai himangoka deʼ o Kain wosobo deʼ o ngï wögögogere maromanga ”Kayododadagi” matonakoka o Eden o wange mahiwaroko.
O Kain aidifauku
17O Kain deʼ ngoihekata yamake o ngohaka o nauru, iwihi romanga o Henokh. Ipahaika o Kain wohigoko moi o kota deʼ wohi romanga o kota gënanga imoteke aingohaka gënanga ai romanga. 18O Henokh o Irad ai ama. O Irad o Mehuyael ai ama. O Mehuyael o Metusael ai ama, deʼ o Metusael ganga o Lamakh ai ama. 19O Lamekh ngoihekata yahinoto, o ngo Ada deʼ o ngo Zila. 20O ngo Ada mihi ngohaka o Yabal, deʼ Yabal aidifauku gënanga o nyawa yopö paliara o aiwani deʼ yogogere o tau-tauoka. 21Ai dodoto ai romanga Yubal, deʼ o Yubal aidifauku ganga ihigogogule o musik kecapi deʼ o sulingi. 22O ngo Zila mihi ngohaka o Tubal-Kain, deʼ aidifauku yododiai hagala i rupa o pakakaha o tabaga deʼ o behi. O Tubal-Kain ngoi hiranga madodoto ami romanga o ngo Naama.
23O Lamekh wätemo ngoihekata yahinotoika.
”Ada deʼ o ngo Zila, ni ihene!
Woma tengo o goduru tïtoma karana wohigoharoka ngohi.
24Nako yatumidi yätoma
yabalahi mangale o Kain wotoma done o nyawa yamori tumidi deʼ yatumidi aha yätoma nako ngohi ihi toma.”
O Set deʼ o Enos
25O Adam deʼ ngoihekata yamake o ngohaka o nauru woma tengoli. O ngo Hawa mato, ”Ma Jou Madutu wohihidoäkoka ngohaka o nauru hokä o Habel ai dururu, wïtoma-tomaka o Kain.” 26O Set aingohaka o nauru wihiromanga o Enos. Oraha gënanga o nyawa yomulaenge yahetongo ma Jou Ai romanga maöraha yohuba.
Šiuo metu pasirinkta:
O KEJADIAN 4: TLB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės