Matiu 2
2
Wi amis mua Yeesus imenarek nain urufowa ekapemik
1Aria epa nain Erot-ke#2.1 Erot Yuudia kame saria maneka-ke. Iir nain wi Yuudia Rom tepak-pa ikemik, ne Rom saria maneka Siisar naemik. Rom prowins unowa, ne prowins eena Yuudia ikua nain Siria naemik. Yuudia kame owow saria ikua. Ne Yeesus Yuudia-pa imenarek, Betlehem owowa-pa. Ne aria wi owow oko amis mua wiena owowa-pa ikok mokoma maneka urufap ookap Yerusalem ekapemik, wiena owowa ama urupow kame-pa ikua. Ekapemi wia nokaremik, 2“Ni Yuuda owow saria maneka niar ikowa nain muuk makena epa kaaneke ikua? I ekapemik nain mokoma ama urupow kame-pa wiar urufap ekapemik, o lotu onu naep,” naap maemik. 3Aria Erot opora nain miimap kema unu-unowa wuak. Ne wi Yerusalem pun opora muuta nain kema unu-unowa wuamik. 4Ne wi pris woos mua ne wi sira amis mua Erot-ke wia farep wia nokarek, “Krais epa kaaneke imenarinon?” 5Ne maakemik, “O Yuudia kame Betlehem-pa imenarinon. Moram opora nain iiriw profet oko-ke siisimep-pueya ikua. Nain feenap,
6‘Oo Betlehem, no Yuudia miiwa-pa ikon nain. Yuudia owowa unowa nos-ke owowa meta onaiya ikainan. Moram ikoka Isrel owow unowa fain saria maneka feeke niar imenarinon. Ne os-ke teeria maneka fain baliwep wia urufam-ikainon.’” (Maika 5.2)
7Aria Erot opora nain miimap wi amis mua ekapemik nain kokot wia fareya urupiwkin wia nokarek, “Ni iir kain mokoma imenareya urufaman? Baliwep efa maakeka.” Ne maakemik. 8Ne wi Betlehem wia sesekami wia maakek, “Ni iwami muuka nain baliwep akena akupeka. Akupap imenap-na yo opor amisa sesekomeka. Ne yos pun iir oko-pa iwap o unuma purupinen.”
9Aria wi amis mua nain opora wiar miimap-puami ikiwemik. Wi ikiwem-ikok mokoma iiriw urufamik nain kiiriw urufamik. Mokoma nain miimep iwam-ikaeya ookam-ikemik. Ne ikiwemi muuka ikua nan iimarep ikua. 10Mokoma naap urufap manek akena kemelamik. 11Ne iwap koora nan fuunep, koor kemena ikiwemik-na muuka nain ona onak Maria naap ikemik. Ne wi kemelap keema muuna mikami unuma purupemik. Ne maa eliwa feekiya pekapemik nain wasirkami o wuomamik. Maa eliwa nain feenap, gol, maa tana ikin eliwa ne foma ikin eliwa. 12Ne nan ikaiwkin Mua Maneka-ke inawera-pa feenap wia maakek, “Ni kirep ikiwemi-na Erot me wiar fuuneka.” Naeya era oko aawep iwamik.
13Ne aria wi kirep ikiwiwkin uura kuisow Mua Maneka ensel-ke Yosep inawera-pa maakek, “No muuka ona onak onaiya aawep ikoka kuisow baurarep ikiwep Isip-pa neeke ikeka. Erot muuka nain ifakimekam naep akupinon. Neek ikaiwkin yena nia maakemkun-na kiiriw nainiw ekapeka.” 14Naap maakeya Yosep iikirap uura kuisow Maria ona muuka naap wia aawep baurarep Isip ikiwemik. 15Wi ikiwep neeke ikaiwkin Erot umeya kiiriw nainiw ekapiyen maemik. Wi Isip ikiwemik nain iiriw profet oko opor kokosa feenap maek,
“Yo muuka faremkun Isip piipuap kiiriw nainiw ekapinon.” (Hosea 11.1)
Wi naap onamik nain opora nain makena arowamik.
Erot Betlehem muuka wia ifakimomakek
16Aria Erot aakisa fan opora miimap maek, “Wi efa peeskimemik, aa.” Neemi samor akena kema bagiwirak. Ne mua wia sesekeya iwap Betlehem ikua kame nan owow-owowa wiar ikiwemik. Ikiwemi muuk gia ne muuka mokoma kuisow ikip erup, teeria nain akena wia ifakimurumemik. Iiriw wi amis mua wia nokareya wi mokoma iir kain urufamik nain maakemik, epa nain tuunap kakeniw nan wia ifakimemik. 17Naeya opora iiriw profet Yeremaiya maek nain makena wiar arek. 18Feenap maek,
“Wi Rama-pa omow opariya omomiwkin wiar miimamik. Nain Resel-ke ona muuka wia omawam-ikua. Kema opamik-na wia. Moram o muuka unowa iiwawun wiar fufuraremik.” (Yenesis 35.19, Yeremaiya 31.15)
Yosep teeria owowa kiiriw ekapemik
19Aria naap ikok Erot umeya Mua Maneka ensel-ke Yosep inawera-pa maakek, 20“Muuka nefar ifakimu naep onamik nain iiriw umemik. Naapeya no aakisa maa unowa opap muuka onak ikos wia aawep kirep Isrel ikiweka.” 21Naap maakeya iikirami muuka onak ikos wia aawemi Isrel ikiwemik. 22Wi ikim-ikok meta miimamik, Akelaus-ke wiawi Erot epa wiar aawep Yuudia kame urufam-ikaiya. Naap miimap Yosep neeke ikiwowa keker opak. Ne uura Mua Maneka-ke inawera-pa maakeya Yuudia me ikiwu naep kakeniw Galili kame ikiwemik. 23Ikiwep owowa Nasaret naimik nan pokamik. Naapeya wi profet iiriw opora muuka nain maemik nain makena wiar arek. Opora feenap maemik, “O Nasaret mua-ke naikuan.”
Šiuo metu pasirinkta:
Matiu 2: mhlNT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1998, Wycliffe Bible Translators, Inc. All rights reserved.