Matiu 8
8
Yeesus mua mia gigir maneka saliwak
(Mak 1.40-44, Luk 5.12-14)
1Aria Yeesus ema-pa ikok oreya yakeyak maneka o ookap ikiwemik. 2Ikim-ikaiwkin mua oko-ke ookap ekapok. Mua nain mia gigir maneka wiar ikua. Ekapemi Yeesus miir onoma-pa keema muuna mikami maakek, “Maneka, nena kookalep-na eliw efa saliweya mia eliwa arinen.” 3Naap maakeya wapena tiinep o tiimami maakek, “Eliw. No sariare!” Naap maem-ikaeya napuma nain ewursow wiar sariarek. 4Ne mua nain maakek, “Aria no ikiwemi-na mua oko me wia maake. Wi pris wiar ikiweya mia nefar pupuk.#8.4 Wi Yuuda-ke maemik, wi mia gigir maneka wiar ikua wi nain Mua Maneka mokoka-pa tumina saarik. Naapeya sariarem naep-na pris wiar ikiwinok naemik. Wi pris-ke pupep urufap “no sariaren” naikuan-na, Mua Maneka patirap eliw ikainon naemik. Ne Moses sira wuak nain wiar ookami Mua Maneka patireya nefa mauk, ‘O sariarek.’ Naap nefa mauk.”
Yeesus irakow woos mua uuwow mua wiar saliwak
(Luk 7.1-10)
5Aria Yeesus ikiwep Kapeneam-pa fuuneya irakow teeria woos mua-ke o wiar ekapep omawami maakek, 6“Maneka, yo uuwow mua-ko wapena, kepura wiar umeya koora-pa nan inep ikua, sirirowa maneka aawem-ikaiya.” 7Naap maeya maakek, “Eliw, yo-ko ikiwep urufinen.” 8Ne mua nain-ke maek, “Maneka, no unum maneka-ke, no koora efar ikiwowa nain yo mua eliwa wia. Naapeya feekeriw ikok oram oporiw maeya uuwow mua efar sariarinok. 9Sira-ke feenap ikua. Yo naap, yo yena iimarow mua tepak-pa wiar ikem, ne irakow teeria yo tepak-pa efar ikemik. Yo mua oko ikiwowa suuwamkun eliw ikiwep-puinon. Ne mua oko ekapowa suuwamkun ekapep-puinon. Ne yena uuwow mua uuwowa maakinen-na, eliw mauwinon.” 10Naap maeya opora nain wiar miimap kakaemi teeria maneka nain wia maakek, “Yo maken akena nia maakiyem, mua fain yo kekanowa maken akena-ke efar naiya. Ni Isrel mua kuisow feenap-ko me nia imenam, weetak akena. 11Ne opora fain pun makena nia maakiyem, miiw maneka fain ama urupowa ikip ama orowa, wi mua unowa ekapep Mua Maneka pika kemena-pa ni Isrel nembesir Abraham, Aisak ne Yekop wiamiya maa enimikuan. 12Nain ni Isrel mua-na, ni Mua Maneka pika kemena-pa ikowa nain weetak, sisina-pa ikowen. Ne ikoka Mua Maneka-ke nia iirareya epa kokoma-pa ikowen. Epa neeke ikok anane sirirowa aawowen, omemi enek muuna geegenem-ikowen.” 13Naap wia maakep-puami mua nain maakek, “Aakisa no eliw ikiwinan, maa mauwa maen nain naap akena nefar imenarinon.” Naap maakem-ikaeya uuwow mua nain sariarek.
Yeesus napuma wia saliwak
(Mak 1.29-34, Luk 4.38-41)
14Ne aria Yeesus iikirami Pita koora wiar ikiwok. Ikiwok-na Pita emeria onak mia keenep esimsa-pa inep ikaeya urufak. 15Ne wameiya ekap wapena-pa wiar tiimak. Tiimeya napuma nain wiar sariarek. Ne iikirap maa uupomak. 16Ne urerareya mua unowa sawur wia anirawap ikemik nain Yeesus wiar pekapemik. Ne os-ke opora maemi sawur wiar iiraremi napuma pun wia saliwomakek. 17Sira naap onak nain iiriw profet Aisaiya maek nain wiar pepek erak. Opora nain feenap,
Os-ke napuma yiar iiraremi mia sirirowa aawimik nain yiar saliwiya.” (Aisaiya 53.4)
Maa baliwep kema suuwap Yeesus ookowa-ke
(Luk 9.57-60)
18Aria yakeyak maneka ekapep Yeesus warikiwkin naap wia urufap ona teeria wia maakek, “Ni ewur eka okaiwi ekeka.” 19Eku naep onam-ikaiwkin sira amis mua-ke ekap maakek, “Somek mua, no epa kaaneke ikiwinan-na yos pun naap nookam-ikainen.” 20Naeya maakek, “Eliw maen, nain siow asia miiw ona-pa inimik ne nepa wiena unowa onap nan inimik. Ne yo Mua Muuka-ke inow epa marew.” 21Naap maeya ona teeria mua kuisow iikirami maakek, “Oo Maneka, yo nookowa nain yo ikiwep owowa-pa ikok ikoka yena auwa efar umeya soopap-puap nookinen.” 22Naeya maakek, “No yo yooke, wi umiwkin-na neeke wiam soopuk.”
Yeesus ewar maneka imenareya ifera yaruma arowak
(Mak 4.36-41, Luk 8.22-25)
23Aria Yeesus aasa ireya ona teeria pun iramik. 24Ne wi ekap eka gone-pa ariwkin ewar asia iikirami ifera kueya aasa eka taaneya bulunarekam naep onak. Ne Yeesus-na inep ikua. 25Naeya ekap ifimami maakemik, “Maneka sa, i fan mesenalimik ya, yia asipe!” 26Naap maakiwkin wia maakek, “Ni moram naep karanemi keker opiman, yo kekanowa me efar kema suuwiman.” Naap wia maakep iikirami ewar kakankeya ewar puemi eka malin inek. 27Ne wi naap urufap soranemi kema unu-unowa wuap wieniw aakunemi maemik, “Nee, mua fain mua kamenap nain-ke? Ewar ne ifera wia maakeya wiar miimap-puamik.”
Yeesus mua erup sawur wia iiraromak
(Mak 5.1-7, Luk 8.26-37)
28Ne aria wi ekap eka pona okaiwi Gadara miiwa naimik nan fuunemik. Fuunep aasa-pa orop miiwa ekamik. Ekap Yeesus mua erup wia urufak. Wiam erup nain matmat-pa ikok o urufap ookap ekamik. Wi nain sawur-ke wia anirawap ikaiwkin riirinem-miemik. Naapeya wi mua epa nain me soomarimik. 29Ne aria Yeesus farep maakemik, “Ei, Mua Maneka Muuka, mauwa yia onekam naep fan ekapon? No yia samorowa epa eewuar nefar ikua. Nain yia samorekam naep ekapon-i?” Naap maakemik. 30Aria lawisiw epasia-pa waa teeria maneka epa yeem-ikemik. 31Ne aria wi sawur nain-ke Yeesus omawami maakemik, “No yia iirarekam naep-na yia sesekeya ikip waa teeria nain mia-pa wiar ikaiyen.” 32Naap maakiwkin wia maakek, “Ni eenap ekeka.” Naeya wi orop ikiwemi waaya nain wia anirawamik. Naeya waa teeria nain karuw-iwami een fuura-pa oromi eka enep umurumemik. 33Aria wi waaya nepiow mua nain naap urufap baurarep owowa ikiwomakemik. Owowa ikiwep maa imenarek nain nanaremi Yeesus mua wiam erup wia saliwak nain pun wia nanaromamik. 34Ne wi owow mua naap miimap unowiya o urufowa ekapemik. Ekapep naap urufap Yeesus kame yiar piipuinok naep maakemik.
Šiuo metu pasirinkta:
Matiu 8: mhlNT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1998, Wycliffe Bible Translators, Inc. All rights reserved.