នាវនតើម 18

1ជេសរីឞ្រាសយេហោវាតឹមមពើលអ៝ន់មាអាឞ្រាហាម់ ឆៃតៃតាតើមជ្រីមាម់រេរី ទោលអាឞ្រាហាម់ គុតាឞោកមពោងចូនពាង់នើមរី នោកនារងក្លាងឞោក។ 2ជេសរីអាឞ្រាហាម់ ងើកឆៃឞូនុយ្សពែនុយ្សទ៝ក់ឞើសនាប់ពាង់រី។ ត៝ត់មាឆៃខាន់ពាង់ ពាង់ញច្វាត់ឞើសមពោងចូនពាង់នើមនៃហាន់រានអាខាន់ពាង់ពាន់អានែសឆូ តឹងនាវវៃអោបអ្វែសលាង់មាកោរាញ។#ហេឞ ១៣:២ 3ជេសរីពាង់លាស៖ “អើកោរាញ លាសខាន់មៃរ៝ង់មាគ៝ប់ងាន់ ទាន់ប៝ត់ហ៝ៈអោសនហ៝តឞើសគ៝ប់ជេងឞូនុយ្សតាន៝ម់ខាន់មៃ។ 4អ៝ន់គ៝ប់ដាៈឞូឆ៝ៈទាកដេៈមារាវជ៝ង់ខាន់មៃ ទាន់ខាន់មៃគុរាលូតាន៝ម់តើមឆីអ្យាប៝ត់។ 5គ៝ប់ហាន់ឆ៝ៈនទើឆោងឆាដេៈដាៈខាន់មរែមាឆោង មាគែសឆ្វានខាន់មៃមាហាន់ជឹតនាប់ជឹត លែៈខាន់មៃមាត៝ត់តានតុកគ៝ប់អ្យា”។ ជេសរីពែនុយ្សខាន់ពាង់នៃលាសមាពាង់៖ “ជានហ៝ម់កើតនាវមៃលាសរី”។ 6ជេសរីអាឞ្រាហាម់ ហាន់តាចូនរីរ៝ មឞើសមាឆារាអីអូរពាង់នើម៖ “អៃឆ៝ៈរានីសមោយពែប្វាត់ ម៝នជាននុមពាង់អ៝ន់គើញអ៝យ”។ 7អាឞ្រាហាម់ នើមរីហាន់ញច្វាត់តាផូងមពោមពា(ឆ្យុម)ជ៝យទូមល៝ម់ក៝ននទ្រោកលៃអ្វែសងាន់ អ៝ន់ឞូនុយ្សជានការមាពាង់ទូហ្វេជាន ឞូនុយ្សជានការអីនៃឆ៝ៈជានរ៝។ 8ជេសរីអាឞ្រាហាម់ ឆ៝ៈងីទាកត៝សនទ្រោក ឆ៝ៈទាកត៝សនទ្រោក នទ្រែលមាឆ៝ៈព្វាច់ក៝ននទ្រោកអីឞូជានត្រាវរីនើស លែវអ៝ន់តានាប់មពោលពែនុយ្សនៃឆោងឆា។ ជេសរីខាន់ពាង់អីនៃឆោងឆា អាឞ្រាហាម់ នើមរីហោមគុនទ្រែល មាឆើមឆ៝ៈនទើឆោងឆាមាខាន់ពាង់តាន៝ម់តើមឆីរីដ៝ង់។

9ជេសរីមពោលពែនុយ្សនៃអោបអាឞ្រាហាម់ ៖ “អាសឆារាអូរមៃនៃ?” អាឞ្រាហាម់ អើសមាខាន់ពាង់៖ “ពាង់គុអាត្រោមចូនត៝”។ 10ជេសរីឞ្រាសយេហោវាលាសមាអាឞ្រាហាម់ ៖ “នាម់ជឹតនាប់ក្លាប់លាសតាខៃអ្យាដ៝ង់ ហេនហាន់ម៝ប់មៃទូតឹតៃជឹត តានោករីតៃឆារាលែៈគែសទូមល៝ម់ក៝នឞូក្លោ”។ ឆារាគុអ្យាត់តាង់នាវខាន់ពាង់ងើយតាឞោកមពោងឞើសកើយអាឞ្រាហាម់ រី។#១៧:១៧; ២១:៣, ៦-៧; រម ៩:៩ 11អាឞ្រាហាម់ នទ្រែលមាឆារាលែៈរាញៗងាន់ ឆារាលែៈឞាសគែសឆាក់ដ៝ង់។ 12នទ្រីឆារាគើមលាសអេងតានូយ្សនហ៝ម់រី៖ “ឆាក់លែៈរាញទាសអ្យាជេស ល៝ង់ឆាយគ៝ប់លែៈរាញងាន់ដ៝ង់ គ៝ប់អើមហោមរ៝ង់មានាវមអាកលាស?”#១ពេ ៣:៦ 13ឞ្រាសយេហោវាលាសមាអាឞ្រាហាម់ ៖ “មើមទឹងឆារាគើម? នអ៝ប់មាលាស «គ៝ប់លែៈរាញងាន់អើមហោមគែសក៝នលាស?» 14អើមគែសលាសនទើឞ្រាសយេហោវាជានមោឞ្លាវ? ត៝ត់អាប់ខៃរីតៃហេនហាន់ម៝ប់តៃមៃ នោកនៃឆារាគែសទូហ្វេក៝នឞូក្លោ”។#២១:១; យោប ៤២:២; លក ១:៣៧ 15យើនមាឆារារាលាច់លាស៖ “មោអោស គ៝ប់មោអោសព្រ៝តគើម” ទឹងពាង់លាសកើតនៃ យ៝រលាសពាង់លែៈក្លាច។ ឞ្រាសយេហោវាលាសមាពាង់៖ “មោអោស អៃលែៈគើមងាន់”។

16ជេសរីពែនុយ្សខាន់ពាង់នៃទ៝ក់ហាន់ ខាន់ពាង់ងគឹលអ្វាញ់ជឹតប៝នឆោដុមរី អាឞ្រាហាម់ ហាន់នទ្រែលដ៝ង់គៃមាញជុនខាន់ពាង់នៃ។ 17នោកនៃឞ្រាសយេហោវាលាស៖ “នាវគ៝ប់នទ្រាប់អុចជានអ្យា គ៝ប់មោអោសម៝មាអាឞ្រាហាម់ 18យ៝រលាសអាឞ្រាហាម់ តៃជេងឞឹមាទូផូងឞ្រីទាកអីទុតក្វ៝ង់ នអ៝ប់មាគែសនាវទើយដ៝ង់ លែៈរាងោចឞ្រីទាកតានែសនតូអ្យាមរាឆ៝ៈទើននាវគែសជេងតាៈឞើសពាង់ទាទេ។#១២:៣ 19លែៈគ៝ប់កើយ្សជេសពាង់គៃមាអ៝ន់ពាង់នតុមនតីក៝នឞូក្លោពាង់ នទ្រែលមាត៝ត់ក៝នត៝ត់ឆៅពាង់ឞើសកើយឞើសកើយតៃ អ៝ន់ញអោតន៝ប់ត្រ៝ងឞ្រាសយេហោវា គៃមាគុងាវតឹមទី នទ្រែលមាអ៝ន់ឆ៝ង់។ លាសក៝នឆៅពាង់ជានកើតនអាងាន់ គ៝ប់ជានទឹងលែៈនាវគ៝ប់ត៝នមាពាង់”។

20ជេសរីឞ្រាសយេហោវាលាស៖ “យ៝រលាសនាវឞូលាសមាប៝នឆោដុម នទ្រែលមាប៝នកោមោរាលែៈហោងាន់ឞូនុយ្សតាប៝ននៃជានតីសទុតអ៝ក់ដ៝ង់។ 21លាសនទ្រីគ៝ប់អុចហាន់ជុរអ្វាញ់ គៃមាគឹតនាវឞូជានតានៃជេងទីកើតនាវគ៝ប់លែៈតាង់លាសមោ។ លាសមោងាន់គ៝ប់អុចគឹតដ៝ង់”។ 22ជេសរីឞារហៃហាន់រាប៝ង់ជឹតប៝នឆោដុមរី។ អាឞ្រាហាម់ រីហោមទ៝ក់នទ្រែលមាឞ្រាសយេហោវាតារីដ៝ង់។ 23អាឞ្រាហាម់ ហាន់ទាច់អោបឞ្រាសយេហោវា៖ “អើមមៃលើសលើយងាន់លាស ឞូនុយ្សឆ៝ង់ នទ្រែលមាឞូនុយ្សតីស?#នក ១៦:២២; អេឆា ៦៥:៨ 24លាសគែស ៥០ នុយ្សឞូនុយ្សឆ៝ង់គុតាប៝នអីនៃ អាសមៃលើសលើយដ៝ង់ប៝នអីនៃបាស? លាសនទ្រីមៃមោយោៈមាប៝នអីនៃយ៝រមាគែសឞូនុយ្សឆ៝ង់ ៥០ នុយ្សគុតាប៝នអីនៃ? 25លាសមៃលើសកើតនៃ ជេងលើសលើយឞូនុយ្សឆ៝ង់នទ្រែលមាឞូនុយ្សតីសមោជេងវាៈ លាសលើសកើតនៃមៃហោមតេៈទោយ្សឞូនុយ្សឆ៝ង់ជេងតឹមឞានមាឞូនុយ្សតីស មោជេងវាៈ។ ជានកើតនៃអើមទីកោរាញផាតទោយ្សមាលែៈរាងោចនែសនតូលាស?” 26ជេសរីឞ្រាសយេហោវាលាស៖ “លាសគ៝ប់ឆៃគែស ៥០ នុយ្សឞូនុយ្សឆ៝ង់គុតាប៝នឆោដុមនៃ គ៝ប់មោលើសអោស គ៝ប់យោៈមាប៝នអីនៃយ៝រមាឞូនុយ្ស ៥០ នុយ្សអីនៃ”។ 27អាឞ្រាហាម់ ងើយមាឞ្រាសយេហោវាជឹត៖ “គ៝ប់អ្យាជេងនែសមោយ នទ្រែលមាអុញឞុសទើមមោគែសនាវខ្លៃ ទាន់មៃលើយក្លាប់នទាង់នាវតីសគ៝ប់ហោមងើយជឹតមាមៃអ្យា។ 28លាសតាប៝នអីនៃមោអោសត៝ត់ ៥០ នុយ្ស គែស ៤៥ នុយ្សទើម លាសនទ្រីមៃលើសប៝ននៃយ៝រមាហោមអែព្រាម់នុយ្សអេហ៝ៈរឹងនៃឞើស?” ពាង់អើស៖ “លាសគ៝ប់ឆៃគែស ៤៥ នុយ្សឞូនុយ្សឆ៝ង់ គ៝ប់មោលើសអោស”។ 29អាឞ្រាហាម់ ងើយតៃមាឞ្រាសយេហោវា៖ “ក្លាប់លាសគែស ៤០ នុយ្សទើម”។ ពាង់លាស៖ “គ៝ប់មោលើសអោស យ៝រមាផូង ៤០ នុយ្សនៃ”។ 30អាឞ្រាហាម់ ងើយជឹត៖ “ទាន់មៃលើយជីនូយ្សមាគ៝ប់ គ៝ប់ទាន់ងើយមាមៃទូតឹជឹត។ ក្លាប់លាសគែស ៣០ នុយ្សទើម”។ ពាង់លាស៖ “លាសគ៝ប់ឆៃគែស ៣០ នុយ្ស គ៝ប់មោលើសអោស”។ 31អាឞ្រាហាម់ ងើយជឹត៖ “ទាន់មៃលើយក្លាប់នទាង់នាវគ៝ប់ហោមងើយនទ្រែលមៃអ្យា ក្លាប់លាសគែស ២០ នុយ្សទើម”។ ពាង់លាស៖ “គ៝ប់មោលើសអោស យ៝រមាផូង ២០ នុយ្សនៃ”។ 32អាឞ្រាហាម់ ងើយជឹត៖ “ទាន់កោរាញឞ្រាសលើយជីនូយ្សមាគ៝ប់ គ៝ប់ទាន់ងើយហោមទូតឹអ្យាទើម។ ក្លាប់លាសគែសជឹតនុយ្សទើម”។ ពាង់លាស៖ “គ៝ប់មោលើសអោស យ៝រមាផូងជឹតនុយ្សនៃ”។#យេរ ៥:១ 33ជេសលែៈផ្យៅឞ្រាសយេហោវាងើយនទ្រែលអាឞ្រាហាម់ រី ពាង់ហាន់យ៝តក្ល៝ក់ឞើសនតុកនៃ ជេសរីអាឞ្រាហាម់ ព្លឹឆឹតតៃតាចូនពាង់នើម។

Populiarios Biblijos eilutės iš
នាវនតើម 18

Biblija:

Bunong

Versija: Bunong - cmoK