Yohanna 9
9
Yesu Dàb Gbam Mpìr Afau
1Barà Yesu ri wam zu àdòníng, sai ku myàng mpìr zyun big mà sig ku zu bàna, ku í àfau. 2Yann sukàwá big bib ku n rag, “Malam, í bu pyìr ni sa síg nì, wà big mà sig ku í àfau níng rà? I bu pyìrwá rà, kó í bu pyìr tawá ma nàwá rà?”
3Yesu dinya big n rag, “Afau-à níng í jir bu pyìrwá kó bu tawá ma nàwá bàna. Ku í àfau, jirà Shìdun aku tìya mpìrká gbamwá. 4Ayi sa swàm-à ku swam bi sig mì ń sa níng, sai-à àyúnn-à dà sig ma áni, jir kai bàna zufi ri bi wà mpìr má sa sar fig rag swàm bàna. 5Sai-à mì ri shi á dunyaru, mì í àyar bu dunyaru.”
6Sai-à ku dang àdòníng, ku tu wìr sháng á jìnn ni, ku vù jànn àtag ma sháng-à níng, n pàb wàníng á zu-à ni. 7A byar-à hi, ku dinya wàníng rag, “A yag tu zuwú mà shar zàpìr-à ni bu Siluwam.” (Yìr zìnn-à níng í aswam). A byar-à hi, mpìr-à níng yag, n tu zuwá, n kàng bi ku ri myàng.
8Ayor luwá big ma mpìrká ká rì myàng sig ku sai-à ku rìi vig kyann bu níng, myàng ku àdòníng, n bib rag, “Wàníng í mpìr zyun-à rìi shi vig kyann bu níng bàna rà?”
9Mpìrká káhi dang rag, “I ku.” Káhi dang rag, “I ku bàna, zu rìg dìr.”
A byar-à hi, mpìr-à níng dang rag, “I mì!”
10Big bib ku rag, “A sa síg ashinn mi ri myàng tàma-à níng rà?”
11Ku dinya big rag, “I mpìr-à big ri bar Yesu níng vù jànn àtag n pàb á zumí ni, n dang rag ń yag mà zàpìr Siluwam ń tu zumí. A byar-à níng hi, barà ǹ yag tu zumí àdòníng, zumí í pù finn rìg-à.”
12Big bib ku rag, wàníng áni rà?
Ku dang rag, “N yì fig bàna.”
Farisawaká Bib Byann Jír á Shinn Mpìr-à Yesu Dàb Gbam Sig Níng
13Big zìg bi mpìr àfau-à níng mà byar Farisawaká ni. 14I àyúnn Asabar wà Yesu vù jànn àtag n pù zu mpìr-à níng ma kàhi. 15Farisawaká bib jakàng mpìr-à níng barà ku sa hár mi ri myàng tàma-à níng. Ku dinya big rag, “Wunù-à níng zìg jànn àtag, n pàb á zumí ni, ǹ yag tu zumí, í wà tàma-à níng mì ri myàng rag.”
16Farisawaká káhi dang rag, “Mpìr-à níng í mpìr Shìdun bàna, jir kai bàna ku wib fig àyúnn Asabar bàna.”
Ama káhi dang rag, “Sáshinn mpìr-à ma í mpìr bu pyìr má sa bu àdòníng rà?” Ayaubá ni, pìkyinnbá í gàb finn rìg-à.
17Farisawaká bib àfau-à níng n rag, “Barà ku pù finn rìghing zuwú níng, wá dang í kai á shinnwá ni rà?”
Ku zìm n rag, “Wàníng í wùn aswam Shìdun.”
18Yahudawaká zìm fig jír-à big ri dang rag, “Mpìr-à níng rì í àfau, ama tàma-à níng ku ri myàng rag ma zuwá níng” bàna. Sai big bar tawá ma nàwá, 19n bib big rag, “Wàníng í wùn ná zyun-à ning dang rag ning mà sig ku í àfau níng bàna rà? Ma sáshinn tàma-à níng ku ri myàng rag ma zuwá rà?”
20Tawá ma nàwá dang rag, “Yi yì hing wàníng í wùnyí, yi yì hing wà yi mà sig ku í àfau, 21ama tàma-à níng barà ku sa mi ri myàng níng, yi yì fig bàna, yi yì fig mpìr-à pù finn sig ku zuwá níng bàna tìnn. Ku wài gbam rìghing, aning bib ku aku dang ma nuwá.” 22Big dang àdòníng, jir kai bàna big ri shàr zinn Yahudawaká. Yahudawaká kwonn sig nubá rag, “Mpìr-à ma zìm hing rag Yesu í Almasihu, bá kan zu rìg ku á tonn bìr kwonn-à ni.” 23I bu-à sa nàwá ma tawá dang rag, “Ku wài gbam rìghing, aning bib ku.”
24A byar-à níng hi, big bar jakàng àfau-à níng, n dinya ku rag, “A dang jír àjai á pyànn Shìdun, jir kai bàna yi yì hing mpìr-à dàb gbam sig wù níng, í mpìr bu pyìr.”
25Afau-à níng dinya kàng big n rag, “Kó ku í mpìr bu pyìr, kó bàna rà, ǹ yì fig bàna. Bu-à ǹ yì sig bàna, wàrì níng mì ri myàng fig bàna, ama tàma-à níng, mì ri myàng kyàr.”
26Big bib ku rag, “Ku sa sig wù í kai rà? Ku pù sig zuwú hi áshinn rà?”
27Ku dinya big rag, “N nìm dinya hing ning, ning fig fig bàna. Bu-à sa ning ri zìm aning fig jakàng í jir kai rà? Kó ning ri zìm aning shi yann sukàwá tìnn rà?”
28Big swau ku n rag, “A shi síg nì wùn sukàwá, ama bigyí, yi í yann sukà Musa. 29Yi yì hing Shìdun dang hing jír ma Musa, ama mpìr-à níng, yi yì fig byar-à ku bi sig bàna.”
30Afau-à níng dang rag, “Jír-à níng í bu mamaki wà barà ning yì fig byar-à ku bi sig bàna, ama ku dàb gbam hing mì! 31Yi yì hing Shìdun ri fig fig jir mpìr bu pyìr bàna, ku ri fig jir mpìr-à ri wib ku mi ri sa bu-à ku ri zìm. 32Tun sai-à big màm jag sig dunyaru, yi fig fig tai zyun rag, mpìr pù finn rìghing zu mpìr-à big mà sig ku í àfau bàna. 33Mpìr-à níng bi sig mà byar Shìdun ni. Nìm ma í àdòníng bàna, ku nìm má sa yì fig bàna.”
34Big dinya ku n rag, “Big mà sig wù áyau bu pyìr, ama tàma-à níng wù ri tàg yi bu rà?” Big í kan zu rìg-à ku mà tonn bìr kwonn-à ni.
Mpìrká Fig Yì Fig Jir Shìdun Bàna Níng Shi Sig Aràg í Afau
35Barà Yesu fig àdòníng, ku yàn dìg wàníng n bib wàníng rag, “A bir hing pìkyinnwú á byar Wùn Mpìr Jíkwìnn rà?”
36Ku zìm n dang rag, “Shinn Lumí, á dinya mì mpìr-à níng hi, àjirà ń bir pìkyinnmí á byarwá ni.”
37Yesu dinya ku n rag, “A myàng rìghing ku, ku í mpìr-à ri dang jír ma wù níng.”
38I byar-à ku dang rag, “Shinn Lumí, ǹ bir hing pìkyinnmí áni.” Ku bi bìnn kir wann á jìnn ni, n wib Yesu.
39Yesu dang rag, “N bi sig á dunyaru àjirà ń wà kwonn. Ká ri myàng fig bàna níng, abig myàng. Ká ri myàng níng, abig shi àfau.”
40Farisawaká zyun-à shi sig ma ku níng, fig jírwá àdòníng, big bib ku n rag, “Asai yi í àfau rà?”
41Yesu dinya big rag, “Wà ning nìm má àfau, big nìm má dang fig rag, ning shi sig ma bu pyìr bàna. Ama tàma-à níng, ning rag ning ri myàng, í bu-à sa ning shi sig á bu pyìrná ni.”
Šiuo metu pasirinkta:
Yohanna 9: Jib
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1996, Wycliffe Bible Translators, Inc., All rights reserved.