Wúlúfè 3
3
Wúlúfè e e sí gɔ̃̀ gɛ̃̀
1Lɛ̀ lúó zààle e diea, Wúlúfè dɛ̃ lèe Nìómì a gèe à lɛ̀ɛ, “M lú, lɛ à mɔ̀ ḿ gɔ̃ naa ɓá sí kɛ wɔ̃́ é kɛ i mɔ̀ sɛ̀. 2Kéa gɔ̃ lɛ́ e Bóà ká, lɛ́ kà à zì yɛɓo kɛ lòà nì ka kɛ yɛɓo kɛ pìà e kíe làa, lɛ kɔa mì kpã̀nazɛ̀ ká. Nyɛ́ŋɛ̀ĩ píéa mɔ̀ɔ, lɛ́ɛ̀ ló kɛɛ̀ là bálè zìi pìà. 3À mɔ́ɔ̀ wɔ̃̀ mɔ̀ɔ, lo íì zúlú í ɓà sɔ kpeĩ dà i mɔ̀ í nyɔ́nɔ́ gĩĩ yiè zɛ̀ kɛ i là í ló lɛ̀ lɛ́ ò bálè zìi yía mɔ̀, kɛɛ yé kɛ̀ ɓá tó á yí dɔ kélɛ̀ i yí é tóá kíli ó nyɛ̃ pɛ ɓèlèe wà pɛ miìi mɔ̀. 4Lɛ̀ lɛ́ è lo wɔɔ̀ yia kpɔ́ i kɔ̀ mɔ̀, yé aà dà yi bàa, ló à gã̀ píé i là kàà làa sɔ̀ɔ léĩ́ sí ɓá káá i là. Wɔ̃́ ì lo à kɛɛ̀ lɛ́ɛ̀ lo à gèe i lɛ̀ɛ.”
5Wúlúfè a zɛ nɔ wèa kélɛ̀, “Wɔ̃́ séĩ́ ɓà gèea ḿm̀ lo à kɛɛ̀.”
6Lɛ̀ e kɛ kília, Wúlúfè e ló bálè zìi pìàa mɔ̀ e wɔ̃́ kɛ nɔ́ lɛ̀ zì à dɛ̃ lèe a gèe a káa lɛ́ ɓe. 7Lɛ̀ lɛ́ Bóà e nyɛ pɛ ɓèlèe wà pɛ miìi mɔ̀ɔ, à zùù zò e dà e ló gbaa e wɔɔ̀ tã́ã̀ bálè zìi pìàa gã̀ wì bòí zàa. Wúlúfè e wɛ̀lɛ̀ sɛ̀lɛ̀ le e ló e sɔɔ̀ ɓo à gã̀ là e wɔɔ̀ tã́ã̀ yi. 8Lɛ̀ bĩ́míà zèí e dɔɔ, Bóà yí a nɔ̀ɔ nɔ́ɔ, lɛ̀ a gɛ̃̀ɛ̃, à lé e pa kɛ é lee gɛ̃̀ wɔ̀á e gã̀ píé. 9“Dé e i ka?” Bóà e wɛ̃́ĩ́ lɔ̀ɔ kɛ.
A zɛ nɔ a gèe, “Ƃà lùò lè Wúlúfè lɛ. Ƃà gbàà-wíìa kàà m là, ɓii, ɓi lɛ́ lɛ à mɔ̀ ko wɔ̃̀ e kɛ i gbã làa.”
10Bóà a gèe, “Gó Yàwɛ é lúà kpɔ́ i mɔ̀ ḿ lú. Ƃɛ̀lɛ yà ɓa zɔ̃̀ɔ̃̀ ɓɛ lɛ gbùò é dieá à yé ɓaà kɛ líé i dɛ̃ lèe káa là. E kɛ à mɔ̀ i ló gɔ̃a nɛ̀ĩ́ dɛɛ dɛɛ, o kɛ bɛ̃̀ɛ̃ kpã̀nazɛ̀ ɛ̃́ɛ̃́ fɛ́lɛ́ zɛ̀ɛ naàá sí kɛ ìí gbaa kɛ. 11M lú, yékɛ̀ í túó i kɛ̀ sɛ́lɛ́ gbɛɛ yí mì ká wɛ̃́ĩ̀. Wɔ̃́ séĩ́ ì ló à naàa, ḿm̀ lo à kɛɛ̀ i lɛ̀ɛ. Mia nɔ́ séĩ́ o pɛ́lɛ e kéa yía, waà yí dɔá kélɛ̀ i lee kpã̀nazɛ̀ dò ka. 12Yee mɔ̀ɔ lɛ́ wánà ká kélɛ̀ ka wɔ̃̀ lɛ m gbã là, ɛ̃́ɛ̃́ ḿm̀ bɛ̀i i mɔ̀ wɔ̃̀ séĩ́ síì m̀ wɔ̃́ ká, kɛɛ gɔ̃ dò lɛ zèea, ye lɛ́ lɛ à mɔ̀ ka wɔ̃̀ é kɛ à gbã là é dieá m làa. 13I yìì lɛ̀ɛ mɔ̀ bĩ́a ká, yé lɛ̀ aà kpà leà, é kɛ̀a lɛ́ɛ̀ ló e zò kɛɛ̀ i píéa kɛ lɛ sɛ̀. Kɛɛ é kɛ̀a lɛ̀ɛ́ ló wèe à mɔ̀ɔ, yé Yàwɛ lɛ ɓea, ḿm̀ ló à kɛɛ. Ì wɔɔ tã́ã̀ lɛ̀ɛ mɔ̀ é tóá kíli làa píé é kɛ.”
14Lɛ̀ e kɛ kília, Wúlúfè e wɔɔ Bóà gã̀píé e tóá kíli làa píé e kɛ. Kɛɛ e wɛ̀lɛ̀ làa píé lɛ̀ tii ká yékɛ̀ mi dò fé á gɛ̃̀, ɓii Bóà lɛ̀ɛ́ gbaa naa kɛ mi dò fé a yí dɔ. 15Bóà a gèe à lɛ̀ɛ, “Nu ɓà yèlè sɔɔ̀ ká ɓá fóló tã́ã̀a mɔ̀.” Lɛ̀ e kɛ kília, ye lɛ́ Bóà e bálè gɔ̃̀ à yí pɛ̀ɛ saládo lɛ́ e bɛ̀i à mɔ̀ é kɛ pã́ũ vũ̀ sɔ́ɔ́li káa gɔ̃́, a gbɛ̃̀ léa là sɔɔ̀ yí, lɛ́ e gbũ à mɔ̀ wa yà à gbã làa. Ye lɛ́ Bóà e ló gbaa e mɛ̀ĩ́ pɛlɛia. 16Lɛ̀ lɛ́ Wúlúfè e ló gbaa e dɛ̃ lèe píéa, Nìómì e Wúlúfè wɛ̃́ĩ́ lɔ̀ɔ kɛ, “Zi kpɛɛ̀ lɛ́ e kɛ̀a, ḿ lú?” Ye lɛ́ zi séĩ́ lɛ́ Bóà e wɔ̃́ kɛ a káa à gèea.
17Wúlúfè a gèe zénií, “A gèe m̀ lɛ̀ɛ yékɛ̀ ḿ nu i píé m kɔ̀ fèle ká, ye lɛ́ a mɔ́ɔ̀ bálè e kéa nɔ ɓo m lɛ̀ɛ.”
18Lɛ́ Nìómì a gèe, “Ì dɔ, m lú, wɔ̃́ lɛ́ e ló pìà kɛɛ, íì ló à gɛ̃̀. Bóà e yía fĩ́ĩ́ dɔ gbɛɛ lɛ̀ɛ́ ló kɛɛ̀ à kɛ̀lɛ̀ é tóá kíli wɔ̃́ e yía à yí é bɛ̀i pɛ̃́nɛ̀ɛ.”
Šiuo metu pasirinkta:
Wúlúfè 3: MHB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės