Lukas 24
24
Yexus Sawv Hauv Qhovtuag Rov Los
(Mathais 28:1-10; Malakaus 16:1-8; Yauhas 20:1-10)
1Hnubkaj thaum kajntug txoog, cov pojniam txawm nqa tej tshuaj tswqab uas lawv twb npaj tau lawm coj mus tom lub qhovntxa. 2Lawv pom daim lagzeb uas npog lub rooj ntxas twb dov rau ibcag lawm, 3lawv txawm nkag mus rau hauv, tiamsis tsis pom Tswv Yexus lub cev lawm. 4Thaum lawv tseem xav tsis thoob txog tej no, tamsim ntawd muaj ob tug txivneej uas hnav ristsho ci ntsa-iab los sawv ntawm lawv ib sab. 5Cov pojniam ntawd ntshai kawg li, lawv thiaj nyo taubhau rau hauv av, tiamsis ob tug txivneej ntawd hais rau lawv tias, “Ua licas nej thiaj nrhiav tus neeg ciaj hauv cov neeg tuag? 6Nws tsis nyob ntawm no; Nws twb sawv los lawm! Ncontsoov tej lus uas Nws tau hais rau nej thaum Nws tseem nyob rau pem Kalilais: #Math 16:21; 17:22-23; 20:18-19; Malak 8:31; 9:31; 10:33-34; Lukas 9:22; 18:31-33 7‘Neeg Leejtub yuav raug ntes coj mus rau cov neeg txhaum muab ntsia rau saum ntoo khaublig, thiab hnub thib peb, Nws yuav sawv rovqab los.’ ”
8Cov pojniam ntawd txawm ncodheev txog Yexus tej lus, 9ces lawv thiaj tawm hauv lub qhovntxa rov los qhia tej ntawd rau kaum-ib tug thwjtim thiab rau txhua tus uas nrog lawv nyob. 10Cov pojniam uas piav tej xwmtxheej no rau cov timthawj yog Malis Madalas, Yau-aanas, Malis uas yog Yakaunpaus niam, thiab lwmtus pojniam uas nrog lawv nyob ntawd. 11Tiamsis cov timthawj xav tias tej uas cov pojniam ntawd hais tsis muaj qabhau dabtsi, lawv thiaj tsis ntseeg cov pojniam ntawd. 12Tiamsis Petus ciali sawvtsees khiav mus rau tom lub qhovntxa; nws khoov ntshis mus xauj, uaciav tsis pom dabtsi li, tsuas pom cov ntaub uas qhwv Yexus lub cev nyob hauv xwb. Ces nws txawm rovqab los tsev thiab xav tsis thoob rau tej uas nws pom ntawd.#24:12: Tej phau ntawv qub uas xuas tes sau, tsis muaj nqe 12.
Taug Kev Mus Pem Lub Zos Ema-us
(Malakaus 16:12-13)
13Tibhnub ntawd muaj ob tug thwjtim tabtom taug kev mus rau pem lub zos Ema-us uas nyob nrug deb ntawm lub nroog Yeluxalees kwvlam li 11 kilumev. 14Nkawd tseem tabtom sibtham txog tej xwmtxheej uas tau muaj los. 15Thaum nkawd tseem sibtham thiab sibnug, Yexus txawm txav zog los nrog nkawd taug kev; 16nkawd yeej pom Nws, tiamsis xyov yog uacas nkawd cim tsis tau Nws li. 17Yexus nug nkawd hais tias, “Neb pheej tham txog dabtsi taug kev?”
Nkawd txawm nres ua ntsejmuag mluasmlob. 18Muaj ib tug uas hu ua Khle-upas, txawm nug Yexus hais tias, “Tshuav koj tibleeg uas nyob hauv lub nroog Yeluxalees no thiajli tsis tau paub txog tej xwm uas nyuamqhuav muaj tau ob-peb hnubno xwb lov?”
19Yexus nug hais tias, “Tej ntawd yog dabtsi?”
Nkawd teb tias, “Tej ntawd yog tej xwm uas tau los raug rau Yexus uas yog neeg Naxalev ntag. Nws yog ib tug xibhwb cev Vajtswv lus; Vajtswv thiab tej neeg sawvdaws puavleej pom tias Nws tej lus muaj hwjchim thiab Nws ua tau tej txujci tseemceeb. 20Peb cov thawj povthawj hlob thiab cov nomtswv tau muab Nws rautxim tuag, thiab muab Nws ntsia rau saum ntoo khaublig. 21Peb twb ciasiab hais tias Nws yog tus uas yuav los tso cov Yixalayees ntag! Tsis tas li ntawd xwb, tej xwm ntawd twb muaj tau peb hnub rau hnubno lawm.
22“Cov pojniam uas nyob rau hauv peb pab, muaj qeeleej tau ua rau peb xav tsis thoob li; thaum kajntug txoog lawv mus rau tom lub qhovntxa, 23tiamsis lawv tsis pom Yexus lub cev lawm. Lawv rov los qhia rau peb hais tias lawv tau pom timtswv ceebtsheej, thiab cov timtswv ntawd tau qhia rau lawv hais tias Yexus twb rov muaj sia lawm. 24Peb cov phoojywg muaj qeeleej tau mus saib kiag lub qhovntxa thiab pom tias yeej muaj rawsli cov pojniam ntawd hais tiag, tiamsis lawv tsis pom Yexus.”
25Ces Yexus hais rau nkawd tias, “Uacas neb yuav ruam ualuaj li, thiab uacas neb tsis ntseeg tej uas cov xibhwb cev Vajtswv lus tau qhia tseg lawm! 26Puas yog tus Mexiyas yeej yuavtsum raug tsimtxom thiab tomqab ntawd, Nws yuav tau txais tus tshwjchim uas ci ntsa-iab?” 27Yexus txawm qhia txog tej uas Vajtswv tej Lus tau hais txog Nws tuskheej, pib ntawm cov phau ntawv uas Mauxes sau thiab tej uas cov xibhwb cev Vajtswv lus txhua tus tau sau tseg lawm.
28Thaum lawv mus ze lub zos uas lawv yuav mus ntawd, Yexus txawm uatxuj ua li uas Nws yuav mus kom dhau plaws. 29Tiamsis nkawd cheem heev-heev hais tias, “Koj ciali nrog wb so ntawm no xwb, rauqhov twb yuav tsausntuj.” Ces Yexus thiaj mus nrog nkawd so. 30Thaum Yexus nrog nkawd nyob noj mov ntawm rooj, Nws muab ib lub ncuav los ua Vajtswv tsaug thiab muab faib rau nkawd noj. 31Thaum ntawd, nkawd lub qhovmuag txawm pomkev tseeb tuaj lawm, nkawd thiaj paub tias yog Yexus, tiamsis Yexus ciali ploj ntais ntawm nkawd qhovmuag mus lawm. 32Nkawd mamli sibtham hais tias, “Thaum peb taug kev tuaj, Nws nrog wb tham thiab piav Vajtswv tej Lus rau wb mloog, mas yeej ua rau wb lub siab kublug cuag li hluavtaws hlawv xwb puas yog?”
33Ces nkawd txawm sawvtsees tamsim ntawd rovqab mus rau nram lub nroog Yeluxalees. Nkawd mus nrhiav tau kaum-ib tug thwjtim thiab lwmtus uas tuaj nyob uake rau ntawd, 34lawv tseem tabtom sibtham hais tias, “Tus Tswv twb sawv rov los lawm tiag-tiag li! Nws twb los tshwm rau Ximoos pom lawm!”
35Nkawd thiajli piav rau lawv mloog hais tias thaum nkawd taug kev mus ntawd muaj dabtsi tshwmsim, thiab thaum Yexus muab ncuav ntais faib rau nkawd noj, nkawd mam paub tias yog Yexus tiag.
Yexus Los Tshwm Rau Nws Cov Thwjtim Pom
(Mathais 28:16-20; Malakaus 16:14-18; Yauhas 20:19-23; Tes Haujlwm 1:6-8)
36Thaum nkawd tseem tabtom piav txog tej no, tamsim ntawd tus Tswv txawm los sawv hauv plawv ntawm lawv thiab hais rau lawv tias, “Thov kom nej tau zoo nyob kajsiab lug.”#24:36: Tej phau ntawv qub uas xuas tes sau, tsis muaj thiab hais rau lawv tias, “Thov kom nej tau zoo nyob kajsiab lug.”
37Lawv poobsiab thiab ntshai kawg, lawv xav tias yog lawv pom dab. 38Tiamsis Yexus hais rau lawv tias, “Nej ntshai ua dabtsi? Uacas nej lub siab tseem ua xyemxyav thiab? 39Nej ciali saib Kuv txhais tes thiab Kuv txhais kotaw, nej thiajli paub tias yog Kuv tiag. Nej ciali cev tes los xuas kiag Kuv kom nej thiajli paub, rauqhov dab tsis muaj nqaij tsis muaj txha li uas nej pom Kuv muaj no.”
40Thaum Yexus hais li ntawd, Nws txawm xyab hlo Nws txhais tes thiab txhais kotaw rau lawv saib.#24:40: Tej phau ntawv qub uas xuas tes sau, tsis muaj nqe 40. 41Lawv zoosiab kawg thiab xav tsis thoob li, tiamsis lawv tseem tsis tau ntseeg tiag; Yexus thiaj nug lawv hais tias, “Nyob ntawm no nej puas muaj dabtsi noj?” 42Lawv txawm muab ib daim nqaij ntses ci cev rau Yexus, 43ces Nws txawm txais mus noj tabmeeg lawv sawvdaws.
44Yexus hais rau lawv tias, “Tej no yog tej uas thaum Kuv tseem nrog nej nyob Kuv twb qhia tas rau nej lawm hais tias, txhua yam uas sau txog Kuv nyob rau hauv Mauxes tej Kevcai, hauv tej uas cov xibhwb cev Vajtswv lus tau sau tseg, thiab hauv phau Ntawv Nkauj, yeej yuavtsum tiav xwb.”
45Ces Yexus txawm qhib lawv lub siab kom lawv totaub Vajtswv tej Lus, 46thiab Nws hais rau lawv tias, “Twb muaj lus sau tseg li no lawm hais tias, tus Mexiyas yeej yuav raug kev tsimtxom thiab peb hnub tomqab ntawd, Nws yuav sawv hauv qhovtuag rovqab los, 47txoj kev tso tej kev txhaum tseg thiab kev zamtxim yuav raug qhia ntawm Nws lub npe mus rau txhua haivneeg, pib hauv lub nroog Yeluxalees mus. 48Nej yuavtsum ua timkhawv txog tej no rau sawvdaws paub. 49Kuv yeej yuav txib yam uas Kuv Txiv tau coglus tseg lawm los rau nej. Tiamsis nej yuavtsum nyob hauv lub nroog tos mus txog thaum uas nej tau txais lub hwjchim uas los saum ntuj los.” #Teshl 1:4
Yexus Mus Saum Ntuj
(Malakaus 16:19-20; Tes Haujlwm 1:9-11)
50Yexus txawm coj lawv tawm hauv lub nroog Yeluxalees mus rau ntawm lub zos Npethanis. Nws tau tsa tes foom koobhmoov rau lawv. 51Thaum Nws tabtom foom koobhmoov rau lawv ntawd, Vajtswv txawm coj Nws ncaim lawv mus rau saum ntuj lawm.#24:51: Tej phau ntawv qub uas xuas tes sau, tsis muaj mus rau saum ntuj lawm. #Teshl 1:9-11 52Ces lawv txawm pehawm Nws thiab rov mus rau hauv nroog Yeluxalees nrog txoj kev zoosiab kawg li. 53Lawv niajhnub mus nyob hauv lub Tuamtsev qhuas Vajtswv.
Šiuo metu pasirinkta:
Lukas 24: MWW2022
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022 United Bible Societies. All rights reserved.