Genesis 19
19
Akngeyel Sodom Gomorrah atherr ywerrelhileyel
1Atwerrp-anem angel atherr apetyek apmer Sodom-warl, tern ilkwewarl. Artwa Lot keyt ilkwa iwerr-angkwarr anenh. Lot-el angel renh-atherr arek, ra akapwert ahern-warl-athek kwenirrek. 2Ra angkek, “Mpwelanth apmer atyenh-warl apetyenherr-atherr, ingkernem-then mpwelanth lhewelhetyek. Ingwa anyent-inger mpwelanth ayntetyek, ingwepenh mpwelanth alethek alpey-akenh.” Ratherr renh ilek, “Mwerr aylanth akethel ayntem, tawen ampepel?” 3Lot-el renh-atherr irrtyelh-ilenh inngantey apmer ikwerenh-warl alpetyek, ratherr inngantey alpek ikwer-angkwarr, apmer ikwerenh-warl. Lot-el amern ampernek ikwer-atherr.
4Rernem ankwayntetyek irrek-anem. Artwa ingkerrenh Sodom-areny-rnem ikwer-rnem-warl, artwa atningk apetyek. 5Rernem ayernek, “Artwa alethang weth-atherr-alew? Warl ngkwenharl aneyel atherr-alew? Akngetya renh-atherr anwantherr apmwa mpwaretyek ikwer-atherr-angkwarr.”
6Lot alhek arriw-warl-athek. 7Ra menty angkek. 8“Kwey aleyak nhenh-atherr akngeynenherr-areyay, artwa atherr mentyarl. Atha renh-atherr arntarnt-areyel, ratherr atyeng-itwel ilkwatherr aneyel.”
9Artwa apmwernem arlkek, “Iwerr-kety alha! Arrkngert angkey-angenh! Artwa yanh alethangarl, nthakenh ra anwekantherr angkey-angenh alakenh. Anwantherr ngenh atwekerr!” Rernem akarrirrenhey-alhek arriw renh ngkweltyiletyek, warl Lot-kenh.
10-11Artwa angel ratherr Lot renh ayteng inek, warl renh martemel artwernem akethelarl rtnenh-rnem ingkerrenh aparrngilek, rernem iwerr renh arey-angenhilek.
12-13Ratherr Lot ikwer angkek, “Ngkwenh-rnem apek apmer nhel aneyel? Alerengkw-rnem-then. Ingkerrenh apmer nhenh-they akngeyna, aylanth apmer nhenh atwem-kety. Aylanth apmer nhenh atwem, rernem apmwangkwarr alheyel-kety.”
14Lot-el malyikw ikwerenh-atherr ilek, rernem apmer-they alpetyek ingkerr-antey. Ratherr ikwer irrpelthirrenh, menty renh awenh.
15Ingwepenh angel-el atherr Lot renh ilek ra apmer ikwer-they alpetyek, “Anew ngkwenh alerengkw ngkwenh-atherr anamerl apmer nhenh-they atnweneyna alpemel. Arrangkwelan nga alpey-angenhan, ingkerrenharl arrenhantherr atwem.”
16Lot arlan anyentel-antey rtnenh. Akngey ilkelhenh renh atnyeneyek. Angel-el Lot renh anew ikwerenh alerikw ikwerenh-atherr-then apmer ikwer-they atnwenhek. 17Angel-el renh-rnem ilek, “Apmer renh artepang arey-angenh alpetyek.”
18-19Lot-el ilek, “Awethem ntwa ilekan. Apwert-warl anwenhantherr ilanthey-angenh, apwert arleng-ketyarl, anwantherr atwelhekerr. 20Tyarlewa anwenhantherr apmer akely ikwer-warl alpetyek.” 21Angel-el ilek, “Ya, kel mwerr, atha apmer renh atwey-angenh. 22Anamerl alhenherr-arey arrenhantherr atwekerr-awaty.” Lot-el tawen akely renh itnewek Zoar, angka ikwerenh-angkwarr aynteyel apmer akely.
23Ingkeny tyerrelhetyek irrek-anem. Lot apmer Zoar ikwer-warl aney-alhek-anem. INGKART-kenh lherrm ikwerenhel tawen renh-atherr atwek.
24-25INGKARTel lherrmel-anem apmer renh atwek. Apmer atherr-antey ra atwek, arwerl-rnem-then atherrk-rnem-then. Altherrp-itwekan atwek arrpemarl lherrmel. Akngeyel arrpemarl tern ilkwitwel atwek arrpemarl. Tern ilkwernem ingkerrenh atwek. 26Lot-kenh anewel artepang arek, ra apwert thalt-anem irrek.
27Ingwepenh ikwerel-antey angkep-antey arrpemarl Abraham alpek irrkaty ikwer-warl, rarl arrwekelarl angkek Akngey-warl. 28Ra kwen-warl-athek lherrm-rnem kwert-then tyerrelhey-ayntenty apmer ikwer-atherr-they.
29Akngey ra iterl-arek, Abraham ra alhelek Lot-anem arntarnt-aremel. ...
Šiuo metu pasirinkta:
Genesis 19: aly
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Wycliffe Bible Translators, Inc. All rights reserved.