San Mateo 16
16
Fxariseo vxite' saduceowe'sx cieluju kĩhçxáawa kaavxya'ja'khaahni
(Mr 8.11-13; Lk 12.54-56)
1Fxariseowe'sx vxite' saduceowe'sxwa pa'jçxa', Jesus ewmée yũutewa kpajkxya' sũhçxa pẽjxtxi:
—Cieluju kĩhçxáawa mkaavxya'ja'j jĩna.
2Nawa Jesus pasçxa' na'jĩk:
—Kusna sek khẽjeçte', kuskusa' sekuuna, ew kusuça' jĩ'i'kwe. 3Sa' kusíi we'weçxa', ãçxha' en ewmée yuuna, tãaphçxáa ũsa' jĩ'i'kwe. Yuwejuçxáa ew we'weçxa', ũuste yu' ewmeeçxáa yaakxsa, en ma'wẽ yũuwa'ja'swa jiyu'i'kwe i'kwe'sxa'. Nawa naa ensu na'wẽ seena'sa vxyaaça' txãa yu'sa' jiyuya' ãja'çmeei'kwe kĩh yũuya' txã'wẽ yũuçtewa. 4Naa nasa ewmeesa' cieluju seena'sa's kaavxya'ja'j jxthãasu'tx. Nawa peena yu' kaavxya'ja'jmeete ewna, naasáa Jonasa' ma'wẽga yuu txã'sçxáana ya'pta'sxina jĩna we'weçxaçxáa nvxihtçxa u'kh.
Fxariseowe'sx kaapiya'jni's lewadura yakh kaaja'da'jni
(Mr 8.14-21)
5Jesus yakh u'jusawe'sxa' ĩkhwala kuten u'jweççxawa, peçxkanaçxa pan yu' jxũmeeta u'j. 6Kxtee pa'jçxa', Jesusa' na'wẽk we'we:
—Mpa'yajkxwe, fxariseo vxite' saduceowe'sx lewadura ewmeesa's jĩte', 7txãawe'sxa' na'wẽtx puutx paapẽyi':
—Pan jxũmeetha'w aça' kxahne' txã'wẽ we'we' jĩ'tx.
8Txã'wẽ we'weni's Jesus jiyuçxa' na'jĩk:
—¿Maa sũhçxakwe pan ji'phmeetha'w jĩna we'wé'? Pan ji'phmeetewa, Dxusa' thẽymée sã'jĩna sũhwa'j yu'sa' ji'phmeewá'kwe. 9Adxa' na'wẽ tahç pan yakhçxáa cinko mil nasatx thẽyméeth sã'jĩ aça' kijxaasa's maz kanasta pkhakhçxawa txã'sa' yaakiçmeewá'kwe. 10Vxite ente' txã'wẽy siete pan yakhçxáa kuatro mil nasatx thẽymeeth sã'jĩ aça' kijxaasa's maz kanasta pkhakhçxawa yaakiçmeewá'kwe. 11I'kwe'sxa' jiyumeewá'kwe adxa' pana's we'weçxa txã'wẽ mpa'yajkxwe fxariseo vxite' saduceowe'sx lewadura ewmeesa's jĩ'çmeeth.
12Txajũ' jiyutx Jesusa' txã'wẽ pante ka'dnisa lewadura's we'wemée, fxariseo vxite' saduceowe'sx kaapiya'jni's we'weçxa txã'jĩni's.
Pedro' jiyuk Jesusa' Dxus tasxu yuusaatewa
(Mr 8.27-30; Lk 9.18-21)
13Jxkaahsa Fxilipo vxitni çxhab Cesarea ja'dasu pa'jçxa', Jesusa' na'jĩnak pẽjx txãa yakh u'jusawe'sxtxi:
—Dxus Nçxi'k Nasa Yuusa's ¿kimna jĩnata we'we' nasa'? jĩte', 14na'wẽtx pta'sx:
—Maaíi yu' Juan Bautistana jĩ'tx. Vxite we'wesa' Eliasna jĩ'tx. Aça' vxite we'wesa' Jeremiasna meeçxa' vxite kasehne' Dxus yuwe pta'sxsa jĩ'tx jĩna pta'sxte', 15Jesus pẽjxçxa':
—I'kwe'sxa' ¿kimna jĩ'kwe? jĩte', 16Simon Pedro' na'wẽk pas:
—Idxa' Dxus ĩtxisa Nçxi'kgu, txajx tasxu yuusa jĩte', 17Jesusa' pasku na'jĩna:
—Jonas nçxi'k Simon, idx yakha' wala weçxa yuja'. Idxa's naa kiwete piçthẽ'j kaajiyu'jmeeta'. Adx Tata cielute ũssa yuuk kaajiyu'j adxa' Dxus ĩtxisa Nçxi'ktewa. 18Idxa' Pedro yaaseg aça' idxwa ma'wẽga adxa's ew jiyu txã'wẽy maawa ew jiyuwa'ja's idx yakh nvxiitu'nja. Aça' txã'wẽ ew jiyunijũ' eçxthẽ'j yuhwa knaymeena Dxus luuçxtxi'. 19Dxus jxkaahna ũsnite pa'jwa'j dxi'ja's phadewa'ja's idxa's ũsu'nja, aça' idxa' maatxwa we'weçxa': Pkaltxi' Dxusa' peltunaĩna jĩte', peltunãyni yũutxna. Nawa peltunaĩmeena jĩte', peltunãynimée neeyũutxna jĩk.
20Txajũ' Pedrowe'sxtxi neewe'wek, Jesusa' Dxus tasxu yuusa yuh yu'ga jĩna maa yuhtxwa pta'sxkahmén.
Jesusa' txajx uuwa'ja's pta'sxni
(Mr 8.31–9.1; Lk 9.22-27)
21Txãa entek Jesusa' nyafxçxah pta'sx txãa yakh u'jusawe'sxtxi na'jĩna:
—Jerusalenna u'jwa'j ji'pthu. Kxteea' wala pkxuuni yu'nja judiu nthẽ'jsawe'sx vxite' sacerdote npiiçthẽ'jwe'sx vxite' Dxus leya's kaapiya'jsa txãawe'sx kusete. Txãawe'sxa' ikhetxna, nawa tekh ente' ki' ĩtxi yu'nja jĩna pta'sxte', 22Pedro' Jesusa's fxiite pe'jna u'jçxa na'wẽk yu'kxpeh:
—Idxa's txã'wẽ yũuwa'j yu'sa' Dxusa' jxthãasmeewaça', ewna jĩte', 23Jesusa' yu'thegçxa na'wẽk we'we Pedro's:
—Eçxthẽ'j, adx tasxuh mtxutée. Idxa' suw wẽenaçxáa ũsgu. Dxus jxthãasni yu'sa' kxtey yuumée, naa kiwega nasaa yaakxniçxá'sgu kxtey yuu wẽje'.
24Txajũ' Jesusa' txãa yakh u'jusawe'sxtxi ki' we'wek:
—Maawa adx yakh yuu wẽeçxa', peekx kakwe jxthãasni's kĩhnawa jxuka nvxihtçxa yuuçxáa adx yakh yujxa' ãjane'kwe, makwe pxthaa yuuwa'j seena'sa ma'k yuu nawa txã'sa' ũukhmée. 25Txã'wẽme', naa kiwete peekx ĩtxi fxi'zewa'jçxá's ya'nwe'wesa', Dxus yakh fxi'zewa'j yu'sa' ivxiituna. Nawa adx yakh fxi'zepa'gaçxáa naa kiwete ĩtxi fxi'zeni's yajkxmée ivxiitusa', Dxus yakh fxi'zewa'j yu'sa' ivxiitumeena.
26Makwe naa kiwetewe'sx yu'sa' jxuka knayçxawa peekx ũus yu's ivxiitute', ¿kĩhteçxá' selpiima'k? Peekx ũusa's ivxiituyã'the', ¿kimçxa' nwe'wema'k? 27Jxpa'yakxmeete', Dxus Nçxi'k Nasa Yuusa' ki' kĩijana Ney eena' kweethni pxãhte txajx angeleswe'sx yakh, aça' ma'wẽçxah yũusaaçxawa teeçxsa na'wẽçxah jxpa'gatxna. 28Isath we'we', ayte ũssa maaíi yu' nee uumey uyuune'kwe txã'wẽ Dxus Nçxi'k Nasa Yuusa' jxkaajxa' pa'jni's jĩnak pta'sx.
Šiuo metu pasirinkta:
San Mateo 16: pbbNNT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1984, Wycliffe Bible Translators, Inc. All rights reserved.