ᒠᓐ 14
14
ᐅᑕᐎᒪᐤ ᐎᒋᒡ
John 14.1-14 (Easter-5 Year A)
1“ᐊᑲᐎᔾ ᒥᑯᔅᑲᑕᔨᑎᒧᒄ᙮ ᑕᑈᐅᒐᔨᒪᐧᒄ ᒋᓴᒪᓂᑐᐤ, ᓂᔾ ᑭᔭ ᑕᑈᐅᒐᔨᒥᒄ᙮ 2ᐊᓐᑕ ᓄᑕᐎᔾ ᐎᒋᒡ ᒥᔅᑎ ᒥᒐᓇ ᐊ ᐱᔅᒋᒐᔭᒋ᙮ ᓂᑭ ᐃᑐᑕᓐ ᓇᑕ ᒐᒋ ᐊᔭᔅᑯᔍᑎᑯᒡ ᐊᓐᑕ ᒐ ᑕᔭᒄ᙮ ᓇᒪ ᒋᐸ ᐅᒋ ᐃᑎᑎᓇᐛᐤ ᐅ ᐊᑲ ᐅᒋ ᑕᑈᒥᑲᒡ᙮ 3ᒋᔅᑕᔭᓇ ᒪᒃ ᐊᓐᑕ ᒐ ᑕᔭᒄ, ᐊᑯ ᒐ ᐸᒋ ᓂᑐᐛᐱᒥᑎᑯᒡ ᐊᑯ ᒐ ᔅᑐᑕᐃᑎᑯᒡ ᐛᔅ ᒋ ᓂᑐᐛᔨᒥᑎᓇᐛᐤ ᒐᒋ ᑕᔭᒄ ᐊᓐᑕ ᐊ ᑕᔭᓐ᙮ 4ᒋ ᒋᔅᒐᔨᑕᓇᐛᐤ ᒪᒃ ᑕᓐᑕ ᐊ ᐃᑐᑕᔭᓐ ᑭᔭ ᑕᓐᑕ ᒐᒋ ᐅᒋ ᐃᑐᑕᓄᐅᒡ ᐊᓐᑕ᙮”
ᒪᔅᑭᓄᐤ ᑭᔭ ᑕᑈᐅᓐ ᑭᔭ ᐱᒪᑎᓯᐅᓐ
5ᑥᒥᔅ ᒪᒃ ᒋ ᐃᑕᐤ, “ᐅᑎᐸᔨᒋᒐᐤ, ᓇᒪ ᓂ ᒋᔅᒐᔨᑕᓇᓐ ᑕᓐᑕ ᒐ ᐃᑐᑕᔨᓐ, ᑕᓐᑕ ᒐᒋ ᐅᒋ ᒋᔅᒐᔨᑎᒪᒡ ᑕᓐᑕ ᒐᒋ ᐅᒋ ᐃᑐᑕᔭᒡ ᐊᓐᑕ ?”
6ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᓂᔾ ᐊᐅᒄ ᒪᔅᑭᓄᐤ ᑭᔭ ᑕᑈᐅᓐ ᑭᔭ ᐱᒪᑎᓯᐅᓐ, ᓇᒪ ᐊᐛᓐ ᒋᑭ ᒋ ᓇᑕᐤ ᐅᑕᐎᒪᐛ ᒥᒄ ᓂᔾ ᐅᒋ᙮ 7ᓴᔅ ᒪᒃ ᐊ ᒋᔅᒐᔨᒥᔭᒄ ᓴᔅ ᒋᐸ ᒋᔅᒐᔨᒪᐛᐤ ᑭᔭ ᓄᑕᐎᔾ᙮ ᐊᓄᒡ ᒪᒃ ᓴᔅ ᒋ ᒋᔅᒐᔨᒪᐛᐤ ᑭᔭ ᓴᔅ ᔅᒋ ᐛᐱᒪᐛᐤ᙮”
John 14.8-17 (Pentecost Year C)
8ᐱᓕᑉ ᒋ ᐃᑕᐤ, “ᐅᑎᐸᔨᒋᒐᐤ, ᐛᐸᑎᔨᓇᓐ ᒪ ᐅᑕᐎᒪᐤ, ᐊᐅᑯᓐ ᒥᒄ ᐊ ᐃᓯ ᓂᑐᐛᔨᑎᒪᑕᒡ᙮”
9ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᐱᓕᑉ, ᓴᔅ ᐛᔅᑭᒡ ᑲ ᑕᔭᓐ ᐅᑕ ᐊ ᑕᔭᒄ ᐃᔭᐱᒡ ᒪᒃ ᓇᒪ ᒋᔅᒐᔨᒥᓐ ? ᐊᓐ ᐊᐛᓐ ᑲ ᐛᐱᒥᑦ ᓴᔅ ᒋ ᐛᐱᒪᐤ ᐅᑕᐎᒪᐛ᙮ ᒐᒂᓐ ᒪᒃ ᐛᒋ ᑯᒂᒋᒥᔨᓐ ᒐᒋ ᐛᐸᑎᔨᑕᓐ ᐅᑕᐎᒪᐤ ? 10ᐱᓕᑉ, ᓇᒪᐎᔾ ᐊ ᒋ ᑕᑈᑕᓐ ᐊ ᐱᒋᔅᑯᐅᒃ ᐅᑕᐎᒪᐤ ᑭᔭ ᐅᑕᐎᒪᐤ ᐊ ᐱᒋᔅᑯᐅᑦ ? ᓂ ᐸᐃᑯᓯᓇᓐ᙮”
ᐊᑯ ᒋᓴᔅ ᐊᑕᑦ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᐅ ᑲ ᐃᓯ ᐃᔨᒥᐃᑎᑯᒡ ᒋᓴᒪᓂᑐᐤ ᓂᒋ ᐃᑎᓱᒥᒄ ᒐᒋ ᐃᔅᒋᔄᐅᒡ᙮ ᐅᑕᐎᒪᐤ ᐊᓐ ᑲ ᐱᒋᔅᑯᐅᑦ ᐃᑐᑎᒻ ᒪᒥᔅᑲᒡ ᐃᑐᐅᓇ ᓂᔾ ᐅᒋ᙮ 11ᐸᒋ ᑕᑈᑐᐅᒄ ᐅ ᐊ ᐃᑎᑎᑯᒡ ᐊ ᐱᒋᔅᑯᐅᒃ ᐅᑕᐎᒪᐤ ᑭᔭ ᐅᑕᐎᒪᐤ ᐊ ᐱᒋᔅᑯᐅᑦ᙮ ᐊᑲ ᒋ ᑕᑈᑎᒧᐛᒂ ᐅ ᐊ ᐃᑎᑎᑯᒡ, ᑕᑈᑐᐅᒄ ᐊᓐ ᐅᒋ ᑕᓐ ᑲ ᐃᓯ ᓂᓇᐧᑯᐤ ᒪᒥᔅᑲᒡ ᐃᑐᑎᒪᓐ᙮ 12ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐ ᐊᐛᓐ ᑲ ᐸᒋ ᑕᑈᔭᔨᒥᑦ ᒋᑭ ᐃᑐᑎᒻ ᑕᓐ ᐊ ᐃᓯ ᐃᑐᑎᒧᒡ ᑭᔭ ᐊᑐᐎᔅ ᒪᒥᔅᑲᒡ ᒐᒂᔪᐛ ᒋᑭ ᐃᑐᑎᒻ ᐛᔅ ᐊᓐᑕ ᓄᑕᐎᔾ ᐊ ᑕᑦ ᓂᔾ ᑭᔭ ᓂᑭ ᑕᓐ᙮ 13ᓂᑭ ᑐᑕᓐ ᑕᓐ ᐊ ᐃᓯ ᓂᑐᑎᒪᔭᒄ ᓂᑦ ᐃᓯᓂᐧᑲᓱᐅᓐ ᐊᐱᒋᑕᔭᒂ, ᐊᑯ ᒪᒃ ᒐ ᓄᒂᒡ ᐊ ᐃᔅᐱᔅ ᒋᔅᑕᔨᑕᑯᓯᑦ ᒋᓴᒪᓂᑐᐤ ᐊᓂᔭ ᐅᒋ ᑕᓐ ᐊ ᐃᓯ ᐃᑐᑎᒥᔨᒋ ᐅᑯᓴ᙮ 14ᒥᒄ ᑕᓐ ᒐ ᐃᓯ ᓂᑐᑎᒪᔭᒄ ᓂᑦ ᐃᓯᓂᐧᑲᓱᐅᓐ ᐊ ᐊᐱᒋᑕᔭᒄ ᓂᑭ ᑐᑕᓐ᙮”
ᒋᓴᔅ ᑲ ᐃᔅᒋᔄᑦ ᒐᔅᑎᓇᔅ ᒐ ᒥᔭᑭᓄᔨᒋ ᐅᒋᔅᒋᓄᐊᒧᐛᑭᓇ ᑲ ᐸᔭᒋᓯᔨᒋ ᐊᒐᒂ
John 14.15-21 (Easter-6 Year A)
15“ᒧᔭᒻ ᓯᔭᒋᐃᐛᒂ ᒪᒃ ᒋᑭ ᓂᓇᐃᑕᓇᐛᐤ ᐛᔅ ᑕᓐ ᑲ ᐃᑎᓯᒥᑎᑯᒡ ᒐᒋ ᐃᑎᔭᒄ᙮ 16ᓂᑭ ᐊᔭᒥᐊᓐ ᐊ ᓂᑐᑎᒧᐅᒃ ᓄᑕᐎᔾ ᒐᒋ ᐃᑎᓴᐊᒪᑕᒄ ᒥᓐ ᑯᑎᑲ ᐊᐛᔪᐛ ᒐᒋ ᐎᒋᐃᑎᑕᑯ ᑭᔭ ᒧᔅ ᑲᒋᒡ ᒐᒋ ᑕᑦ ᐊᓐᑕ ᐊ ᑕᔭᒄ᙮ 17ᐊᐅᒄ ᒪᒃ ᐊᓐ ᑲ ᐸᔭᒋᓯᑦ ᐊᒐᐧᒄ, ᐊᓐ ᑲ ᒋᔅᒐᔨᑎᒥᐃᐛᑦ ᑕᑈᐅᓂᔪᐤ᙮ ᐊᓐᒡ ᐊᐛᓐᒋ ᐊᑲ ᑕᑈᔭᔨᒪᒡ ᐅᑕᐎᒪᐛ ᓇᒪ ᒋᑭ ᒋ ᐱᑎᑲᐊᐅᒡ ᐅᐱᒪᑎᓯᐅᓄᐛᒡ ᑲ ᐸᔭᒋᓯᔨᒋ ᐊᒐᒂ, ᐛᔅ ᓇᒪ ᐛᐱᒪᐅᒡ ᑭᔭ ᓇᒪ ᒋᔅᒐᔨᒪᐅᒡ᙮ ᒥᒄ ᒪᒃ ᒋᔨᐛᐤ ᒋ ᒋᔅᒐᔨᒪᐛᐤ ᐛᔅ ᒋ ᐎᒐᐅᑯᐛᐤ ᑭᔭ ᒋᑭ ᐱᒋᔅᑲᑯᐛᐤ᙮”
18“ᓇᒪ ᓇᐅᔅ ᒋᑭ ᐅᒋ ᓂᑭᑎᑎᓇᐛᐤ ᐅᑕ ᐊᔅᒋᒡ᙮ ᒥᓐ ᒋᑭ ᐸᒋ ᓂᑐᐛᐱᒥᑎᓇᐛᐤ᙮ 19ᓇᒪ ᓇᔅᒡ ᓇᐅᔅ ᓂᑭ ᐅᒋ ᐛᐱᒥᑯᒡ ᐃᔪᒡ ᐅᑕ ᐊᔅᒋᒡ, ᒥᒄ ᒋᔨᐛᐤ ᒋᑭ ᐛᐱᒥᓇᐛᐤ᙮ ᒋᑭ ᐱᒪᑎᓯᓇᐛᐤ ᑭᔭ ᒋᔨᐛᐤ, ᐛᔅ ᓂᔾ ᓂ ᐱᒪᑎᓯᓐ᙮ 20ᐃᔅᐱ ᒪᒃ ᐅᑎᒋᐱᔨᒐ ᐊᓐᑕ ᒐ ᐸᒋ ᓂᑐᐛᐱᒥᑎᑯᒡ ᐊᑯᑕ ᒐ ᓂᔅᑐᑎᒪᒄ ᐊ ᐱᒋᔅᑯᐅᒃ ᓄᑕᐎᔾ ᑭᔭ ᐊ ᐱᒋᔅᑯᐅᔭᒄ, ᑭᔭ ᐊ ᐱᒋᔅᑲᑎᑯᒡ᙮”
21“ᐊᓐ ᐊᐛᓐ ᒐ ᑕᑈᑎᒧᒂ ᑭᔭ ᒐ ᓂᓇᐃᑎᒧᒂ ᑕᓐ ᐊ ᐃᑎᓱᐛᔭᓐ ᐊᐅᒄ ᐊᓐ ᐊᐛᓐ ᑲ ᓴᒋᐃᑦ᙮ ᒋᑭ ᓴᒋᐊᐤ ᓄᑕᐎᔾ ᐊᓂᔭ ᐊᐛᔪᐛ ᑲ ᓴᒋᐃᔨᒋ, ᑭᔭ ᓂᔾ ᒪᒃ ᓂᑭ ᓴᒋᐊᐤ ᐊᓐ ᐊᐛᓐ ᑭᔭ ᓂᑭ ᐃᑐᑐᐛᐤ ᒐᒋ ᒥᔪ ᒋᔅᒐᔨᒥᑦ᙮”
22ᒍᑎᔅ, ᓇᒪᔭᐤ ᐊᓐ ᐃᔅᑲᕆᔭᑦ ᑲ ᐃᓯᓂᐧᑲᓱᑦ, ᒋ ᐃᑕᐤ, “ᐅᑎᐸᔨᒋᒐᐤ, ᒐᒂᓐ ᐛᒋ ᐎ ᐃᑐᑐᐅᔭᒡ ᓂᔭᓐ ᒐᒋ ᒥᔪ ᒋᔅᒐᔨᒥᑕᒡ, ᐊᑲ ᒪᒃ ᐎ ᐃᑐᑐᐅᑥᐤ ᑯᑎᑭᒡ ᐊᐛᓐᒋ ᒐᒋ ᒥᔪ ᒋᔅᒐᔨᒥᔅᒡ ?”
John 14.23-29 (Easter-6 Year C)
23ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᐊᓐ ᐊᐛᓐ ᑲ ᓴᒋᐃᑦ ᒋᑭ ᓂᓇᐃᑎᒻ ᓂᑦ ᐃᔨᒧᐅᓂᔪᐤ᙮ ᓄᑕᐎᔭ ᒋᑭ ᓴᒋᐃᑯᐤ᙮ ᑕᐱᔅᑯᓐ ᓄᑕᐎᔾ ᑭᔭ ᓂᔾ ᓂᑭ ᓂᑐᐛᐱᒪᓇᓐ ᑭᔭ ᒐ ᐎᒋᒥᒋᑦ᙮ 24ᐊᓐ ᐊᐛᓐ ᐊᑲ ᐸᒋ ᓴᒋᐃᑦ ᓇᒪ ᓂᓇᐃᑎᒻ ᓂᑦ ᐃᔨᒧᐅᓂᔪᐤ᙮ ᐅ ᑲ ᐃᓯ ᐸᑎᒪᒄ ᓇᒪ ᓂᔾ ᐊ ᑕᔭᓐ ᐅᒋᐱᔪᐤ ᒪᒃ ᓄᑕᐎᔾ ᐊ ᑕᑦ ᐅᒋᐱᔪᐤ, ᐊᓐ ᑲ ᐸᒋ ᐃᑎᓴᐅᑦ᙮”
25“ᐊᐅᒄ ᐅ ᐊ ᐃᓯ ᐎᑎᒪᑎᑯᒡ ᐊᔅᒄ ᒪᒂᒡ ᐊ ᑕᔭᓐ ᐅᑕ ᐊ ᑕᔭᒄ᙮ 26ᐊᓂᔭ ᑲ ᐸᔭᒋᓯᔨᒋ ᐊᒐᒂ ᓄᑕᐎᔾ ᒐ ᐸᒋ ᐃᑎᓴᐊᒪᑕᒄ ᓂᑦ ᐃᓯᓂᐧᑲᓱᐅᓂᒡ ᐅᒡ ᐊᐅᑯᓐ ᐊᓐ ᒥᓯᐛ ᒐᒂᔪᐤ ᒐ ᒋᔅᑯᑎᒪᑕᒄ ᑭᔭ ᒋᑭ ᒋᔅᒋᒥᑯᐛᐤ ᒥᓯᐛ ᒐᒂᔪᐤ ᑲ ᐃᓯ ᐎᑎᒪᑎᑯᒡ᙮”
27“ᒋ ᓂᑭᑎᒪᑎᓇᐛᐤ ᒋᔭᒪᔨᑎᒧᐅᓐ᙮ ᓂᔾ ᓂᒋᔭᒪᔨᑎᒧᐅᓐ ᒋ ᒥᔨᑎᓇᐛᐤ᙮ ᓇᒪ ᐅᑕ ᐊᔅᒋᒡ ᐊ ᐃᑕᔨᑕᒂᒡ ᒋᔭᒪᔨᑎᒧᐅᓐ ᒋ ᒥᔨᑎᓇᐛᐤ᙮ ᐊᑲᐎᔾ ᒪᒃ ᒥᑯᔅᑲᑕᔨᑎᒧᒄ ᑭᔭ ᐊᑲᐎᔾ ᑯᔅᑕᒋᒄ᙮”
28“ᔅᒋ ᐸᑐᐅᓇᐛᐤ ᑲ ᐃᑎᑎᑯᒡ, ‘ᒋᑭ ᓂᑭᑎᑎᓇᐛᐤ ᒥᒄ ᒪᒃ ᒥᓐ ᑲᐤ ᓂᑭ ᐸᒋ ᑎᑯᓯᓐ᙮’ ᒋ ᓴᒋᐃᔭᒄ ᒪᒃ ᒋᐸ ᒥᔽᔨᑕᓇᐛᐤ ᓄᑕᐎᔾ ᐊ ᑕᑦ ᐊ ᐃᑐᑕᔭᓐ, ᐛᔅ ᐎᔾ ᐃᐛᒃ ᓱᒐᔨᑕᑯᓱᐤ ᐃᔅᐱᔅ ᓂᔾ᙮ 29ᒥᓯᐛ ᒋ ᐎᑎᒪᑎᓇᐛᐤ ᐅ ᐊᔅᒄ ᐊᑲ ᐃᔅᐱᔨᒡ, ᑭᔭ ᐃᔅᐱ ᐃᔅᐱᔨᒐ ᒐ ᑕᑈᑎᒪᒄ᙮ 30ᓇᒪ ᓴᔅ ᓇᔅᒡ ᓇᐅᔅ ᒋᑭ ᒋ ᐃᔨᒥᐃᑎᓇᐛᐤ, ᐛᔅ ᒥᒋᒥᓂᑐᐤ, ᐊᓐ ᑲ ᑎᐸᔨᒋᒐᑦ ᐅᑕ ᐊᔅᒋᒡ ᓴᔅ ᐸᒋ ᑎᑯᓯᓄᐤ᙮ ᒥᒄ ᒪᒃ ᓇᒪ ᓇᔅᒡ ᓂᑭ ᒋ ᐅᒋᒪᐧᑲᑎᒄ᙮ 31ᒥᒄ ᒪᒃ ᐃᔪᒡ ᐅᑕ ᐊᔅᒋᒡ ᒋᐸ ᒋᔅᒐᔨᑎᒧᒡ ᐊ ᓴᒋᐃᒥᒋ ᐅᑕᐎᒪᐛ ᐊᐅᑯᓐ ᒪᒃ ᒧᔅ ᐛᒋ ᓂᓇᐃᑐᐅᒃ ᒥᓯᐛ ᑕᓐ ᐊ ᐃᑎᓱᒥᑦ᙮ ᐊᔅᑎᒧᒄ ᒪᒃ ᔅᑐᑕᑕᐤ᙮”
Šiuo metu pasirinkta:
ᒠᓐ 14: ᓇᔅᑲᐱ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada