Populiarios Biblijos eilutės iš Mbete Matiye 6

Dalintis

Dale í poŋ mun woiri hi̧ Ŋgerzah ɓá lak mbay tulu, í hi̧ mun woiri ɓá tu Ŋgerzah ɓa záh woiri dara mí fe a ɓoruri-aw le, ke ndár hi̧ wuri ɓáy.

Kaŋaw mí í hi̧ kerɓay ɓá tehre law woiri tul nam a pele ya. Fe zɔklɔ nam a pele na ɓay pele. Fe zɔklɔ nam a suŋ suŋ na ɓay namu-aw.

Sa̧wu mí-i ƴo ɓah hi̧ wuri ɓahri se, í hi̧ law woiri ɓá tehre ya, ɓa ra kerɓay fe su̧na, ɓa ra kerɓay gar ndohna. Uwa, nzuk pirmatul mba tul fe su̧na mba-mba, mun nzuk mba tul gar ndohna mba-mba, kaŋ ya le ?

A wo ba, gelke mu ƴo ɓah ɓay ziŋ Ŋgerzah le, mú mu̧h mun wo ké ti̧w gel, mú tuh nzakful ɓu tul wo, mí mú ɓah ɓay ziŋ bah wo ké ƴo gel a mu̧h-u ra dale, bah wo ké ƴo ko mu ké gel a mu̧h-u ra ɓay hi̧ suki ye ɓá gi ziŋ mu.

Mí í ɓah ɓay ziŋ ni kandɔkay : Bah wah ké nunmbam, riŋ ɗina wo mbew yaŋ ɓá mgbe ké nzak nzukri ɓahri, mu ɓa záh woyri. Lák mbay wo ɓá ya̧ gel. Fe ké mu yih laɓu ɓá ti̧h ké tusiɓa kandɔk a nunmbam.

Mú hi̧ na fe su̧na a namu-aw, náh su̧ guri.

Mú lu salɓay suya ké mgba tul wah kandɔk a wah, nah sel nzukri ké laɓ na suya.

Le mú hi̧ fe-leh law ɓá ziŋ na ya. Wara le mú sel na ɓil ndɔk záh law a pipiri-u.

Gelke i sel nzukri ké laɓ wuri suya le, bah woiri a nunmbam ɓay lu salɓay suya ké tul woiri.

Í ko gundoyri. Gundoyri ruh fe ya, vbeh fe pay ya, mbu̧h fe payri ku̧ pul ya. Bah woiri a nunmbam ƴo hɔl gundoyri-aw. A woiri ba, i mba tul gundoyri mba-mba, kaŋ ya le ?

Í mbu̧h fe ziŋna woiri ké tusiɓa ya. Tusiɓa ra ɓa gel ké si̧niri ƴo ɓeɓ fe ké ri, fe a ɓoruri ba, ƴo ko gay. Riɓari ƴo haw nzak vul si rih feri ɓilu pi. Mí í ka̧y fe ziŋna woiri tul hani ké nunmbam. Ké nunmbam ra ndereri nde fe ké ri ya, feri ko gay ké ri ya, riɓari haw nzak vul fa̧h fe ké ri ya. Gel a a̧y ké fe ziŋna wo ku̧ ri ra, sa gelaw mí law wo te sa sari.

Mgbal ké hi̧ tul ye hi̧ bahgaŋri seɗe ta-a. Mgbal ra ɓay fu̧y nzuk a mbewu, ke él sa nzuk a ɓoru. Ke ɓay ƴo ke nzuk a mbewu ke law mbew, bahgaŋ a ɓoru ba, ke él kpȩhr ni. Kandɔkaw mí mahful ɓay mú mbu̧h fe ziŋna tukala ke Ŋgerzah ta-a.

A ké gay feri ɓil kpah ké Ŋgerzah ndoh funa ɓa gar ndohna, pele le, hɔrɔ se ra wa, ani ɓáy mí ke a woiri le ? I mba tul fe-uri mba-mba, kaŋ ya le ? Uwa, a woiri nzukri ké law woiri kehr seɗe.

A wo ba, gelke mu laɓ law in ziŋ nzuk sehri le, mú hi̧ ndɔk kperu wo ɓá tu fe ké ndɔk lakna laɓ ra ya ɓay hi̧ ɓo law in ké mu laɓ ra ɓá laɓ ké gel a mu̧h-u dale, bah wo ké ƴo ko suki ké mu laɓ ké gel a mu̧h-u ra ɓay el hi̧ mu ɓáy.

Í ru̧ ke mun woiri rɔkɔ í laɓ suki ke riŋ Ŋgerzah ké nun nzukri ɓay hi̧ riŋ woiri ɓá mgbe. I laɓ ɓay hi̧ nzukri ɓá ko fe laɓna suki woiri le, i ta ziŋ kpaŋndɔk ké ta̧w bah woiri ké nunmbam ra ya.

Í ru̧ ke mun woiri rɔkɔ í saŋ mbih kandɔk nzuk-mu̧h ketinari. Ku haw nzakpol woyri. Ku ŋga̧h nun woyri hi̧ nzukri ɓá ko saŋmbih woyri. Ɓa ketina, mi ƴo ɓah ɓayay hi̧ wuri, kpaŋndɔk woyri le ku ziŋ keɗ da. A wo ba, nam ké mu saŋ mbih le, mú wɔk nun wo, mú nu̧h num tul wo ɓa suki rɔkɔ nzukri ɓá tu saŋmbih wo. Dale bah wo ké mu̧h mun ye ké nun nzukri ra ƴo ko fe ké mu laɓ ké gel a mu̧h-u, mí ke ɓay hi̧ suki ye ɓá gi ziŋ mu.