MARKUS 10
10
Ajalan i Yesus mongkona poga'atan
(Mat. 19:1-12, Luk. 16:18)
1Lapas aijo' i Yesus nompala'imo tampat aijo', ka' aha nokiijo'mo i tano' Yudea ka' i tano' santoa nu Kaunyo Yordan. Mian da'isan tinoka mule' sinihuk montikubi Yesus. Ka' sumo biasanyo i Yesus nongajan aha.
2To pia-piangkuka na mian nu Farisi tinoka mule' da molio-lio kasala'an i Yesus. Aha nompokilawa, “Koonyo nu hukum nu agamanto, pa' timbali na mian mongga'atakon bengkele'nyo?”
3Tinaaman i Yesus, “I Musa nombee'i palentah apaa hi komiu?”
4 #
Ul. 24:1-4, Mat. 5:31 “I Musa nompoloas mian mongga'atakon bengkele'nyo, asan montulis sulat poga'atan pe'e,” tinaaman nu aha.
5“I Musa nontulis palentah aijo' kalana komiu talalo susa' na o ajan,” koo-Nyo i Yesus hi aha. 6#Kej. 1:27, 5:2 “Panyo i momonanyo, tempo'nyo Tumpu nompotimbalimo mian, tinaloakonnyo tukoonyo, ‘Tumpu nompotimbali aha mo'ane ka' boune. 7#Kej. 2:24 Aijo' na sababnyo mo'ane mompala'i tina tuumanyo ka' mosa'angu' tiba bengkele'nyo, 8sahingga ua-ua'aha timbalimo sa'angu'.’ Jadi aha misa'mo ua'aha, panyo memo sa'angu'. 9Aijo' na sababnyo, apaa na anu pinosa'angu'mo nu Tumpu Allah, madi' timbali oga'atakon nu mian!”
10Salatan aha ninsoop i laigan, anu saja' mombatuki Ia, nompokilawama hi Yesus mongkona han aijo'. 11#Mat. 5:32, 1Kor. 7:10-11 I Yesus notatae hi aha, “Ihe na anu mongga'atakon bengkele'nyo lantas mo'osoa tiba boune sangga'at, mian aijo' masala' hi bengkele'nyo anu momona aijo'. 12Sumo aitu mule' na boune mongga'atakon langkainyo lantas mo'osoa tiba mo'ane sangga'at, ia mule' masala'!”
I Yesus nombalakatimo to ana-anak
(Mat. 19:13-15, Luk. 18:15-17)
13Daagi' ko to mia-mian anu nomboa to ana-anak hi Yesus da nu panya ka' nu balakati na aha. Panyo anu saja' mombatuki Yesus nontambuha'imo mian haha aijo. 14Montoa han aijo', i Yesus pinusa lantas Ia notatae hi anu saja' mombatuki Ia, “Pojohok da to ana-anak aijo' toka hi beleng-Ku! Boli montewa' aha, kalana to mia-mian anu susumo aiya na timbali minsoop mian anu palesayamo hi Tumpu. 15#Mat. 18:3 Inau'mo na aiya! Ihena madi' mangadap hi Tumpu sumo samian na anak, madi' timbali minsoop mian anu palesayamo hi Tumpu.” 16Lapas nontaloakon sumo aitu, i Yesus nontangkungmo anak haha aijo', lapas aijo' Ia nompotiikmo lima-Nyo hi aha toto samian ka' nombalakatimo aha.
Mian anu kaya
(Mat. 19:16-30, Luk. 18:18-30)
17Tempo'nyo i Yesus daagi' molausakon lumambaanannyo, samian tinokamo mae popoopadeka' hi Yesus. Mian aijo' nonsombah i ahop hi Yesus ka' nompokilawa, “Gulu' anu manonong, aku tionyo mombau apaa da mohumpak kantumuu'an talakana' toka sidu-sidutu'?”
18“Kadaka' beleyum montaloakon Aku talalo ma'ima'?” pinokilawa i Yesus. “Madi' ko anu ma'ima', sambiha'nyo Tumpu Allah. 19#Kel. 20:12-16, Ul. 5:16-20 Beleyum nonsumbu'mo palentah-palentah nu Tumpu, ‘Boli mompatei, boli masala', boli montomang, boli bau sakisi baleko', boli mongakali, adati na tuuma tinaum.’ ”
20“Tuumangku Gulu',” koonyo nu mian aijo', “iwi-iwi' palentah aijo' noko batukankumo daagi' pe'e olitau.”
21I Yesus noliibosmo na nontoa mian aijo' lantas notatae, “Me sa'angu' na han mule' anu daagi' opalalui nu beleyum. Lako'mo pobaluk iwi-iwi' na halata'um; bee' na doinyo hi mian anu kasiasi, ka' beleyum mohumpakje halata' i suluga'. Lapas aijo' tokaje mae mombatuki Aku.” 22Nohongo i Yesus notatae sumo aijo', mian aijo' ingise'-ise'mo, lantas nompala'imo tampat aijo' ka' sinusa'mo na kinyonyoa, kalana ia talalo kaya.
23Sahingga i Yesus nontoa hi anu saja' mombatuki Ia, ka' notatae hi aha, “Susa' hondo na mian kaya timbali minsoop mian anu palesayamo hi Tumpu!”
24Anu saja' mombatuki Ia, binangang na nohongo potatae i Yesus aijo'. Panyo i Yesus notatae mule', “To ana-anaku, memang susa' na timbali minsoop mian anu palesayamo hi Tumpu! 25Lebe dengke sa'angu' na unta minsoop i lulu nu paka'ut de mule' samian na anu kaya minsoop i Dunia Bu'ou nu Tumpu.”
26Potatae i Yesus aijo' mombau anu saja' mombatuki Ia da binangang, sahingga aha mompaha poki-pokilawamo samian ka' sangga'at, “Desumo aijo', ihena moko ala timbali salamat?”
27I Yesus nontoa aha ka' nontaami, “De hi mian aijo' madi' opoko ala, panyo de hi Tumpu; iwi-iwi' opoko ala nubau nu Tumpu.”
28Lantas i Petrus notatae, “Toamo, kami nompala'imo apa-apaa da mombatuki kita Tuuma.”
29Koonyo i Yesus, “Palesayamo: Mian anu nompala'imo auwannyo, kabai utusnyo mo'ane, kabai boune, kabai tinanyo, kabai tuumanyo, kabai to ana-anaknyo, kabai pe'e sawah ale'nyo kalana Aku ka' kalana Lele Ma'ima' lengkat mae hi Tumpu, 30mian aijo' montalimaje lebe manjoo' i tempo' u'uka aiya. Ia mohumpakje pinsa'atu lebe manjoo', utus mo'ane, utus boune, tina, to ana-anak, sawah ale'nyo, – ka' osakisa mule'. Ka' tempo' saidi'mae, mian aijo' montalimaje kantumuu'an ma'ima' toka sidu-sidutu'. 31#Mat. 20:16, Luk. 13:30 Panyo da'isan na mian u'uka aiya anu tongkoimoona timbali tongkoimihi, ka' manjoo' na tempo' aiya anu tongkoimihi timbali tongkoimoona.”
I Yesus binasisik ko pintolunnyomo mongkona kasilakaan-Nyo
(Mat. 20:17-19, Luk. 18:31-34)
32I Yesus ka' anu saja' mombatuki Ia, hau-haunyo i uno nu lumambaanan mokiijo' i Yerusalem. I Yesus lumajang namba i moona, ka' anu saja' mombatuki Ia iwi-iwi' i hentemo. Ka' to mia-mian anu mombatuki aha aitu mae i mihi mongoa'i nabuhukmo. Lapas aijo' i Yesus nolaga mule' anu saja' mombatuki Ia, ola posi aha ka' nompoto'i hi aha na anu timbali i butong-Nyo saidi'mae. 33“Hongomo”, na koo-Nyo, “kita u'uka hau-haunyo mokiijo'mo i Yerusalem. Kiijo' mae Anak nu Mian obee'mo hi to kapa-kapala nu imam ka' to gulu-gulu' agama. Ia o hukumo mate; lapas aijo' obee'mo hi to mia-mian anu misa' Yahudi. 34Aha mompopo'ambang Ia, montupe'i Ia, monsakisa Ia, ka' nonsalib Ia. Panyo i sinaa ko totolu'nyo, Ia po'ule'mo tumuu'.”
Poitaon i Yakobus ka' i Yohanes
(Mat. 20:20-28)
35Lantas i Yakobus ka' i Yohanes, aijo'mo to ana-anak i Zebedeus, tinokamo hi Yesus. “Tuumangku Gulu',” koonyo nu aha, “daagi' ko sa'angu' na han anu okahanda'i mami obauakon nu kita Tuuma hi kami”.
36“Apaa na okahanda'i miu da Kubauakon hi komiu?” pinokilawa i Yesus.
37Tinaaman nu aha, “Kami mongka'oho' sumuhang i koanan ka' i kowi nu kita Tuuma, de kita Tuuma sumuhangmo i kasuhangan anu talalo opopodaka'.”
38 #
Luk. 12:50
“Komiu madi' monsumbu' apaa na anu pinoita miu”, koonyo i Yesus hi aha, “Opoko ala miu na monginum i galas kasansalaan anu Ku inum saidi'mae, ka' minsoop i uno nu kasansalaan anu Ku pinsoopi?”
39“Opoko ala”, tinaaman nu aha.
Sahingga i Yesus notatae mule' hi aha, “Memang komiu monginumje i galas kasansalaan anu saidi'mae Ku inum, ka' minsoop i uno nu kasansalaan anu Ku pinsoopi. 40Panyo mongkona ihena anu sumuhang i koanan kabai i kowing-Ku, aijo' misa' Aku na ko hak montantukan. Tumpu na montantukan ihehemo na anu sumuhang i tampa-tampat aijo'.” 41Tempo'nyo sampulu' na anu saja' mombatuki Yesus anu sangga'atannyo aijo' nohongo han aijo', aha pinusamo hi Yakobus ka' hi Yohanes. 42#Luk. 22:25-26 Jadi i Yesus nolaga aha iwi-iwi' lantas notatae, “Komiu monsumbu' saba' to pola-polaya' bansa anu madi' monsumbu' Tumpu Allah monsansalai miannyo. Ka' to mia-mian daka' nu aha mongkabisa'i aha. 43#Mat. 23:11, Mrk. 9:35, Luk. 22:26 Panyo komiu madi' timbali sumo aijo'! Sumo aitu mule', mian anu mongka'oho' timbali daka' atina' hi komiu, ia tionyo timbali posaihonnu belemiu. 44Ka' mian anu mongka' oho' tongkoimoona atina' hi komiu, tionyo timbali posaihon hi aha iwi-iwi'. 45Kalana Anak nu Mian mule' madi' toka da obee'i apa-apaa na kapalaluan-Nyo. Ia toka da mombee'i apa-apaa ka' da mombee' nyawa-Nyo pompobebas mian da'isan.”
I Yesus nompa'alin i Bartimeus anu mapisok
(Mat. 20:29-34, Luk. 18:35-43)
46Aha tinoka i Yerikho. Ka' tempo'nyo i Yesus tiba anu saja' mombatuki Ia tiba mian da'isan nompala'imo kota aijo', samian na anu mapisok hau-haunyo suha-suhang lewa' momoita i sambiha' nu jalan. Sanggonyo i Bartimeus, anak i Timeus. 47Salatan ia nohongo saba' anu hau-haunyo notulu aijo' i Yesus, mian nu Nazaret, ia noloboo'mo, “Yesus, Anak i Daud! Kalibosi mae na aku!”
48Ia tinambuha'an nu mian da'isan, ka' tinewa'nyo momohokot. Panyo ia noloboo' daka-daka', “Anak i Daud, kalibosi mae na aku!”
49Sahingga i Yesus tinolotinjo lantas notatae, “Lagamo mae na ia.”
Jadi aha nolaga mian mapisok aijo'. Aha notatae hi ia, “Boli hengge'! Beleyum ilagamo i Yesus, tinjomo!”
50Mian mapisok aijo' mule' nongalin jubahnyo, lantas nalia-lia' ia tinuminjo ka' namba hi Yesus.
51“Apaa na nuka'ima'i Kubau hi beleyum?” koonyo i Yesus hi ia.
Mian mapisok aijo' nontaami, “Tuumangku Gulu', aku mongkahanda'i montoa.”
52“Lako'mo”, koonyo i Yesus, “kalana beleyum palesaya hi beleng-Ku, beleyum ma'alinmo.”
Tempo'nyo aitu, mian aijo' tinimbalimo nontoa. Lantas ia nombatukimo Yesus i jalan.
Šiuo metu pasirinkta:
MARKUS 10: LAILOE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės