Lucas 24
24
Ó xechón Jesús
(Mt. 28:1-10; Mr. 16:1-8; Jn. 20:1-10)
1Imá nchítjen ti ña̱o domingo, mé ti ña̱o xránkíxixín semana, ti chojnichjin la xíkjan sin ínaá ti tsíxravá Jesús la sákjuíko sin xro̱a̱n xraxé tsíkjichꞌéna sin la ko íso chojnichjin sákjuikotoxi̱n sin. 2Ndá ti ó kjuíji sin ntiha kꞌuíkon sin kixin ti ixro̱ tsíkjèxín ti tòye̱ la í xi̱kahña itjen ti sákjuí sin. 3Ndá kꞌuíxehen sin tòye̱ la kꞌuitjahya sin cuerpo kuènté Ìnchéni Jesús. 4Ndá chrakon sin la noehña sin nkehe sichꞌe sin. Ndá xrína̱hña kꞌuíkon sin yaá chojnindoa tjejóxin to̱té chjinaxón ti tjejó sin, la iké sin la tjáki̱ni tsjehe. 5A̱ndá ti chojnichjin kꞌuisén sin tjejótsjehe sin nonte kixin imá chrákon sin, a̱ndá ti chojnindoa ndáchro sin:
―¿Nkekuènté xritjéyára ti nkexro tjechón ti siín ti sin tsíkꞌen? 6#Mt. 16:21; 17:22, 23; 20:18, 19; Mr. 8:31; 9:31; 10:33, 34; Lc. 9:22; 18:31-33.*Tjenhña ntihi, ó xechón chꞌan. Xráxinkaonra nkehe ndáchro chꞌan ti kjuákꞌe chꞌan nonte Galilea 7ndáchro kixin jehe ti Xje̱en Díos kꞌóna Chojni ticháxi̱n tsotsé ti sin chónta ijie̱ tsja̱kꞌe̱nka̱ni sin ntacruz la ko ti níxin ña̱o tsoxechón chꞌan ínaá ―ichro sin.
8Landá ti síchjin xráxinkaon sin kixin nkexrín tsíchronka Jesús, 9ndá ti ó kja̱nxi̱n sin ti tsíxravá chꞌan la chenka sin ti tejnko ti sin kuékꞌajiko chꞌan la ko kaín ti íso sin. 10La ti sin sákjuichenka ti sin apóstol la mé tjan María Magdalena la tjan Juana la tjan María ìñé Jacobo la ko ti íso chojnichjin. 11A̱ndá ti sin apóstol kuíhin sin éxi ijnko nkehe chaxínhña ti nkehe chrónka ti sin a, ndá kuítekakonhña sin.
12Kjánchó chꞌin Pedro kꞌuaxrjexín nchia tinká sákjuitsjehe ti tsíkji̱xravá Jesús. Ndá ti kjuíji la tsjehe chꞌan ti nkaxehen ti tòye̱ la kꞌuíkon kixin jehó ti ika tsíkꞌisimá Jesús ntiha itjen. Ndá ikjan chꞌan ti nchia la chrákon chꞌan kixin xi̱kaha tsíkóhen.
Ti nti̱a Emaús sákjuí sin la kjuíjichréhe̱ Ìnchéni
(Mr. 16:12-13)
13A̱ndá ti ña̱o a mé yaá sin sákjuí sin ijnko chjasin itꞌin Emaús, la tíha mé tejnko kilómetro kjínxi̱n ti itjen Jerusalén, 14la tinkákjo sin kícho sin kaín ti nkehe tsíkóhen Jerusalén. 15A̱ndá na̱xa̱ tinkákjo sin, la chꞌin Jesús kóchjinehe ti jehe sin la sákjuíko sin chꞌan. 16La kjuatso̱anhña sin chꞌan kixin kjuajonhña Díos kjuachaxin. 17A̱ndá chꞌin Jesús kjuanchankíhi chꞌan sin ndáchro chꞌan:
―¿Nkehe ti tinkakjóra ti kꞌuinkara nti̱a? ¿Nkekuènté kixin tꞌavára? ―ichro chꞌan.
18A̱ndá ijnko ti jehe sin mé itꞌin Cleofas, mé kjuáte̱he, ndáchro:
―Kaín chojni ó nohe nkehe tsíkóhen Jerusalén la jaha kja̱xin kjuákꞌe ntiha la, ¿á jahuá ti noahña nkehe tsíkóhen ntiha ní? ―ichro chꞌan.
19A̱ndá chꞌin Jesús kjuanchankí:
―¿Xá nkehe tsíkóhen?
Ndá jehe sin chrónka sin:
―Ti nkehe tsíkóhen chꞌin Jesús tsíkji̱xi̱n Nazaret. Jehe chꞌan la ijnko nkexro kꞌuéchronka itén Díos, la kjua̱ko̱xi̱n chꞌan ti kjuachaxin kuènté Díos kaín ti nkehe kꞌuékjichꞌe chꞌan la ko kaín ti nkehe kꞌuéchronka chꞌan nkayakon Díos la ko kaín chojni. 20A̱ndá ti ncha̱tꞌá tꞌe̱to̱an la ko ti sin tꞌe̱to̱an chjasin la kjuínchekꞌayéhe̱ sin ti nkexro a ti sin romanos kixin itsꞌen chꞌan la tsjakꞌenkáni chꞌan ijnko ntacruz. 21A̱ndá jeheni kꞌuejóchóheni kixin jehe chꞌan chrókjuinchekaá chꞌan ti sin Israel. Landá ijie ó itji iní ña̱o xi̱kaha kóhen. 22A̱ndá iso ti chojnichjin kja̱xin kꞌuéchréhe̱ sin chꞌin Jesús mé kjuínchechrákon sin ti jeheni kixin jehe sin tsíkjitsjehe sin ti tsíxravá chꞌan imá nchítjen 23la tsíkꞌitjahya sin ti cuerpo kuènté chꞌan, ndá ikjan sin chrónka sin kixin tsíkꞌikon sin yaá sin ángel tsíchrónka kixin chꞌin Jesús la tjechón chꞌan, ichro sin. 24Ndá tuénxín yaá ti sin kꞌuájikoni kja̱xin sákjui̱tsjehe sin ti tsíxravá chꞌin Jesús la kꞌuíkon sin éxi tsíchronka ti chojnichjin, kjánchó chꞌin Jesús la kꞌuíkonhña sin ―ichro ti yaá sin a.
25Ndá kjuáte̱he chꞌin Jesús ndáchro:
―Lo̱nti̱ra jahara; tjokahya kuitekáonra ti nkehe kꞌuéchronka ti sin profeta kꞌuejó ósé. 26¿Xá ticháxi̱nhña chrókjuasóte Cristo senó ndá chrókꞌuáyéhe̱ ti kjuachaxin chrókꞌue̱to̱an ní? ―ichro chꞌin Jesús.
27Ndá kjuankíxin chrónka chꞌan nkexrín tꞌaxrjexín kaín ti nkehe nixja ti xroon itén Díos kixin nkehe tso̱hen ti jehe chꞌan la kjuankíxixín chꞌan chrónka chꞌan kaín ti nkehe tsíkjin chꞌin Moisés la ko kjuintaxín chrónka chꞌan ti nkehe tsíkjin ti íso sin profeta.
28Ndá ti ó kjuíji sin ti chjasin, la chꞌin Jesús tsjehe éxi na̱xa̱ sáchrokjui ikjín. 29A̱ndá jehe sin mé chrónoéhe̱ sin chꞌan kixin ntahó chrókuíto̱he chꞌan, ndáchro sin:
―Tito̱ha ntihó tsꞌejóni kixin ó ndá kóntó la ó tsꞌixitie ―ichro sin.
Ndá chꞌin Jesús kꞌuíxehen ti nchia la kuito̱eko sin chꞌan. 30A̱ndá ti ó kꞌuejótja̱xi̱n sin sinie sin, la chꞌin Jesús kuákja ti nio̱tja̱ la chjéhe kjuasáya Díos la kóchrítꞌo̱ chꞌan kuákja sin. 31Ndá kjuátso̱an sin ti jehe chꞌan, kjánchó chꞌin Jesús la tuénxín kꞌuitjáñakoa chꞌan. 32Ndá jehe sin ikjo kícho sin, ndáchro sin:
―¿Á chaxínhña chéhe̱ a̱séni ti kjui̱ka̱oni chꞌan nti̱a la chrónkaxín chꞌan nkehe tꞌaxrjexín ti itén Díos tsíkjin sin ósé? ―ichro sin.
33Ndá tuénxín kꞌuínkatjen sin la ikjan sin Jerusalén la ntiha kꞌuitja sin ti tejnko sin nkoko̱a tjejó sin la ko ti íso sin a. 34A̱ndá ti sin tjejó ntiha la ndáchro sin:
―Chaxín ó xechón Ìnchéni tsíkꞌikon chꞌin Simón ―ichro sin.
35Ndá jehe sin kja̱xin sin chrónka sin ti nkehe tsíkóhen ti nti̱a sákjuí sin la nkexrín kjuátso̱anxín sin Jesús ti ó kóchrítꞌo̱ chꞌan ti nio̱tja̱ la kjuajon chꞌan.
Titàya̱ kꞌuikuén sin ikui Jesús
(Mt. 28:16-20; Mr. 16:14-18; Jn. 20:19-23)
36Ndá jehe sin na̱xa̱ tjejótjo sin kaín ti nkehe tsíkóhen, landá xrína̱hña chꞌin Jesús kjuákꞌe nko̱siñe ti tjejó sin, nixje̱he̱ ti jehe sin ndáchro:
―¿Á kjuaxróxin tjejora?
37A̱ndá jehe sin la imá chrákon sin kjuénka̱yáxin sin kixin kꞌuíkon sin ijnko xri̱nto̱e chojni.
―Áchꞌe kjuachani ―ichro sin.
38A̱ndá ndáche chꞌin Jesús ti jehe sin:
―¿Nkekuènté chrakonra? ¿Nkekuènté xi̱kaha tjenka̱yáxin a̱sánra? 39Tsjehéra tjaná la ko to̱téná kixin chaxín janhan. Itse̱rana la ko komárana, kixin ijnko xri̱nto̱e chojni chóntahya into la ko chóntahya hueso éxi tꞌikonra kixin chonta janhan ―ichro chꞌin Jesús.
40Mé xi̱kaha ichro ndá kjuako itja la ko to̱té. 41Ndá kjónté xi̱kaha kꞌuíkon sin la na̱xa̱ kuítekakonhña sin kixin chéhe̱ sin la ko chrákon sin. Landá chꞌin Jesús ndáchro chꞌan:
―¿Á chontara nkojín nkehe sinieni ntihi ní?
42Ndá chjéhe sin chꞌan itꞌo̱ koche tsíchjátaón xrohi la ko ijnko itꞌo̱ katjé kotsje̱nta tjiá itsje̱n. 43Ndá chꞌin Jesús kuákja kjónie la kꞌuíkonxín ikon sin. 44Landá ndáchro chꞌin Jesús:
―Kaín ti nkehe kꞌuatsínka ti janhan mé kꞌuéndáxrja̱n ti na̱xa̱ kuékꞌejóni senó; kixin ticháxi̱n tsoxiteyá kaín ti nkehe chronka ti ley tsíkjin Moisés la ko ti nkehe tsíkjin ti sin profeta la ko ti nkehe ndáchro ti salmo kixin nkexrín tso̱na janhan ―ichro chꞌin Jesús.
45Ndá kjuajon chꞌan kjuachaxin kixin tsienxín sin ti xroon itén Díos tsíkjin sin ósé. 46Ndá ndáchro chꞌan:
―Mé xi̱kaha nixja ti xroon itén Díos kixin ti Cristo la ticháxi̱n itsꞌen, la níxin ña̱o la tsoxechón. 47A̱ndá tsja̱ko̱xi̱n sin ihni̱é chꞌan tsjankíxixín sin chjasin Jerusalén la ko chrókuihin chojni kuenté chjasintajni kixin chrókuíto̱he sin iji̱é sin, chrókuitekaon sin ti jehe kixin jehe chꞌan mé chrókjua̱tse̱n chꞌan ti iji̱é sin. 48A̱ndá jahara mé tso̱chro̱nkaxínra kixin xi̱kaha kꞌuíkonra kaín tíha. 49#Hch. 1:4.*Ndá tsochrꞌan janhan ti Ncha̱kuén Tꞌaná éxi tsíndáchro chꞌan. Kjánchó chjasin Jerusalén ntahó tito̱hara tsoxiteyájia tsꞌayéhéra kjuachaxin tsi̱xi̱n nkaya nka̱jní.
Jesús sákjui̱ nkaya nka̱jní
(Mr. 16:19-20)
50 #
Hch. 1:9-11. *A̱ndá chꞌin Jesús sákjuíko sin la kꞌuaxrjexín sin chjasin Jerusalén sákjuí sin chjasin Betania. Ndá kjua̱ya̱ itja chꞌan kjuíncheñao ti jehe sin. 51A̱ndá kjuixin kjuíncheñao chꞌan sin ndá kꞌuaxrjenta chꞌan ndá sákjui̱ nkaya nka̱jní. 52A̱ndá jehe sin kꞌuíkon sin xi̱kaha, a̱ndá kjuikosáyehe sin chꞌan, ndá ikjan sin chjasin Jerusalén la imá chéhe̱ sin. 53A̱ndá kaín ña̱o tjejó sin nkaxehen ni̱nko chjéhe sin Díos kjuasáya. Mé xi̱kaha tso̱hen.
Šiuo metu pasirinkta:
Lucas 24: poeNTplus
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2016, Wycliffe Bible Translators, Inc. All rights reserved.