Luka 24
24
Ovenyihiwa wa Yesu muukwani
(Matewuzhi 28.1-10; Maruku 16.1-8; Zhuwawu 20.1-10)
1Nlabo nowambeela na sumaana ebembe mbee ahiyana yahidhowaga onsiyeni. Yahithukulaga dhoonukwela dhasasanyedhigiisu. 2Yafwanyilege nibwe nigapigirisiwe vansiyeni. 3Egavolowilemo kayafwanyilegemo mwiili wa Nabwiya Yesu. 4Aliwa kayanonaga dhafunigiisu wiira, yahisimwelaga. Yuubuwelagave, yahikumelelaga alobwana abiili, dhoowara dheewa dhegi ozherimela. 5Ahiyana ale yahikannaga woova wuulubale. Yahiworomihedhaga kove vati. Alobwana ale yahawaaddelaga, wiira: <<Munamusayelela ddi mugumi vaari va anookwa? 6Oliye mu kalimo! Ohuvenyihiwa! Muubuwelele madhu yowogiliiyenaani mukalaga oGalileya. 7Yeeriliiye Mwaana a Muthu oneere opelekiwa mmadadani mwa athu oothega, akomeliwe vamuraddini, nlabo na neethaaru avenyihiwe>>. 8Vano yahuubuwelela madhu aaye.
9Egawelilewo onsiyeni yahisorihaga dhego dhaatedhene wa anamasuuza kumi ni mmohi ni wa ale aatene yaaligi ni aliwa. 10Ahiyana ala aaligi Mariya a oMagadala ni Zhuwana ni Mariya, maaye a Tiyago teto ni ahiyana amohi yaaligi ni aliwa, yahisorihaga dhego dhaatedhene wa arumiwi. 11Madhu ala yaali wona eebeweene, aliwa kayaarumeedhilege ahiyana ale. 12Mbwenye Peduru ahivenyaga othamagela onsiyeni, agafiyile ahiturumelagamo oonilege guwove baahi dha liinyu. Peduru ahiwelelaga vaade vaaye ootikiniheya mwaha wa dhende dheereyile.
Dhowiireya mundila ya Emawu
13Nlabo nimohive nenddo anamasuuza abiili yaharaga dila ya murudda mung'onong'ono weeriwa Emawu, olapelana wiwa waali makilomeeturu kumi ni nimohi, ofiya oZheruzalemi. 14Yegi othapanyedha, dhego dhaatedhene dheereyile. 15Ethapanyagave ndo, Yesu mwiinyeene ahawaaddamelaga, othaananaga ni aliwa. 16Meento eewa yahithiitheyaga, kayamudidelilege.
17Vano Yesu ahaawogagana, wiira: <<Yego ddi yuukathamihileni enathapanyedhiinyu mweeddaga?>> 18Aliwa wiimela ni okubanya namasuuza mmohi eeriwa Keleyopa ahaakulaga, eeraga: <<We oli muleddo oZheruzalemi wuno onatikina dhiireyile malabo alena evirile?>> 19Yesu ahaakohaga aliwa, wiira: <<Epadduwile ddi?>>
Vano yahimwaaddelagamo dhende dheereyile: <<Dhampadduwele Yesu muNazarethi. Oyene aali mulobwana namavuhulela, owodha mmabasani ni mmadhuni, vameentoni va Mulugu ni vameentoni va athu aatene. 20Vano wona apogo a anamakutha ni asogoleli eehu yahimpeleka wi akoniwe ni opiwa ni omukomela vamuraddini. 21Mbwenye hiyo noojejihedha wi aakale oliyeene oobole nlogo na Ezarayeli teto mwa dhaatedhene, ala malabo maraaru dhego nda dhipadduwiliiwa. 22Mbwenye teto ahiyana amohiwa yaali ni hiyo ehinitikiniha, voomaruwa njijiji noomaselo edhowaga onsiyeni. 23Vano kifwanyilemo muruthu wa Yesu, owelawo yiiraga: <Nihifwanyiwa maroho a angero, ayene esorihile wi Yesu mugumi>. 24Ebaribareene amohiwa a mwa hiyo yahidhowa onsiyeni, woona ebaribariya dhawogile ahiyana ale mbwenye kiyamoonile>>.
25Yesu ahiwoga, wiira: <<Nyo muli wona oolodhowa oonyemela mirima wi muroromele ni orumeedha dhiwogile anamavuhulela! 26Kamunonile wi yaali yoofuneya Kirixtu#24.26 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 46. oonihiwe goyi avolowe munthithimihoni naaye?>> 27Vevale ahambeela waatapulela dhilebiwe dha oliye mmalebani maatene wambeela maniivuru a Mozezi ofiyedha mmaniivuruni a anamavuhulela aatene.
28Yaaddamelaga murudda wadhowigiisu Yesu eeddaga wona onafuna akwaranye. 29Mbwenye aliwa yahiiraga: <<Kamukwaranye vowi ohuriba. Nduwa nihidhowa>>. Oliye ovolowa okala ni aliwa.
30Egakaraatile vameeza ahithukulaga mukaathe, ovahedha mahala, opadhula waagawela. 31Mowaaguva meento eewa yahifuguwaga omudidela wi di Yesu ahinaanelaga vameentoni veewa. 32Yegi owoga mmohi ni mukwaaye, yiiraga: <<Mirima dheehu kadhathamaga awogiiye mundila anitapulelaga Maleba, kaahi ndo?>> 33Mudhidhi mmohive olene yahimaruwaga owelela oZheruzalemi, waafwanya arumiwi kumi ni mmohi egatugumane ni amohiwa. 34Yiiraga: <<Ebaribareene Nabwiya ohuvenyihiwa ohukumelela wa Simawu>>. 35Vano alobwana abiili ale yahisorihaga dhawiireyele mundila, voomudidela ni voopadhula mukaathe ni waagawela.
Yesu onowooneyela wa anamasuuza aaye
(Matewuzhi 28.16-20; Maruku 16.14-18; Zhuwawu 20.19-23)
36Ewogagave dhego nda, Yesu ahikumelelaga vaari veewa, wiira: <<Murenddele okale ni nyo>>.
37Aliwa yahirurumuwaga ni woova yeesaga enoona ntowa. 38Oliye waakoha, wiira: <<Mukalele ddi owukuuwa ni waanganyedha mmirimani? 39Moone madada aaga ni manyalo aaga. Di miyeene. Mugaababele, mugoone. Vowi ntowa kannakalana mwiili, naari makuva, munagooneliinyu miyo gihikanna>>.
40Awogagave nda ahawoonihaga madada ni manyalo. 41Vano aliwa kayarumeedhile mwaha woohagalala ni otikina, Yesu ahiiraga: <<Muhukalanaavo yooja?>> 42Nuwindo, yahimvahaga epaddi ya somba yowoosa.#24.42 Dhoolebiwa ni madada dhijinji dhini: Nuwindo, yahimvahaga epaddi ya somba yowoosa ni nikandda na nuwi. Mbwenye anamasuuza ajinji enoobuwela wi ni nikandda na nuwi madhu ala kiyalebiwe ni Luka. 43Waakela oja vameentoni veewa.
44Nuwindo, wiira: <<Miyo ngalive ni nyo gahiwoga wi dhineere dhaakwanele dhaatedhene dhilebiwe dhodheela wa miyo mMalamuloni a Mozezi, mmaniivuruni a anamavuhulela ni mMasaalimuni>>.
45Vano Yesu ahaafugulaga moobuwelelo eewa wi yiiwelelemo Maleba Ootaleleya. 46Wawaaddela, wiira: <<Dhilebiwe sowi: Kirixtu oneere orabulihiwa ni ovenyihiwa muukwani nlabo na neethaaru. 47Wi mwa ndina naaye nlaleyeliwe, wi athu etthwaruwe mwa dhoothega dheewa, wi eleveleliwe. Nda dhineere dhilaleyeliwe milogo dhaatedhene wambeela oZheruzalemi. 48Nyo muli anamoona a dhego nda. 49Moone, miyo ginowuurumihedhani nroromeliho na aBaba, mukalegeve muluwani mwemuno ofiyedha muwarihiwe kopolo dhodheela odhulu>>.
Yesu onogwela odhulu
50Nuwindo, Yesu ahaasogolela okuma muluwani mule, odhowa oBetaniya. Ahaathukulelaga madada wareeliha. 51Aareelihagave yahimwalanaga, othukuliwa odhowaga odhulu.
52Egamweebedhile, yahiwelelaga oZheruzalemi ni ohagalala wuulubale. 53Yookalave nyuba ya Mulugu, emutamaalaga Mulugu.
Šiuo metu pasirinkta:
Luka 24: tke
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.