ମାତିଉ 11
11
ଜିସୁ ନି ଡୁବନ୍ ସିନି ଯୋହନ
(ଲୁକ ୭:୧୮-୩୫)
1ଜିସୁ ୱାନି ବାରଲୋକ୍ ସିସୁରିଙ୍ଗ୍ ଇୟାୱିଜୁ ମାଟା ସିତି ୱେନ୍କା ଆୟା ବାଡି ଡ଼ିସ୍ସି ଲାକ୍ତୁରି ଗାଡ଼୍କାଙ୍ଗ୍ ସଲ୍ସି ପ୍ରଚାର୍ କିଦେଙ୍ଗ୍ ଆସ୍ତାନ୍ ।
2ନାସ୍ତିୱାଲେ ଡୁବନ୍ ସିନି ଯୋହନ ଜଇଲ୍ତୁ ମାର୍ହାନ୍ । କ୍ରିସ୍ତ ଏମେ ୱିଜୁ ପାଣି କିଜିମାର୍ହାନ୍, ତାନି କାବୁର୍ ପୟ୍ଜି ୱାନ୍ ନିଜେଦି ସିସୁରିଙ୍ଗ୍ କ୍ରିସ୍ତଦି ଲାକ୍ତୁ ପକ୍ତାନ୍ । 3ୱାର୍ ସଲ୍ସି ଜିସୁଙ୍ଗୁଁ ୱେନ୍ବାତାର୍, “ଏମେ ଲୋକୁ ୱାନାନ୍ଇଜି ଯୋହନ ଇର୍ହାମାର୍ହାନ୍, ନିନ୍ ଇନିକା ଆକାନ୍ ନେ, ମାପ୍ ଆଇୱାନିଙ୍ଗ୍ କାପ୍କିଜି ତେବାନାପ୍ ?”
4ଜିସୁ ୱାରିଙ୍ଗ୍ ଇର୍ହାନ୍, “ମିର୍ ଡ଼େସି ସଲ୍ସି ଆମାକା ୱିଜୁ ୱେନ୍ଜିନିଦେର୍ ମାରି ସୁଡ଼୍ଜିନିଦେର୍, ଆୟାକାୱିଜୁ ଯୋହନତିଙ୍ଗ୍ ୱେର୍ତୁ । 5କାଣାର୍ ସୁଡ଼୍ଦେଙ୍ଗ୍ ଆଟ୍ସିନାର୍, ସଟାର୍ ବୁଲାଜିନାର୍, କୁସ୍ଟରୋଗ୍ତି ଲୋକୁ ନେଗେନ୍ଆଜିନାର୍, ବଇରା ଲୋକ୍ ୱେନ୍ଡ୍ରେଙ୍ଗ୍ ଆଟ୍ସିନାର୍, ସାତି ଲୋକୁ ଡ଼େସି ନିଙ୍ଗିଁଜିନାର୍ ମାରି କାକୁର୍ତି ଲୋକାମାନୁ ବା ନେଗି କାବୁର୍ ପ୍ରଚାର୍ କିଆଇଆଜିନାତ୍ । 6ନା ବିସୟ୍ତାନ୍ ଏମେୱାରି ଇନିକା ନାମ୍ଇକା ସିଲେତ୍, ୱାନ୍ ଦନ୍ୟ ।”
7ଯୋହନତି ସିସୁର୍ ଡ଼େସିସର୍ରିୱାଲେ ଜିସୁ ଲୋକାଙ୍ଗ୍ ଯୋହନତି ବିସୟ୍ତାନ୍ ଇର୍ହାନ୍, ମିର୍ ଯୋହନତିଙ୍ଗ୍ ସୁଡ଼ୁଦେଙ୍ଗ୍ଇଜି ଏସ୍ତିୱାଲେ ବାଲିବୁମିଦୁ ସର୍ରିମାର୍ଇଦେର୍, “ଇନିକା ସୁଡ଼୍ଦେଙ୍ଗ୍ ଆସା କିତିମାର୍ହିଦେର୍ ? ଇନିକା ଗାଲିଦାନ୍ ଦୁଙ୍ଗ୍ଁଜିମାନି ଉଣ୍ତ୍ରି ଦେର୍ ନାଡ଼ା ? 8ମିର୍ ଇନିକା ସୁଡ଼୍ଦେଙ୍ଗ୍ ସତିସର୍ଇ ମାର୍ଇଦେର୍ ? ପାତଲ୍ ଆଙ୍ଗିଁ ଆରାତିମାନି ଅରେନ୍ ଲୋକ୍ତିଙ୍ଗ୍ ? ସୁଡ଼୍ଦୁ, ଆମାକାର୍ ଆୟାୱାଜା ପାତଲ୍ ଆଙ୍ଗିଁ ଆରାତି ଲୋକୁ ରାଜାଦି ମେଡ଼୍ତୁ ତେବାନାର୍ । 9ନାଙ୍ଗିଁ ଇନ୍ଡ୍ରୁ, ଇନିକା ସୁଡ଼୍ଦେଙ୍ଗ୍ ସର୍ହିମାର୍ହିଦେର୍ ? ଇନିକା ଅରେନ୍ ବାବବାଦିଙ୍ଗ୍ନୋ ? ନାନ୍ ମିଙ୍ଗିଁ ସତ୍ ଇଜିନା, ମାତର୍ ବାବବାଦି ମାଣ୍କୁ ଅରେନ୍ ନାଣ୍ତପେରି ଲୋକ୍ତିଙ୍ଗ୍ ସୁଡ଼ୁତିମାନିଦେର୍ । 10ଇରିଙ୍ଗ୍ ଇୟା ଯୋହନତି ବିସୟ୍ତାନ୍ ସାସ୍ତ୍ରଦୁ ରାସାତାମାନାତ୍, ମାପୁରୁ ଇର୍ହାନ୍, ମି ଉଣ୍ତିଙ୍ଗ୍ ସାରି ରସ୍ତେଙ୍ଗ୍ ନାନ୍ ଆଗ୍ଡ଼ି ନା ଦୁତ୍ତିଙ୍ଗ୍ ପକ୍ନା । 11ନାନ୍ ମିଙ୍ଗିଁ ସତ୍ ଇଜିନା, ପୁର୍ବେଦାନ୍ ନେର୍ ସାନ୍ଦି ଇୟା ଦୁନିଆଦୁ ଏସ ଲୋକୁ ଜନମ୍ଆତାମାନାର୍, ଆୟା ୱିଜେରି ମାଣ୍କୁ ଡୁବନ୍ ସିନି ଯୋହନ ପେରିକାନ୍ । ମାତର୍ ମୁସ୍କୁପୁର୍ତି ରାଜିଦୁ ଏନ୍ ୱିଜେରି ମାଣ୍କୁ ଇସ୍ରିକାନ୍, ୱାନ୍ ଯୋହନତି ମାଣାନ୍ ପେରିକାନ୍ । 12#ଲୁକ ୧୬:୧୬.ଡୁବନ୍ ସିନି ଯୋହନ ୱାନି ସୁସମାଚାର୍ ପ୍ରଚାର୍ କିନି ଦିନ୍ତାନ୍ ନେର୍ ସାନ୍ଦି ମୁସ୍କୁପୁର୍ତି ରାଜିଦୁ ମୁସ୍କୁ ନାଣ୍ତ ରେଲ୍ନିଅନିକା ସାଲାଜିନାତ୍ । ରେନିଅନିକାର୍ ବପୁଦାନ୍ ଅଦିକାର୍ କିଦେଙ୍ଗ୍ ସେସ୍ଟା କିଜିନାର୍ । 13ଯୋହନ ୱାନିସାନ୍ଦି ମସାଦି ନିୟମ୍ ନି ବାବବାଦିରି ମାଟାଦାନ୍ ଆୟା ରାଜି ବିସୟ୍ତାନ୍ ଇନାଜିମାର୍ହାତ୍ । 14#ମାତିଉ ୧୭:୧୦-୧୩; ମାର୍କ ୯:୧୧-୧୩.ଜଦି ୱାରି ମାଟା ମିର୍ ବିସ୍ବାସ୍ କିନିଦେର୍, ଆରିଙ୍ଗ୍ ଯୋହନ ଆଜିନାନ୍ ଏଲିୟ୍, ଆମାକାନ୍ ଆଗ୍ଡ଼ି ୱାନିକାମାର୍ହାତ୍ । 15ଏମେୱାନିଙ୍ଗ୍ ଗିତଣିମାନାତ୍, ୱାନ୍ ୱେନିନ୍ !
16“ଇୟା ଆଜିକାଲ୍ତି ଲୋକାଙ୍ଗ୍ ଏମେତାନିୱାଲେ ତୁସ୍ନା ? ୱାର୍ ସାତା ନାଡ଼୍ମି ବାସ୍ସି କାର୍ଜିଜିମାନି କଡ଼ରି ୱାଜା । ଉନ୍ଡ୍ରି ଦଲତୀ କଡ଼ର୍ ଆଇ ଦଲ୍ତିଙ୍ଗ୍ ଇନାର୍, 17ମାପ୍ ପେଡ଼ିଦି ବାଜା ଏସ୍ତାପ୍, ମାତର୍ ମିର୍ ଗାତ୍ଇତିଦେର୍ । ମାପ୍ ଦୁକ୍ତି ପାଟା ପାରିତାପ୍, ମାତର୍ ମିର୍ ଆଡ଼ାବାଇତିଦେର୍ । 18ଯୋହନ ୱାଜି ଉପାସ୍ କିଜିମାର୍ହାନ୍, ମାରି ଅଙ୍ଗୁର୍ରସ୍ ଉଣୁଏଜିମାର୍ହାନ୍ । ୱିଜେରେ ଇର୍ହାର୍, ୱାନ୍ ଦୁବାକାସ୍ତିକାନ୍ ! 19ଏସ୍ତିୱାଲେ ମନୁଷ୍ୟପୁତ୍ର ୱାଜି ଉଣାନ୍ ତିନାନ୍, ୱିଜେରେ ଇର୍ହାର୍, ଇୟା ଲୋକ୍ତିଙ୍ଗ୍ ସୁଡ଼୍ଦୁ ! ୱାନ୍ ଅରେନ୍ ପେଟୁ ନି ମଦୁଆ, ସିସ୍ଟୁ ଲୋସ୍ନି ଲୋକା ମାରି ପାପି ଲୋକା ସଙ୍ଗ୍ । ମାତର୍ ମାପୁରୁ ବୁଦି ନିଜେଦି ପାଣିଦାନ୍ ସତ୍ଇଜି ପାର୍ମାଣ୍ଆତାନ୍ ।”
ଅବିସ୍ବାସି ଗାଡ଼୍କୁ
(ଲୁକ ୧୦:୧୩-୧୫)
20ଏମେ ଗାଡ଼୍କାଙ୍ଗ୍ ଜିସୁ ୱାନି ନାଣ୍ତ କାବାଆନି ପାଣି କିତାମାର୍ହାନ୍, ଆୟା ରାଜିତି ଲୋକୁ ୱାରି ପାପ୍ତି ଉଣ୍ତିଙ୍ଗ୍ ମନ୍ତିଙ୍ଗ୍ ଡ଼େପ୍ଇକା ସୁଡ଼୍ଜି, ଜିସୁ ଆୟା ଗାଡ଼୍କାଙ୍ଗ୍ ବାସେକିଦେଙ୍ଗ୍ଆସ୍ତାନ୍ । 21ଏ କୋରାଜିନ୍, ଏସା ନାଣ୍ତ ନିନ୍ଦାଦି ଦୁକ୍ ପୟ୍ନିଦେର୍ ! ବେତ୍ସାଇଦା, ନି ଦସ୍ବା ଆୟାୱାଜା ! ନିବାନ୍ ଏମେ କାବାଆନି ପାଣିୱିଜୁ କିଆଇଆତାମାନାତ୍, ଆୟାୱିଜୁ ଜଦି ସୋର ନି ସିଦନ୍ତୁ କିଆଇଆତାତ୍ମାନ୍ଦି, ଆବେଣି ଲୋକୁ ମେନ୍ଦଲ୍ତୁ ନିରୁ ଉସାଜି ବାସ୍ତେଙ୍ଗ୍ ଆରାଜି ମନ୍ତିଙ୍ଗ୍ ଡ଼େପ୍ତାର୍ ମାନ୍ଦି । 22ନାନ୍ ସତେ ଇଜିନା, ମାପୁରୁ ବିସାର୍କିନି ଦିନ୍ତୁ ମି ବାଦ୍ଲୁ ସୋର ନି ସିଦନ୍ତି ଲୋକାଙ୍ଗ୍ ନାଣ୍ତ ଦୟା ତର୍ନାନ୍ । 23ମାରି କପର୍ନାହୁମ୍ତୁ ବାସାନିକିନ୍ଦା ! ନିନ୍ ଇନିକା ନିଜେ ମୁସ୍କୁପୁର୍ ସନ୍ଡ଼୍ରେଙ୍ଗ୍ ବଦାକିଜିନି ? ନିନ୍ ନର୍କଦୁ ପକାଇଆନି । ନି ବାନୁ ଏମେ କାବାଆନି ପାଣି କିଆଇଆତାମାନାତ୍, ଆକା ଜଦି ସଦମ୍ତୁ କିଆଇଆତାତ୍ମାନ୍ଦି, ଆୟା ଗାଡ଼୍ ନେର୍ ସାନ୍ଦି ତେବାଦେଙ୍ଗ୍ ଆଟ୍ତାତ୍ମାନ୍ଦି । 24#ମାତିଉ ୧୦:୧୫; ଲୁକ ୧୦:୧୨.ନାନ୍ ମିଙ୍ଗିଁ ସତ୍ ଇଜିନା “ମାପୁରୁ ବିସାର୍ ଦିନ୍ତୁ ମି ମାଣ୍କୁ ସଦମ୍ତୁମାନି ଲୋକା ଉଣ୍ତିଙ୍ଗ୍ ନାଣ୍ତ ଦୟା ତର୍ନାନ୍ ।”
ନାବାନୁ ୱାଜି ରମ୍ଦୁ
(ଲୁକ ୧୦:୨୧-୨୨)
25ଆୟା ସମୟ୍ତୁ ଜିସୁ ପାର୍ତନାକିଜି ଇର୍ହାନ୍, “ଏ ବୁବା, ମୁସ୍କୁପୁର୍ ମାରି ଦୁନିଆଦି ପ୍ରବୁ, ଇୟାୱିଜୁ ମାଟା ନିନ୍ ବୁଦିମାନି ମାରି ପଡ଼ାତି ଲୋକାମାଣ୍କୁ ମାର୍କ୍ସି ଇଡ୍ଜି ପଡ଼ାଇ ଲୋକାମାନୁ ୱେକ୍ତିମାନି ଆକା ନାନ୍ ନିଙ୍ଗିଁ ଦନ୍ୟବାଦ୍ ସିଜିନା । 26ହୁଁ ବୁବା, ନି ବଦାଦାନ୍ ଇୟାୱିଜୁ ଗଟାଜି ସଲ୍ସିନାତ୍ ।
27 #
ଜୋହନ ୩:୩୫;
ଜୋହନ ୧:୧୮; ୧୦:୧୫. “ନା ବୁବା ନାଙ୍ଗିଁ ୱିଜୁ ବିସୟ୍ ସିତାମାନ୍, ବୁବେଙ୍ଗ୍ ଡ଼ିସ୍ତିଙ୍ଗ୍ ମାରିସିଙ୍ଗ୍ ମାରି ଏନ୍ ନେସ୍ଏର୍, ମାରି ମାରିସିଙ୍ଗ୍ ଡ଼ିସ୍ତିଙ୍ଗ୍ ମାରି ଏନ୍ ନେସ୍ଏର୍ । ମାରିସି ଏମେୱାରି ଲାକ୍ତୁ ବୁବେଙ୍ଗ୍ ୱେଙ୍ଗିଁସ୍କିନାନ୍, କେବଲ୍ ଆକାର୍ନେ ବୁବେଙ୍ଗ୍ ନେସ୍ତେଙ୍ଗ୍ ଆଟ୍ନାର୍ ।
28“ଏ ୱାନ୍ଦିତି ୱିଜେରେ ନି ବଜ୍ତୁ ମାନି ଲୋକୁ ୱିଜେରେ, ନା ଲାକ୍ତୁ ରାଦୁ, ନାନ୍ ମିଙ୍ଗିଁ ରମିସ୍କିନା । 29ନା ପୁନ୍ଦି ନିଜେଦି ମୁସ୍କୁ ପିଣ୍ତ୍ଦୁ, ମାରି ନାବାଣ୍କୁ ଅଜାଦୁ, ଇରିଙ୍ଗ୍ ନାନ୍ ନିଜେ ସାଦୁ ନି ଜିବନ୍ତୁ କାର୍ମୁ ସୁଣିକିନ୍ଦାଆକା । ଆବେଟ୍ ମିର୍ ରମ୍ନିଦେର୍ ।” 30ନାନ୍ ମି ମୁସ୍କୁ ଏମେ ପୁନ୍ଦି ଲାଦେକିନା, ଆକା ପିଣ୍ଡ୍ଦେଙ୍ଗ୍ କାସ୍ଟୁସିଲେ । ମାରି ମିଙ୍ଗିଁ ଏମେ ବଜ୍ ସିନା, ଆକାବା ନାଣ୍ତ ଉସାସ୍ ।
Šiuo metu pasirinkta:
ମାତିଉ 11: NTKoo20
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020