MARKUS 7
7
To ada-adat nu mompolee'
(Mat. 15:1-9)
1Sanggombu na mian nu Farisi ka' to pia-piangkuka na gulu' agama lengkat mae i Yerusalem tinoka hi Yesus. 2Aha nontoa to pia-piangkuka na anu saja' mombatuki Yesus mongkaan nu lima anu madi' belesi' susumo koonyo nu agama, aijo'mo de ma'isa pe'e obaso'i na lima susumo koonyo nu atulan nu agama.
3To mia-mian nu Farisi, sumo aitu mule' iwi-iwi' na mian nu Yahudi, mohongo-hongo hondo mombatuki to ada-adat nu mompolee' nu aha. Aha madi' mongkaan de ma'isa pe'e obaso'i na lima mombatuki apaa na anu tinantukanmo. 4Apaa na anu ingoli i pasan madi' timbali okaan de ma'isa obaso'i pe'e imoona. Ka' manjoo' na atulan sangga'at nolengkat mae i mompolee' nu aha anu nunutoongi nu aha totu-totu'u; susumo mombaso'i galas, mangko', ka' to paka-pakakas tambaga.
5Kalana aijo' to mia-mian nu Farisi ka' to gulu-gulu' agama aijo' nompokilawa hi Yesus, “Kadaka' anu saja' mombatuki Beleyum aijo' mongkaan nu lima anu madi' obaso'i? Apaa na sababnyo aha madi' mombatuki adat nu mompolee'to?”
6 #
Yes. 29:13
I Yesus nontaami, “Komiu to mia-mian baleko'! Totu'u hondo apaa na anu tinaeakon i Yesaya mongkona komiu, aijo'mo,
‘Sumo aiya na koonyo nu Tumpu.
To mia-mian aijo' ola ahi' monsombah Aku nu potatae,
panyo kinyonyoa nu aha majo'on lengkat hi beleng-Ku.
7Palasuma na aha monsombah Aku,
kalana atulan nu mian
nu ajanakon nu aha
au'aitu aijo'mo na atulan-Ku!’
8To pale-palentah nu Tumpu madi'mo otoongi nu belemiu, ka' to atu-atulanmo nu mian na otoongi nu belemiu totu-totu'u.”
9Lantas i Yesus notatae mule', “Komiu pande hondo mombahakon palentah nu Tumpu da timbali montoongi posi pangajalan. 10#Kel. 20:12, 21:17, Im. 20:9, Ul. 5:16 I Musa nombee'imo palentah aiya, ‘O adati na tuuma tinaum,’ ka' ‘Ihe na monguda-udahi tuuma tinanyo, o hukum mate.’ 11Panyo komiu nongajanakon: De mian motatae hi tu'anyonyo, ‘Apaa na anu tionyo kubee' hi tuuma tina, noko sombahkonkumo hi Tumpu,’ 12sahingga komiu mompobebas mian aijo' i pakalaja'annyo, montulungi tuuma tinanyo. 13Jadi, tiba posi ajalanum anu binee' nu belemiu hi to mia-mian, komiu madi'mo nontalima potatae nu Tumpu. Daagi' manjoo' na han sumo aiya anu binau nu belemiu.”
Hahan momtawasi mian
(Mat. 15:10-20)
14Lantas i Yesus po'ule' minsan na nolaga mian da'isan aijo' ka' notatae hi aha, “Hongo da mangalati'! 15Madi' ko anu lengkat mae i sambiha'nyo na minsoop i uno nu mian sahingga mombau mian aijo' pahengas. Sumo aitu mule', anu mosabat lengkat hi toto samian, aijo'mo na anu mombau ia pahengas. [ 16Jadi, de ko bihing, hongomo.]”
17Salatan i Yesus nompala'imo mian da'isan aijo' ka' ninsoop i laigan, anu saja' mombatuki Ia nompokilawa hi Ia mongkona makisut nu kantuang aijo'. 18Sahingga i Yesus notatae hi aha, “Apaa komiu ma'isa mule' mangalati'? Apaa komiu madi' moko ala mangalati' kalana anu minsoop hi toto samian madi' mombau mian aijo' pahengas? 19Kalana anu minsoop aijo' madi' montulu i kinyonyoa, panyo montulu i kompong, ka' lapas po'ule' mosabat.” Tiba potatae haha aijo' i Yesus nontaloakon saba' iwi-iwi' na kaanon aijo' halan.
20Lantas i Yesus notatae mule', “Anu mosabat lengkat hi mian, aijo'mo na montawasi ia. 21Kalana lengkat i unonyo, aitumo lengkat i uno nu kinyonyoa, lubat na pikilan-pikilan ma'idek anu monsabapi mian mombau anu masala', montomang, mompatei, 22mahenyu, baleko', mongalu, tiba mombau sangga'at anu to ide-idek, timbali matongot, madi' ko atulan, minsihip, mohang hangka-hangkat butong, ka' madi' opoko ajan. 23Iwi-iwi' anu ma'idek aijo' lubat lengkat i unonyo, ka' aijo' mo na mompotimbali mian pahengas.”
Palesaya anu totu-totu'u nu samian na boune
(Mat. 15:21-28)
24Lapas aijo' i Yesus nompala'i tampat aijo', ka' namba i tano' ohani kota nu Tirus. Ia ninsoop i uno nu sa'angu' na laigan ka' madi' mongka'oho' mian monsumbu' Ia, daagi' i kiijo'. Panyo Ia madi' moko ala momposuluk butongnyo. 25Samian na tina ko anaknyo boune pininsoopan nu roh ma'idek, nohongo apa-apaa mongkona i Yesus. Ia tinoka hi Yesus ka' nonsombah i ahop-Nyo, 26ka' mompoita da i Yesus molaa'akon roh ma'idek lengkat hi anak aijo'. Boune aijo' misa' mian nu Yahudi, i hampe i tano' Fenisia i Siria. 27I Yesus notatae hi ia, “To ana-anak tionyo obee'i mongkaan momona. Madi' ma'ima' mongala kaanon nu to ana-anak ka' olumbu'akon i dedeng.”
28“Kita Tuuma”, tinaaman nu boune aijo', “To dede-dedeng pe'e i aluk nu meja', mongkaan laaya' anu manabu' lengkat hi to ana-anak!”
29Lantas i Yesus notatae hi ia, “Kalana pinontaamium sumo aijo', pinsusule'mo; roh ma'idek nosabatmo lengkat hi anakum!”
30Tinanyo aijo' ninsusule'. I laigan, tinokannyo na anaknyo daagi' male-male' i kamale'an, ka' roh ma'idek totu-totu'u nosabatmo lengkat hi anak aijo'.
I Yesus nompa'alin samian na anu momo' ka' mabongon
31Lapas aijo' i Yesus nompala'i tano' nu Tirus, ka' nolausakon lumambanan-Nyo motulu Sidon mokiijo' i Dowiwi Galilea. Ia nongala jalan motulu tano' Sampulu' na Kota. 32I kiijo' mian nomboa hi Ia samian na anu momo' ka' mabongon. Aha mompoita hi Yesus da mompotiik lima-Nyo i butong nu mian aijo'. 33I Yesus nomboa mian aijo' nanintade lengkat hi mian da'isan, lantas pinotiik-Nyo na bua' nu limanyo i uno nu ohua' na bihing nu anak aijo'. Lantas i Yesus nintupe' ka' nontiik jila' nu anak aijo'. 34Lapas aijo' i Yesus nontihanga langit, lantas tinolo usa hoso-hoson ka' notatae hi mian aijo', “Efata”, anu alati'nyo, “Tinabuka'mo!”
35Bihing nu mian aijo' tinabuka' ka' jila'nyo madi'mo i hojok sumo imoonanyo, ka' ia dinengkemo na nontampu'uni notatae. 36Lantas i Yesus nontewa' aha iwi-iwi' da boli monsisik han aijo' mau mule' pa' hi he. Panyo mau mosiamo na i Yesus montewa', ola mule' ahi' nu paka leleakon nu aha. 37Ka' iwi-iwi' na mian anu nohongo aijo' binangang hondo. Aha notatae, “Iwi-iwi' binaunyo ima-ima'! Ka' mule' ia nombau mian ma bongon mohongo, ka' mian momo' timbali motatae!”
Šiuo metu pasirinkta:
MARKUS 7: LAILOE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės