यूहन्‍ना 21:15-17

चमैंइ चल् खाँबै लिउँइँ येशूजी सिमोन पत्रुसने “ओ यूहन्‍नाए च्ह सिमोन, क्हिइ ङने चुमैंइ भन्दा ल्हें म्हाँया लम्मा?” बिमा चइ खीने बिइ, “अँ प्रभु, ङइ क्हिलाइ म्हाँया लम् बिब क्हिजी सेइमुँ।” खीजी चने बिइ, “छ बिस्याँ ङए क्यु झजमैं चल् पिंन्।” येशूजी ङ्हिखेबै लारै या चने “ओ यूहन्‍नाए च्ह सिमोन, क्हिइ ङने म्हाँया लम्मा?” बिसि ङ्योएमा चइ खीने बिइ, “अँ प्रभु, ङइ क्हिलाइ म्हाँया लम् बिसि क्हिजी सेइमुँ।” खीजी चने बिइ, “छ बिस्याँ ङए क्युमैं छेनाले छैं लद्।” येशूजी सोंखेबै लारै या चने “ओ यूहन्‍नाए च्ह सिमोन, क्हिइ ङलाइ म्हाँया लम्मा?” बिसि ङ्योएमा पत्रुसए सैं च्योंब तयाइ तलेबिस्याँ येशूजी सोंखेबै लारै या चने “क्हिइ ङलाइ म्हाँया लम्मा?” बिसि ङ्योएइ। छतसि चइ खीने बिइ, “प्रभु, क्हिजी तोन्दोंरि ताँ सेइमुँ। ङइ क्हिलाइ म्हाँया लम् बिसि क्हिजी सेइमुँ।” छबिमा येशूजी चने “ङए क्युमैं चल् पिंन्,” बिइ।