मर्कूस 1
1
बप्तिस्मा तेरुप यूहन्नाकी लाम टडिक क्यावु
(मत्ती ३:१-१२; लूका ३:१-१८; यूहन्ना १:१९-२८)
1कोन्छ्योककी सेवु येशू ख्रीष्टकी लेन ल्यामु ति दुक क्यानी गो चुसुङ। 2कोन्छ्योककी लुङ्तेम्बा यशैयाकी टिवु कोन्छ्योककी सुङ नाङ्ला,
“ल्होसा, ङ ङे लेन क्योलुप मीला ख्योरे गोमाला तोङ्यिनो।
तीकी ख्योरे लाम टडिक किवितो।
3दासा पाङ्थेरीला दुक सिनी च्यार देन्दुप वोरु ग्येकितो,
‘चोवो फेपुप लाम टडिक की।
खो फेपुप लाम थेकाङ जो।’”#मलाकी ३:१; यशैया ४०:३
4तमा बप्तिस्मा तेरुप यूहन्नाकी दासा पाङ्थेरीला वानी मीतिवाला दिक्पा ने थर्वा ङ्येतुपकी थोक्ला दिक्पा ने सेम ग्युरुप बप्तिस्माकी कोर्ला ख्याप्टाक क्यासुङ। 5तमा यहूदिया लुङ्बा ताङ यरूशलेमकी मीतिवा तेरी तीकी चाला गल्नी खोरो दिक्पा क्यावु यिन सिनी ती नेसुर यर्दन चङ्बुला बप्तिस्मा लासुङ। 6यूहन्नाकी ति सेम्ज्येन वोङ्मी पु नेसुर जोवु मज्या कोन्नोक, तीकी केल्दाङला ति क्वाकी करा च्यिङ्गिनोक, तमा च्युच्यु पे ताङ टाराङ सेनोक। 7तमा तीकी दुक सिनी ख्याप्टाक क्यासुङ, “ङ सिनाङ ओङ छ्ये वोतुप ति ङे तिङ्ला फेप्कितो। ङ याङ कुक क्यानी खोकी शप्चेकी र्हाम्डोक डोलुप साङ पोमु मेङ्गिवी। 8ङे ख्यिराङला छ्यु थ्वोनी बप्तिस्मा बिनिन, यिने खोकी ख्यिराङला कोन्छ्योककी थु चाङ्मा नेसुर बप्तिस्मा नङ्गितो।”
येशूकी बप्तिस्मा लावु
(मत्ती ३:१३–४:११; लूका ३:२१-२२; ४:१-१३)
9ती पेला येशू गालीलकी नासरत ने फेप्नी यर्दन चङ्बुला यूहन्ना नेसुर बप्तिस्मा लासुङ। 10येशू छ्यी नाङ ने पाङ्ला थेन्दुप पेला शार्क्येक देवाच्येन सेङ्गुप ताङ कोन्छ्योककी थु चाङ्मा गम्देर दोके क्यानी खोरो खला पापुप ति खोकी थोङ्सुङ। 11तमा देवाच्येन नेमा दुका वोरु यी ग्यप्सुङ, “ख्युरुङ ङे ङ्यिङ्ज्येवु पुज्युङ यिन। ङ ख्योरो मुला छासे गा वे।”
शैतानकी येशूला खोक्पा ल्हावु
12तमा शार्क्येक कोन्छ्योककी थु चाङ्माकी येशूला दासा पाङ्थेरीला ताङ्सुङ। 13येशू ङ्यिमा खल ङ्यी सेक ते ज्युसुङ। तमा शैतानकी खोला खोक्पा ल्हासुङ। खो रितकतिवी मुला ज्युसुङ। ती पेला देवाच्येनकी लेन क्योलुप थुतिवी खोला शब्ज्यी पुल्सुङ।
येशूकी लेन ल्यामु ख्याप्टाक क्या नङ्गुप
(मत्ती ४:१२-२२; लूका ४:१४-१५; ५:१-११)
14यूहन्ना चोन्खाङला शोर्सिमा येशू गालील लुङ्बाला फेप्नी कोन्छ्योककी लेन ल्यामु ख्याप्टाक क्या नाङ्सुङ। 15खोकी मीतिवाला सुङ्सुङ, “कोन्छ्योककी तुजे छे सिन वे, खोकी ग्येल्खाप चिप्ला वा वे। ख्यिराङ दिक्पा ने सेम ग्युर्नी खोकी लेन ल्यामुला तेपा की।”
येशूकी थल्माला लोमा मिरा ज्यीला पेतुप
16ङ्यिम्ज्यिक येशू गालीलकी ग्येम्छो गारी ने फेप्सालेन्सिन सिमोन ताङ तीकी नुप अन्द्रियास ति ग्येम्छोला ङ्या जिम्बुपला जाल क्युरिन वोतुप थोङ्सुङ, च्यिलासिसिन तिवा ति ङ्या जिम्बुप मी यिनोक। 17तमा येशूकी तिवाला “ङे तिङ्ला तिङ्यो। ङ ख्यिराङला ङ्या जिम्बुप मिन, मीतिवा जिम्बुप मी जोयिनो।” सिनी सुङ्सुङ। 18ती थोसिमा तिवा शार्क्येक ङ्या जिम्बुप जालतिवा क्युर ज्याक्नी येशूकी तिङ्ला तिङ्यासुङ।
19तेसुर येशू फेचेक फेपुप पेला जब्दियाकी पुज्युङ याकूब ताङ तीकी नुप यूहन्ना ति टी नाङ्ला देनी जाल ल्हेन्दा ग्यकिन वोतुप थोङ्नी 20खोकी शार्क्येक तिवाला कताङ्सुङ। तमा तिवा खोप्रे पपा जब्दियाला ति लावातिवी मुला टुला क्युर ज्याक्नी शार्क्येक येशूकी तिङ्ला तिङ्यासुङ।
येशूकी डे ग्यपुप मीला टेक च्यितुप
(लूका ४:३१-३७)
21येशू खोरो लोमातिवी मुला कफर्नहुम ग्येसाला फेप्सुङ। तमा ङासोप ङ्यिमाला खो यहूदी छ्योखाङला फेप्नी मीतिवाला येन्देन नाङ्सुङ। 22खोकी येन्देन थोनी ते वोतुप मीतिवा हलेवा क्यासुङ, च्यिलासिसिन खोकी येन्देन ति यहूदी छ्योकी गेकेनतिवी क्यावु दोके मिन, यिने खोरे ओङ्ज्येन नेमा राङ नाङ्नोक। 23ती पेला यहूदी छ्योखाङ नाङ्ला डेकी कुलुप मी यी नोक। तीकी ति च्यार देनिन सिरा सिक्यासुङ, 24“ओ नासरतकी येशू, ख्युरुङ ङ्यिराङला काङ कितुप छोलुप यिन? काङ ख्युरुङ ङ्यिराङला ना तोङ्गुपला फेवु यिन? ख्युरुङ सु यिन सिनी ङला छ्या वे, ख्युरुङ कोन्छ्योककी तङ्गुप मी टेङ्बु यिन।” 25तमा येशूकी ती डेला वोरु तेन्नी सुङ्सुङ, “ख्युरुङ खरक्पा देनी ती मी नाङ नेसुर थेन ग्युक!” 26खोकी तुक सुङ्लुङ्मे ती डे ति ती मीला छासे र्हुक च्यिनी च्यार ग्येर्पु यी देनिन सिरा पाङ्ला थेन गाल। 27ती थोङ्सिमा मी तेरी हलेवा लानी, “ओए! दी काङ यिन? दी याङ ओङ छ्येवु येन्देन सम्बा के नोक। दी मी तीकी खोरो ओङ्ज्येन नेमा डेतिवाला क नङ्सिमा तिवी ती कला ङ्येन्गिनोक।” सिनी सिक्यासुङ। 28तमा येशूकी क्या नङ्गुप लाकाकी लेन ति शार्क्येक गालील लुङ्बाकी छो ज्यीला टाम्सुङ।
येशूकी मी बङीला टेक च्यितुप
(मत्ती ८:१४-१७; लूका ४:३८-४१)
29तमा येशू यहूदी छ्योखाङ नेसुर थेन्नी शार्क्येक याकूब ताङ यूहन्ना मुला सिमोन ताङ अन्द्रियासकी खाङ्बा फेप्सुङ। 30ती पेला सिमोनकी यिवी ति छा ग्यप्नी ङ्यिलोक्नोक। तमा तिवी तीकी कोर्ला येशूला सिक्यासुङ। 31दी थोसिमा येशू तीकी चाला फेप्नी तीकी लाक्पाला जिम्नी येर लाङ्सुङ। लाङ्सिमा तीकी छा टेक्नी तीकी खोतिवाला शब्ज्यी पुल्सुङ।
32ती गोमु ङ्यिमा गासिमा मीतिवी नेर्पु ताङ डे ग्यपुप मीतिवाला येशूकी चाला टि लेसुङ। 33तमा ग्येसाकी मी तेरी खो ज्युवु खाङ्बी गे चाला जोम्सुङ। 34येशूकी नेजु नम्बा बङी वोतुप नेर्पुतिवाला टेक च्यिसुङ। तमा खोकी मीतिवी नाङ नेमा डेतिवा बङी तेन्सुङ। यिने येशूकी डेतिवाला ताम्ङे लप माच्यी, च्यिलासिसिन येशू सु यिन सिरुप ति तिवाला छ्या नोक।
येशूकी कुसुमी दासाला मोपोर क्या नङ्गुप
(लूका ४:४२-४४)
35तेसुर येशू टोपला टेताङ लानी कुसुमी दासाला फेप्नी ते राङ मोपोर क्यासुङ। 36ती पेला सिमोन ताङ तीकी मुला वोतुपतिवा येशूला छोलिन नोक। 37तिवी येशूला ठेसिमा, “मी तेरीकी गेकेनला छोलिन नोक।” सिनी सिक्यासुङ। 38येशूकी तिवाला सुङ्सुङ, “दाक्पु चाला वोतुप यम्बा युल युलला डोप। ते साङ ङ ख्याप्टाक कितिन, च्यिलासिसिन ङ दी लाका कितुप थोक्ला राङ वावु यिन।” 39तेसुर खो तेरी गालील लुङ्बा ताङ यहूदी छ्योखाङतिवाला फेप्नी ख्याप्टाक कितुप ताङ डेतिवाला तेन्सुङ।
येशूकी जे ग्यपुप मीला टेक च्यितुप
(मत्ती ८:१-४; लूका ५:१२-१६)
40ती पेला जे ग्यपुप मी मिरा च्यिक येशूकी चाला वानी पुमुङ सला चुनी दुक सिनी गोङ्बा शुसुङ, “गेकेनकी नो वोसिन ङला टेक ज्यि थुप्किवी।” 41तमा खोकी तीला ङ्यिङ्ज्ये लानी छ्याक क्याङ्नी तीला रेक्नी दुक सुङ्सुङ, “ङला नो वे, ख्युरुङ टेक्शी।” 42खोकी तुक सुङ्लुङ्मे ती मी ति जे ग्यपुप नेजु नेसुर टेक्सुङ। 43तमा येशूकी तीला क छ्येम्बु नाङ्नी दुक सिनी ताङ्सुङ, 44“ल्होसा, सुला साङ काङ ताम्ङे मालाप। त गल्नी ख्योरो जु कोङ्यारला छ्या तेन, तमा ख्योरे जु टेकुप कोर्ला मोशाकी क बिन्दुप दोके जिन्बा पुल्नी मीतिवाला पङ्बु बिन।” 45यिने ती मी ति पाङ्ला गल्नी ती तेरी ताम्ङे टाम्सुङ। तुक क्यानी येशू मी मिङ्गाला ग्येसाला फेप माथुप्नी कुसुमी दासाला ज्युसुङ। यिन्सिनाङ मीतिवा छो ज्यी नेसुर खोकी चाला लेसुङ।
Šiuo metu pasirinkta:
मर्कूस 1: xsrNT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2014, Wycliffe Bible Translators, Inc. All rights reserved.